رواية تاج (كاملة جميع الفصول) عبر روايات الخلاصة بقلم إيمان شلبي
رواية تاج الفصل الثالث 3 والأخير
- حكتيله ايه انتي بتهزري؟؟
اتنهدت بحزن وانا ببص لصاحبتي وبهز راسي بنفي
-لا مش بهزر
-قولتيله ايه ؟
بصيت قدامي واحنا ماشين ومروحين من الدرس
-قولتله الموضوع بس بطريقه غير مباشره
-ازاي مش فاهمه؟!
-يعني قولتله اني كنت معجبه بواحد واني كنت مفكره أنه بيبادلني نفس الشعور بس هو طلع مرتبط
-وهو قالك ايه؟
-قالي مش يمكن هو كمان كان معجب بيكي بس شاف انك مسترجله
-مسترجله؟؟
هزيت راسي وانا ببتسم بسخريه وببص لنفسي وبقولها بتريقه
-اه قالي كده
-بس انتي مش مسترجله انتي مفيش في رقتك ولا شياكتك ياتاج ازاي يقول كده بجد هو مبيشوفش!
مسحت دمعه نزلت من عيوني وانا بهز راسي بحزن :
-اللي مزعلني اني حكيت
-هو فهم أن الكلام عليه ؟
-معرفش بس اكيد فهم اي حد مكانه هيفهم
اتنهدت بحزن وهي بتمسك ايدي وبتبصلي بعتاب :
-مش عارفه اقولك ايه بس انتي غلطانه ياتاج مكانش المفروض تحكي
هزيت راسي بدموع وتأكيد :
-فعلا انا غلطانه وستين غلطانه كمان
-طب وناويه تعملي ايه؟
-ناويه ابعد
-مره واحده كده من غير اي مقدمات
-اكيد لا مش حابه أثبت اني كنت بحكي عنه هو لو بعدت هيفهم وش
-بالظبط
-ادعيلي انتي بس
-ربنا يريح قلبك وبالك ويعوضك خير يارب
-يااارب
روحت البيت اليوم ده وانا مقرره افوق لمذاكرتي واحاول انسي الموضوع وخصوصاً أن بدأ مستوايا يقل والمدرسين يشتكوا مني بعد ما كنت شاطره في اول السنه وبطلع من الاوائل !
اتنهدت تنهيده طويله وانا بسند ايدي علي سور البلكونه وبشرب بوق من فنجان القهوه اللي عملته عشان يساعدني على التفكير
بدأت وقتها افكر بعقلي شويه
لو كنت أطول اشيل قلبي عشان اقدر افكر كنت هعمل كده
حاولت انهي الصراع اللي قايم بين عضوين كل واحد فيهم بيفكر عكس التاني تماماً
حاولت اخلي العقل هو اللي ينتصر المره دي وبالفعل بعد مناهدات وبعد تفكير طويل وبعد صراع يطول شرحه قدر عقلي ينتصر علي قلبي اللي مبيجيش منه غير الوجع وبس
كانت فتره صعبه حاولت فيها ابعد بكل الطرق وفي الحقيقه هو ساعدني علي كده من بعد ما بقي يختفي ويفضل بالايام ميكلمنيش
وقتها بس قدرت اعرف أن مشاعري وصلت حتي لو بطريقه غير مباشره لكنها في النهايه وصلت وبكل أسف بُعده يدل انها اترفضت
مكنتش زعلانه علي رفضه لمشاعري أو استهوانه بيها قد ما كنت زعلانه علي نفسي وعلي وقت كبير جدا ضيعته مع شخص ميستاهلش قلبي ولا حبي
يمكن كانت تجربه قاسيه شويه لكنها كانت بمثابه درس ليا قدرت استفاد منه اني مضيعش وقت تاني مع شخص غامض مشاعره مش واضحه من البدايه
كنت لسه صغيره في فتره المراهقه ومتخبطه ومشاعري هي اللي موجهاني
لكن التجارب والايام والدقائق أو حتي الثواني اللي بتمر علينا بتعلم الواحد وتخليه ينضج ويكبر عمر فوق عمره
فات شهر كامل حاولت بكل ما املك ادوس علي قلبي وابعد
البعد عن الطريق الغلط كان انسب حل
حل ينقذ قلبي ،مشاعري ،كرامتي ونفسي
منكرش اني كل فتره كنت بدخل أكلمه وهو كذلك
منكرش أبداً أن كان لسه في بصيص أمل جوايا وخاصه من بعد ما عرفت أنه مبقاش مرتبط
كنت ما بين نارين القرب أو البعد
مكنتش عارفه اخد قرار يرضي قلبي وعقلي
قلبي عايز قربه
عقلي رافض بكل ما يملك !
