اسكريبت حمل غير مرغوب الفصل الثالث 3 والأخير بقلم أسماء مصطفى

اسكريبت حمل غير مرغوب عبر روايات الخلاصة بقلم أسماء مصطفى

اسكريبت حمل غير مرغوب الفصل الثالث 3 والأخير

روحت المستشفى وانا طول الطريق بدعي ميكونش حصلها حاجه، الدكتور اكد عليا انها مينفعش تتعب لان مناعتها ضعفت بعد اخر مره وانها مش بتستحمل

روحت ولقيت الدكتور واقف بيتكلم مع بابا، جريت عليه وانا بقوله

_ طمني يا دكتور هي كويسة؟ هي فين؟ انا عايز اشوفها

اتكلمت والدتي وهي بتحضني وقالت بفرحة

_ زهرة حامل يا رائد، حامل في شهرين

اتصدمت من كلامها ومكنتش مهتم بصراحة بالرغم من اني كنت مبسوط اوي بالخبر، بس كنت خايف يحصل زي كل مرة والحمل ما يكملش، عشان هي بتتعب اوي، جسديًا ونفسيًا 

بعد دقايق دخلتلها وكانت نايمة لسه مفاقتش، قعدت جنبها وانا بقرألها سورة يوسف عشان بتحبها اوي

بعدها بشوية وانا بقرأ فاقت، قومتها بالراحة وعدلتها وقولتلها

_ الف مبروك 

ردت عليا وهي بتكشر وبتقول بابتسامة صغيره 

_ الناس لما حد بيتعب بيقولولها الف سلامه وانت بتقولي الف مبروك! انت شمتان فيا ولا ايه؟ 

ضحكت ومسكت ايدها وقولتها

_ انتِ حامل يا زهرة

ملامحها اتجمدت وهي بتحاول تستوعب اللي انا قولته، لحد ما قولتلها

_ احنا هنعمل اللي علينا ونتابع مع الدكتورة بتاعتك ونهتم بكل حاجه عشان متتعبيش ونوكل امرنا لله، قولي الحمدلله واشكري ربك، وخليكِ واثقة انه خير بإذن الله 

حسيت بعد الكلمتين دول ملامحها ارتاحت شوية وبدأت تلين، لكن خوفها وقلقها كان واضح، كنت حاسس بيها، اصل صعب برضو انها ما تكونش خايفة بعد اللي مرت بيه، لكن، ربنا كريم ولطيف

مرت شهور الحمل على خير وجه معاد الولادة، في اليوم اللي هي هتولد فيه كانت داخلة العمليات واحنا لسة مش مصدقين ان ربنا مَنّ علينا وكلها ساعة واشوف بنتي

دخلت العمليات وانا قعدت اصلي وادعيلها كتير، وبعد شوية وقت مش عارف قد ايه، سمعت صوت صراخ طفل صغير، عرفت انها ولدت

جريت اتطمن عليها قبل ما اشوف بنتي حتى

دخلت واستنيتها لما فاقت من البنج، واول ما فاقت سألت على بنتا واتكلمت بدموع

_ فين؟ هي فين يا رائد؟ قولي انها كويسة 

ابتسمتلها بحب وقولت

_ الحمدلله هي بخير ما تقلقيش، انا مرضتش اشوفها غير لما تصحي، دقيقة اجيبها واجي

طلعت بره كانت والدتي شايلاها، خدتها منها وانا بسمي الله وبعدها أذنت في ودنها ودعيتلها تكون ذرية صالحة

دخلت وحطيتها بين اديها وهي ماكانتش بتعمل حاجه غير انها بتهدهدها وهي بتعيط ومبسوطة

كنت فاهم شعورها عمةً، قعدت جنبها وخدتهم هم الاتنين في حضني وبوست راسها بعدين بعدتها عني ومسكت ايدها بوستها كمان وقولتلها

_ انتِ اللي هتختاري اسمها عشان انتِ استحملتي اكتر مني، استحملتي كتير اوي، محدش ليه حق يسميها غيرك

ردت عليا وقالت بحب 

هسميها «رؤيا» 

هسميها على اسم اختك الله يرحمها، انا فاكرة ايام خطوبتنا حكيتلي عليها قد ايه وانك كنت بتحبها ومتعلق بيها اوي وانك نفسك في بنوتة تسميها رؤيا على اسمها

انت وريتني صورتها وهي صغيره ووهي كبيرة وحاسة بنتا هتكون شبهها اوي

هسميها رؤيا واتمنى تكون زي رؤيتك وفي نفس مكانتها

ابتسمت وقلبي كان مبسوط اوي وحاسس براحة بقالي فترة محستهاش، حاسس بسلام نفسي، ونعم ربنا محاوطاني من كل اتجاه

غمضت عيوني ودعيت ربني من قلبي وقولت

_"اللهم اغفر لي ذنبي كله، ما قدمت وما أخرت وما أعلنت وما أسررت وما أنت أعلمُ به مني، اللهم بارك لي في زوجتي وابنتي وقِرَّ عيني بهما، اللهم ارضَ عني وارضني وراضني، اللهم الرضا في كل شيء، الحمدلله على نعمك وفضلك عليَّ يا أرحم الراحمين" 

رجعت حضنتها تاني وهي شايلة بنتنا بين اديها وهمست جنب ودنها وقولت

- فى حد دايما يقولى :

الحنينين دايماً عُيونهم حُلوة.

وانتِ عِيونك حُلوة  › •

#تمت

#حملٌ_غيرُ_مرغوب

#Asmaa_Mostafa 

اسكريبت حمل غير مرغوب كامل من هنا