رواية مغامرات عائليه الفصل السادس والعشرون 26 الجزء الثاني 2 بقلم أماني السيد
.jpg)
رواية مغامرات عائليه الفصل السادس والعشرون 26 الجزء الثاني 2
بارت 26
دينا : و لما جدو يشوف العلبة دي و يعرف انك صاحبتها هيقول ايه ؟ بنت مراهقة تعرف الدوا ده منين ؟ هتبقى موضع شك مش كدة ؟
لارا بخوف : انا مليش دعوة .. و مهما حاولتي تلزقيها بيا مش هتعرفي
دينا : كل ما هتزودي عنادك ده هتخليني اصمم ان جدو يعرف … و طبعا لو حبيت اتحربق اكتر هروح اقول لباباكي و انتي عارفة اونكل ايهاب مش هيرحمك
فتحت حلا الباب بعنف و قالت : في ايه كل ده ؟! دلوقتي حالا تقولولي ايه الي بيحصل هنا
دينا : من فضلك يا حلا ملكيش دعوة بالحكاية دي
حلا : لا و النبي ؟! ليه قولتولنا نجتمع طيب ؟
دلفت فريدة و البنات
فريدة : انا هقولك ايه الي حصل …
اخبرتهم و بعد ان انهت كلامها التفتت الى حبيبة و قالت : اديهم الدوا يشوفوه
لارا بغضب : انتي ايه الي حشرك ؟ و بعدين البتاع ده مش ليا افهمو بقا
امسكت حلا العلبة و تفحصتها بنظرات حادة
حلا : ايه الدوا ده اصلا ؟
فريدة : معقولة مش عارفة ؟! اقري المكتوب
حلا : يا بت انا الانجليزي بتاعي على قدي .. قولي و خلصينا ايه ده ؟!
فريدة ببرود : ده منشط موضعي قوي جدا بيستخدموه المتجوزين الي عندهم مشاكل
حلا بضحك : لا يشيخة ؟! و انتي عرفتي الكلام ده منين ؟!
فريدة بحدة : اتلمي … نسيتي انا خريجة ايه ؟! الادوية لعبتي يا بت
غادة : ممكن تقفلو اليسيرة دي ؟؟ الكلام بالموضوع ده عيب اصلا .. في بنات صغيرة هنا
حلا : و الله اختك الي بنقول عليها صغيرة طلعت داهية و بتعرف حاجات انا شخصيا معرفهاش
فريدة بتحذير : لارا … العلبة دي ليكي ؟!
لارا بتوتر : قولت مليش دعوة بيها
فريدة : متأكدة ؟! اصل انا يعني عارفة هي بتتجاب منين
لارا بخوف : انتو عايزين مني ايه ؟!
فريدة : عايزين نعرف بنت في سنك شايلة دوا زي ده ليه ؟! واضح انك جايباه من فترة كويسة … اصل يعني الايام الي فاتت كنا كلنا مع بعض و ما خرجتيش لوحدك ابدا
لارا بغضب : انتي ازاي بتكلمني كدة ؟! انتي اتجننتي ؟!
دينا : و ايه التفسير لوجوده معاكي ؟! امتى لحقتي تحطيه باوضتي ؟!
حاولت لارا الخروج و لكن حلا دفعتها لتعود الى مكانها
حلا بجنون : انتي ايه ؟! ها ؟ قوليلي انتي مخلوقة من ايه ؟؟! … مش مكفيكي المصايب الي عملتيها زمان ؟!! مش عايزة تتلمي ؟
لارا بخوف : حلا .. انا .. ما اتكلمتش عليكي .. سيبيني اخرج
حلا بسخرية : اسيبك تخرجي ؟! و ننسى الموضوع عادي كأن شيئا لم يكن … انتي عملتي ايه اصلا ؟! ده هزار خفيف كدة كان ممكن دينا تتفضح بسببه مش اكتر .. عادي ليه الافورة ؟! .. مش ده الي عايزاه ؟!
