رواية حنين ويونس عبر روايات الخلاصة بقلم حنين منصور
رواية حنين ويونس الفصل الثالث 3 والأخير
= مين ده يا خالتي؟
لقيت ماما بتحضنه وبتقوله:
_ وحشتني يا حبيبي
يوسف راح مبعدهم عن بعض:
= حبيب مين يا حجه!
_ ايوه طبعًا حبيبي
= مين ده يا ماما؟
يونس راح بص بصدمة:
_ ماما مين!
= دي أمي
_ هو انت يوسف ابن خالتي!
كلنا واخدين الصدمة ما عدا ماما فقالت:
= ادخل يا يونس، احنا هنتكلم عالباب كده!
يوسف من الصدمه اعترض:
_ يدخل فين!.. مين ده؟
= ده يونس بن خالتك عفاف
_ده ابن خالتي انا!
= اه والله
( هفهمكم... خالتي عفاف دي اخت ماما الكبيره، كنا بنزورها واحنا صغيرين، لكن لما كبرنا انشغلنا في الدراسه وكده لكن ماما كانت على اتصال معاها على طول، محدش كان بيزور حد لإن كل واحد انشغل في حياته وكده وهوبااا نلاقي ان دكتور يونس هو هو يونس ابن خالتنا!)
فسألت باستغراب:
_ يعني دكتور يونس هو هو يونس ابن خالتي!
فردت ماما بتأكيد:
= ايوه يا حنين... على فكره هو معاكِ في نفس الجامعه
_ ايوه يا ماما ما انا عارفه
= وعرفتِ منين!
_ افتكري يا ماما الصبح لما كلمتك
= كلمتيني عن ايه؟
_ افتكري كده
= ااااه. انتِ كلمتيني عن الواد اللي مترباش اللي مسك ايدك واديتيله على عينه
يونس بصلي ورفعلي حواجبه وربعلي ايديه بغضب...
= ماما انتِ لو قاصده تسقطيني مش هتعملي فيا كده!!!
_ ليه يا بت؟.. استني احكي لابن خالتك يمكن يتصرف معاه
= يا ماما لا... بالله خلاص
_ لا والله أبدًا الواد ده لازم يتربى
لسه هرد راح يونس قاطعني..
= لا يا خالتي لازم تحكيلي
_ بص يا حبيبي... في واحد كده نده عالبت حنين وهي مردتش فراح ماسك ايديها..
يوسف اتعصب بعد الجمله دي وقال بغضب:
= يمسك ايديها بتاع ايه ده!.... قوليلي اسمه ايه وانا اكسرهاله
لقيت يونس بلع ريقه بخوف من يوسف مع انه اكبر منه، وانا حبيت اللعبه صراحه وقولت أخوفه حبه فروحت انا حطيت بنزين عالنار.. وقولت بتمثيل درامي...
_ شوفت يا يوسف!!.. اتجرأ ومسك ايدي عشان مردتش عليه
= وينده عليكِ بتاع ايه من أصله؟
بصيت ليونس وقولت:
_ معرفش يا يوسف، الشباب دلوقتي عليهم شوية حركات كده غريبه، ولا ايه رايك يا يونس؟
اتوتر شويه ورد عليا وهو بيحاول يثبت:
_ اه اه طبعًا، جيل ما يعلم بيه الا ربنا
ماما راحت مكمله كلامها وهي موجهاه ليونس:
= فراحت ادته على عينه وهزإته، المصيبه بقا انه طلع المعيد بتاعها
عمل نفسه متفاجئ:
_ ايه ده بجد!!!
= اه تخيل
_ خلاص يا خالتو انا هحل الموضوع ده
فيوسف راح رادد بزعيق:
= امال انا لازمتي ايه هنا!!، انا هعرفه مقامه
_ خلاص يا حبيبي يونس قال هيتصرف، مش عايزين مشاكل
فرديت انا بمكر مخفي وقولت وانا باصه ليونس وموجهه كلامي ليوسف:
_ ماما عندها حق يا يوسف، يونس هيعرف يتصرف من غير مشاكل
واخيرًا يوسف اقتنع.. فماما بقا راحت سألت:
_ اه صحيح يا يوسف انت كنت بتزعق مع يونس ليه عالباب مع انك مكنتش تعرفه
= اعرفه يا ماما اعرفه
_ تعرفه منين؟
= أصل....