وكأن عمرو حسن بيوصفي في جمله من أشعاره
فيه نُص بتاع " نغز كرامتك " مابقاش طايقه
أما النص اللي بتاع " قلبك " فـ ده لسه معاه
عدت فتره الامتحانات علي خير
وفي الحقيقه انا في الفتره الاخيره مكنتش بنام من كتر التوتر والخوف
كنت بذاكر وبجتهد وبحاول اشيل الموضوع من دماغي
كان كل يوم يدخل يسألني عملتي ايه وكنت برد علي قد الكلمه واقفل
لحد ما فضلت بالايام متكلمش وهو كمان وديه كانت اكتر خطوه صح عملتها في حياتي
ظهرت النتيجه ونجحت بتقدير كويس وقدمت علي كليه تجاره ودخلتها
-ياااااه أخيراً بقي دخلت الكليه وهخربها
اختي بتريقه :
-اوماااااال
-لا لا احباط مبحبش
-بصي ياحبي انا هسيبك تتفاجئ هتنبهري في الكليه صدقيني
-مش عارفه ليه خوفت بس ولو ولوووو لو مسحوا بيا بلاط المدرج مش هحن لايام الثانويه الهباب دي تاني
-هتنبهري
وفعلا وقد كان انبهرت والكليه مسحت بيا بلاط المدرج بس حصل خير ولا يهزني انا اصلا استرونج جدا و....
-مالك يابنتي بتعيطي ليه
بصيت لماما وانا بقولها بعصبيه :
-انا زهقت اتخنقت مش طايقه نفسي
انا عايز اتستت عايزه اعمل لجوزي قره عيني رز وملوخيه
-طب بمناسبه الرز والملوخيه في عريس متقدملك
قومت من علي الكتاب وانا بقول بهزار :
-ايه ده اوف اوف اقفل تاني ياساتر يارب
-الله مش كنتي من ثواني عايزه تعملي رز وملوخيه ؟؟
-بصراحه مكنتش متخيله أن الموضوع يتحقق بالسرعه ديه
-طب بجد انا مش بهزر في عريس متقدملك
اتنهدت وانا ببصلها بجديه :
-مين ياماما ؟
-محسن ابن صاحب ابوكي
اتنفضت من مكاني بعصبيه :
-هو مبيزهقش الراجل ده هو وابنه مش اتقدم وانا في ثانوي ورفضت
-بس احنا مرفضناش مباشره احنا قولنا للراجل انك في ثانوي ومش بتفكري دلوقتي في الموضوع
-والله وده ملفتش نظره لحاجه ؟
-انا مش فاهمه رافضه ليه الولد كويس ومحترم ومتعلم ومفيش اي عيب فيه
-مش مرتحاله ياستي هو الجواز بالعافيه
بصتلي بغيظ :
-ايه لسه مستنيه يجي يتقدملك
-هو مين ده ؟
-نوح ،لسه مستنياه
رديت بعصبيه والدموع بتلمع في عيني :
-انا مش مستنيه حد
-اه متستنيش عشان انتي اصلا مش في باله ولا بيحبك
-عارفه مش محتاجه تعرفيني
-انا مش هغصبك علي حاجه بس انتي كده بتضيعي فرص ولسه هتضيعي عشان اوهام في دماغك
قالت كلامها وخرجت من اوضتي وانا ببص لآثرها ومن جوايا بسأل نفسي بحيره
هو انا رفضت ليه العريس ؟
هو فعلا شخص مناسب اي بنت تتمناه
لكن البنت ديه مش أنا
اكيد هيلاقي البنت اللي تقبل بيه بكل رضا
مرفضتش عشان لسه مستنيه زي ما ماما فاكره
انا بس رفضت لاني فعلا مش برتاح للشخص ده من زمان من وقت ما كنا صغيرين
بس مقدرش أنكر أن كان جوايا امل ولو واحد في الميه أن نوح يفكر فيا في يوم
-اوباااااا ايه الجمال ده
بصيتلها وانا بفرك ايدي وبسألها بتوتر :
-بجد شكلي حلو ؟
-اوي بجد
اخدت نفس طويل وانا ببتسم ابتسامه مهزوزه وببص في المرايه علي الفستان اللي كنت لبساه والميك اب اللي عملته بمناسبه فرح بنت عمتي واللي هو بالتأكيد موجود فيه
كنت بقالي فتره كبيره جدا مشوفتهوش ولا كلمته
وفي الحقيقه كانت فتره كفيله تنسيني وتعلمني الجفا
كانت فتره كفيله تعرفني أن لو كان بيحبني أو شاريني مكانش ارتبط بغيري
كفيله تخليني أعترف أن مفيش شخص ممكن يحب شخص بالعافيه
كفيله تخليني انضج واكبر عمر فوق عمري واخد حذري اوووووي من اللي جاي
روحنا الفرح وكان كل اللي يشوفني يتفاجأ!
