رواية مغامرات عائلية الفصل الثالث عشر 13 الجزء الثاني 2 بقلم همس كاتبه
رواية مغامرات عائلية الفصل الثالث عشر 13 الجزء الثاني 2
صعد زياد للاعلى بسرعة .. وجد لارا تركض وراء كارما و تضربها بحذائها بقوة
زياد و هو يدفع لارا : ابعدي عنها يا لارا .. في ايييه ؟؟؟
لارا بغضب : اختك مش متربية
كارما ببكاء : دي بنت مش طبيعية اقسم بالله .. ملحقتش اتكلم معاها قامت ضربتني
فريدة بغضب : ليه بتضربيها ؟ عملتلك ايه ؟
لارا : شتمتني
كارما : كدابة و الله ما شتمتها
سحر بحزم : كفاية .. امشو عند جدكم هو الي يفهم الحكاية
كارما : انا و الله ما عملت حاجة
لارا : دي مواضيع بنات مش هنقولها لجدو يعني يا طنط
سحر : يبقى انا هقول لمامتك و تحلها مع فريدة بقا
لارا بغضب : انا مش صغيرة عشان تقولي لماما عليا
غادة : لارا احترمي نفسك و انتي بتكلمي طنط سحر .. امشي قدامي عند ماما
لارا لكارما : و الله لانزل اقول لجدو و اخليه يعاقبك
نزلت لارا بسرعة لمكتب جدها
زياد : ايه الي حصل يا حبيبتي ؟ ليه اتخانقتو ؟
كارما : كنا بنكلم عادي و لما حاولت انصحها جريت ورايا و قعدت تضربني
فريدة : طب انتي كويسة دلوقتي ؟
كارما ببكاء : و الله لو جدو زعل مني لاضربها زي ما ضربتني
بعد دقائق … اتى مصطفى و قال : كارما جدو عايزك تحت
كارما : متعصب ؟
مصطفى : اوي .. ده بهدل لارا و دلوقتي هيبهدلك انتي كمان انزليله يلا
زياد بحدة : اتلم يالا .. ما تخافيش يا حبيبتي مش هيحصل حاجة امشي انا جاي معاكي
غادة : استنا هاجي معاكم
نزلو ثلاثتهم الى اوضة المكتب
عبد الله : زياد خد خطيبتك و اطلع برا
زياد : انا عايز افهم ليه لارا ضربتها .. عايز سبب مقنع .. مش على اساس الضرب ممنوع هنا ؟!
عبد الله : زي ما انت اخوها انا جدهم هما الاتنين .. اطلع برا و سيبني اشوف حكايتهم
زياد بعدم رضا : حاضر .. امشي يا غادة
غادة : لارا ..كرملة .. افتكرو ان الكدب حرام و هتخشو النار لو كدبتو على جدو .. عن اذنكم
خرج زياد و غادة
عبدالله : ايه الحكاية يا كارما ؟!
كارما ببكاء : و الله يا جدو انا كنت بكلمها عادي
لارا بمقاطعة : كدابة انتي كنتي بتعايريني
عبد الله : لارا مش عايز اسمع صوتك .. ما تقاطعيهاش و خليها تقول الي عندها
لارا بدموع : دلوقتي هتقول معاها الحق .. انا اتعودت على كدة
عبد الله : لا يا لارا .. انتو الاتنين بالنسبالي زي بعض .. هحكم بينكم بالعدل و هتتعاقبو على اغلاطكم .. احكيلي يا كارما ايه الي قولتيه ؟
كارما بتوتر : جدو انا مقولتش حاجة غلط .. انا بس كنت بنصحها
لارا بغضب : لا قولتي عليا بتاعة رجالة و بلف عليهم
عبد الله بصدمة : معقولة يا كارما ؟!