غادة : بالراحة يا حلا مش كدة هتتحل المشكلة
حلا بغضب : ما اسلوبكم ده هو الي خلاها ما تحسبش حساب لحد .. الطبطبة دي هيا السبب بكل مصايبها .. لازم تاكل علقة جديدة عشان تتربى
لارا بغضب : لو مديتي ايدك عليا اقسم بالله همد ايديا و رجليا و امرمطك هنا
دينا بحدة : ليكي عين تتكلمي كمان ؟!
لارا : اقولك على حاجة عشان تستريحي ؟ اه العلبة دي انا الي حطيتها باوضتك و انا الي قولت لماما عليكي عشان عارفة انها مش هتسكت … و مستعدة اعمل اكتر من كدة كمان
دينا بصدمة : يخربيتك … ايه البجاحة دي ؟!
لارا : سميها زي ما انتي عايزة … بس بالاخر انا جبت حقي .. عشان تعرفي ان الي يدوسلي على طرف هدوس عليه بجزمتي
دينا بابتسامة : تمام .. بس دلوقتي الطربيزة اتقلبت يا اغبى اخواتك .. باباكي هيعرف اول واحد و وريني بقى لو سابك عايشة … و لسا عندك فارس لو قولتله تفتكري هيعمل ايه ؟!
لارا بغضب : و لا يفرق معايا .. مش هخاف منك
تركتهم و خرجت و صفعت الباب خلفها
كارما باستغراب : ايه الي يخلي لارا تعمل كدة ؟! كل ده عشان اتريقتو عليها ؟!
دينا : طبعا .. بس هيا كانت مستقصداني من قبل ما ده يحصل .. انا هوريها بنت الكلب
غادة بغضب : دينا احترمي نفسك و ما تشتميش .. بعدين الاسلوب ده مش حلو ابدا .. فين مبادئك ؟! انتي هددتي عيلة صغيرة و خوفتيها اوي .. في مليون طريقة تانية ممكن تجيبي حقك بيها
دينا بانفعال : ايييه ؟؟ هتديني محاضرات ؟! ما كنتي تديها لاختك اولى بيها … مفيش طريقة تانية غير الضرب و لو استخدمها كنت هطلعهالك جثة .. ده شرف يا غادة مش لعبة بايديها
غادة : دي لسا صغيرة .. يعني ممكن نفهمها غلطها باسلوب احسن من ده .. بابا و فارس لو عرفو بالحكاية ممكن يدبحوها يا دينا
دينا : اكيد مش هنقولهم يعني .. بس لارا لازم تتعاقب و عقوبة كبيرة كمان
حلا : يعني ايه هنقول لجدو ؟! اصله الشخص الوحيد الي هيتعامل مع الموضوع بطريقة هادية في العيلة المتخلفة دي
حبيبة : لا .. مش عايزين الموضوع يخرج عن السيطرة .. بصو يا بنات .. هنستخدم الصمت العقابي ..دي احسن وسيلة نعاقبها بيها
كارما : ده تستخدميه مع عيالك لما يكبرو يحببتي او مع جوزك لما يزعلك .. اساسا لارا مش بتكلم حد غيري في البيت ده
حبيبة : ما حضرتك اول واحدة هتقاطعيها .. محدش هيكلمها ابدا
فريدة : و انتي يا غادة تروحي تنامي باوضة كارما و ما تكلميش لارا
كارما : انتو مش ملاحظين انكم كبرتو الحكاية ؟ هيا غلطت معاكي بس يا دينا يبقى الموضوع بينك و بينها .. حرام نقاطعها كلنا كدة
دينا : انا قريبتها و عملت فيا كدة ما بالك بنات الناس ؟ افرضي اتخانقتو و عملت كدة معاكي ؟ دي لسا من كام يوم ضربتك بالشبشب .. بنت زي دي لازم حد يوقف بوشها و يفهمها غلطها
مرت لحظات من الصمت
فريدة : ها ؟ نقرا الفاتحة ؟
اومأت غادة و قالت : طالما العقوبة كدة انا موافقة
كارما : و انا كمان
حلا بسخرية : ايه صمت عقابي و كلام السوشال ميديا ده ؟ دي لازمها علقة موت
حبيبة : حلا .. نسيتي حقوق المرأة بتاعتك ؟! مش كل حاجة بالضرب
حلا : مش بتنازل عن مبادئي بس برضو الحق حق … غلطتها مش حاجة بسيطة و تعدي
امسكت فريدة فرشاة الشعر و خبطت بها على التسريحة
فريدة : هدوووء .. بصفتي الكبيرة هنا يعني انا القاضي .. و حكمت على لارا بالصمت العقابي لمدة معينة ستنتهي بناء على النتائج … و اي مخالفة للحكم ده بمثابة جر..يمة يعاقب عليها القانون .. انتهت الجلسة
*************************
نزلت البنات الى الحديقة واحدة تلو الاخرى
فارس باستغراب : فييي ايه ؟! حد يفهمني
غادة : قولتلك مواضيع بنات .. انت مالك ؟!
