رواية بين هذا وذاك عبر روايات الخلاصة بقلم مريم سمير
رواية بين هذا وذاك الفصل الثالث 3 والأخير
الكل بدأ يهلل أنه يقول بسرعة ' أنا ومريم فرحنا الشهر الجاي
_ ايييييي؟؟؟؟
= عاصم بيه أنا الي عاوز اتجوز مريم
_ احمد!!!
كان قلبي مقبوض ، الاتنين بيبصوا لبعض ب منتهي الغضب ، يوسف مسكه من هدومه
' انت شكلك اتجننت وانا مش سايبك النهارده
احمد مسكه هو كمان = انت لو متظبطش أنا الي هعدلك
بابا زعق ° احنا فين هنا؟ أي الي بتعملوه دا؟
سابوا بعض وكانوا لسه بيبصوا لبعض ب عصبيه
° طيب يجماعة حفلتنا النهارده خلصت ، شكراً جدا علي حضوركم ، أنا متأسف جدا علي الموقف البايخ دا
المعازيم بدوا يمشوا لحد ما مفضلش غيرنا احنا الأربعة
' انت جاي تقول انك عاوز تتجوز خطيبتي قدام كل الموجودين ؟ انت أي راحت منك؟
= مش خطيبتك ومش هتبقي
° والله عال يدكتور احمد! طب ما تخليك انت ابوها واتكلم بالنيابة عني؟
= العفو يفندم أنا مقصدش ، الي انا اعرفه إن مريم مش عوزاه
° وانا الي اعرفه اني من حقي أنا الي اختار جوز بنتي مش اي حد تاني!
= حقك طبعاً ، بس بنتك بردو مش حقها تختار ، الايام الي هتعيشها معاه دي عمرها
° طيب نسيبنا من الفلسفة الي مبتجبش همها
' انت لسه هتتكلم معاه يا اونكل؟؟ ، دا لازم يتأدب ويعتذر ويمشي من المستشفى حالا ومعتش اشوف وشه
° استني انت ييوسف
' استني اي؟ واحد جاي يقول إنه عاوز يتجوز الي هتبقي مراتي ؟؟ اقعد اتناقش معاه لي؟
كنت بصاله ب طرف عيني ، قال يعني بيعمل كده غيرة!!
بابا رجع بص ل احمد
° خلينا نتكلم بالعقل يدكتور احمد ، انت طبعا عارف مستوايا الاجتماعي عامل ازاي ، ومقدر جدا موقفي ك أب اني عاوز ل بنتي احسن واحد والي يعيشها عيشة مرتاحة ، يعني ب اختصار هتعرف تعمل دا؟ ، انت عندك اي يا احمد؟
= عندي..
_ يبابا مش لازم يبقى عنده فلوس كتير وهو الي بيصرف علي نفسه وبيشتغل و..
° مريم ، ياريت لو هتقعدي ف متتكلميش دلوقتي ، أنا عاوز إجابة حالا من الدكتور
= أنا ممكن اضمن لحضرتك أننا لو اتفقنا هعرف اعيش مريم مبسوطة ، وعمري ما هاجي عليها وهشيلها في عنيا
° كلام جميل ، بس كلام ، ميأكلش عيش ، انت عارف مصروفها كام في اليوم؟ في الشهر؟ في سفرية من بتوعها؟ اظن الحمل هيبقي تقيل عليك اوي خصوصا انك لسه شاب في أول حياتك ، ف أنا هعتبر نفسي مسمعتش أي جملة اتقالت منك النهارده ودا عشان مستقبلك الي الظاهر انك مش خايف عليه!
= يفندم أنا كنت..
° انت لازم تتفضل دلوقتي ، ودي أخر فرصة بدهالك يا احمد انت لو مشيت من المستشفى بتاعتي مش هتعرف تشتغل ف اي مستشفى تاني عشان هحطك في دماغي ، وربنا ما يوريك لما احط حد في دماغي بعمل في أي
بصلي ، كنت بعيط ، مش عارفة اعمل اي؟ مشي!
_ بابا ، لي عملت كده؟ لي؟
° أنا عارف مصلحتك كويس
_ بابا انت مش عارف أي حاجة غير الفلوس ، أنا مش بيعة هتديها للي معاه فلوس اكتر! احمد اطيب راجل انا شوفته في حياتي ، انت حتي مفكرتش تاخد رأيي!
' هو انتي بتقولي اي؟ ناقص تقولي انك بتحبيه!
