اسكريبت حمل غير مرغوب الفصل الثاني 2 بقلم أسماء مصطفى

اسكريبت حمل غير مرغوب عبر روايات الخلاصة بقلم أسماء مصطفى

اسكريبت حمل غير مرغوب الفصل الثاني 2

حسيت الدنيا بتلف بيا ومش قادر اسند نفسي، مش سامع غير صوت الدكتور وهو بيزعق بعصبية وبيقول لازمها انعاش قلب بسرعة

حاولت ادخلها بس منعوني، كنت عايز اشوفها واتطمن عليها، وقفت اشوفها من بره، الدكتور بيعملها انعاش قلب وهي بتتنفض وجسمها بيتهز، مع كل صدمة كهربية بتاخدها بالجهاز كان قلبي بيتكسر عليها

لسه في اول جوازنا مكملناش خمس شهور، وبدل ما اكون واقف معاها بفسحها ونقضي وقت حلو، بقيت واقف مستني حد يخرج يطمني عليها، يقولي بس انها كويسة ولسة عايشة، انها بخير، كنت سامع صوت صفارة جهاز القلب وقلبي بيدق برعب، خايف اخسرها، لحد ما اتنهدت براحة اول ما لقيت الجهاز بدأ يشتغل تاني

قعدت وانا مهدود وحاسس بصداع شديد، حطيت راسي بين ايديا ودعيت ربنا يتمم شفاها على خير، انا مليش غيرها

الدكتور سمح ليا ادخلها لما فاقت وطول الوقت دا كنت ببص عليها من بره

دخلت وهي كانت باصة على السقف ودموعها بتنزل بصمت، بصت ليا نظرة عمري ما انساها، نظرة لوم وعتاب وكأنها بتقولي انت السبب

وفعلاً انا كنت السبب، انا اعترضت على نعمة ربنا من الاول واهو ربنا استرد أمانته، وراح ابني اللي مكنتش عايزه، زعلت اوي عليه، اصل كنت اتأقلمت على الوضع خلاص وسمحت لقلبي هو اللي يتحكم وركنت عقلي، فا اتحركت مشاعر الأبوة والمسؤولية

بقيت عايزه ييجي النهارده قبل بكره، بس دلوقتي راح مني وكل دا ليه، عشان مرضتش بأمر ربنا والنعمة اللي مَنّ عليا بيها

مسكت ايدها وقولت وانا بحاول اتحكم في نبرة صوتي اللي طلعت مهزوزة غصب عني

_ زهرة، انتِ كويسة؟ 

حركت راسها بنفي من غير ولا كلمة وبدأ عياطها يزيد وصوتها يعلى، قعدت جنبها على السرسر وخدتها في حضني وبدأت اطبطب عليها، قلبي كان بيتألم عليها واحساسي بالذنب تجاها بيزيد اكتر

هي دلوقتي تعبانة جسديًا ونفسيًا، فقدت ابنها قبل ما ييجي على الدنيا والوقعة اللي وقعتها أثرت عليها ورجليها اتكسرت

اتكلمت وقولتها وانا بحاول اهديها

_ انا اسف يا زهرتي، حقك عليا، الحمدلله انك بخير ورجعتيلي بالسلامه 

بعدت عني وقالت وهي بتمسح دموعها

_ انا عايزه اروح يا رائد، مش عايزه اقعد هنا المكان خانقني اوي

_ حاضر يا حبيبتي الدكتور لسه مقالش هنطلع امتى

_ انا مش هقدر اقعد هنا انا كويسة بس عايزة ارتاح في بيتي

_ حاضر هتصرف

اخدت اذن اننا نمشي مع تعليمات الدكتور ليا اني اهتم بيها كويس عشان الوقعة كانت صعبة عليها وهي فعلاً كانت تعبانة

عدى سبع شهور على الفترة دي، وفي يوم جت قالتلي انها هتنزل مع صحابها، وافقت، في الليل لما رجعت البيت لقيتها قاعدة على السرير مستنياني، وكان باين عليها التوتر والقلق

قربت منها وقولت بهدوء عشان اعرف مالها

_ فيه ايه يا زهرتي، مالك كدا متوترة وخايفة

مدتلي اديها بورق وكان باين انه تحاليل، مدتهولي من غير ما تنطق وهي على نفس التوتر، استغربتها اوي، لكن قولت لما اشوف التحاليل مالها

كنت بفتح التحاليل بخوف وانا خايف يطلع عندها مرض او تعبانه، بس حمدت ربنا لما قريت اللي مكتوب، كان مكتوب Positive، اجابي، طلعت حامل!! 

حضنتها بفرحة وانا بقول

_ الف مبروك يا حبيبي انا مبسوط جدًا، الحمدلله يارب 

بعدت عني وعلى ملامح وشها الاستغراب وقالت

_ انت مش زعلان؟!! 