بنت عمي بانبهار وهي بتحضني :
كبرنا واحلوينا
-حبيبي تسلميلي يارب
عمي وهو بيحضني:
-عقبال ما نفرح بيكي
-ربنا يخليك ياعمو عقبال نوح الاول
-مين بيجيب في سيرتي ؟
لفيت وقلبي بيدق بتوتر اول ما سمعت صوته
-ا ازيك يانوح
سلم عليا وهو بيبصلي بأعجاب :
-ايه الجمال ده
حطيت وشي في الأرض بأحراج :
-تسلم ربنا يخليك
-عقبالك ياقمر
رديت بهزار:
-لا ياعم انت الاول
-ياستي ماشي شوفيلي عروسه وانا معاكي
ضحكت علي كلامه من غير ما انطق حرف وبعدها انسحبت وبدأت اندمج مع العيله وكل فتره المحه واقف في ركن بعيد ومركز معايا
لكن في الحقيقه !
لاول مره تركيزه ونظراته متفرحنيش
عارفين ليه
اصل هو من زمان بيعمل كده
من زمان نظراته مُزيفه أو حتي اعجاب لكن من بعيد لبعيد
هو اصلا شخص مش عارف هو عايز ايه
وانا مكانش ينفع أفضل قاعده ومستنيه ومعلقه نفسي بأوهام
من اليوم ده وانا اقدر اقول ان "نوح" انتهي من حياتي وللأبد
هو اصلا من البدايه مكانش ينفع يدخلها لكن الإنسان لحد ما يموت هيفضل يجرب ويتعلم
وفي يوم كنت قاعده في اوضتي فاتحه الواتس وفجأه جاتلي ماسدج من رقم غريب
-مساء الخير ياتاج ازيك
-الحمد لله مين ؟
-انا عمرو معاكي في الكليه في سنه رابعه
-ايوه حضرتك اتفضل
-بصي بصراحه من غير لف ودوران انا شوفتك اكتر من مره في الكليه ومعجب بيكي وبأخلاقك وكنت حابب يعني لو تديني فرصه نتعرف علي بعض ولو في قبول أن شاء الله هجيب اهلي ونيجي نتقدم علي طول
-بس انا خايفه
-خايفه من ايه يا تاج
بصيت قدامي والدموع بتلمع في عيني
-خايفه اوافق قلبي يتكسر مره تانيه يا ايه
مسكت ايدي وهي بتبتسم بهدوء :
-خلينا متفقين أن المره الاولى انتي اللي وهمتي نفسك من غير اي مقابل من نوح
هزيت راسي بحزن :
-فعلا عندك حق
-الحب لازم يكون متبادل
-بس للاسف الحب مش بأيدينا
-نوح معملش اي حاجه تستدعي الحب ده كله !
اتنهدت بحزن وانا ببصلها بحيره :
-انا دلوقتي نسيت نوح خلاص
-فعلا ولا مجرد كلام وخلاص
رديت بصدق:
-لا فعلا انا كان لازم أنساه لانه ميستحقش الحب ده كله
-بالظبط انتي بالنسباله كنتي سد خانه ،كنتي حد بيسد بيه الفراغ العاطفي اللي عنده واول ما ظهر حد جديد مبقتيش موجوده في يومه خلاص !