فقاطعته انا وانا بحاول اغير الموضوع..
_ هو احنا مش هنتغدى ولا ايه يا ماما!
= حالًا يا حبايبي، انت لازم تتغدى معانا يا يونس..
_ حاضر يا خالتي
وبعد ما ماما مشيت يوسف سألني بزعل طفيف:
= ليه مقولتيش!
_ خلاص يا يوسف، موقف وعدا... متخليش ماما تتضايق
يونس ساعتها ملامحه بان عليها الندم والزعل فبص ليوسف وقال:
_ انا آسف أوي بجد... انا فهمت غلط حقكم عليا
فيوسف كان ساكت فبصتله اللي هو رد عليه خلاص حصل خير...
= خلاص يا يونس حصل خير بس بعد كده خد بالك، عشان ده اثم في حد ذاته، عشان ده ظن سوء... اختلق أعذار للي حواليك
_ حاضر... أنا آسف بجد
= خلاص يا عمنا.. ده انت طلعت واحد من العيله.. الا قولي
_ ايه!
= خالتي عفاف لسه بتصحيك الساعه 7 تجيب العيش من الكشك؟
_ حصل يابني والله لحد دلوقتي
= تقريبًا كلهم نفس المدرسه يابني.. حتى خالتك بتعمل كده لسه
وقعدوا يفتكروا ذكريات الطفوله الحلوه اوي(بالنسبالهم)..
_ فاكر لما حنين وقعت واتكسرت سنتها اللي قدام؟
فراح يوسف ضحك وقال:
= يا ماما مث هينفع أروح المدرثه
والاتنين ضحكوا عليا وانا قاعده بشيط منهم..
فروحت انا مناديه ماما:
_ الحقيني يا مامااااا
= في ايه يا بت!
_ الحقي الجوز دول بيتريقوا عليا
= بتتريقوا عليها ليه يا فردة شراب منك ليه!
فيوسف قال بضحك:
_ بنفتكرها لما سنتها اتكسرت، كانت بتضحك اوي..
فماما بقا.. ست الكل ودرعي الوحيد راحت بصتله باستفزار وقالتله..
= طب فاكر يا يوسف لما جيت في يوم من المدرسه متشلفط وطلع في عيل معلّم عليك وجاي بتعيط!.. كان شكلك يضحك اكتر
ضحكت انا ويونس بقا عليه.. فمامت راحت بصه ليونس اللي بيضحك علينا وقالتله:
_ وانت ياسي يونس فاكر لما امك بعتتك تجيب سمك ولما جيت من غيره وسألناك عن السبب قولتلنا ايه!
= احم... لا مش فاكر
_ افكرك يا عيون خالتك، قولتلنا رجعته البحر تاني عشان كان شكله تعبان
قعدنا انا ويوسف بقا نضحك عليه.. حرفيًا حبل غسيل مصايبنا كلنا اتنشر قدامنا كده...
وقعدوا يتكلموا ويضحكوا وبقوا صحاب اوي من قعده واحده!!
وعدا اليوم... هتقولولي ازاي هقولكم الله أعلم بقا!... من حيث لا أدري
فالمهم تاني يوم روحت الجامعه حكيت لصاحبتي حبيبه عن انه طلع ابن خالتي راحت غمزالي.. بتغمز ليه البت دي؟
_ ايوه بقا يا عم.. طلع ابن خالتك وكدهووون
= يعني ايه يعني؟
_ حنين انتِ عندك عم دماغه تعبانه!
= لا ليه!
_ امال دماغك التعبانه دي جايه منين!
= شاتب يا وليه
_ بقا انا يتقالي شاتب!
= عدت معاكِ وليه دي عادي!
_ اه يعني...
= طب يلا يا حبيبه ناكل
_ همك على بطنك على طول
= من عاشر القوم 40 يوم يا حبيييييبتي
_ واحمد يا عووووومر
= بنت!!.. عيب
_ اشطا
= بقولك ايه؟
_ ايه تاني!
= تعالي حفظي معايا الولاد انهارده
_ امممم يوسف هيبقى موجود؟
= لا هينزل عشان عنده سكشن
_ اشطا هجيلك
وعدا اليوم وبعد ما روّحت بشويه لقيتيونس قاعد مع ماما... هو استحلاها ولا ايه؟!
