رواية البلطجي (كاملة جميع الفصول) عبر روايات الخلاصة بقلم ولاء حامد
رواية البلطجي الفصل الثامن والعشرون 28
هارون أخيرا خلص شغله ونزل الجراج خد عربيته وطلع من الباب الخلفي زي ما دخل من غير ما حد ياخد باله وساق لحد ما بعد بمسافه كافيه عن الشركه واتحرك براحه لفت نظره عربيه ماشيه واره من بدري عدل المرايه اللي قدامه وبص فيها بتركيز
هارون بإستغراب هو قاطرني انا ولا إيه الحكايه بالظبط
سكت ثواني ولف بالعربيه من طريق تاني لقي العربيه فعلا وراه
هارون بإبتسامه : يا اهلا بالشقاوه والله زمام مشي وكمل طريقه ببرود لحد ما وصل للكومباوند دخل والأمن منع دخول العربيه اللي وراه
ركن عربيته ودخل الفيلا وهو شارد
هنا اول ما شافته قامت منطوره : ايه يا هارون مالك داخل شارد في ملكوت ربك كده ليه وواخد في وشك زي اللي غيطه غرقت
هارون هز راسه بنفي :لاء مفيش انا كويس وبخير قدامك اهو
هنا بنص عين عليا انى الكلام داه تقوله لحد تاني غيري دانا من طله في وشك اعرفك
هارون بتهرب: لا لا والله مفيش ضغط شغل بس واتلفت حواليه :الله اومال فين اخواتك ما اسكت الله لهم حساً
هنا وهي بتقعد على الكنبه تاني إخواتك في الظس يا اخويا لسه مجوش
هارون ماشي ربنا معاهم بالتوفيق يارب ويجعل تعبهم بفايده
هنا اللهم آمين سيبك بقى منهم اغرفلك تتغدا زمانك لسه مكلتش لقمه والصبح طلعت على لحم بطنك وانا عارفاك وعارفه طبعك المهبب بتنسي روحك
هارون بتنهيده: لا والله يا هنا مش جيعان عندي شويه شغل هادخل اوضه المكتب اخلصه لما اخواتك ييجو نبقى نقعد ناكل مع بعض احنا بقالنا كتير متجمعناش
هنا بزعل ايوه والله يا اخويا من ساعه ما رجلنا خطت المدعوقه دي تحس ان وشها شمال علينا الأول كنا بنتجمع على طول واحنا في البيت اللي هناك في الفطار تقعد تنكشنا والغدا نتجمع واللقمه متتبلعش الا واحنا ملمومين حواليها ونقاسمها مع بعض والعشا نقعد نرزاي ونرخم على بعض ونضحك من قلبنا
ومصمصت شفايفها انما هنا تحس ان كل واحد مننا تاه في وادي لوحده
هارون بتفهم: معلش عارف وواخد بالي بس اهي مشاغل يا هنا إخواتك عندهم دروس ومذاكرة متنسيش انهم ثانويه عامه وانا وغرقان في الشغل لشوشتي ان شاء الله هانرجع نتجمع تاني يا هنا ان شاء الله
هنا بضيق: اهو كلام فض مجالس وانا خلاص جبت اخري من القعده وشي في وش الحيطان زي بوز الأخص
هارون وليه حابسه نفسك هنا اطلعي وفكي عن روحك اتمشي في الجنينه أطلعي روحي النادي
هنا حطت ايديها في وسطها :وانا بتاعت نوادي والكلام الفاضي داه طب دول شويه عيال فلتانين ناقصين ربايه اللي مسقط بنطلونه واللي ناسيه نص هدومها في البيت وكله كوم واللي عاملك عش عصافير فوق رأسه كوم تاني
هارون بضحكه :والله يا هنا انتي ما ليكي حل يعني ساكنه في أغلى مكان في مصر ولسه زي ما انتي متغيرتيش
هنا الشر بره وبعيد اتغير ليه انا كول عمري احب اعيش عيشتي ولا بحب اللبس توب مش توبي وانا عامله زي السمك اللي لو طلع من الميه يموت وانا لو غيرت طبعي اموت
هارون بإبتسامه صافيه بسيطه:عارفه يا هنا احلى حاجه بحبها فيكي هي الرضا دايما راضيه وحامده ربنا دايما معاكي ممعكيش راضيه
هنا بحب: ربنا يرضى علينا وعليك يارب
هارون وهو رايح نحيه مكتبه: انا يادوب اللحق اخلص شويه من الشغل اللي متلت ورايا وزي ما قولتلك كده اول ما إخواتك ييجو اندهيلي ماشي
هنا حاضر من عنيا
هارون دخل وقفل الباب وقعد على الكرسي وبداء يلف بيه يمين وشمال وهو بيفكر: امممم وبعدين بقى العباره دي شكلها فيها ان يعني من كام يوم بهوات ييجوا يسألو عليا وعلى اهلي في الوراق ودلوقتي عربيه قطراني منين ماروح امممم وبعدين
وسرح مع نفسه طيب لو قولت علشان شغلي مستحيل اللي سألو كان قبل ما أظهر خالص يعني شغلي مستبعد بس مين وليه داه اللي عايز اعرفه ولازم اعرفه