فارس : لا مش مواضيع بنات .. كل الي قاعدين هنا عارفين كل حاجة و انا الوحيد الي مش فاهم ايه الي بيحصل
حلا بحدة : الي حصل ان لارا غلطت غلط كبير و قررنا نعاقبها بطريقتنا
فارس : و الله ؟! ايه ورثتي جينات جدك بالسرعة دي ؟
حلا بغضب : انا مش بهزر .. لارا فعلا عملت حاجة مش كويسة
فارس : الي هيا ايه ؟!
حبيبة : بص يا فارس .. الي عملته ده شيء يخص البنات .. بصراحة غلطت بحق دينا .. مفيش داعي تعرف تفاصيل كتير
فارس : غلطت ازي يعني ؟
دينا : اتكلمت عليا .. كويس كدة ؟
حلا : كلام كبير و وصل لمامتك و هي قالت لباقي الستات .. اهو عرفت اسكت بقى
فارس بذهول : قالت ايه بالزبط ؟!
دينا بنرفزة : كفاية يا فارس .. ما تلبس طرحة و تقعد وسطينا كمان ؟!
فارس : للدرجادي دايقتك ؟ .. طب فهموني بس قالت ايه بالزبط و انا هكلمها
فريدة : فارس .. لارا مش اول مرة تغلط .. اول مرة اتكلمت على حبيبة و بعدين حاولت تبوظ جوازتك من حلا .. و من كام يوم ضربت كارما و اهي دلوقتي اتكلمت على دينا .. احنا مش عايزين نعاقبها و نأذيها .. بالعكس هدفنا نساعدها عشان تتغير .. كل الي في البيت اتكلمو معاها و حاولو يعقلوها و اتضربت كمان و مفيش فايدة .. المفروض تحس بقيمة العيلة و الناس المهمين بحياتها
تميم بابتسامة : شوفتو العقل .. برضو الحكمة ليها ناسها
دينا : مش وقت رومانسية يا دكتور .. نتكلم بالمفيد ؟
فارس : ايوة
دينا : اتفقنا ان الحرب هتكون صامتة .. هنسكت كلنا كدة و نتجاهل وجودها
فارس : حرب صامتة ؟!
دينا : ايوة .. هنستخدم اسلوب الصمت العقابي
فارس بضحك : فلسفة اوفر … لارا اصلا مش طايقة حد و الكلام ده مش هيجي معاها سكة
حبيبة : اهو نجرب يا فارس .. و لو فشلنا ننتقل للخطة ب
اوس بابتسامة : الي هيا ايه ؟!
حبيبة : معرفش بس كلهم بيقولو كدة
دينا : الخطة البديلة سيبوها عليا
مصطفى باندفاع : لا عليا .. لو ما اتعظتش هنلجأ للمقالب بتاعتي
فريدة : بعدين نتكلم بالموضوع ده .. لو فشلنا نعمل اجتماع تاني و نخطط من جديد
**************************
في اليوم التالي
دلفت دينا اوضة خديجة و وقفت تنظر اليها
خديجة باستغراب : دينا … في ايه يا بنتي
دينا : متقوليش يا بنتي عشان انا مش بنتك .. انا جاية اقولك كلمتين بس .. قبل ما تتكلمي على بنات الناس يا طنط ركزي مع بنتك شوية
خديجة : هنرجع لقلة الادب تاني يا دينا ؟! عيب يا بت انا بمقام امك
دينا : عمرك ما هتكوني زي امي .. امي ست مفيش زيها اصلا ..بتعرف تربي و تحتوي بنتها .. عارفة ازاي تفهمها الصح و الغلط من غير ما تجرحها .. بس من يوما انتي دخلتي حكايتنا بوظتي علاقتي بيها .. و بدأت ماما شوية شوية تبقى زيك
خديجة باستغراب : ليه بتقولي كدة يا دينا ؟!