فهمت قصدها وانها لسه فاكره اول مره، وليها حق اكيد مش هتنساها

اتنهدت وقولت وانا نفسي ربنا يسامحني على اعتراضي الغير مبرر وقولت

_ زهرة انا اتعلمت من المرة اللي فاتت، وحقيقي انا زعلت اوي لما فقدنا الجنين ومش عارف اسامح نفسي، زعلت عليه بالرغم من اني في الاول ما كنتش عايزه، بس دلوقتي بعد ما ربنا كرمنا تاني انا بجد مبسوط ومستني اللحظة اللي هتولدي فيها

اول ما سمعت كلامي ابتسمت ابتسامة واسعة وفرحت وجريت عليا وحضنتني وقالت وصوتها بيغلب عليه الفرح والتأثر

_ انا مبسوطه اوي اوي عشان انت كمان مبسوط، عارف؟ انا كنت خايفة اوي تكون مش فرحان وتزعل زي المره اللي فاتت، بس هو دا نصيبنا والحمدلله 

بعدتها عني ومسكت وشها بين ايديا وقولت بحب

_ عايزها بنوتة شبهك

اتكسفت وقالت بخجل

_ وانا كمان عايزاها بنوتة عشان بحب البنات اوي

بعد شهرين جه معاد الكشف بتاعها، كنت متابعلها مع دكتورة عشان اتطمن عليها، روحنا وبعد ما دخلنا قعدت شوية لحد ما الدكتورة خلصتلها السونار

اتكلمت باضراب من ملامح الدكتورة اللي ما بتبشرش بالخير وقولت بتساؤل

_ طمنيني يا دكتورة هي كويسة والبيبي كمان كويس؟ 

اتكلمت وقالت

_ للأسف الجنين ميت بقاله اسبوع

اتصدمت ومقدرتش اتكلم، خايف عليها اوي، زهرة معاتبتنيش ولا قالتلي اني السبب بس انا حاسس بيها، بصيت عليها لقيتها بتعيط والدكتورة بتهديها وهي بتقول

_ اهدي يا مدام زهرة دي مش اول ولا آخر مرة هتحملي فيها، ربنا يرزقك بذرية صالحة بإذن الله، تابعي سواء معايا او اي دكتور تاني وربنا هيرزقك بإذن الله، بس لازم ننزل البيبي مينفعش يقعد اكتر من كدا عشان دا خطر عليكي

شكرت الدكتورة وخدتها ومشيت بعد ما اتفقنا اننا هنروحلها المستفى بكرا

اتمشينا في الشارع واشريتلها عصير وبسكوت وحاولت اخفف عنها 

جه تاني يوم روحنا المستشفى وهي كانت زعلانه والدموع متجمعة في عنيها، مش هاين عليها تدخل اوضة العمليات 

شجعتها وانا بقول

_ دا نصيب يا زهرة ولازم نرضى بأمر ربنا، مش انتِ اللي دايمًا بتقوليلي كدا، انا واثق ان ربنا هيرزقنا بإذن الله، احمدي ربنا وتوكلي عليه واتركي الامر كله لله، دا انتِ حافظة القرآن حتى

ربنا بيقول في كتابه العزيز

﴿وعسى أن تكرهوا شيئًا وهو خيرٌ لكم وعسى أن تحبوا شيئًا وهو شرٌ لكم والله يعلم وأنتم لا تعلمون﴾

دخلت العمليات وانا فضلت ادعيلها لحد ما خرجت، كانت تعبانة وباين عليها الارهاق اوي، بس انا حمدت ربنا ودعيته يقوينا ويصبرنا ويغفرلنا كل ذنوبنا

عدت سنة بعد الفترة دي وحملت لتالت مره، لكن يشاء الله ان الحمل ميكملش برضو

حملت رابع وخامس وبرضو الحمل مكنش بيكمل 

في الحمل الخامس دا كان بقالنا اربع سنين متجوزين، ساعتها بعد ما اجهضت الدكتور قال انه خطر عليها تحمل تاني وهتقعد فترة عشان متتعبش وميحصلهاش اي مشاكل

دخلتلها الاوضة وكانت بتعيط كالعادة، جيت امسك اديها بعدت عني وقال بصوت مكسور

_ سمعت الدكتور قال ايه، قال انه هقعد فترة مش هخلف ومش عارفين ممكن اخلف تاني ولا لأ بعد المشاكل اللي حصلتلي في الرحم

رائد انا عايزة اروح عند ماما اقعد فترة هناك عشان ارتاح، مش عايزه ارجع البيت دلوقتي 

راحت عند اهلها قعدت فترة وكنت بزورها يوميًا لحد ما نفسيتها اتظبطت شويه وبعدين رجعت البيت

وبالفعل قعدنا سنتين بعد كلام الدكتور لينا، وعمرها ما لامتني وقالتلي اني السبب عشان اعترضت على نعمة ربنا وجحدت عليها، لكن انا كنت حاسس بيها وبكل الكلام اللي جواها

وفي يوم كنت في الشغل وفي وسط مانا مندمج في اللاب لقيت مكالمة من ماما، رديت عليها واول ما فتحت لقيتها بتصرخ وهي بتقول

_ تعالى يا رائد بسرعة، زهرة تعبانة اوي، احنا في مستشفى***

#يُتْبَع

اسكريبت حمل غير مرغوب الفصل الثالث 3 والأخير من هنا

اسكريبت حمل غير مرغوب كامل من هنا