كارما ببكاء : و الله ما قولت كدة انا بس كنت بتكلم معاها و افهمها انها بتفكر غلط .. جدو .. لارا اول ما بتشوف راجل بتتكلم عليه على طول حتى لو كان كبير .. حتى جوز تيتة زيزي ما سلمش من لسانها و …
عبد الله بمقاطعة : بس .. عيب الكلام ده يا كارما .. و انتي يا لارا عيب تفكري بالطريقة دي .. واضح اننا قصرنا بتربيتكم .. الحاجات دي اكبر من سنكم
لارا : جدو احنا كبرنا و بقينا فاهمين الدنيا ماشية ازاي .. بس العيب هو ان صاحبتي الي بقولها كل حاجة تروح تفضحني و كمان تغلط بيا
عبد الله : كرملة .. سيبني مع لارا شوية
كارما : حاضر يا جدو
خرجت كارما و بقيت لارا .. قام عبد الله و جلس مقابلها
عبد الله : لارا يا بنتي .. انتي شايفة نفسك كبرتي عشان خلصتي الثانوية بس الحقيقة ان لسا قدامك طريق طويل تغلطي و تتعلمي فيه .. بكرا لما تكبري شوية هتقعدي تتريقي على الايام دي .. لازم تفهمي يا لارا ان البنت ملهاش غير سمعتها .. يعني الكلام ده الي بتقوليه لصحابك تأكدي انه مش هيفضل سر بينكم .. ربنا خلق لينا قلب عشان نحب و نتحب .. بس بنفس الوقت خلق لينا عقل عشان نميز بين الصح و الغلط
لارا : يا جدو انا مش بفكر كدة اقسم بالله .. انا بس قولت رأيي لبنت عمي الي كنت فاكراها صاحبتي .. كنا بنتناقش عادي قامت هيا عايرتني و بقت تغلط بيا
عبد الله : انا عارف كارما كويس .. لو كانت بتعايرك بجد كان راحت قالت للبنات .. بس كارما خايفة على مصلحتك و يمكن خانها التعبير و انتو بتتكلمو .. في حاجات كتير تفكري فيها اهم من المواضيع التافهة دي .. انتي بنت شاطرة و شخصيتك قوية .. استغلي ده عشان تبقى بشمهندسة نفتخر بيها .. فكري بطموحك و نجاحك يا لارا
لارا بانفعال : اقسم بالله ما بفكر غير بمذاكرتي .. الكل واخد عني فكرة سيئة و مع اول خناقة كله بيصف ضدي .. بابا و ماما شايفين غادة البنت المثالية و دايما هيا الصح .. و هنا كلهم شايفيني عدوانية .. حتى كارما اول ما اتصاحبت على حبيبة بعدت عني
عبد الله : طب فكري معايا كدة بتصرفاتك … انتي شايفة انك كويسة مع الكل ؟
لارا : اوك انا بتخنق بسرعة و بقول الي في قلبي على طول .. بس ده مش معناه اني ما اتعاشرش .. لو هما بيحبوني كان استحملوني زي ما انا
عبد الله : و لو انتي بتحبيهم مش هتجرحي حد .. لو انتي بتحبي كارما كنت قبلتي على الاقل تسمعي نصيحتها .. بس انتي ما بتحبيش حد يكون فاهم اكتر منك مش كدة ؟
لارا بتفكير : اوك يعني .. بس ده مش معناه اني بنت مش كويسة
عبد الله : و مين قال كدة ؟ انتي بنت عندك مميزات كتير بس انتي مش شايفاها .. لو قعدتي مع نفسك شوية هتفهمي كلامي .. البنت الي اتخانقتي معاها من شوية دي كانت تقعد تعيط و تكلمني على مميزاتك و طيبتك يا لارا .. كانت اول مرة احس بيها ان كارما قلبها عليكي و بتحبك بجد .. دي كانت بتعد الايام لفرح زياد عشان تجتمعو عندي و تشوفك
لارا : منا كمان بحبها و بقولها على كل حاجة بتحصل معايا يا جدو
عبد الله : بس بتجرحيها .. و بتتريقي على اي حاجة هيا بتقولهالك .. رغم انها الوحيدة الي بتسمعك و بتفهم مشاكلك
لارا : اهي بتقولك على كل حاجة .. يعني خانتني
عبد الله : و فيها ايه لما تحكيلي على مشاكلك ؟! دي كدة بتحاول تساعدك تفوقي .. انا جدكم و انتي عارفة طبعي .. لا انا باباكي عشان اضربك و لا امك عشان ازعقلك
لارا بابتسامة : بس حضرتك جدو الي بتعاقب .. يعني مش سالكين
عبد الله : اممم .. طب قومي اندهيلي كارما
لارا : مخاصماها
عبد الله : ده بينك و بينها .. قومي يا بت اندهيلها
لارا بخوف : حاضر حاضر
بعد دقائق دلفت كارما و لارا
كارما : ايوة يا جدو
عبدالله : انتي و لارا من النهاردة هتخدمو على كل الي في البيت .. عقوبة خفيفة كدة على الهبل الي عملتوه
كارما بفزع : خفيفة ؟!