المهم دخلت القيت السلام وكده وبعدين دخلت أوضتي ارتاح من الأحداث اللي اكبر من دماغي دي!
وجت الساعه 7.. وقت وصول الولاد.. طبعًا حبيبه جت قبلهم تغلس عليا وتطبل لماما كالعادة..
فجـت سجده وكان باين عليها معيطه..
_ مالك ياحبيبي زعلانه ليه؟
= مفيش يا مس
_ لا في.. مالك!
= انا محفظتش!!!
_ بتعيطي عشان محفظتيش؟
= ايوه.. عشان كده حاسه ان ربنا مش راضي عني
_ ليه بس كده!
= عشان انا كنت بحفظ حلو ودلوقتي محفظتش.. يعني هاخد وقت أطول عقبال ما اختم
_ طب ليه محفظتيش؟
= معرفش.. انا لقيت نفسي كسلانه ومش قادره احفظ.. حتى مكنتش هاجي انهارده!
_ كمان!
= ايوه
_ وده ليه بقا؟
= عشان هاجي اعمل ايه!.. ما انا مش حافظه
_ طب وايه اللي خلاكِ تيجي!
= مش عارفه.. بس قولت مش هيبقى مفيش حفظ ومفيش حضور
_ جدعه.. يلا روحي احفظي بقا.. وعلى فكره مش معنى انك كسلتي ان ربنا مش راضي عنك ممكن يكون اختبار لعزيمتك... او اختبار منه ليكِ بس
= بجد!
_ اها... يلا روحي احفظي يلا..
حبيبه كانت قاعده مع بنوته صغيره اسمها ملك.. فسمعت صوتها وهي بتقولها:
_ يا بنتي اسمها أَيْمَـٰنُكُم... مش أَيْمَـٰنَكُم.. صحصحي معايا كده يا ملك
= انا مصحصحه على فكره
_ ما انا واخده بالي
= طبعًا
_ ايه الثقه دي؟
= ده العادي بتاعي
_ نفسي في نص ثقتك دي
= خليها في نفسك بقا
_اعترفي يا ملك
= أعترف بإيه؟
_ انك وليه أرشانه في جسم عيله صغيره
= لا يا بيبو انا عيله صغيره لسه
حبيبه كانت لسه هترد روحت رديت عليها انا:
_ بيبو!.. ده انا عشرة عمرها ونادرًا مابقولها بيبو دي
= عادتشييي بقا
_ عادتشيي بقا!!!. بت يا ملك
= نعم
_ طلعي روح ام سماح اللي جواكِ كده وكلميني
= نعم يا أبله
_ أبله!
= مش انتِ اللي قولتِ؟
_ ايه الإستجابه السريعه دي؟
= معايا مفيش حاجه مستحيله
_ طب يلا يا ملك سمعي بدل ما اخليكِ تغسلي المواعين اللي جوه دي.. امي عايزاني اغسلهم وانا اصلًا بتلكك
= لا ياحبيييييبتي.. من أفسد شيئًا عليه إصلاحه
_ وانا أفسدت ايه يا وليه!
= مش المواعين دي اطباق وحلل؟
_ امممم
= وانتِ كلتي من الطبق وغرفتي من الحله؟
_ حصل
= يبقى انتِ مفسده ولا مش مفسده؟
_......
لقيتها جت مسكتني من وداني بإيديها الصغيره وبتقولي وهي بتدحرج دماغي زي الكوره الكَفر...
= ردي عليا بقولك... مفسده ولا مش مفسده
_ مفسده.. ايوه انا المفسده في رواية أحدهم وفي مطبخ بيتنااا
= ايوه كده اعترفي
_ بت يا ملك
= نعم يا مس
_ مس ايه بقا!.. انتِ خليتِ فيها مس!
= انا يابنتي!
_ مش ملاحظه ان الأدوار اتبدلت
= انا مش ملاحظه انتِ ملاحظه
_اه
= يبقى المشكله فيكِ بقا
_ بجد والله
= أفكووووورس
_ طب تعالي بقا
ونزلت انا وحبيبه زغزغه فيها لحد ما كانت هتفطس مننا.. اليوم خلص الحمدلله...
وتعدي الأيام ويونس حرفيًا الصديق الصدوق ليوسف.. لا وكمان بيطبلوا لبعض ويحفلوا عليا... المهم بقا جيت في يوم قاعده في الكاڤتريا والاقي يونس جايلي وعنيه بتطق شرار..
