رواية وربحت رهان حبك الفصل الثاني عشر 12بقلم ملك سعيد
رواية وربحت رهان حبك الفصل الثاني عشر 12
#البارت الثاني عشر
ديما كانت بتكلم ليلي صحبتها في التليفون وبتقول بمرح :"عروستنا الحلوة أخبارها ايه؟!".
ليلي بضيق مصطنع:"والله لسه فاكره تسألي عليا يا جزمة".
ديما :"ما انتي لو تعرفي ايه الي حصلي في اليومين الي فاتوا هتعزريني ".
ليلي بفضول قاتل :"ايه الي حصل قولي ها ها ".
ديما بضيق من فضول صحبتها :"خلاص يا بنتي الفضول هيموتك هقولك اسمعي يا ستي _____ ها عرفتي الي حصلي".
ليلي بصدمة:"يا نهار ابيض كل ده حصلك من ورايا ".
ديما بسخرية :"تصدقي كان المفروض كل ده يحصل قدامك مش كده ".
ليلي بتتجاهل نبرة السخرية في كلامها و بتسألها:"طب انتي هتتجوزي مين فيهم ؟!"
ديما بتتأفف بضيق وبتقولها :"اتجوز ايه بس انتي التانية مفيش جواز ولا نيلة اصلا تلاقي جدي نسي الموضوع ".
ليلي بافتراض :"طب لو منسيش هتعملي ايه؟!"
ديما بزهق :"هتصرف يا ليلي سيبك مني انا و قوليلي اخترتي فستان الفرح ؟!"
ليلي بسعادة :"طبعا وشكله يجنن انا مبسوطة اوي اوي بيه ".
ديما بمشاكسة :"بيه هو بس".
ليلي بخجل :"بنت اتلمي اصلا انا غلطانة اني رديت عليكي المهم انا هستناكي بكره في _____لإني عاملة حفلة لكل صحاب الجامعة بتاعتنا علشان نحتفل مع بعض قبل ما اتجوز ".
ديما بتتحمس للحفلة وبتقولها بفرحة :"تعرفي يا ليلي مع اني احيانا بحسك غبية بس المره دي انتي ابهرتيني بالفكرة خلاص بكره هكون عندك بس الاول عايزة اروح اشتري فساتين الأول للحفلة و للفرح ".
ليلي :"خلاص يا ستي بكره اشتري كل الي انتي عايزاه وانا هستناكي هضطر اقفل دلوقتي علشان شريف بيتصل".
ديما بمزاح :"قولتيلي شريف امممم ماشي هقفل انا لأن شكل شريف سرقك مني يا صحبتي يلا باي ".
ليلي بتضحك علي كلام ديما وبتقولها :"باي يا مجنونة".
_____________
تاني يوم الصبح
رعد كان رايح جاي في اوضته بيفكر بحجة تخليه يروح يوصل ديما وسلمي للمول من غير ما حد يشك فيه
فوقف وقال بزهق :"ايه الي بيحصلك يا رعد معقول حتة بت زي ديما هتشقلب احوالك كده ؟!
بس اعمل قلبي ملقاش غيرها علشان يحبها بس اعمل ايه؟! مش عارف بقي انا هخرج واشوف هقولهم ايه ".
خرج رعد لقي ديما و سلمي قاعدين بيفطروا فقرب منهم وقالهم بابتسامة:"صباح الخير ".
سلمي و ديما :"صباح النور ".
بيقعد رعد علي الكرسي وبيبص لأوضة علي وبيسألهم : "اومال فين علي ؟!".
بترد عليه ديما بزعل :" الدكتور جاله اتصال من الصبح بدري من المستشفي وقالوله ان فيه حالة خطيرة ومحتاجينه في المستشفي ومشي ".
بيفرح رعد من جواه ان علي راح الشغل وبكده جاتله فرصته انه يروح مع البنات المول
سلمي بتحط ايديها علي ايد ديما و بتقولها بابتسامة:"متزعليش يا ديما مش انتي عايزة تروحي المول تشتري فساتين خلاص يا ستي هنروح لأي مكان عايزة تروحيه ومش لازم علي يودينا احنا نروح بأي تاكسي و خلاص ".
رعد بيبص لسلمي بنظرات توعد وبيقول ببراءة مصطنعة :" خلاص يا ديما متزعليش انا هوديكي أي مكان عايزة تروحيه ".
بتبصله ديما بفرحة بس بتفكر في نفسها وبتقول :"لو راح معانا مش هاخد راحتي في اختيار الفساتين هعمل ايه دلوقتي؟!".
بيبصلها رعد باستغراب وبيقولها :"في حاجة يا ديما ؟!".
بتبصله ديما بابتسامة وبتقوله وهي بتجز علي أسنانها:"أبدا مفيش شكرا يا رعد معلش هنتعبك معانا انهاردة بس لو عندك شغل مفيش مشكلة احنا هنتصرف".
بتأيدها سلمي في كلامها وبتقوله :"ايوا يا رعد لو مشغول مفيش مشكلة احنا هنتصرف".
