رواية الزمان وما يأتي به عبر روايات الخلاصة بقلم هاجر نورالدين
رواية الزمان وما يأتي به الفصل الثالث 3
_ إنت شكلك عيل قليل الأدب ومحتاج تتربى.
كانت جملة ياسين اللي كان رايح يضربهُ من تاني،
مسكت إيديه وأنا بوقفهُ بسرعة وقولت بغضب وأنا ببص ناحية التاني المدعو أخويا الكبير:
= إستنى يا ياسين بس إستهدى بالله ميستاهلش.
إتكلم وقال بسخرية وأسلوب تريقة مستفز:
_ ميستاهلش!
متربية أوي بجد، أنا هخلي أبوكي يسيب تربيتك ليا أنا عشان شكلهُ دلعك بزيادة.
بصلي ياسين وقال بتساؤل وعصبية:
= هو في إي يا إنچي، فهميني مين دا بدل ما أرتكب فيه جناية.
حطيت إيدي على وشي بخيبة أمل وإحراج وقولت:
_ إهدى بس يا ياسين، دا المفروض أخويا، بمعنى أوضح هو إبن والدي من ست تانية ولسة ظاهر اليومين دول وشكلهُ بيعاني من عـ *نف أسري ما صدق يلاقيني عشان يطلعهُ عليا.
قرب مِني أخويا بغضب اللي كان إسمهُ بالمناسبة ياسر وقال:
= إنتِ بجد متربتيش وعايزة تتربي.
كان جاي عامل حسابهُ يجيبني من شعري بس قبل ما إيدهُ تلمسني مسك ياسين دراعهُ ولفهُ ورا ضهرهُ وسط صراخهُ بألم.
إتكلمت ياسين بتحذير وقال بغضب:
_ طيب بُص، عشان شكلك مستجد بس هسامحك المرة دي،
غير كدا لو فكرت تاني مرة تمد إيدك على خطيبتي هكسرهالك خالص مش هتبقى مجرد لوية دراع.
خلص كلامهُ وسابهُ بعنف، فضل ياسر ماسك دراعهُ بألم شوية وبعدين قال وهو بيبعد خطوتين بضهرهُ وبنظرات متوعدة:
= حسابك تقِل معايا يا إنچي،
وإنت حسابك إتأيد معايا ومسيري هحاسبك.
خلص تهديدهُ ومِشي على طول،
إتنهدت بإحراج وفضلت مغمضة عيني لثوانٍ.
لحد ما ياسين إتكلم وقال بتساؤل:
_ إنتِ كويسة يا إنچي؟
بصيتلهُ بإنتباه وقولت بنُص إبتسامة كنت بحاول أرسمها:
= الحمدلله، حقك عليا بجد يا ياسين أنا أسفة.
إتكلم بإبتسامة وقال بعدم فهم:
_ ولا يهمك يا حبيبتي إحنا واحد،
أنا بس مش فاهم إزاي أخوكي مش قولتيلي إنك وحيدة؟
بصيت للطريق قدامي وقولت بتعب وإجهاد:
= أيوا المفروض إني كنت فاكرة كدا،
بس دا موضوع طويل أوي يا ياسين ومش هينفع حد يعرفهُ.
إتكلم بتفهم وقال:
_ خلاص مش هدخل نفسي في المواضيع العائلية.
ضحكت عليه برغم إني مش قادرة أضحك فعلًا وقولت:
= لأ مقصدش والله، قصدي مينفعش حد تاني يعرفهُ،
بس إنت حضرت موقف ولازم أصححهُ قدامك، على الأقل عشان متفكرنيش كدابة ومتقعش بلسانك بعدين قدام ماما، تعالى ندخل الشغل وهفهمك.
دخلنا بعدها الشغل وكل واحد قعد في المكان المخصص ليه،
وبعد شوية وبعد ما خلصت الحكاية إتكلم ياسين بشفقة عليا وصدمة وقال بنبرة مواساة:
_ حبيبتي ولا يهمك، هو أكيد برضوا عندهُ أسبابهُ اللي منعتهُ يعرفكم.
بصيتلهُ بجنب عيني بعدم رضا عن اللي قالهُ وقولت بإنفعال وإعتراض قوي:
= إي الأسباب اللي تخليه يخفي عيلتهُ الأولى بقى عن عيلتهُ التانيم طول الـ 23 سنة!
إي الأسباب اللي تخليه يكسر قلب واحدة بيقول إنهُ بيحبها،
طيب والتانية أو الأولى بقى عارفة وساكتة إزاي وقابلة!
إتكلم ياسين بنبرة هادية وهو بيحاول يهديني وقال:
_ يا حبيبتي إهدي أنا مقصدش أدافع عن الفعل، ولكن عشان اللي بتقوليه دا بقولك أكيد في أسباب حصلت محدش عارفها وأسرار برضوا.
سكتت بعدم رضا عشان مبحبش أنفعل على ياسين،
هو شخص طيب وكويس وبيحبني أكيد يقصد مصلحتي.
هو كمان حس إن النقاش مش عاجبني فـ سكت وكل واحد فينا كمل شغلهُ بهدوء.
في أخر اليوم إتكلم ياسين بإبتسامة وتساؤل وقال:
_ إنتِ خدتيلي ميعاد من والدك ولا لأ؟
خبطت بإيدي على جبيني بتذكر وقولت:
= يالهوي بجد أنا إزاي نسيت،
معلش بقى حقك عليا من كل الأحداث والصدمات اللي عمالة تحصل نسيت أقولك إنهم مستنيينك بعد بكرا إن شاء الله.