انفعلت _ ليك عندي حاجة؟ ليك عندي اي عشان تيجي تحاسبني في كل حاجة بعملها؟ انا شيفاك ولا حاجة ، بخاف منك ومن قربك ليا ومن صوتك ، عاوزة اهرب منك ومش عارفة والمصيبة إن بابا شايف كل دا وموافق عليه ، انت ملكش أي دخل فيا تاني انت سامع؟
' أنا مش هحاسبك دلوقتي ، لما نتجوز لينا كلام تاني
مشي وهو متعصب رجعت بصيت لبابا ونزلت علي الارض
_ متعملش فيا كد يبابا ، عشان خاطري لو بتحبني ، أنا عمري ما هسامحك لو عملت فيا كد
نزل لمستوايا ° بكرة تعرفي اني كنت عاوز مصلحتك والخير ليكي ، أنا عارف انا بعمل أي كويس
كنت خلاص يأست اني اعرف اغير رأي بابا ، في نفس الوقت مش عارفة ارضي ب المفروض عليا ، زي ما احمد قال! الايام دي عمري! ، مينفعش اتنازل عشان ببساطة هيجي يوم ألاقي نفسي لوحدي ، ست تعيسة ضعيفة هتبص جمبها مش هتلاقي حد! ، مكنش قدامي حل تاني
كتبت ورقة وسيبتها جمب بابا ومشيت ، هربت! هروح فين؟
ليلي كانت مسافرة وصحابي التانيين كل واحدة فيها طلعت ب حجة! ، كنت مغفلة وانا بنقي صحابي ؟
= مريم؟؟؟ انتي جيتي هنا ازاي ؟؟؟
_ لاء متخافش
= قولتي ل باباكي انك جاية الحمد لله ؟
_ لاء أنا هربت
= طب بركة و.. ايييي؟ هربتي؟ ام جمالات عبايتك وتعاليلي وقتييييييي
طنط نزلت ودخلنا الشقة = شايك الجميل بقي يا ام جمالات
رجعت بصيتله بعد ما سابتنا ودخلت المطبخ
_ بابا محكم رأيه اني لازم اتجوز يوسف
= طب اهدي ، اكيد فيه حل
_ ما انت شوفت بنفسك!! ، احمد أنا جاية أسألك سؤال
= اي هو؟
_ انت لما قولت انك عاوز تتجوزني ، لي قولت كد؟
= يعني هربانة عشان جاية تسأليني السؤال دا؟ يعني مفيش في دماغك اختراع اسمه واتساب ؟ مسدجات؟
_ أنا مش بهزر ، جاوبني
= مكنش ينفع اشوفك بيحصل فيكي اكتر حاجة بتكرهيها واقعد ساكت ، كان لازم اساعدك
_ بس؟ ، يعني عملت كد مساعدة ليا؟ مفيش اي سبب تاني ؟
رفع حاجبه وضحك = سبب تاني؟ زي اي مثلا ؟
_ ها؟ وانا اي يعرفني أنا بسألك
= انتي ساعدتيني اعمل العملية وقدمتيلي خدمة عمري مهنسهالك ، ولو طلبتي مني اي حاجة مش هتأخر عليكي ابدا يمريم
_ اه يعني بتردلي الي عملته؟
= بحاول ، بس للاسف معرفتش
سكتت! ، معرفش ليه كنت عاوزة اسمع السبب الي كنت جاية عشانه ، أنه عاوز يتجوزني وعرض عليا دا عشان بيحبني! ، هو انا لي مضايقة ؟ هو انا حبيته؟ أكيد لاء ، طب ولي لاء؟؟؟
_ أنا لو رجعت هيجوزوني غصب عني
= أنا هاجي معاكي وهتكلم مع باباكي
_ انت لي مش قادر تفهم إن بابا الي في دماغه في دماغه ؟
= عشان في الاول والاخر أب ، هو شايف الموضوع من منظوره هو ، لو حاولنا مع بعض يمكن نصحح وجهات النظر
_ ولو متصححتش؟ ألبس أنا ؟
= الصراحة الواد سمج دا انا مستحملهوش تلت دقايق هتستحملي انتي ازاي العمر كله
_ أنا مش عاوزة ارجع هناك تاني ، أنا عارفة مصيري هيبقي أيه لو رجعت
= أنا مش هسمح لأي حاجة تحصلك ، ولا هتعملي اي حاجة غصب عنك ،ومش هتتجوزي واحد مبتحبهوش ، أنا عاوزك بس تثقي فيا وانا هعرف اتصرف
_ ولي تعمل كد؟ هتضيع وقتك لي في حاجات متهمكش؟
= انتي تهميني
_ نعم؟
= قصدي يعني.. ، إن مينفعش اشوفك كد ومحاولش اعمل حاجة
_ اه ، أنا واثقة فيك يا احمد ، وحتي لو منجحتش تعمل حاجة هفضل دايما شايفة الي عملته معايا خدمة مش هعرف اردهالك
= يبقي نمشي قبل ما باباكي ياخد باله أو يحس ب حاجة
_ لاء مهو..