بيبصلهم رعد بغيظ وبيقولهم :"لا ابدا انا اصلا فاضي انهاردة علشان كده هوصلكم لو خلصتوا فطار قوموا جهزوا نفسكوا علشان اوصلكم ".
وفعلا بيقوموا البنات علشان يجهزوا نفسهم
تحت ضيق ديما من فكرة ان رعد هو الي هيوصلهم
___________
علي قاعد علي مكتبه وهو بيقول بضيق :"كان لازم يتصلوا عليا علشان الحالة ما في كذا دكتور في المستشفي كان لازم انا اهو ضيعت عليا خروجة مع سلمي أدي اخرة الي يكون دكتور".
__________
في سرايا المنشاوي
في اوضة عليا
كانت قاعدة علي سريرها و ماسكة تليفونها وبتقلب في صور رعد بهيام وابتسامة واسعة علي وشها
بتدخل عليها امها بتلاقيها قاعدة ومبتسمه في التليفون فبتقرب منها باستغراب وتقف وراها وبتبص علي التليفون ولاقت صور رعد
فضربت عليا علي كتفها بقوة
لدرجة ان تليفون عليا وقع منها من الخضة
والوجع مسكت كتفها وقالت لأمها بغيظ :"في ايه يا ماما ضربتيني ليه؟!".
بتقعد جنبها عليا وهي بتلوي بقها وبتقول :"ربنا ابتلاني بواحدة مورهاش حاجة غير سي رعد والتاني طول الليل بره بيشرب مع صحابه ولا هامه حاجة عرفتي ليه ضربتك ".
بتتعدل عليا في قعدتها وبتقول لأمها بحنق :"ايه الي انتي بتقوليه يا ماما طب ما ايه الجديد ما انا و أدهم دايما كده وانتي عارفة كويس اني بحب رعد اوي ونفسي اتجوزه وابنك ده بقي في عالم تاني ده بايظ خالص".
عايدة بتمسك راسها وبتقول بصراخ في عليا "انتي عايزة تجننيني سيبك من رعد وانسيه خالص لإن جدك مصر انه يجوز رعد لديما لأنه متأكد ان ديما هتختاره".
عليا بتتحول ملامح وشها للشر وبتقول برفض من كلام امها :"لا مستحيل اخلي رعد وديما يتجوزا وهتشوفي يا أمي ازاي ديما هتختار أدهم و انا واثقة من ده ".
قالت كلامها وابتسمت بشر
وبصتلها عايدة بعد اطمئنان لحالة بنتها وهوسها لرعد الي بيزيد كل يوم
___________
وصلوا للمول ودخلوا البنات علشان يختاروا الفساتين الي هيشتروها وسابوا رعد يركن عربيته
وبما ان الساعة لسه ٩ الصبح ف كان المول فاضي بعض الشئ
وكانت ديما بتتجول فيه من محل لمحل بحماس ومعاها سلمي الي كانت فرحانة بالخروجة دي وشكل الهدوم و الفساتين الموجودة
دخلوا البنات لمحل فساتين
وديما كانت كل اختياراتها عبارة عن فساتين قصيرة او طويلة بس كاشفة عن ضهرها
سلمي لما شافت اختيارات ديما قالتها بتوتر وخوف من ردة فعل علي او رعد علي الفساتين دي :"ديما انتي متأكدة انك هتلبسي الفساتين دي؟!".
بتبصلها ديما بثقة وبتقول :"طبعا اومال انا هشتريهم ليه؟!".
سلمي بتوتر :"بس الفساتين مش قصيرة حبتين ومكشوفين ".
ديما بتقلب عينيها بملل وبتقول بلا مبالاه :"يا ستي وفيها ايه احنا عندنا عادي البنات تلبس فساتين زي دي فمفيش مشكلة ".
رعد من وراهم بصوت غاضب :"بس انا عندي مشكلة".
بتلف ديما و سلمي بخضة من صوت رعد الغاضب
بيلاقوا رعد عيونه علي ديما وبيبصلها بشرر كأنه عايز يقتلها فقرب منها بخطوات بطيئة مخيفة زادت من
خوف ديما من شكله فبلعت ريقها بخوف وقالتله:"وايه هي مشكلتك يا رعد".
سلمي لما شافت شكل رعد الغاضب قالت بمهس لديما:"رعد هيولع فيكي ".
بصتلها ديما بقلق وبصت لرعد الي وقف قدامها وعروقه برزت من الغضب وقالها بحدة :"كنتي بتسأليني عن مشكلتي انا هقولك انتي مشكلتي يا ديما من ساعة ما شفتك وانتي عاملالي مشاكل بس انا مش هسكتلك بعد كده وبالنسبة للفساتين المسخرة الي انتي ماسكاهم دول مستحيل اخليكي تلبسيهم فهمتي".
ديما بتخاف من كلام رعد بس بتحاول تداري خوفها وبتقوله بشجاعة مصطنعة :"بس انا حرة يا رعد و اقدر البس الي انا عايزاه وانت مين اصلا علشان تتحكم فيا؟!".