دينا بغصة : يا طنط .. اول مرة قولتي اني بحاول اخطف زياد من غادة .. و بسببك خسرت اخويا الي امي مخلفتهوش .. و دلوقتي روحتي سخنتيها عليا و شككتيها بيا … انا عارفة ان لارا الي جات و قالتلك .. و عارفة انك اقنعتي ماما تفتش حاجتي عشان تلاقي عليا دليل .. بس هبقى احسن منك و من بنتك و مش هفضحكم قدام جدو
اقتربت خديجة من دينا و قالت : حقك عليا يا دينا .. اقسم بالله انا بعتبرك بنتي .. اتخضيت عليكي لما لارا كلمتني عشان كدة روحت قولت لمامتك .. خوفت تغلطي يا حبيبتي و الله ما قصدت اتكلم عليكي
دينا : انا مش جاية اسمع منك الكلام ده .. حبيت اقولك ان الي حط العلبة باوضتي هيا بنتك .. و متأكدة انك عارفة بس مش عايزة تقولي … اسمحيلي اقولك ان بنتك ما اتربتش و عمرها ما هتعرف تعيش زي الناس طالما بتفكر بالشكل ده
خديجة : حقك .. انا حاسة بيكي و عارفة انك اتظلمتي بسببها .. اوعدك هكلمها و اهزقها
ابتسمت دينا بسخرية و خرجت من الاوضة
***************
اجتمعت العائلة على مائدة الطعام
كانت نظرات عبد الله تتوزع على الموجودين
عبدالله بشك : مالكم ؟!
فارس بمرح : مفيش يا بيدو .. بس و الله الشغل متعب اوي .. ما تدينا عقوبة اخف شوية
عبدالله : عدنان .. شغلهم كويس و لا اي كلام ؟
عدنان : كويس يابا .. فاضل شوية بس و يخلصو
عبدالله : لا سيب العمال يكملو الباقي .. العيال دول هينزلو ينضفو البادروم
تميم : عادي هنخلصه بساعتين .. مش عقوبة كبيرة يعني
عبدالله : طيب .. انزلو انتو و لما تخلصو شغل هسلمكم شغل تاني
ليلة : جدو .. مفيش اخبار عن بابا و ماما ؟
عبدالله : ليه يا حبيبتي .. زهقتي عندنا ؟
ليلة : لا ابدا بس وحشوني اوي
فارس : تلاقيهم غرقانين بالعسل و مش فاكرينك اصلا
مصطفى بحدة : فارس
فارس بضحك : يلهوي اتخضيت .. ايه هتغير عليها و انتو لسا بالحضانة يا صاصا
عدنان : فارس اتلم .. انا بقول نفصل شغل البنات عن الاولاد يابا
سحر : ليه يا عدنان دول لسا عيال
كان عدنان سيرد لولا وقوف فريدة المفاجىء
تميم بفزع : مالك يحببتي ؟!
فريدة بألم : معدتي بتوجعني اوي
ذهبت بسرعة باتجاه الحمام
سحر باستغراب : مالها البت ؟!