قاطع تفكيره صوت هنا وهي بتفتح الباب يا هارون بقالي ساعه بنادم عليك
هارون فاق ايه يا هنا في ايه
هنا انا اللي في ايه ولا انتا بقالي ساعه عماله انادي عليك واقولك اخواتك جم
هارون ماشي روحي انتي وانا جاي وراكي اهو
طلعوا وحطت هنا الأكل
هنا بصتلهم بحب وفرحه والله زمان كأننا متجمعناش من سنين مش كام يوم ربنا ما يطقعلنا عاده ويجعلنا دايما ملمومين حوالين بعض كده دايما
هارون بإبتسامه اللهم آمين المهم عاملين ايه في المذاكره طمنوني
حسام بفخر: متشغلش بالك تقل جيبك انتا بس لطب
هارون بفخر: ادخل انتا ومتشلش هم عايز عيانين نجيب عايز جثث نجيب
حسام ايوه بقى الله عليك يا كبير
وبدائوا ياكلو وسط مناوشات قطعهم رنت تليفون هارون
بصلهم بإستغراب ورد بسرعه
هارون ايوه يا برنس عامل ايه اخبارك واخبار المنطقه ايه
البرنس والله كلنا تمام يا معلم بس في حاجه كده حصلت وعواء بيحصل في المنطقه وقولت لازم يوصلك خبر بيها يا كبير
هارون بحده خير اوعي يكون حط اتنطط عليكم ولا حط على حد هناك اديني ساعه زمن وابقى عندكم مسافه الطريق
البرنس لا يا كبير محدش يستجرى يهوب هنا ولا يعمل لبش مش مستدعيه جيتك احنا هنا نسد
هارون بحده متخلص اومال ايه اللي حصل
البرنس: والله يا معلم شكلها كده حكومه
هارون قام وطلع بره علشان يضمن ان محدش يسمعه واتلفت اتأكد أن مفيش حد سامعه: حكومه ليه هو حد غريب ولا مطلوب نزل وسكن المنطقه ولا إيه
البرنس: لا يا كبير لا داه ولا داه
هارون اومال ايه العباره ايه اخلص
البرنس بتردد والله يا كبير شكلهم كده جايين وقاصدينك انتا بالخصوص
هارون بصدمه: قاصديني انا عرفت الكلام داه منين وعرفت منين انهم حكومه
البرنس عيب والله يا معلم انك تسأل سؤال زي داه
هارون اخلص مش هانخش لبعض افيا
البرنس حمحم :احم احم يا معلم الحكومه ريحتها فايحه والغريب اللي رجله بتدب بنعرفه ودول دايرين يلفو زي الدبان اللي بيعف على كيس زباله من هنا لهنا ميعرفوش اننا بنعرف الحكومه من ريحتها ودول شكلهم مخبرين جداد طالقينهم في الحته اصلهم غشم اوووي
هارون طيب عايزن مني انا ايه
البرنس والله يا معلم علمي علمك هما دايرين يسألوا ويعسو على اي خبر عنك بس شكل الحوار كده كبير بالقوي كمان
هارون يعني ايه
البرنس والله يا معلم ما اعرف انا قولت ابلغك عشان تبقى معايا في الصوره
هارون طيب مبعتش حد يطأقس من حبايبنا هنا يعرف ايه ورا الحوار داه
البرنس عيب ودي تفوتني بردوا انا اول ما هلو علينا بعت الولا شلاطه يعس وراهم وراح لحبايبنا في القسم بس زي ما راح زي ما جه كل اللي عرفه أن الموضوع جاي من ناس فوق اوووي وحد من الجماعه التقال
هارون بتفكير طيب هو ليه علاقه بالجماعه اللي جم من كام يوم
البرنس مش عارف يا معلم بس انا مبقتش بستبعد حاجه خصوصا انهم جايين وبيتنشقوا ويشمشمو على خبر عنك انتا بالخصوص
هارون بتفكير: طيب خلي عينك انتا والرجاله عليهم وشوف اخرهم ايه من بعيد لبعيد وسهلهم اللي عايزينه عشان يمشو اوام اوام قبل ما حد يشم الخبر كده ولا كده وتلاقي الكلام اتنطور هنا وهناك وانا معاك اربعه وعشرين ساعه على التليفون
البرنس وجب يا مَعْلَمه اعتبره حصل ولو حصل وجد في الجديد جديد احنا هنا سدادين ورجالتك كبير
هارون بفخر وداه العشم ياض دانتوا ربايه ايدي
البرنس بصوت عالي: فخر وشرف ليا يا كبير اني اتربيت على ايد المعلم هارون بجلاله قدره المعلم هارون على سن ورمح اجدع معلم معلمين بر مصر كلها مش شرق لغرب ومن شمال لجنوب
هارون بإبتسامه: طول عمرك ياض كلامنجي وطقاق حنك ولا اجدع نبطشي أفراح
البرنس بضحكه عاليه مجلجله:طول عمرك رافع معنوياتي يا كبير