عبد الله : عندك اعتراض ؟
كارما بتوتر : لو حضرتك هتسامحني معنديش مشكلة ابقى شغالة للقطيع الي برا ده
عبد الله : هسامحك يا حبيبتي بس بعد ما تتعاقبي
لارا : جدو ما احنا كنا كويسين من شوية ايه الي حصل ؟!
عبد الله : ده قانون و لازم يسري على الجميع .. انتو مش احسن من فارس و حلا عشان اعفيكم
لارا برجاء : دلوقتي كلهم هيرخمو علينا و يتعبونا يا جدو
عبد الله : مش عايز اسمع اعتراض .. يلا على شغلكم
لارا بتمتمة : فينك يا زيزي الله يرحم ايامك
عبد الله : بتقولي حاجة ؟
لارا : طب ينفع نتصالح انا و كارما و تعفينا من العقوبة ؟
عبد الله : لا مينفعش .. لو عايزين تتصالحو اتصالحو من غير شروط .. يلا لارا اعملي الشاي و انتي يا كارما وضبي الجنينة عشان هنقعد فيها
********************
فارس بملل : الواد ده زنان .. خوده شوية يا تميم
تميم : حبيب بابي يا ناس .. ما ينفعش اشيله دي عقوبتك انت
فارس : انت بني ادم رخم .. و ما شاء الله ابنك واخد كل رخامتك
فريدة من وراه : امسك غيرله هدومه
فارس : ليه ؟ ما اهو مستريح بدول
فريدة : انت مالك ؟ انا مامته و عارفة مصلحته اكتر منك
فارس : ايه المصيبة دي يا ربي … ام و اب ارخم من بعض
نزلت حبيبة مع دينا
دينا بضحك : ايه الحلاوة دي يمامي فارس
فارس : اتلمي يا رخمة .. فين حلا ؟
حبيبة : بتحفظ الكتاب الي اداهولها جدو
فارس : طب واحدة فيكم تجري تطلعلها اكل قبل ما تفضحنا
دينا : يخلاثيي .. بقيتي مامي اوي يا فروسة
حبيبة : هات انا هغيرله
فارس : بجد ؟؟ كتر خيرك ده انتي جدعة
فريدة : لا … ممنوع دي عقوبته
حبيبة : مالك يا بنتي ؟ مش هيحصل حاجة لو ساعدناه شوية .. ده فارس مش زيزي يا قادرة
فارس : يا اصيلة يا بنت الاصول .. خودي اهو
فريدة : طبعا منتي ضامنة مش هتتعاقبي
تميم : فعلا حبيبة عمرها ما اتعاقبت .. دي عنصرية بحت
حبيبة : لا و الله مش عنصرية .. انا بس مليش بجنانكم
دينا : ما كل مرة بنتعاقب بسببك انتي و جوزك المغرور
حبيبة : دينا اتلمي .. اقسم بالله كل حاجة بتحصل من جنانك انتي و فارس
دينا : طب خلاص مش هنقعد نتعاتب بعد ما العقوبة خلصت
فريدة : كارما و لارا برضو اتعاقبو يا بنات .. هيبقى شغالين عندنا
دينا : بجد ؟! و الله لاقرفهم طلبات
زياد : اتلمي و ما تزوديهاش .. كارما مش ناقصة
غادة : و لا لارا ناقصة يا زياد بلاش حقد
زياد : و الله لارا الي ضربتها … دي لسانها طويل اصلا و ادي ايدها كمان طولت
غادة : و انت مالك ؟ مش جدو قال هيحلها ؟ خلاص يبقى ملناش دعوة
حبيبة : هو ليه دايما كل راجل بيكون مش طايق اخت مراته ؟!