تميم : مش عارف .. بقالها مدة تعبانة كدة
سحر : و سايب مراتك تعبانة من غير ما تطمن عليها ؟ ده انت دكتور يا ابني
حبيبة بمشاكسة : اصله مش دكتور نسا يا طنط
سحر : ايه علاقة ده بكلامنا ؟ بيقولك البت تعبانة من مدة
حبيبة بابتسامة : اممم لازم تروح للدكتورة تطمن
حلا : لاااا .. حبيبة ما بتتكلمش كدة الا لما تكون مخبية حاجة .. في ايه يا بت ؟
حبيبة : مفيش
تميم باستغراب : انتي عارفة حاجة و مش عايزة تقولي ؟
حبيبة بتوتر : لا
عبدالله : حبيبة .. في ايه ؟
حبيبة بتمتمة : غبية .. انا الي جبته لنفسي
فارس : ايييه هو سر يعني ؟ في ايه يا حبيبة انطقي ؟
دينا بعفوية : البت فريدة حامل يا جماعة
سحر بذهول : اييه ؟!
دينا : مهي واضحة زي الشمس بنت كل شوية معدتها بتوجعها و دايخة .. هيكون ايه غير بيبي جديد جاي في السكة ؟
حبيبة بخوف : انا ما قولتش حاجة
تميم : طيب مش هنقولها … بس الكلام ده صح و لا لأ ؟
حبيبة بتوتر : مش عارفة .. هي عملت اختبار حمل امبارح و طلع ايجابي
تميم بلخبطة : يعني .. يعني حامل ؟!
حبيبة : مش عارفة
دينا : هو ايه الي مش عارفة ؟ طالما ايجابي يعني حامل .. سمعونا زغرودة بقى
كارما بملل : دلوقتي هتقرفنا .. دي لسا مخلفة من فترة
سحر بسعادة : معلش بكرا يكبرو العيال و يتربو مع بعض و هتنسى التعب ده كله .. ربنا يقومها بالسلامة يا رب
سعاد بابتسامة : هتبقى تيتة للمرة التالتة يا سحر .. الف مبروك
نظر زياد لتميم و قال : مالك يعم ؟ وشك مخطوف كدة ليه ؟
تميم : مش قادر اصدق اقسم بالله
زياد باستغراب : طب انت مبسوط و لا زعلان فهمني
تميم : اكيد مبسوط هيبقى عندي كمان عيل .. بس بنفس الوقت قلقان على فريدة اوي
غادة : لا يكلف الله نفساً الا وسعها يا تميم .. دي هدية من ربنا و ان شاء الله فريدة هتكون قدها
نظر تميم الى فريدة التي تمشي باعياء و تضع يدها على بطنها
تميم : استني استني
فريدة باستغراب : في ايه ؟!
اتجه لها و امسك يدها
تميم : امشي بالراحة .. ما تتعبيش نفسك كتير .. تعالي تعالي
جلست بجانبه و بدأ هو يقرب الاطباق نحوها
تميم بحماس : كلي بيض عشان البروتين .. و سلطة عشان الفيتامينات.. نسيت اللبن .. اللبن عشان الكالسيوم .. ماما اعمليها عصير برتقان
فريدة بصدمة : فييي اييه ؟!
زياد : الف مبروك يا حبيبتي
فارس : من النهاردة اتلغت عقوبتها مش كدة يا بيدو ؟
حبيبة بتوتر : فريدة .. اقسم بالله ما قولت حاجة .. هما فهمو لوحدهم
فريدة : فييي ايه حد يفهمني ؟!
حلا : عرفنا انك حامل يا بت .. بس ايه السرعة دي انا مش فاهمة
فارس : ابننا دكر يا مزتي
ايهاب بحدة : فااارس
فريدة : بس بس .. مين الي قالكو الكلام ده ؟!