= انتي عملتي حاجة؟
_ سبت ورقة مكتوب فيها اني هربت ، بص هو عمتا زمانه قرأها وقالب عليا الدنيا
= قولي انك بتهزري؟
بصتله _ متخافش أنا مش هسبب ليك أي مشاكل
= استني استني ، انتي راحة علي فين؟
_ مش عارفة لسه
= وانا مستحيل اسيبك تخرجي لوحدك ، مريم الدنيا برا مش زي عندك في الفيلا ، لو حد اتمكن منك مش هيرحمك ، وانا مش هعرف اخلي حاجة تأذيكي
_ وانا مش هبقي سبب أذيتك ، اكيد هيجوا يدوروا عليا هنا
= يبقي يحلها حلال ، انتي ممكن تفضلي هنا لحد ما الموضوع يهدي ، وانا هكلم باباكي تاني متخافيش
_ اقعد هنا !!!!
= معلش مش قد المقام
_ لاء مش قصدي ، بس انا ملقتش ولا اي حد من صحابي الي قدمتلهم كل حاجة ، انت الوحيد الي عاوز تقف جمبي وتشوفلي حل!
= كله هيبقي تمام ماشي؟
ابتسمتله وانا بهز راسي = هجبلك حاجة تكليها ، أكلي هيعجبك اوي
_ انت بتعرف تطبخ؟
= كلي واحكمي
° الشاي يحبايبي ، أنا هطلع يا احمد عشان اخد العلاج
= تعبتك معايا ، تسلميلي
راح وصلها ورجع نزل وكلنا سوا
_ احمد معلش هو انت هتبيعني أعضاء امتي؟
= اي؟
_ اصل مستحيل تكون طيب كد ، انت بتعمل كده عشان تطلب فدية ؟
= مريم انتي الي يعتبر خطفاني!
_ أيوة صح أنا الي جاية
ضحك = كملي أكل وياريت متشغليش دماغك تاني
كنا قاعدين ، قاعدة افكر يتري بابا هيعمل ايه ؟ لو عرف اني عند احمد اكيد هيحصله مشاكل كتير ، مكنش قدامي حل تاني غير اني اجي هنا ، مكنش قصدي أني ممكن اكون سبب في تعبه !
= مريم
_ ها؟ نعم
= متفكريش في حاجة ، كل حاجة هتبقي كويس ، انتي مش هتتجوزي غصب عنك ، اطمني
_ شكراً يا احمد ، أنا عمري مهنسي الي بتعمله معايا ، قال قولي صحيح انت ما شاء الله دكتور ، بتفهم في الميكانيكا ، بتعرف تطبخ ، انت بتعرف تعمل كد ازاي؟
= أنا اشتغلت كتير اوي ، مرة في ورشة ، مرة في مطعم ، وكنت بذاكر بردو عشان حلم ابويا وامي أنهم يشوفوا ابنهم دكتور يعوضهم عن كل الي شافوه ويفتخروا بيه ، ف كنت بحاول علي قد ما اقدر اشتغل وأوازن بين الشغل والدراسة لحد ما دخلت طب واتخرجت والحمد لله اشتغلت بشهادتي
_ أنا مبعرفش اعمل اي حاجة!