_ انتِ ازاي تعملي كده!
= عملت ايه؟
_ ده على اساس انك مش عارفه!
= في ايه؟... ماتتكلم براحه
_ ده انا هفشفش نافوخك
= وليه ده كله!
= هو صحيح الواد اللي اسمه كريم ده جه وطلب منك رقم باباكِ؟
_ اه ليه؟
= وانتِ اديتيهوله؟
_ لا
فلقيته زفر براحه لحد ما كملت..
= اديته رقم يوسف..
رفعلي حواجبه وهو ناوي يفشفش دماغي فعلًا وقال:
_ نعم يختي!
حسيت ان صوته بدأ يعلى والناس بدإت تبص علينا، فزغرتله وااتكلمت من تحت ضرسي...
_ يونس.. وطي صوتك
= لا مش هوطيه.. ازاي يتجرأ وييجي يطلب منك الرقم
_ يونس قولتلك وطي صوتك
= برضو بتقولي وطي صوتك!
لقيت ان مفيش فايده من الكلام معاه فروحت سبته ومشيت.. بس قبل ما امشي مسك ايدي للمره التانيه...
= استني هنا انا بكلمك
ساعتها وصلت لأقصى مرحله من الغضب والضيق وده بان في صوتي لما قولتله...
_ انت لو منزلتش ايدك حالًا انا هعمل تصرف اندمك بيه واخليك كل ما تفتكره تتقهر على نفسك
= اسمعيني الأول
_ نزل ايدك قولتلك!
قولتها بصوت عالي معرفش ازاي خرج مني بالعصبيه دي.. بس ازاي الغبي ده يمسك ايدي تاني!
مش خايف من حساب ربنا!.. مش عارف النبي ﷺ قال ايه في اللي بيمسك ايد بنت بدون وجه شرعي!
مش فاكر كلامه لما قال:
"لأن يطعن في رأس أحدكم بمخيط من حديد خير له من أن يمس امرأة لا تحل له"!
بجد ده كائن غبي... روحت وسبته في صدمته وهو مش فاهم انا ليه اتعصبت اوي كده وبقى لوني أحمر من كتر الغضب..
روحت البيت وانا مقرره انه خلاص مبقاش فيه كلام بنا الا سلام ربنا بس..
ماما لاحظت وشي المقلوب اول ما دخلت فسألت بقلق:
_ حنين... في حاجه حصلت معاكِ؟
= لا يا حبيبي مفيش
_ حنين.. انتِ ايه اللي حصل معاكِ.
= مفيش يا ماما
_ لا في
قومت من كتر ضيقي وقولتلها وانا رايحه الأوضه:
= بالله عليكِ سبيني.. انا خلاص مش قادره
دخلت الأوضه وقفلت على نفسي، فضلت نايمه لوقت من كُتره مش قادره أعدّه..
لإن ده المهرب الوحيد من تعبي.. هو النوم!
وبعد ما فوقت سمعت ماما وهي بتقول:
_ اتفضل يا يونس ياحبيبي
ساعتها حطيت المخده على وشي وانا متغاظه منه على الآخر..
لقيت ماما داخله عليا الأوضه...
_ حنين
= نعم يا ماما
_ يونس بره
= اعمله ايه يعني؟
_ اطلعي سلمي عليه
= مبسلمش على حد
_ وده من امتى!
= من دلوقتي
_ ليه حصل ايه؟
= محصلش حاجه
_ متأكده؟
= أيوه
_ طب قومي
= لا
_ حنين قومي بقولك
= يا ماما سبيني بقا لو سمحتي
_ مش هسيبك غير لما افهم
= مفيش حاجه أصلًا عشان افهمهالك
_ والله!
= ايوه
_ ماشي ياحنين... مسيري اعرف
= ساعتها يبقى يحلها ربنا
_ ماشي يا حنين... ماااشي
وسابتني ومشيِت فعلًا...
وبعدها بربع ساعه لقيت يوسف بيدخل الأوضه بعد ما استأذن..
_ حنين
= يادي النيله عليا.. نعم
_ يونس بره
= هو في ايه بقا ماتهدوا كده على نفسكم.. كل شويه يونس بره... يونس بره... اعمله ايه يعني يا جماعه؟
_ انتِ بتزعقي ليه يا بت انتِ!