وفي الحقيقه كانت كل كلمه بتقولها صح قدرت اقتنع بيها مع الوقت
-طب انا اعمل ايه دلوقتي اوافق علي عمرو ده ولا اعمل ايه
-فيها ايه لو تجربي لو هو حد كويس
-بس انا معرفش أن كان بيحور ولا هو فعلا عايز يرتبط بيا !
-احنا هنقول لماما وهي تقولنا نعمل ايه
-تمام
وفعلا روحنا حكينا لماما كل حاجه وهي قاعده تسمعنا بكل هدوء وتفاهم
وفي الحقيقه انا محظوظه بوجودها في حياتي ،لولا وجودها والنصائح اللي بتدهالي انا واختي كُنا زمانا دلوقتي متخبطين ،تايهين ،خايفين!
-طيب قبل اي حاجه كده أنتي لسه بتفكري في نوح؟
هزيت راسي بنفي :
-خلاص ياماما نوح انتهي من حياتي
-عن اقتناع ؟
-بكل اقتناع صدقيني
-تمام ،انتي دلوقتي هتردي علي عمرو ده هتقوليله انك حكتيلي
-تمام وبعدين ؟
-وبعدين لو عايز يتعرف عليكي باب بيتنا مفتوح احنا مش بنرتبط غير رسمي
-طب افرضي قالي أنه محتاج يتعرف عليا قبل ما نرتبط مش يمكن منتفاهمش!
-مفيش مشكله يدخل البيت من بابه ويقولنا الكلام ده واحنا نديله فرصه يتعرف عليكي والله عجبه الوضع كان بها معجبهوش يبقي كل شيئ قسمه ونصيب
-صح
-انا كنت غلط من البدايه لما سمحتلك تتكلمي مع نوح وتديله مشاعرك بدون اي مقابل منه ودلوقتي بندفع التمن
انتي مش عارفه ترجعي زي زمان ولا قادره تبعدي ولا قادره تقربي
مش هسمحلك تدخلي حد تاني حياتك ويدمرها بالشكل ده
اترميت في حضنها من غير ما انطق حرف والدموع بتلمع في عيني
وبصراحه مكانش حد قادر يفهمني ولا يحتوي حزني ويقدره غيرها هي واختي
-انا هكلم عمرو واقوله
-تمام يلا
فتحت الواتس ولقيته باعتلي علامه استفهام ..
اخدت نفس عميق ورديت عليه
-بص ياعمرو انا معنديش مشكله نتعرف علي بعض بس لو تدخل البيت من بابه وقدام اهلي في النور لاني مبحبش اعمل حاجه في السر أبداً
-انا معنديش مشكله لو تعرفيهم بس انا حالياً مش جاهز أخطب
-ولما انت مش جاهز عايز ترتبط بيا أزاي؟
-انا كنت حابب لو نتعرف علي بعض. فتره معينه وفي خلال الفتره دي اكون كونت نفسي وهاجي اتقدم
-يعني عايزني ارتبط بيك من غير اي حاجه رسمي
-صدقيني انا مش داخل العب بيكي انا فعلا معجب بيكي ونفسي لو تكوني من نصيبي
اخدت نفس طويل ورديت بعصبيه:
-وانا مش برتبط غير رسمي عايز تتقدم بيتي مفتوح يا استاذ عمرو
انا مش للتسليه لو علي التسليه في الف بنت غيري
-ياتاج انتي ليه بتقفشي انا مقولتش كده ابداً وانا مش بتسلي بيكي صدقيني
-سوري ياعمرو بس انا اعرفك منين عشان اثق فيك ؟
-طب ايه اللي يرضيكي وانا هعمله
-انا قولتلك ياعمرو عايز ترتبط بيا يبقي رسمي قدام اهلي وأهلك وكل الناس
-وانا دلوقتي لو دخلت لأهلك هقولهم ايه ،انا مش معايا اي حاجه لسه
-والله اللي عايز حد وبيتمناه من ربنا فعلا بيعمل ايه حاجه عشانه
مش بيجي من ورا أهله يقوله انا عايز ارتبط بيك وهو مش عارف أمتي ممكن يكون نفسه
وبعدين متزعلش مني انا معرفكش ،معرفش ان كنت جد ولا داخل تتسلي يومين وتمشي ،انا مشاعري مش لعبه
وبصراحه مضمنش حتي لو وقفت جنبك تيجي تتقدم ولا هتقولي لا أصل ماما مش موافقه لا اصل بابا جايبلي بنت عمي وعايزني أخطبها
انا بشوف بلاوي ياعمرو ،بشوف مشاكل تخليني مثقش في حد
وبصراحه مريت بتجربه استنزفت مني مشاعري وطاقتي وكل ما املك
مش حمل ادخل في تجربه تانيه معرفش نهايتها هتكون ايه ،اظن كلامي ميزعلش أبداً
شاف الماسدج ورد عليها بجمله خلتني اضحك بسخريه:
- تمام ربنا يوفقك ويسعدك
-يارب
قفلت المحادثه وانا ببص قدامي وبيتنهد براحه
اصل في الحقيقه لو مكنتش عملت كده كنت هرجع لنقطه الصفر بعد ما بدأت انسي !