= يعني اي؟
_ كل حاجة بتيجي قدامي من غير ما اتعب فيها ، مبطلبش حاجة غير لما تبقي عندي ، أنا عارفة إن بابا بيشتغل كتير اوي عشان منقلش في مستوانا ، لكن كان نفسي يفهم اني محتجاه ، محتاجة اشوفه ويقعد معايا ، ماما لما كانت عايشة مكنتش حاسة اوي ب الفجوة الي بيني وبين بابا عشان كانت هي بتحاول تقرب بينا ، لكن بعد ما مشيت مين هيقرب بينا؟ ، كان نفسي يفهم اني مش بحب يوسف واني لو اتجوزته هكرهه وهكره نفسي ، كان نفسي اختار مش يتفرض عليا
= فيه مناديل جوا اجيب؟
ضحكت _ لاء مش كل مرة ، مش هعيط متقلقش
= ربنا يرحمها ، باباكي اكيد مبيحبش حد قدك بس مش عارف يوصلك دا ، واحدة واحدة وهيعرف أنه كان بيفكر غلط ، متزعليش انتي بس اهم حاجة
_ انت طيب اوي يا احمد ، مش هتقتلني بجد ولا اي؟
= تاني؟؟؟
قعدنا نتكلم كتير ، كتير اوي ، محستش ب الوقت خالص غير لما كل واحد فينا كان عاوز ينام
= دا مفتاح الاوضه دي ادخلي واقفلي علي نفسك
_ وانت هتنام فين ؟
= أنا متعود انام في المستشفى علي استراحة اصلا ، هنام هنا علي الكنبة ، تصبحي علي خير
_ وانت من أهله
صحيت علي صوت خبط في الباب
= أنا آسف اوي والله عشان الشغل وكد عاوز هدومي بس
_ لاء ولا اي حاجة اتفضل
راح عند الدولاب وبدأ يبص علي الهدوم
_ اختار معاك ؟
اختارتله طقم كلاسيك ، لبس وطلع بصلي
= أنا بخبط تلت خبطات علي الباب ، زودت عن تلاتة هاتي طبلة وافتحيلي
ضحكت _ متبقاش تتأخر
= لاء متخافيش هاجي بدري إن شاء الله
مشي ووصل المستشفى
= هو في أي
° المدير قالب الدنيا عليك
= اقسم بالله ؟
° حالف يعدمك العافية
= اممممم
° قالنا اول ما تعتب المستشفى نمشي كلنا
= لي هيقلبها حلبة مصارعة وياخدني جولة؟
° ادخله ، بس نصيحة من اخ؟
= اخويا
° اتشاهد قبل ما تدخل
= حبيب اخوك بالسلامة انت في رعاية الله
دخل المكتب = بلغوني انك عاوزني يفندم؟
° بنتي فين يا احمد؟
= بنتك مين يفندم؟
° انت هتصيع؟ مريم فين يا احمد؟
= اكيد في بيتك! ، أنا مش فاهم حاجة
° مريم هربت
= هربت؟ لا حول ولا قوه الا بالله ، طب لي كده
° استهبل استهبل ، كمل
= في أي يفندم انت شاكك فيا؟
° لاء يراجل شاكك أي ، أنا متأكد
= الله يكرمك ، طب أي يفندم اخرك اي؟
° بنتي لو مرجعتش هعلق راسك علي باب المستشفى يا احمد
= هتقلبها مدبح ولا اي لاغيني؟
° انت هتفضل تستظرف كتير؟
= وانت لي مفكرتش في السبب الي خلاها تهرب؟
° سبب؟ أنا عمري ما حرمتها من حاجة
= حرمتها من اهم حاجة ، انت
°..
= كان اهم حاجة عندها وجودك ، مكنتش عاوزة تحس انها لوحدها بعد ما مامتها اتوفت ، كانت فاكرة انك الأهم عندك انك تشوفها عروسة مبسوطة مش واحدة مستقلبها هيتأمن ميت سنة قدام ، كانت عاوزة تحس بالأمان بدل ما عينها كلها خوف ، خوف من يوسف ومنك ومن كل الي حواليها ، حاولت تطمنها؟ حاولت تسألها مرة واحدة مالك؟ بدل دا كنت بتغيرلها عربية وبتديها فلوس سفرية ، مريم مكنتش محتاجة كل دا ، كانت محتاجة تسمعها ، كانت محتجاك انت!
