رواية حنين ويونس عبر روايات الخلاصة بقلم حنين منصور
رواية حنين ويونس الفصل الأول 1
_انتِ مجنونة!
= انت ازاي تتجرأ وتمسك ايدي!
_ ما قولتلك استني وانتِ موقفتيش
= انت بأي حق تقول استني من الأصل؟
_ في ايه!.. فاكره نفسك ايه انتِ؟
= احترم نفسك واتكلم بأدب
_ والأدب ده انتِ هتعلميهولي!
= طالما منعدم عندك يبقى ممكن أعلمهولك
_ طب احترمي نفسك بقا وعدي ليلتك
= انت بتهددني ولا ايه؟
_ بلا تهديد بلا بتاع بقا يا شيخه، انا ماشي..
ومشي اللي عاملي فيها مش عارفه ايه، ده ايه المرار الطافح ده بجد!..
روحت البيت وانا على آخري من اللي حصل وانا اصلًا مش طايقه نفسي ولا طايقه حد في العموم..
ولما وصلت البيت، ألقيت السلام وانا بوزي أطول من برج خليفه بالمعنى الحرفي!..
= مالك مبوّزة ليه كده؟
_ مفيش
= انجزي يا بت مالك!
_ مفيش يا ماما
= مش عايزه تحكيلي!
_ انا مش قادره
= انجزي بس واحكي..
_ بصي يا ماما، انتِ طبعًا عارفه إن أنا مبسكتش عن الغلط ولو فيها روحي صح؟
= أستر يارب
_ صح بقولك؟
= أفكووورس يختي
_ فالمهم وانا ماشيه انهارده من السكشن لقيت صوت شاب بيقولي استني استني
= اوعي تكوني استنيتِ
_ عيب عليكِ
= تربيتي
_ فمستنتش، فجه بقا وراح ماسك ايدي عشان اقف
= يا خبره الأزرق!، وانتِ عملتِ ايه؟
_ اديته كف على خلقته وهزقته
= جدعه يختي جدعه
_ وبعدين راح واقف ومزعق معايا
= فـ زعقتي انتِ كمان معاه
_ ايه الشطاره دي؟
= طبعًا، انتِ لسانك ده أطول منك مرتين
_ في ايه بقا الاه!
= مفيش يختي
_ بس.. فعشان كده مش طايقه نفسي..
= خلاص يا حنين موقف وعدا
_ بس هو قليل الذوق
= يختي ما انتِ ادتيله بدل الكلمه عشره
_ عرفتي منين؟
= هو انا هتوه عنك!.. ده انتِ شرشوحه من يومك بس مستنيه الفرصه
_ حبيبي الله يباركلك
= انجزي بقا عشان الساعه داخلة على 5
_ يا خبر!!.. الولاد هييجوا كمان شويه
= ايوه الحقي كُلي وخدي دش قبل ما يبجو
_ مجبتيش سيرة الصلاة يعني!
= عشان انا متأكده انك مش هتيجي وانتِ مش مصليه صح!
_ مهو أصل....
= أصل ايه يا حنين!.. اوعي تكوني مراكمه!
_ لسه مصلتش العصر
= ليه كده يا حنين، ده زمان الملائكة سابوكِ وانتِ مش بتصلي وشُهرتك قلّت
_ شُهرت ايه؟
= هو انتِ متعرفيش ان الملائكة بتبدل علينا ورديّات!
_ ده اللي هو ازاي معلش؟
= قال رسول الله ﷺ:
"يتعاقبون فيكم ملائكةٌ باللَّيلِ وملائكةٌ بالنَّهارِ ويجتمعون في صلاةِ العصرِ وصلاةِ الفجرِ ، ثمَّ يعرُجُ الَّذين باتوا فيكم فيسألُهم وهو أعلمُ بهم : كيف تركتم عبادي ؟ فيقولون تركناهم وهم يُصلُّون وأتيناهم وهم يُصلُّون"
_ يعني الملائكة وهي بتتبدل بتقول انا سبت فلان بيصلي!، وكل ما الملائكة تقول كده كل ما فلان ده بيبقى مشهور بين أهل السماء؟
= شوفتِ!
_ يبقى هقوم فُريره
= يلا بسرعه...
وفعلًا قمت أصليها وانا متضايقه أوي!.. ازاي أفوّت شُهرة بين أخيَر الأقوام والأهم، ازاي الملائكة وهي بتتبدل متقولش اسمي لربنا!!.
ليه عملت في نفسي كده!.. قررت من ساعة ما عرفت إن كل الصلوات يجب الإتيان إلى ربنا فيها في عَجل عشان نقابله بسرعه لكن الفجر والعصر لازم اهتم بيهم أكتر حبه عشان التبادل اللي بيحصل ده،(وانتَ كمان يا جميل اعمل زيي)..