فارس : مين قالك كدة ده انتي عزيزة عليا جدا بس خودي ده و النبي
حبيبة : ده استغلال مش محبة
زياد : معرفش ليه دايما اخت الزوجة بيكون دمها تقيل و بتلزق كدة
تميم : بس انا عمري ما قولت كدة على كارما .. بالعكس دي غلبانة
زياد : اه اخواتي انا حاجة تانية .. انا بتكلم على اخوات الناس التانين
وكزته غادة و قالت : اتلم
تميم : اخواتك حاجة تانية ؟؟ و المفترية دي عادي تبهدلني معاها ؟!
زياد : دي حاجة خاصة بينكم انا مالي
فريدة بحدة : زياد .. قول لابن عمك يتلم
زياد : فارس اتلم
فريدة بغضب : مش ده .. التاني
زياد بضحك : ااه … تميم اتلم
تميم : زياااد .. قول لاختك لينا بيت يلمنا
زياد : فريدة تميم بيقولك لينا بيت يلمنا
فريدة : قوله مش قاعداله فيه .. انا هنام الليلة عند اختي حبيبتي
زياد: هو انا ببغاء عندك انتي و هو ؟ ما اهو قاعد قدامك كلميه
فريدة : ما بكلمش كدابين
تميم بغضب : زياد قول لاختك تقصر لسانها
فريدة : زياد قوله …
حبيبة بانفعال : كفايةةةة .. ما تتلمو انتو الاتنين و تبطلو هبل العيال ده
تميم بصدمة : ايه ده حبيبة بتشخط بيا ؟!
فريدة باستغراب : مالك يا بت ؟ حد داسلك على طرف ؟
حبيبة بغضب : انا اعصابي مش مستحملة .. اقسم بالله لو ما اتلمتوش هروح لجدو و اقوله يعاقبكم انتو الاتنين
تميم : يا حلاوة .. دي حبيبة ؟!!!
دينا : لا دي هرموناتها .. اتعودنا
حبيبة : اتلمي انتي كمان .. فين البسبوسة الي طلبتها ؟
دينا : انتي طلبتي موس شوكلا يا بت
حبيبة : و دلوقتي عايزة بسبوسة .. روحي اعمليها
دينا : منا الشغالة الفليبنية الي جابهالك جوزك مش كدة ؟! اتلمي يا حبيبة انتي حامل مش عايزة اجيبك من شعرك
حبيبة ببكاء : كمان عايزة تضربيني ؟!
دينا : دخلنا مرحلة الصعبنيات .. هروح اعملهالك حالك بس اكتمي تانك المية ده
************************
بعد وقت اجتمعو في الحديقة .. كان فارس يضع وسادة على قدميه و يضع فوقها اسر و يهزه … و حلا تقرأ بصوت عالي و تحفظ الكتاب
عبدالله : فين اوس ؟
حبيبة : قالي هيروح يقابل صاحبه .. بس اتاخر اوي
سحر : معلش يا حبيبتي .. هيا الحياة كدة اول ما الراجل يبقى متجوز بيخرج بالساعات و ما بتبقيش عارفاله مواعيد
حبيبة : بس اوس ما كانش بيتأخر على البيت
سعاد : قعدة الصحاب غير .. خودي يا حبيبتي
مدت لها طبق من البلح
حبيبة : لا مش عايزة
سعاد : لازم تاكلي منه ده مفيد جدا للولادة هيساعدك تولدي بسرعة
حبيبة : بجد ؟
سعاد : طبعا مهو مذكور في القرآن في سورة مريم الي بتقريها كل يوم
حبيبة : بس حسب ما اعرف انه لبعد الولادة مش بيسرع الولادة نفسها
تميم : مفيش دراسات بتأكد انه بيساعد على الولاده .. بس برضو فيه عناصر غذائية مهمة بتدي طاقة للجسم
فارس : انت بقيت دكتور نسا ياض ؟
حبيبة : معلش يماما خليه لبعدين مش قادرة اكل
حلا بغضب : ما تاكلي منه و انتي ساكتة .. و لا اقولك هاتي هاكله انا