= ما انتوا زهقتوني
_ اتلمي كده وعدي ليلتك
= ولو معدتهاش؟
_ هخليها تعدي غصب عنك
= ولا غصب عني ولا غصب عنك، انا نازله
قولتها وانا بلبس النقاب على الفستان اللي كنت لابساه..
_ رايحه فين؟
= رايحه في داهيه.. عارفها؟
_ هو انتِ بتتكلمي كده ليه؟
= ابعد عني يا يوسف دلوقتي الله يرضى عنك.. انا عفاريت الدنيا بتتنطط قدام خلقِتي دلوقتي ومش ناقصه حد
_ وليه ده كله؟
= من غير اسباب
_ ده يبقى جنان
= يا سيدي انا مجنونه.. سيبوني بقا.... الله!
قولتها وانا خارجه من الاوضه، كان قاعد بره مع ماما مبصتلوش حتى وقولت لماما اني نازله ونزلت فعلًا...
قعدت الف في الشوارع وانا كل ما افتكر طريقته في مسك ايدي ببقا متغاظه وببقى عايزه امسك دماغه افلقها فلقتين قد بعض (اه عشان النظام بس)...
روحت قعدت عالكورنيش.. اهدى شويه وقلبي يبطل حيره...
طول عمري حاسه بفقدان للأمان..
خوف من اني ألاقي الناس القاسيه بس من غير حنيّـة تهون عليا..
طول عمري كنت سند بس زي ما بيقولوا باب النجار مخلع!..
فضلت قاعده لوقت محسبتهوش ولما زهقت قولت اروح بقا بس بعد ما رميت للبحر كلام كتير مينفعش يتقال...
ولما وصلت لقيت ماما ويوسف قاعدين وبصولي بصة كلها زعل...
ألقيت السلام وردوه عادي، فقعدت من غير ولا كلمه.. أصلي هقول ايه!.. الكلام خلاص خلص؟!
فماما قالتلي بعتاب:
_ حنين انتِ ليه مش عايزه تحكيلي؟
= احكيلك ايه يا ماما؟
_ عن اللي حصللك
= مش عايزه احكي
_ عشان منزعلش من يونس يعني؟
بصتلها بصدمه:
_ وانتِ عرفتِ منين يا ماما ان زعلي ليه علاقه بيونس!
= هو حكالي
_ حكالك ايه؟
= حكالي عالمرتين اللي مسك فيهم ايدك.. الأولى لما مرضيتيش تحكيلي انتِ وأخوكِ، والتانيه اللي حصلت انهارده
_......
= ليه يا حنين مقولتيليش؟
_ مكنتش عايزاكِ تزعلي منه
= بس كنت هفهمه ان مهما حصل مايمدش ايده على بنت
_ مجاش في بالي اي تصرف فسكتت
= سكوتك عن الغلط اكبر من الغلط نفسه.. طالما في ايدك تعدلي غلط يبقى متتنازليش عن محاولاتك دي..
_ حاضر
= وعالعموم انا فهمته غلطه واعتذر لينا انا واخوكِ
_ طيب
فجت ماما تمشي من قدامي وقفت فجأه وقالتلي:
_ اه صحيح نسيت أقولك
= نعم!
_ يونس طلب ايدك؟
= طب.... ايه!!
_ ايه!
= يونس مين اللي طلب ايدي؟
_ يونس بن عفاف يا حنين
= قوليله لا.. انا مش موافقه
فيوسف اتدخل وكان باين عليه انه عايز يقنعني....
_ طب ما تديله فرصه يا حنين
= هو انت موافق؟
_ ايوه.. محترم وابن ناس.. هو بس ايده سابقه دماغه لكن امك عملت معاه الصح
= برضو لا
_ ليه!
= هو كده... ومحدش يفتح معايا الموضوع مره تانيه
_ طب...
= قولت لا.. وبلغوه برفضي بهدوء بدل ما اقولهاله انا بشكل مش هادي أبدًا
وخلاص قفلت الحوار ده.. صحيح كنت بحس بالأمان اللي كنت مفتقداه وهو جنبي لكن لا.. مش مجرد شعور الأمان يخليني أربط حياتي بشخص...
هو هيبقى ليا اب وأخ قبل ما يبقى زوج..