اشار جميعهم الي حبيبة مرة واحدة
اوس بضحك : ده الي مش هتقولو لحد ؟! دي ندالة
فارس : ده رداً على ندالتك انتا و هيا
فريدة بغضب : مش انا قولتلك ما تقوليش لحد لغاية ما اتاكد
حبيبة : و الله ما قولت .. هما الي قالو و جرجروني بالكلام
فريدة : و الله ؟! ماشي يا حبيبة حسابك بعدين
حلا : اتلمي يا فريدة .. ما كلنا هنعرف يعني الموضوع مش سر
فريدة : يا جماعة افهموني … انا لسا مش متأكدة
سحر : مش قولتي عملتي اختبار ؟! يعني حامل
فريدة : اوك بس لازم اتأكد الاول
تميم : معلش يا روحي النهاردة هاخدك و نتأكد .. المهم انتي ارتاحي دلوقتي
عبدالله : خلصتو ؟! يلا على شغلكم .. و انت يا اوس كلم يزن و قوله ما يتأخرش … و يعمل حسابه هيبات هنا لغاية ما العقوبة تخلص
خولة : لأ .. لو سمحت يعمي ما تخليهوش يبات هنا .. احنا مش ناقصين
عبدالله باستغراب : انتي بتقولي ايه ؟! ده جوز بنتك يا خولة
خولة : لما يبقى جوزها بجد اهلا و سهلا يقعد عندنا زي ما هو عايز .. بس طالما لسا خطيبها يبقى كل واحد في بيته احسن
حسين : الراجل كاتب كتابه يا خوله
خولة : حتى ولو .. البيت في بنات …
عبدالله بمقاطعة : خولة … يزن ابننا و واحد من العيلة و بالنسبالي هو حفيدي .. يعني اي كلمة هتتقال في حقه انا الي هزعل
خولة : مش ده قصدي يعمي .. انا بس ..
عبدالله بحزم : بس .. اقفلي ع الباقي
خولة باحترام : حاضر
عبدالله : يلا يا عيال .. على شغلكم
حبيبة : ماما خلي بالك من اسر انا هنزل معاهم
سعاد : ماشي يحبيبتي بس اوعي تتعبي نفسك انتي لسا نفسا
حبيبة : ماشي
عبدالله : حبيبة .. طالما نازلة معاهم يبقى تتابعي الشغل و اي حد يزوغ تعالي قوليلي
**********************
دفع تميم باب البادروم و نظر امامه بضيق
تميم : ايه كمية التراب دي ؟!
دينا بحماس : تفتكرو ممكن نلاقي حاجة هنا ؟
حلا : حاجة زي ايه ؟!
دينا : اي حاجة زي الي بالروايات .. ممكن نلاقي قطة بتتكلم و بقالها كتير مستخبية هنا عشان ما حدش يكتشف انها بني ادمة حولتها الساحرة الشريرة لقطة سودا
يزن : انا مش هجيبلك روايات تاني
تميم : لا انا لازم البس كمامة .. ايه القرف ده
توجهو للعمل بينما حبيبة جلست على كرسي خشبي تتابعهم
حلا بضيق : انا هتخنق من التراب ده
فارس : و انا كمان .. قال نلاقي قطة قال .. مفيش غير شوية كراكيب لتيتة الله يرحمها
توجهت دينا و كارما لزاوية تحتوي على اواني قديمة و بدأن في تنظيفها …. رفعت دينا طبق كبير و مسحت عنه الغبار .. كان مصنوع من المعدن و مطلي باللون الابيض و اطرافه مزخرفة بالورود الحمراء
دينا بابتسامة : فاكرين الطبق ده ؟
تميم : اه ده طبق تيتة .. مخصص لرمضان
زياد : هيا قالت ان ده جيه في جهازها .. ورثته من مامتها
دينا : طب ليه جدو شايله هنا ؟ ده لازم يتعمل تحفة فنية في البيت
تميم : سيبك من التحفة دي و اشتغلي عايزين نخلص بسرعة
زياد : هيا العقوبة دي هتاخد وقت قد ايه ؟! انا قرفت
فارس : و الله محدش عارف جدو دماغه بتوديه لفين .. ممكن يمددها لغاية الفرح عادي جدا
يزن : ده كدة يبقى بينافس النمرود
زياد بغضب : و ديني لما اعرف المخبر بس انا هوريه
وقع طبق من يد كارما و التفت اليها الجميع
دينا بشهقة : يخربيتك .. ده لطنط سحر
زياد : مالك يا كرملة ؟!
بدأت كارما بالبكاء و يدها ترتجف
زياد بفزع : في ايه ؟!
كارما ببكاء : زياد … انا الي قولت لجدو …….. يتبع
مغامرات عائلية 2
همس كاتبة
يتبع
الرواية كامله من( هنا )