كنت هستنزف طاقتي ومشاعري مع شخص مش مضمون
تجربتي الاولي علمتني مثقش في حد ولا في كلامه ولا نظراته ولا حتي تلميحاته
الكلام والنظرات والمشاعر كلها اشياء ممكن تتزيف
كلها اشياء ممكن تخليك طاير لسابع سما وبعدها توقعك على جدور رقبتك
تجربتي علمتني ان كلمه بحبك مش مجرد كلمه ممكن تتقال فتفرح اللي قدامك بيها وخلاص
كلمه بحبك افعال اكتر من اقول
افعال الشخص اللي قدامك
تمسكه بيك
تحمله اكتئابك وتوهانك وحالتك النفسيه
مجهوده ووقوفه في وش العالم وكأنه في حاله حر*ب عشان يفوز بيك في الآخر
كلها اشياء بتثبت فعلا أن الكلمه خارجه من القلب مش مجرد كلمه وخلاص
بعد مرور أسبوع
كنت واقفه في الكليه مع اصحابي وفجأه شوفت عمرو ماشي ومعاه بنت ماسكه في أيده
بصيت علي أيديهم ملقتش دبل
وقتها ابتسمت بسخرية وانا بحمد ربنا اني رفضت ارتبط بشخص زيه
بالرغم من كبر سنه إلا أنه في نظري عقله لسه منضجش كفايه
ومن المؤكد أن البنت دي هتاخد وقتها وحلاوه البدايات وبعدين هيروح لغيرها
هتفضل حياته زي الدايره ملهاش بدايه ولا نهايه !
صاحبتي وهي بتبصلهم بأحتقار :
-ده انت عيل تافهه كتك نيله في شكلك
بصيتلها باستغراب :
-في ايه
-شايفه البني ادم براس بخاخه اللي هناك ده
-عمرو؟
-ايه ده انتي تعرفيه
-ايوه بس ماله عملك ايه
-دخلي ياختي من كام يوم وقالي انا معجب بيكي وحابب لو نتعرف علي بعض ولو في قبول هكلم اهلك وبتاع
-الاه!!
-ايه في ايه
-اصله دخل كلمني وقالي نفس الكلام بالحرف
-بتهزري؟
-والله بجد ،طب وانتي قولتيله ايه
-رفضت طبعا ده عمرو ده الكليه كلها عارفاه بتاع بنات وكل يومين مع واحده شكل ده خ*زوق يجي عشرميت بنت لحد دلوقتي
-ربنا يهديه
-او ياخده ايهما أقرب
-حرام عليكي
-لا بجد ده بني آدم حق*ير عشم بنات كتير اوي ياتاج
اتنهدت وانا ببص قدامي بحزن :
-منه لله هو واي حد بيعشم بنات الناس ويوهمهم بمشاعر مزيفه
-فعلا حسبي الله ونعم الوكيل
بصيت في ساعه الفون وانا بقولها باستعجال :
-يلا نطلع علي الكورس
-يلا
روحنا الكورس وبدأ الدكتور يشرح وهو ما بين اللحظه والتانيه يبصلي بنظرات غريبه مقدرتش افهمها !