انا مش بس بختار زوج ليا..
انا بختار اب لولادي
بختار جد لأحفادي
بختار طبيب نفسي وقت مشاكلي
وصاحبي الجدع وقت زهقي
وزوجي الحنيّن وقت احتياجي
واخويا السند وقت تعبي
وابويا اللي حضنه بغنيني عن الكل...
وابن تاني لأمي وأبويا.. وأخ جديد لأخويا..
هيبقى جوز خالة ولاد يوسف وأب تاني ليهم..
الامان صحيح أساسي..
لكن الحب والتفاهم برضو مهم..
هو مش متفاهم..
ايده سابقه دماغه زي ما يوسف قال..
منكرش اني لاحظت انه غيران ساعة حوار كريم..
بس مش بيفكر في نتيجة أفعاله..
بيعمل الحاجه ويرجع يتصدم من النتيجه..
طب وليه من الأول يا ابن الناس؟....
طب كنت اديت نفسك فرصه تتفاهم بهدوء..
التفكير ده مهم عشان كده الراجل هو القوام..
هو اللي يفكر بهدوء وعقله سابق قلبه..
عشان تحكمه في أعصابه اكتر من الست..
عشان ثباته الإنفعالي في موقف ممكن يخليني أنهار!..
خلاص.. كفايه كده.. مستحيل نبقى لبعض...
_____________
مر حوالي أسبوع وانا معرفش عنه حاجه... مش بييجي الجامعه ولا حتى بييجي البيت...
منكرش اني قلقت من الاختفاء المفاجئ ده بس كنت بقعد اقوله لعله خير...
جيت في اليوم التامن لما دخلت المدرج سمعت صوته!.. ايوه هو صوته..
_ ازيكم يا شباب اخباركم ايه؟
= الحمدلله يا دكتور
_ معلش غبت عنكم شويه.. لكن معلش، وعشان نعمل ريفريش لمعلوماتنا هعمل امتحان صغير دلوقتي
كله وافق على رايه لإنهم بيحبوه.. بس جه فجأه وقال:
_ انسه حنين
= ايوه يا دكتور
_ اتفضلي اطلعي بره
= نعم!
_ بقولك اتفضلي اطلعي بره
= ليه؟
_ من غير ليه.. اتفضلي
= بس...
_ من غير كلام لو سمحتِ
سمعت زمايلي بيتهامسوا عاللي بيحصل بس حقهم.. انا نفسي مستغربه ده كله..
حبيبه خرجت ورايا عشان تهديني لانها عارفه اني هعيط...
قعدت تطبطب عليا وتقولي:
_ اهدي يا حنين
= اهدى ازاي!.. ازاي يعمل كده؟
_ يمكن يكون عنده سبب
= سبب ايه اللي يخليه يطردني من المحاضره بالمنظر ده!
_......
= ما تردي عليا... سبب ايه؟
_ ما انا معرفش
= عشان مفيش سبب من الأصل
_.....
= ازاي يزعقلي ويكلمني بالطريقه دي!.. ازاي هونت عليه يهينني بالمنظر ده قدام دفعتي كلها!
قومت سبتها وروحت.. انا كنت محتاجه انام... لازم انام... وبعد ما صحيت لقيته قاعد بره.. مقدرتش اسكت بقا وطلعت روح عبده موته اللي جوايا..
_ انت ايه اللي جابك هنا يا بني آدم انت!!.. انت بجح؟
لقيت ماما بتزغرلي وبتقولي:
= عيب كده يا حنين
_ عيب!.. بقا انا اللي يتقالي عيب؟.. وده مين يقوله عيب هاا!
= بس يا حنين اسكتي
_ لا مش هسكت.. انت انسان بجح ومعندكش دم... انت ازاي تعمل فيا كده؟.. ليه كل موقف بيني وبينك تضايقني فيه اكتر من الأول؟.. ليه بتكمل عليا!!.. ليه بجد بتعمل كده!
= انا عارف ان....
قاطعته بكل ضيق وتعب من أفعاله:
_ عارف!.. انت متعرفش حاجه.. انت... انت أذيتني يا يونس.. انا كنت فاكره انك هتكون انت ويوسف في ضهري وتخلوني اواجه قسوة الدنيا.. لكن دلوقتي بقيت بواجه قسوة افعالك انت!.. طلعت مع الدنيا عليا
كان بيبصلي وهو شويه وهيعيط بس كان لازم يفهم... كان لازم يفكر قبل ما يتصرف.. كان لازم يندم على أفعاله المتهورة ويستعين بالحكمه في أفعاله..
