رواية حنين ويونس عبر روايات الخلاصة بقلم حنين منصور
رواية حنين ويونس الفصل الثاني 2
_ الحقيني يا ماما
= في ايه ياحنين؟
_ اللي حكيتلك عليه امبارح
= ماله؟
_ طلع المعيد!
= يا مستقبلك اللي ضاع يابنتييي
_ بالله ماتندبي وقوليلي هعمل ايه دلوقتي!
= بصي.. اقعدي ورا.. ولا اقولك متحضريش
_ محضرش ازاي كده هشيل الماده!
= ما انتِ لو حضرتي هتشيلي السنه كلها يا عين أمك
_ يا وقعتك المنيله يا حنين
= اصبري يابت خليني أفكر
_انجزي يا ماما الله يرضى عنك
= مهو لو لسانك ده اتقص منه حته مكانش زماننا في العك ده دلوقتي
_ مهو اللي مد ايده
= بس....
_ بس ايه يا ماما؟، يحمد ربنا اني مكسىتهالوش بعد المسكه دي
فسمعت صوت من ورايا.... ده يا خبر ازرق.. الصوت ده مش غريب عليا.. وأول ما لفيت...
= بقا عايزه تكسريلي ايدي!
فكلمت ماما وانا وافقه قدامه...
_ ماما..
= في ايه!
_ مش كنتِ ناويه تقعديني بعد المعهد؟
= اه
_ هحققلك أمنيتك وأسيب الكليه.. البت أصلًا ملهاش اللي بيت جوزها..
فلقيته ضحك لوهله ورجع تاني لللعادي..
= بقا انا عايزه تكسريلي ايدي!
_ ءءء...
=ءءءءء... ايه بس؟
_......
= طالما انتِ كتكوت مبلول اوي كده عملالي فيها شبح ليه؟
_ احترم نفسك
= برضو!
_ أيوه، طالما مش محترمني يبقى أيوه
= يا بنتي هو جر شكَل للبيع ولا ايه؟
_ وأجر شكَلك بتاع ايه انا!
= شوفي انتِ بقا
_ تقصد ايه؟
= أصل يعني أغلب البنات بـ....
قاطعته ومستنتهوش يكمل وقولت بغضب...
_ اوعى خيالك المريض يصورلك اني ممكن اعمل كده لغرض في دماغي، لا.. انا مبعملش غير اللي انا شايفاه صح وبس
= وانتِ شايفه ان اللي عملتيه ده صح؟
_ وصح الصح كمان
= نعم!
_ مستغرب ليه؟.. واحد مسك ايدي وروحت اديته بالقلم.. بسيطة يعني
= لا والله!
_ أيوه طبعًا، طالما غلطت يبقى لازم تتعاقب
= انتِ قد الكلام ده؟
_ اوعى تكون فاكر اني هتهز عشان طلعت المعيد، انا معملتش حاجه غلط اخاف منها، ولا حرام اخاف اتعاقب عليها..
= بأمارة البت ملهاش الا بيت جوزها
_ احم... على فكرة عادي ده مجرد اعتراف لأمي مش حوار
= الأيام بيننا يا....
_ مش مهم
لقيت حبيبه دخلت في اللحظة دي..
= فينك يا حنين؟
فلقيت يونس بصلي بانتصار وبيقولي وهو ماشي:
_ عرفته خلاص
=روحي يا حبيبه منك لله!
_ انا عملت ايه يا وليه؟
= بتناديلي ليه قدامه؟
_ عادي هو سر حربي؟
= اه يختي، انتِ تعرفي ده مين؟
_ دكتور يونس
= غيرُه
_ هيكون مين يعني؟
= ده اللي اديته على عينه امبارح
_ متهزريش.. هو ده اللي....
= ايوه هو المنيل ده
_ احم... من الواضح اني عكيت
= انتِ فعلًا عكيتِ ياللي منك لله
_ وانا اعمل ايه طاااه!
= طاااه ايه بس!.. انا مستقبلي انهار خلاص
_ يابت متبقيش متشائمه كده
= أمال اعمل ايه؟
_ تعاملي ولا كإن في حاجه حصلت
= نعم يختي!
_ زي ما بقولك كده
= ازاي يعني؟
_ حنين، انتِ مغلطتيش، اللي عملتيه كان مجرد رد فعل لفعل مش مقبول بالنسبالك وخلصت
= فعلًا
_ يبقى نكمل، صاحب الحق مش بيخاف
= حصل يا باشا..
_ يبقى يلا نحضر المحاضره
= ربنا يستر بقا
وفعلًا دخلنا المدرج... حسيت بنظرته عليا بس ولا اهتميت... اااه انا في الكاريزما معنديش يما ارحميني..