بيبستم رعد بسخرية وبيقولها ببرود :"كلام انك حرة ده علي عيني وعلي راسي بس الحرية مش بالبس المسخرة ده وبالنسبة بقي انا مين فأنتي هتعرفي بعدين ودلوقتي هاتي الفساتين المهببة دي ".
ديما شدت الفساتين لحضنها وهزت راسها برفض أنها تديله الفساتين بس رعد قدر ياخدها منها بسهولة
وبصلها بابتسامة نصر وحط الفساتين في ايد سلمي
وقالها بآمر :"رجعي الفساتين دي وروحي اختاريلك فساتينك وسيبيلي المجنونة دي انا الي هنقلها ".
بصتله ديما بصدمة وسلمي نفذت أمر رعد وراحت ترجع الفساتين مكانهم وهي قلقانه علي ديما
وخايفة لرعد يتعصب عليها
اما ديما فبصت لرعد وقالتله بعناد :"بص بقي انت رجعت فساتيني وانا متكلمتش بس انك تختارلي فساتيني ده مستحيل أوافق عليه ".
بصلها رعد ببرود وقالها :"هو انا سألتك عن رأيك اصلا يلا قدامي".
بصتله ديما بغيظ وقالتله برفض :"لاء انا هختار فساتيني لوحدي مش محتاجة مساعدة ".
اتنهد رعد من عنادها وقالها باقتراح :"بصي خلينا في النص ".
بتبصله ديما باستغراب وقالتله:"ازاي يعني مش فاهمة ".
رعد بهمس وسخرية :"هو انتي بتفهمي اصلا".
ديما بتضيق عيونها بشك وبتقوله :"علي صوتك وانت بتتكلم ".
بصلها رعد و قالها :"بصي مش انتي عايزة تختاري فساتينك ".
بتومأ ليه ديما
فبيكمل كلامه وبيقول :"اتحلت يا ستي انتي اختاري فساتينك وانا اديكي رأيي عجبوني كويس معجبونيش مش هخليكي تختاري كويس كده ".
بتزفر ديما بضيق وبتقوله :"وهو انا عندي خيار تاني يلا خلينا نخلص في اليوم المهبب ده".
ضحك عليها رعد وهي بصتله بغيظ وسابته مشيت وهي لحقها وهو بيضحك
_________
بعد مدة طويلة قضتها ديما في اختيارها للفساتين ورفض رعد لإختياراتها وأخيرا رعد وافق علي اخر فستانين اختارتهم لأنه شافهم محتشمين وفي نفس الوقت شيك
وديما اتنهدت براحة لإن رعد وأخيرا رضي عن لبسها
ديما كانت ماسكة الفساتين وهي ماشية مع رعد وبيتلفتوا حواليهم بيدورا علي سلمي
وفجأة سمعوا حد بينده علي ديما بصوت عالي من وراهم
رعد وديما بصوا لبعض باستغراب ولفوا وراهم
لقوا شاب بيبص لديما بابتسامة واسعة وحماس
وهو ماسك شنط كتير ولابس نضارة ملونة وحلق صغير في ودانه وملون بعض من خصلات شعره باللون الأزرق
ديما اول ما شافته ناديتله بفرحة :"لؤي ".
جري عليها لؤي ورمي الشنط لرعد
وخد ديما بالحضن ولف بيها تحت صدمة رعد من تصرفه ورميه للشنط ليه
لؤي وهو حاضن ديما بيقول بفرحة :"ايه يا عمري لؤي كيفك يا روحي كتير اشتقتلك".
بصله رعد برفعة حاجب بسبب طريقة كلامه مع ديما وياعمري وياروحي الي قالهم لديما
والي خلت نار الغيرة تشتعل من جديد جواه
ملقاش نفسه غير وهو بيشد لؤي من قفاه لورا وبيبعده عن ديما وبيقوله بغضب :"ايه ياض شغل المسخرة ده ما تتلم شوية ومالك بتتكلم كده ليه استرجل يلا".
بيبصله لؤي من فوق لتحت وبيقوله باعجاب وبيتجاهل كلامه :"واو شو هالعضلات الجذابة وكمان بشرتك كتير صافية قلي يا عمري شو بتستخدم لوجهك ليخليه كتير حلو هيك كرمال استخدمه لبشرتي".
بصله رعد بصدمة وزقه بعيد عنه وبص لديما بمعني :"مين المجنون ده؟!".
وديما كانت بتضحك علي كلام لؤي وملامح رعد الي اتحولت لصدمة من بعد ما سمعه
____________
ايه رأيكم في البارت ؟!
ومين لؤي الي ظهر فجأة ده
و رعد هيعمل فيه ايه؟!
ده الي هتعرفوه في البارت الجاي
#وربحت رهان حبك
#ملك سعيد
دمتم سالمين ❤
يتبع
رواية وربحت رهان حبك الفصل الثالث عشر 13
لقراءة باقي فصول الرواية اضغط هنا ( رواية وربحت رهان حبك )