لقيته بص لماما برجاء:
_ لو سمحتِ يا خالتي سبيني معاها شويه
= بس...
_ لو سمحتِ!
وفعلًا ماما سابتنا في الصاله بس كانت قريبه منا عشان منبقاش في خلوة... ولقيته اتنهد وقال بصوت حزين:
= حنين لو سمحتِ افهميني
_.....
= طب بصي اسمعيني للآخر وبعدين قرري
_ اتفضل سمعاك
= انا بعترف اني غلطت في حقك كذا مره.. بس انا بجد معرفش ليه عملت كده!.. ملحقتش افكر في نتيجة أفعالي.. مديت ايدي ومسكت ايدك اول مره كان لسوء ظن مني فيكِ عشان في الأول كنتِ لافته انتباهي وحبيت اني اقرب منك في الحلال وتبقي ليا.. ولما لقيتك حاضنه يوسف غيرت اوي وعملت اللي عملته... والمره التانيه لما عرفت حوار كريم ده كنت خلاص بقا وصلت لمرحلة العمى من كُتر الغضب..
_ انك تغير ده تحت مسمى ايه؟
= خطيبك المستقبلي ان شاء الله
_ سلامتك انا قولتلهم اني رافضه
= وانا جاي عشان تغيري رأيك
_ مستحيل
= جربي
_ انا مش هسلم حياتي لحد مش بيفكر قبل ما يتصرف يا يونس... دلوقتي انت لوحدك.. لكن بعدين هيبقى معاك زوجه وأولاد ومسئوليات وتفكير مضاعف عن دلوقتي... وانت مش عارف توفر ده
= خلاص والله اتعلمت.. انا الاسبوع اللي اختفيته ده قعدت اقرأ فيه كتب عن كيفية التصرف ووقته وازاي احل مشاكلي وخلاص بقيت بفكر كتير قبل ما اتصرف
_ والمطلوب!
= تديني فرصه بس!
_ ولو قولت لا
= هحاول تاني وعاشر لحد ما توافقي
_ ليه طردتني من المحاضره؟
= عشان مكنتش عايزك تمتحني معاهم
_ وليه؟
= عشان هيبقى ليكِ نموذج مختلف لوحدك
_ ازاي يعني؟
لقيته بيمدلي ورقه وقالي افتحها ولما فتحتها لقيت مكتوب فيها
_ تتجوزيني؟
= طب والله انت عندك حاجه في دماغك
_ مش مهم المهم اننا نتجوز
= بس...
_ مفيش بس بقولك... الشربات يا خالتي
= من عنيا يا حبيب خالتك
_ لا والله!.. ده انتوا متفقين بقا!
= بصراحه اه يا عين امك.. الواد شاري
_ مش موافقه.. على جثتيي....
__________________
وبعد اسبوع.. انهارده يوم كتب كتابي على يونس...(بس ايه رأيكم في الثبات على المبدأ!)
وبعد الجمله الشهيره" بارك الله لكما وبارك عليكما وجمع بينكما في خير"
لقيته جه وقف قصادي وقالي بهمس:
_ مبارك يا حنيني
= الله يبارك فيك
_ مبسوطه!
= اتمنى متخذلنيش بس
_ يا فصيله انتِ
= في ايه الاه!
_ انهارده كتب كتابنا وزغاريط وحوارات بتجيبي سيرة الخذلان ليه!!!!
=خايفه يا يونس
_ متخفيش.. ان شاء الله مش هخذلك
= طااااااايب
_ فيه بنت رقيقه تقول طااااايب!
= مش انا عملت كده؟
_ اه
= يبقى فيه.. معروفه
_ صبرني يارب على ما ابتليتني
= لا يا حبيبيييي وانا مايرضينيش، بينا عالمأذون يطلقنا
لقيته جه مسكني من قفايا:
_ عارفه لو مسكتيش انا هفشفشك
= فيه دكتور جامعي يقول هفشفشك!
_ مش انا عملت كده؟
= ايوه
_ يبقى فيه....
وخلصت الحدوته.🫂🤎....
#حُنيــــــــــــــــن