إبتسم إبتيامة واسعة وقال بسعادة وتنهيدة عميقة:
_ أهي دي الأخبار اللي تفرح وترد روح الواحد والله،
ليه مينفعش دلوقتي؟
ضحكت وقولت وأنا باخد شنطتي عشان أمشي:
= معلش بقى متضطر تستنى.
قال بإبتسامة وهدوء:
_ طيب آجي أوصلك؟
بصيتلهُ بجنب عيني وأنا مبتسمة وقولت بتنبيه:
= لأ دا إحنا لسة مقريناش فاتحة حتى هنبدأها كدا؟
ضحكنا وبعدين نزلت وهو نزل معايا اتأكد إني ركبت وإتحركت ومشي هو كمان.
كنت مبسوطة بصراحة وكمان ياسين فكرني بالحدث اللي مستنيينهُ من بدري.
روحت البيت وأول ما دخلت ئوفت بابا وماما قاعدين،
إبتسمت ماما وقالت وهي قايمة:
_ والله جدعة كنت لسة بقول إني جوعت ولسة كنت هحضر العشا، إزخلي بقى غيري عقبال ما أخلص.
إبتسمت وقولت:
= حبيبتي تسلم إيدك.
بمجرد ما ماما إختفت من نظرنا قلبت وشي وروحت قعدت جنب بابا وقولت بضيق وخنقة:
_ إنت إبنك دا لو مبعدش عني وعن طريقي أنا بجد هبلغ فيه.
بصلي بخضة وقال بتساؤل وعدم فهم:
= إبني!
ياسري، عمل إي مش فاهم؟
إتكلمت بغضب وقولت وأنا بحاول أوطي صوتي:
_ إتعرضلي النهاردا في الشغل وكان عايز يمد إيدهُ عليا واتخانق مع ياسين لما حاول يدافع عني وكمان طعنني في سمعتي قدام الشارع، بص يا بابا أنا لحد دلوقتي بحاول أكون إبنة كويسة، كدا كدا أنا معرفش الشخص التاني دا لو مقدرتش تحكم عليا يبعد بعيد عني أنا هبلغ عنهُ وهعمله محضر عدم تعرض.
سكت بابا شوية بعد ما إتعصب وسرح قدامهُ شوية وبعدين قام بغضب من غير ولا كلمة.
كانت ماما لسة بتحط الأكل، شافتهُ قايم إتكلمت بتساؤل:
_ رايح فين يا حبيبي الأكل جهز أهو.
إتكلم بابا وهو ماشي من غير ما يبصلها ودخل الأوضة وقال:
= ماليش نفس.
بصتلي ماما بإستغراب وقالت بإستفسار:
_ مالهوش نفس إي دا كان لسة بيقول جعان،
إنتِ قولتيله إي يا مقصوفة الرقبة إنتِ سديتي نفسهُ؟
حاولت أبتسم وأتعامل طبيعي وقولت وأنا قايمة رايحة ناحية الأكل:
= مقولتش حاجة، أكدت عليه بس ميعاد العريس بعد بكرا، الظاهر كدا إنهُ متضايق إني هسيبكم وأمشي.
بصتلي ماما بعدم رضا وفضلت واقفة ثوانٍ مش عارفة تعمل إي.
تاني يوم صحيت وكنت واخدة اليوم دا أجازة،
عشان ألحق أظبط البيت مع ماما قبل ما ياسين ييجي هو وأهلهُ تاني يوم.
فضلنا اليوم دا كلهُ ترويق وتنفيض ولا ترويقة العيد،
إتهد حيلي حرفيًا وبابا كان طول اليوم برا في الشغل.
بالليل كنت أنا وماما خلاص خلصنا خالص،
دخلنا ننام وأنا قبلها حضرت الفستان اللي هقابلهم بيه بكرا ونيمتهُ جنبي بسعادة وكأنهُ طقم العيد الجديد.
تاني يوم وهو اليوم الموعود اللي هنبقى فيه أنا وياسين لبعض قدام الكل خلاص وهيبين إنهُ شاريني.
كنت مبسوطة كنت، لبست وحطيت ميك آب،
وكنت ببص كل شوية من الشباك كعادة آي عروسة عشان أشوفهُ وهو جاي.
مسكت موبايلي لما سمعت صوت رسايل ورا بعض وفكرتها منهُ،
كنت مبتسمة وأنا بفتح الرسايل بحماس ولكن مطلعتش منهُ.
كانت من رقمهُ أيوا بس محتوى الرسالة كالآتي:
" حبيبتي ممكن جوزي قصدي طليقي ياسين يتأخر عليكم شوية لإنهُ معايا ويعني قالي أبلغك عشان متزعليش بس، باي باي يا حبيبتي."
الرسالة خلصت وبعدها رسالة تاني بملاحظة ڤيديو 3 ثوانٍ ليها هي اللي ماسكة الموبايل وياسين جنبها شايل بنتهُ وبيديها حاجة غالبًا.
حسيت إن الدم جري في عروقي وحسيت إني مش طايقة نفسي ولا طايقة اليوم وإني في ثانية إلا ثانية دلوقتي هرفض ياسين بشكل نهائي من حياتي كلها.
#يتبع