صاحبتي وهي بتهمسلي وهو بيكتب علي البورد:
-هو الدكتور بيبصلك كده ليه
رديت باستغراب :
-مش فاهمه بجد
رفعت ايديها للسما وهي بتدعي :
-يارب يبقي اللي في بالي يارب عايزه البس فستان يارب
كنت لسه هرد عليها بس هو لف وكمل شرح ونظراته مبتتغيرش
بدأت اتكسف وابص في كل مكان إلا عيونه لحد ما خلصنا علي خير
اول ما خلصنا لميت حاجاتي بسرعه عشان أهرب من نظراته اللي بدأت توترني
-تاج
بلعت ريقي وانا بلف وبرد بتوتر :
-ن نعم يادكتور
-ثواني عايز اتكلم معاكي
-ت تمام
فضلت واقفه انا وصاحبتي اللي كانت عماله تهمسلي بكلام وترني اكتر
-يادبله الخطوبه عقبالنا كلنا
رديت بغيظ :
-اخرسي يابت
-ياختي كميله بتتكسفي يابطه
رديت بنبره متوتره :
-تفتكري عايزني في ايه
-معروفه يعني واضحه زي الشمس بس انتي اللي مبتفهميش طول عمرك
-هي ايه اللي واضحه ؟
ضربتني علي دماغي بغيظ:
- الراجل معجب بيكي يا اذكي اخواتك
-معجب !!!
-ده شويه وهيقولك بحبك ،ده اللي قاعدين كلهم فهموا الا العاق اللي هو انتي يعني
كنت لسه هرد عليها بس هو كان خلص كلام مع الطلاب وقرب مننا
ابتسم وهو بيبصلنا وبيقول بجديه :
-ايه الاخبار
-تمام الحمد لله
اتنهد تنهيده طويله وبصلي وهو بيقولي :
-كنت عايز رقم والدك ياتاج
فتحت بوقي ببلاهه :
-رقم بابا ليه ؟
ابتسم علي رد فعلي :
-متقلقيش هتعرفي
-ا احم ح حاضر اتفضل *****
-تمام اتفضلوا
-عن اذنك
خرجنا من السنتر واول ما خرجنا صاحبتي اخدتني في حضنها بفرحه
-احلي عروسه كده كده
ضحكت علي رد فعلها وانا برد بكسوف:
-مش يمكن عايزه في حاجه تانيه
ردت بسخريه :
-جايز برضو ممكن مثلا يبقي عايز يلعب معاه كوتشينه
رديت باستفزاز :
-جايز
رفعت ايديها للسما بغيظ :
-يااااارب اشكو اليك ياااارب
ضحكت عليها وكملنا طريقنا وهي طول الطريق عماله تخطط هنعمل ايه في الخطوبه
روحت البيت وحكيت لماما اللي حصل وطبعا زي اي ست مصريه اصيله كانت طايره من الفرحه
بليل كلم بابا وقاله انه عايز يجي عشان يتقدملي وبابا بلغنا وقاله هرد عليك تيجي أمتي
-ها ياتاج اقوله يجي ولا لا
ماما بسرعه :
-ايوه طبعا خليه يجي
رد باستفزاز وهو بيرفع حاجبه :
-انا بسال تاج هل انتي تاج
ردت وهي بتاخدني في حضنها :
-لا امها حبيبتها ورأي من رأيها مش صح ياتاجي؟؟
ابتسمت بأحراج :
-صح ياقلبي
-يعني اقوله يجي يوم الخميس
-تمام يابابا خليه يجي
بليل كنت في اوضتي وفارده ظهري علي السرير وببص للسقف بشرود
في الحقيقه دكتور " مروان " شاب محترم
،جنتل ،مثقف ،وسيم ،ضحكته تخطف القلب
شخص مناسب اي بنت تتمناه
ليه لا ؟
ليه مديش لنفسي فرصه ادخل شخص زيه حياتي وخاصه وهو داخل من باب بيتي من غير لف ولا دوران
الفرص بتيجي مره في العمر وأعتقد لو شخص ضيع فرص عشان اوهام في دماغه هيفضل ندمان عليها العمر كله
يوم الخميس بليل كنت واقفه في اوضتي قدام المرايه وببص علي نفسي وقلبي بيدق بخوف وتوتر