جهزت حاجتي وقعدت مستنيه الولاد اللي بيحفظوا قرآن معايا وبالفعل بدأو ييجوا، هم مش صغيرين اوي يعني حوالي 10 سنين مثلًا لكن اللهم بارك عندهم همّة مش عند ناس كتير...
_ أهلًا أهلًا بالدكتور مروان
= ازيك يا مس؟
_ الحمدلله يا حبيبي، انت عامل ايه!
= كويس الحمدلله
_ ها جايب ايه انهارده!
= جايب سورة السجدة كاملة ان شاء الله
_ اللهم بارك بجد، يلا نبدأ؟
= يلا
وبالفعل بدأ مروان يسمّع واللهم بارك المخارج مظبوطة لحد ما وصل لآخر السورة...
_ وَيَقُولُونَ مَتَى هَذَا الوَعْدُ إِن كُنتُمْ صَـٰدِقِين..
= لا هنا مش الوعد، هنا الفتْح وعلى فكرة دي الوحيدة اللي في القرآن كله
_ يعني مفيش الفتح تاني!
= لا، بص.. هم أصلًا 7 تمام!
_ تمام
= "الوَعد" ذُكرت في....( يونس، الأنبياء، النمل، سبأ، يس، الملك)
أما "الفَتح" ذُكرت في السجده فقط..
_ فهمت
= أشطر دكتور كده كده
_ تسلمي يا مس..
طبعًا كلهم سمعوا وصدعوني بأسئلتهم الكتير بس على قلبي زي العسل...
دخلت أوضتي عشان أعمل الروتين بتاعي قبل ما انام،ومحستش بنفسي غير وانا بزعق:
_ يا يوووسف
= ايه في اييه؟
_انت ازاي تتجرأ تعمل كده!
= عملت ايه؟
_ ازاي تبقى عارف اللي بيضايقني وتعمله؟
= يا بت فهميني أنا عملت ايه؟
_ ميت مره قولتلك ماتخدش من حاجتي حصل؟
= حصل يا كبير
_ وطالما اتنيل حصل بتاخد منها ليه!
= يرضيكِ أخوكِ ينزل وشه فيه جلد ميت!
_ يرضيك انت المقشر أبو 300 جنيه يروح عالأرض!
= فين اللي عالأرض ده!
_ يوسف متستهبلش، انت مش بتاخد مسحه تحطها، انت بتاخد نص العلبه بإيدك اللي شبه الحله الكبيره دي
= لحظه!.. انتِ بتتريقي عليا!
_ أنا!
= أه انتِ اتريقتي!
_ لا أبدًا
= يعني انتِ مش بتتريقي!
_ افكووورس نوت
وفي لحظه كالعاده قلب الترابيزه عليا بس عديتها لإني فعلًا مش قادرة...
واليوم خلص على كده...
تاني يوم كان عندي الجامعه اللي مش فاهمه مش حاطين في دماغهم اننا بني آدمين ومن حقنا نرتاح ليه!
روحت هناك وشوفت صاحبتي حبيبه.. واللي اول ما شافتني..
_ ما بدري يا هانم
= حبيبه اصطبحي عالصبح
_ في ايه يختي مالك!
= معرفش، مش طايقه نفسي ولا طايقاكِ
_ وانا مالي يا لمبي!
= يلا عشان عندنا زفت محاضرة
_ سمعت ان المعيدين في منهم اتغير
= يارب يبقوا أحسن من اللي قبلهم مش ناقصين بجد هطل وعُقد
_ ما تهدي على نفسك كده يما
= يما يا بيئة!
_ امشي قدامي يا حنين بدل ما اخليكِ انتِ والاستيكر مفيش فرق بينكم
= لا وعلى ايه يا بوب!، الطيب احسن
_ يلا قدامي
وبالفعل دخلنا المدرج بس الفكره ان كان في ناس كتير من الدفعه متجمعه حوالين حد كده ومبسوطين عالآخر....
= في ايه يا جماعه؟
_ المعيد الجديد جه
= ايوه يعني مبسوطين ليه بردو؟
_ يا بنتي ده طلع يونس
= يونس مين؟
_ معيد جديد لسه حديث التخرج، سمعت ان أغلب الدفعات تعرفه وبيحبوه، وانه كان دايمًا بيعمل ملخصات لكل دفعه قبل الامتحانات
= طب والله فيه الخير
_ جدع اوي الصراحه
= هو أنهو فيهم؟
_ ده يا بنتي، اللي لابس قميص اسود وبنطلون جينز
= فين ده يا.... يا مستقبلي اللي ضاع
جريت على طول ولقيتني بكلم امي...
_ الحقيني يا ماما
= في ايه يا حنين؟
_ اللي حكيتلك عليه امبارح
= ماله؟
_ طلع المعيد!
يتبع...
#حُنيـــــــــن