بدا الشرح وبصراحه شرحه تحفه!.. احم... قصدي يعني عسول... يووووه.. قصدي ينجحنا يعني.. المهم بقا جه في نص المحاضره ولقانا كلنا هنجنا بسبب كمية المعلومات اللي رماها في وشنا..
حمحم كده وقال:
_ بما انكم فصلتوا، تعالوا نتناقش في موضوع كده ونتبادل وجهات النظر..
الكل اتلفت انتباهه ومن ضمنهم العبد الفقر لله... مش عشان حابه اعرف بس عشون أرضي فضولي وكده..
_ سؤال مهم.. هو لازم اللي احنا شايفينه بيكون صح؟
فـ حبيبه ردت وقالت:
= لا طبعًا، أوقات اللي بنبقى شايفينه بيبقى مجرد جانب واحد من الصوره..
_ أحييِك يا أنسه...
= حبيبه يا دكتور
_ تمام يا أنسه حبيبه تشرفنا
وحبيبه قعدت، فهو كمل كلامه:
_ معنى كلامك يا أنسه حبيبه إن أوقات بنحكم على المواقف وبندي ردود أفعال مع اننا ممكن نكون فاهمين غلط..
فلقيته بصلي فجأه وكمل:
_ يعني مينفعش أتخانق وأطول لساني وانا مش فاهم الموقف صح من الأول
فاتعصبت اوي وروحت قايمه وقولت بعصبيه مكتومة:
= بس أوقات طولة اللسان بتبقى هي الحل مع قلة الأدب والإحترام
فلقيته رفعلي حواجبه بمعنى ( بقا انا قليل الأدب!!)
وبعدين كمل:
_ بس بناءً على ايه بتحكمي إن اللي قدامك قل أدبه أو احترامه؟
= بإنه يتعدى حدوده و مايبقاش معترف بغلطه لا وكمان بيقاوح
_ حدود ايه اللي بتتكلمي عنها؟
= حدود ربنا يا دكتور..
يعني لا واحد يمسك ايد واحده بحجة انها مش بترد عليه لما بينده
ولا واحد يبعت لواحده برايڤت بحجة ملخص او محاضره كان ممكن ياخدها من زمايله الشباب
ولا قلة الذوق في التعامل
ولا الصداقه بين الولد والبنت... كل دي حدود واللي يتعداها يبقى تعدى مستوى الأدب والإحترام بالنسبالي..
كان هيكمل كلامه بس بص في الساعه الأول ولقى وقت المحاضره خلص..
حمدت ربنا انها خلصت، كنت عايزه أمشي أوي... واحنا خارجين لقيت حبيبه بتتنهد براحه:
_ أخيرًا المحاضره خلصت على خير
= وايه اللي مكانش هيخليها تعدي؟
_ حنين انتِ اول ما قومتِ قولت ده الدنيا هتبوظ أكتر وهتتفصلي
= طالما بقول الحق يبقى مش مهم
_ صح يختي بس في حين ان صباعك تحت ضرسهم دي فيها كلام تاني
= يمكن
_ طيب يا ستي، هتروحي ازاي؟
= يوسف هييجي ياخدني
_ ومن امتى الحنيه دي؟
= أصله خد من المقشر بتاعي فـ معقباه
_ قادرة وتعمليها
= ده انا غلبااانه
= أشهد يختي وابصم بصوابعي العشره كمان..
ومشيت حبيبه وفضلت قاعده في الكاڤتريا مستنيه يوسف... فلقيت بنوته كده معروف عنها إنها انطوائيه دايمًا وساكته جايه عليا...
طبعًا اتوترت عشان دي اول مره تكلمني،فجتلي وهي ملامحها باين عليها الحزن..
_ ممكن اقعد!
= أكيد طبعًا اتفضلي
_ انا....انا....
= انتِ ايه يا حبيبي!
_ انا عايزه حضن ممكن!
طبعًا اتفاجئت من طلبها،ازاي انطوائيه وحتى ماتكلمتش معايا غير مرتين تلاته وجايه تطلب مني حضن!
= حضن مني انا؟
_ مش حابه!
= لا مش الفكره بس...
_ تقصدي عشان مش بنتكلم يعني؟
= ايوه بالظبط
_ انا يعني...بصي انا بخاف من الناس عشان كده مش بتكلم معاهم
= بتخافي منهم ليه؟
_ عشان كلهم مؤذيين
= مش كلهم صدقيني
_ لا كلهم..كل واحد بيإذي بس بطريقته
= طب كده ابقى انا كمان مؤذيه زيهم
_ لا..انتِ قلبك طيب
= وعرفتِ منين؟
_ عشان شوفتك وانتِ قاعده بتملسي على القطه بالرغم من ان ناس كتير بتخبطها بالطوب
= بس!..