كنت لابسه جامب سوت واسعه لونها اسود وشوذ احمر وطرحه حمرا وحاطه ميك اب رقيق جدا
اختي وهي بتقرب مني وبتعدلي هدومي بفرحه :
-زي القمر
-بجد شكلي حلو
ردت بمرح :
-يابختك ياعم مروان هتاخد سكر العيله
ضحكت بكسوف على كلامها وشويه ولقيت ماما بتخبط عشان اخرج
اخدت نفس عميق وخرجت معاها وانا حاطه وشي في الأرض بأحراج وتوتر
-السلام عليكم
-وعليكم من السلام ورحمه الله وبركاته
سلمت علي أهله وعليه وقعدت معاهم شويه وفي الحقيقه التوتر راح لأنهم كانوا ناس لطيفه جدا
شويه ولقيت نفسي قاعده معاه لوحدنا
-عامله ايه
ابتسمت ابتسامه مهزوزه:
-ت تمام الحمد لله
-ماشاء الله شكلك زي القمر
رديت ووشي احمر من الكسوف :
-ربنا يخليك يادكتور
رد بمرح :
-بقي بذمتك في واحده تقول لخطيبها يادكتور
رفعت راسي وضحكت :
-مانا متعوده طيب اعمل ايه
-لا حاولي تتأقلمي قوليلي مروان عادي
-حاضر
اتنهد وبصلي بجديه :
- طيب في أي حاجه عايزه تسأليني عنها
-بصراحه اه
-اتفضلي
-انا لو حبيت اشتغل بعد الجواز هتوافق ولا لا ؟
-وماله الشغل مش عيب بس اتمني الشغل ميأثرش علي حياتنا
رديت بلهفه :
-لا متقلقش هواظب ما بين الشغل والبيت أن شاء الله
ابتسم بتفاهم :
-وانا معنديش مشكله ابدا وهساعدك تبقي ناجحه وهكون فخور بيكي جدا كمان
ابتسمت علي كلامه وانا بهز راسي بفرحه :
-بجد
-بجد طبعاً
-طب انت حابب تسألني علي حاجه
-اه
-اتفضل
-بصي طبعا أنا مش داخل افرض عليكي رأي ابدا وانا معجب بيكي وبأخلاقك عشان كده اتقدمت
بس هي في حاجه واحده اتمني تغيريها
-ايه هي ؟
-بصي انتي الجيبات والفساتين بتكون جميله اوي عليكي بجد اتمني يبقي استايلك كله كده
وقبل ما تعترضي صدقيني انا مش بفرض عليكي رأي انا بس حابب نبدأ حياتنا صح
يعني مره شوفت بوست ليكي كنتي كاتبه انك نفسك في شخص ياخد بأيدك للجنه تسمحيلي اكون انا الشخص ده !
هزيت راسي بفرحه :
-طبعا
ابتسم ابتسامه خطفت قلبي وهز رأسه :
-يبقي علي بركه الله
قعدنا نتكلم شويه واكتشفت أنه شخص لطيف جدا وشويه ودخلوا وقرانا الفاتحه وانا جوايا مبسوطه بشكل ميتوصفش
خلص اليوم ونزلت علي الفيس والواتس اني اتخطبت وكان أول واحد يشوف الحاله هو " نوح "
-الف الف مليون مبروك ربنا يتمملك بخير يارب
شوفت الماسدج بتاعته ورديت ببرود:
-الله يبارك فيك عقبالك يانوح
-يارب
شويه ولقيته منزل استوري
ليكي حق تشوفي نفسك
ف شخص غيري بيحتويكي
كان بيعرف امتى اكلك
امتى شُربك و العلاج
كان بيعرف يشتريكي
اول ما شوفت الاستوري ابتسمت بفرحه بعد ما شوفت ندمه
وقتها اخدت نفس طويل جدا وانا شايفه حقي بيجيلي من غير مجهود مني
اما عن مروان نزل ايدينا بالدبل وهو كاتب عليها كابشن خطف قلبي زي صاحبه
حدثت الله عنك، أخبرته أن قلبي معقود بقلبك، و أنك أشد أشيائي حبًا، دعوته أن يُبقيك لي و معي ♥️💍
تمت
#تاج
#إيمان_شلبي
وفر وقتك… لو بتدور على رواية كاملة وممتعة… اضغط (هنا)