سعاد : اتلمي انتي
حلا: منا قاعدة بحفظ لازمني طاقة
سعاد : طب خودي يا طفسة
احضرت لارا الشاي و قالت : اي اوامر تانية ؟
حبيبة بخبث : ايه ده شاي عادي ؟ لا انا عايزة شاي كرك
حلا : و انا شاي بلبن
فارس : خليهم اتنين
دينا : انا اعمليلي سبانيش لاتيه
لارا : و الله ؟! امته هلحق اعملهم دول ؟ و بعدين الشاي الي انتي عايزاه يختي معرفش اعمله
حبيبة : في يوتيوب اتعملي منه
لارا بسخرية : كنتي اتعلمي انتي يكش تفلحي بحاجة
حبيبة : جدو دي بتلقح عليا
عبدالله : لارا احنا قولنا ايه ؟ يلا شوفي شغلك
لارا : اشمعنا كارما قاعدة و انا بس الي اشتغل ؟
حبيبة : احنا بنحب الشاي من ايديكي .. كارما ما بتعرفش تعمله زيك
دينا : اه دي مش فاهمة حاجة .. من ايديكي هيكون تحفة
لارا بابتسامة : اوك هروح اعملهم حالا
ذهبت لارا بسرعة للمطبخ
خديجة بضحك : حرام عليكي انتي و هيا ضحكتو عليها
دينا : ادينا بنعلمهالك حاجة مفيدة
فارس : ده بيعيط ليه دلوقتي ؟!
فريدة : عايز لبن .. قوم اعمله
فارس بملل : اهي العلبة لسا فيها شوية
فريدة : اوعى … ارميه حالا و اعمل واحد جديد
فارس : ليه هو تعب و خلاص ؟!
تميم : انت حمار يبني ؟ ده خلاص باظ اعمله تاني
فارس و هو يحضر اللبن : اه يا شبابي الي ضاع اه
عبدالله : دول لسا ساعتين ما لحقش يضيع شبابك بيهم
فارس : امته هخلص من العقوبة دي و ارجع لحياتييي يا جدو
ايهاب بحدة : اتعدل ياض ده انت قد الشحط و بتندب ؟!
فارس : اتعدلت اهو .. هاتي من ايدك العيل ارضعه
بعد دقائق
اتت لارا و قالت : اهو عملت كل حاجة طلبتهوها
بدأت بتوزيع الاكواب عليهم
زياد بخبث : لارا انا عايز سينابون
لارا : مش بعرف اعمله و بياخد وقت كتير
زياد : معلش روحي جربي اصلي نفسي فيه
غادة : انا ممكن اعمله
زياد : لا عايز لارا تعمله
فارس و هو يرفع اسر : و الله ؟! طب كارما قومي اعمليلي براونيز
كارما : ايه ده معرفش اعمله
فارس : افتحي يوتيوب و اتعلمي
زياد بحدة : لارا اعمليلي تشيزكيك
فارس : كارما اعمليلي ريد فيلفيت
زياد : لارا اعمليلي ….
حبيبة بغضب : بس انت و هو .. فاكرين نفسكم في محل حلويات ؟! ما شاء الله كل واحد بيطلب حاجة اصعب من التانية
زياد : ايه ده انتي بتتعصبي عليا ؟!
سحر : بطلو معيلة منك ليه .. اقعدي انتي و هيا مفيش حاجة هتتعملهم
فارس بقرف : اعاا الواد رجع عليا
فريدة : ده مش ترجيع ده قشط يا اهبل .. بقالك ساعة بتخضه
فارس : خوديه طيب هروح اغير هدومي
عبدالله : اقعد مكانك و بلاش دلع .. اديه منديل يا غادة
***********************
بعد منتصف الليل
دلف اوس اوضته وجد حبيبة تنتظره
اوس : ايه ده حبيبتي انتي لسا صاحية ؟
حبيبة : كنت فين ؟ ………….. يتبع
" معلش اسفة بجد بس البارت الي بعده هيتأخر شوية "
مغامرات عائلية 2
همس كاتبة
رواية مغامرات عائلية الفصل الرابع عشر 14 الجزء الثاني 2
الرواية كاملة من (هنا)