_ لا وعشان لما لقيتيني بعيط بعتتيلي ورقه فيها شوكلت وكتبتيلي فيها ماسدج لطيفه
= ءءءءء....
_ كنتِ فكراني مش عارفه انه انتِ!
= اه
_ عارفه من ساعتها
=......
_ فعشان كده حاسه اني عايزه منك حضن، انتِ كلامك بجد حسسني بالدفا فما بالك بحضن!
محستش بنفسي غير وانا بحضنها جامد، واتعرفت عليها... طلعت عسوله اوي اللهم بارك، مش انطوائيه زي ما الناس فاكره، هي بس كانت عايز صوت يدعمها وحضن وقت ضيقها تجري عليه مش اكتر...(واعتقد كلنا هذا الرجل)
_ وبعد مرور نص ساعه
لمحت يوسف جاي من بعيد قولتله بغيظ:
_ ما بدري يا بييه
لقيته بيمدلي كيس فيه كاندي كتير وقالي:
= مش كنت بدور عالحلويات للقمر
بصيتله وعنيا لمعت زي الأطفال:
_ دول ليا بجد!
= قولت أعوضك عن المقشر أبو 300 جنيه
_ فداك أي حاجة
= لا والله!. ده احنا شويه وكنا هنتقابل في المسامح كريم
_ انكشفت
= نعم يختي!
_ خلاص بقا يا جدع
= طيب يا ستي
_ بقولك ايه!
= ايه!
_ ما تجيب حضن
مسك قميصه بشكل درامي:
= شرفي!
_ ما تنجز يلا
= هو انا اطول!
وراح حضنني جامد، بصراحه استغليت الفرصه.. عشان حاسه انه محتاجه بس مكسوف يقولي.. فـ كان لازم اديهوله حبيب اخته ده.. حسيته بيشد على حضني كإنه ما صدق.. صحيح في تانيه جامعه بس لسه هيفضل طفل في نظري..
واول ما طلعت من حضنه إذا بـ يونس قدامي.. وبيقول بغيظ وعصبيه:
_ طب ما انتِ حلوه اهو وبتحضني كمان
= تقصد ايه!
كان لسه هيرد بس يوسف وقف قدامي وقال بغضب مكتوم:
_ في حاجه يا شبح!
= وانت مالك انت!.
_ الاه! انا مالي!
= ايوه انت مالك انا بكلمها هي اللي عملالي فيها ضد اللمس
كنت لسه هرد بس يوسف راح مديله بوكس وقعه عالأرض وهو بيقول بعصبيه:
_ اخرس، قطع لسانك دي أشرف منك ومن أمثالك
فقولت بخوف عليه:
= يوسف بالله عليك خلاص، هو فاهم غلط بس
_ هو ماله أصلًا يفهم غلط ولا صح
= خلاص يا حبيبي بالله عليك
راح يونس قايم وقالي:
_ أمال عملالي فيها بتاعت مبادئ ومتدينه وانتِ أصلًا...
يوسف كان هيكمل عليه بس انا اتدخلت...
= يوسف.. خلاص هو مش فاهم، دكتور يونس مع ان ملكش الحق انك تتدخل أصلًا بس أحب أقولك ايوه أنا بحضنه وكمان بقوله ياحبيبي عشان ده أخويا
_ أخوكِ!
= أيوه أخوها وعلى الله المحك بتبصلها بس فاهم!
_ أنا آسف
= أسفك مش مقبول، يلا يا حنين
_ بس...
= يلا يا حنين بقولك
ومشينا وسبنا يونس في وسط الكاڤتريا.. ولما روحنا...
_ خلاص بقا يا جو
= خلاص ايه يا حنين، انا مش هرحمه
_ خلاص يا حبيبي بقا انسى
= انتِ ازاي قادره تنسي؟
_ هو بس كان فاهم غلط
= هو ماله بيكِ من الأصل؟
_ بالله عليك خلاص، وبعدين بقولك ايه؟
= انجزي قولي
_ اخبار سمسمه إيه؟
= زي ما هي
_ اوعى تكون حاولت تكلمها يا يوسف
= أخوكِ عمره ما يعمل كده
_ واثقه فيك يا حبيبي
وفي اللحظه دي الباب خبط.. ويوسف اللي راح يفتح وساعتها سمعت صوته العالي:
_ انت ليك عين كمان تيجي لحد هنا!
= ايه ده!.. انت ايه اللي جابك هنا؟
_ انا اللي ايه اللي جابني ولا انت؟
روحت على الصوت انا وماما فلقيته يونس!... فماما سألت:
_ صوتك عالي ليه يا يوسف؟
وقبل ما يوسف يرد يونس سأل ماما:
= مين ده يا خالتي!
لقيت ماما بتحضنه وبتقوله:
= وحشتني يا حبيبي
_يتبع.....
#حُنيـــــــــــــــــن