° بنتي فين يا احمد؟
= بنتك في الحفظ والصون ، أنا ميرضنيش احرمك منها ، بس توعدني انك متجوزهاش غصب عنها ، بدل ما تكرهك وتخسرها ، سيبها هي تختار ، أنا متأكد إن بنتك هتحب شاب كويس وساعتها هتعرف تبقي مبسوطة وانت مطمن عليها
° أنا عاوز اشوفها
الباب خبط _ طيب طيب يا احمد
فتحت لقيت بابا ف وشي رجعت خطوتين ل ورا
_ ب بابا!! أنا.. ، أنا مكنش قصدي
قرب مني ف غمضت عيوني جامد ، حضني وعيط! ، كنت مخضوضة ف كنت متخشبة ، بصيت علي أحمد الي كان بيشاورلي اني احضنه زي ما بيحضني
حضنته وانا كمان عيطت ° حقك عليا ، أنا مش عاوزك تكرهيني ، أنا كنت فاكر إني عارف مصلحتك ، اكيد ذينب لو كانت هنا مكنتش هيعجبها الي بعمله كانت علي الاقل هتقولي المفروض اعمل اي ، متزعليش مني يمريم أنا بعمل كل دا عشانك ، أنا مليش غيرك
_ مش زعلانة منك يحبيبي ، متزعلش انت مني
بعد عني ° يعني هترجعي معايا؟
_ مش هتجوز يبابا
° متخافيش ، مش هجوزك ابدا غير ب رضاكي
رجعت حضنته تاني ° أنا متشكر اوي يا احمد ، كلامك ليا فوقني أنا مش عارف اقولك اي
= ياريت يفندم لو تزود مرتبي هكون شاكر جدا لحضرتك
ضحكت _ انت الي كلمته؟ بابا ينفع بس خمس دقايق ونمشي؟
خرج ف رجعت بصيت ل احمد
_ أنا مش عارفة اقولك أي
= معملتش حاجة ، المهم انك مبسوطة ومرتاحة دلوقتي
_ اكتر مما تتخيل ، أنا لو فضلت اشكرك من هنا لبكره مش كفاية يا احمد
= خلي بالك من نفسك ، هشوفك تاني مش كده؟
_ اكيد إن شاء الله
مشيت ، بس والمرادي وانا متأكدة اني بحبه ، قلبي بيرقص جوايا ، كنت فاكرة اني مش هيبقي ليا قصة حب زي ما بسمع عنها ، لكن قصتي؟ كانت احلي من أي حاجة كنت عوزاها ، كنت بحب اطيب راجل في الدنيا!
بابا كلم ابو يوسف ونهي معاه اتفاقه، بابا اتغير! رجع يهتم بيا ويقعد معايا وقت كبير ، نتكلم ونهزر ونفتكر ماما ونزورها ، رجع تاني عندي عيلة ومبقتش لوحدي ، رجعت تاني مبسوطة ومش خايفة .
° متقدملك عريس
_ بابا مش انا قولتلك لسه امبارح علي عريس امبارح لاء؟
° لاء مهو عريس تاني
_ بردو لاء!
° لاء بس ما مينفعش ترفضيه
ربعت أيدي _ نعم يسي بابا؟ رجعنا تاني ل فرض الرأي ولا اي؟
° لاء خلاص مدام انتي مش عاوزة الدكتور أحمد يبقي بلاها جواز
_ أيوة مش عاوزة قوله مش موافقة و.. اي؟ قولت مين ؟
° عندك حق هكلمه حالا اقوله مش موافقة و..
_ بابا استني ، احمد احمد؟؟
° اه احمد احمد
_ يوه انت بتضغط عليا لي
° لاء خلاص تمام هقوله مش موافقة
_ بابا متضغطش عليا اكتر من كد ارجوك ، خلاص ماشي الي تشوفه
ضحك ° يشيخه؟ دلوقتي بقت الي اشوفه؟
كنت حاسه اني طايرة! ، مش مصدقة الي سمعته ، جاي النهارده! ، روحت اشتريت فستان جديد واستنيته يجي
° مريم هانم ، البيه وصل تحت
_ حاضر نازلة
نزلت وقعدت قدامه _ احمممم طيب يعمي؟
° اه عاوزني اسيبكم شويه؟
_ يعني لو عصير او اي حاجة من المطبخ بالله عليك
بابا ضحك وقام ورجعت بصيتله
_ وحشتيني اوي
= أحمد!
_ كنت عاوز اشوفك ف قولت طب متتجوزها وتشوفها علي طول
= يدكتور!
_ الفترة الي فاتت كنت بفكر فيكي طول الوقت ، واكتشفت حتة اكتشاف محصلش
= أي هو ؟
_ مريم أنا بحبك ، انتي الست الوحيدة الي عاوزها تبقي معايا وجمبي
= ها ؟؟
_ تتجوزيني ؟
= زي بعضه
_ اقسم بالله؟ زي بعضه؟ دا ردك؟
= خلاص ماشي موافقة
_ أيوة موافقة لي ؟
=..
_ يعني انا جاي وقاعد وبتكلم ومدرب ميت مرة قبل ما اجي عشان اعرف اتكلم قدامك وتقوليلي زي بعضه؟ لي بنفض خناقة ؟
= عشان أنا كمان بحبك
_ مهو مينفعش الي بيحصل دا والله و.. اي قولتي اي؟
° العصير يا احمد
_ يعني دا وقته يعمي ؟؟؟؟
تمت 🤍.
بين هذا وذاك 🤍.
مريم سمير 🤍.