هارون بضحكه: اه يا واطي المهم اعمل زي ما قولتلك كده وانا معاك اول بأول ماشي
البرنس ماشي كلامك يا كبير
قفل معاه ودخل وهو دماغه شغاله زي الشواكيش مبتسكتش قعد مع اخواته وهو بيحاول يركز معاهم لحد ما ينفض الموال ويقدر يقعد على رواقه يفكر
هنا بفضول : في ايه يا هارون مش داه واحد من رجالتك اللي في الوراق
هارون ايوه داه البرنس
حسام بضيق مش خلصنا بقى من الوراق واللي فيها وسيبناها بكل اللبش و العواء اللي فيها
هارون بحده وهو بيخبط على التربيزه بحده: ماكلش دعوه ومتدخلش في اللي ملكش فيه ياض واوعي تقلع توبك يا ابن أحمد من أمته واحنا بنقلع توبنا ولا بننسى اصلنا
حسام يا هارون احنا سيبناها وارتاحنا انساها بقى
هارون بصوت عالي انسى مين ياض دانا المعلم هارون كبير الوراق ولما الكبير يسيب مكانه مين يسد لما ييجي شويه عيال هفأ تتنطط على اكتاف الخلق هارجع اعيدلك كلامي اللي قولته قبل سابق في الوراق انا كبير الوراق ومعلم معلمين الوراق على سن ورمح
وشاور على نفسه
المهندس هارون
هارون بيه
المعلم هارون
كل دول هنا العبد لله وانا لا بقلع توبي ولا بتسلخ من جلدي وانسى أهلى وناسي دول عزي وعزوتي
وسبق وقولتها المنطقه هناك لو حد احتاجتني في اي وقت هيلاقوني سداد الليل قبل النهار ومش انازاللي اسيب مكاني سداح مداح لكل من هب ودب
جنا ماشي يا هارون بس انتا دلوقتي غير قبل كده دلوقتي بقى ليك اسمك ومركزك انتا مش عارف انتا بقيت ايه داه الناس كلها انهارده ملهاش كلام ولا سيره غيرك داه حتى اصحابي انهارده في المدرسه وحتى في الدرس ملهومش كلام غير عليك وانا كتت فخوره اوووي وانا بقولهم انك اخويا ومكانوش مصدقين لحد ما شافو صورنا ما بعض وصدقوا
وكل البنات صحباتي ودول بنات هاي هاي كلاس اوووي ومستوى واوا كانوا هايموتو هايموتو كده ويتعرفوا عليك
هارون آآآآآآه ادي اللي كنت خايف منه حصل جو الفشخره والانعره الكدابه
جنا :قصدك إيه بقى بكلامك داه
هارون بحده: قصدي يا بنت صابره يا ربايه الوراق تعدلي كلامك وتبطلي تتيهه زي اللي جالها شلل في لسانها عيشي عيشه اهلك يا جنا
هنا انا بتأنعر وبتيه يا هارون بتقولي انا الكلام داه
هارون بنبره حاسمه ايوه ليكي من كام يوم بس لسه قايلك بلاش الانوار دي تزغلل عنيكي دي انوار مدهونه مش اصليه مع أول شويه ميه نضيفه او حتى وسخه هاتشيل كل الوسخ بتاع الالوان دي ويبانلك معدنها الأصلي شويه صفيح نادي لا ليه قيمه ولا تمن
هنا تجهلت كل كلام أخواتها وبصت لهارون: في حاجه حصلت هناك ولا إيه
هارون بهزه راس وهو حاطط عينه في طبقه :لا مفيش دول كتر خيرهم بيطمنو عليا
هنا بصتله بعدم اقتناع وسكتت بقله حيله لأنها عارفه انه مستحيل يتكلم ولا ينطق الا بمزاجه وكيفه
وصل على تليفون نصر ملف كامل ووصل زيه على تليفون ماهر
نصر دخل مكتبه وقفل الباب بالمفتاح وبداء يقراء الملف بتمعن شديد ومركز في كل كلمه وحرف قدامه محسش بالوقت من كتر تركيزه خلصه ومسك التليفون اكتشف انه بقاله تلات ساعات قاعد يقراء تاريخ هارون اتصل بماهر
نصر ايوه يا ماهر بقولك ايه سيب كل حاجه في ايدك وتعالي دلوقتي
ماهر: مادام اتصلت يبقى وصلك الملف
نصر اه وصلني وقريته
ماهريب وايه رائك في اللي فيه انا شايف انه مليان حاجات كتير تقلق وحاجات اكتر حواليها علامات استفهام
نصر وعلشان كل اللي قولته داه بقولك سيب كل اللي في ايدك وتعالي عندي حالا الكلام في التليفونات مش هاينفع خالص
ماهر اجيلك فين انتا عارف الساعه كام ثم المسافه بيني وبينك مش قليله واحنا مش ساكنين جار بعض
نصر اخلص متحسسنيش اني هاتجيلي مواصلات ولا مشي على رجليك اركب عربيتك وتعالي اخلص داه شغل ومشروع العمر اللي مش هايتكرر تاني ومش هاينفع تسنتي للصبح
ماهر قفل معاه وخلال نص ساعه كان وصل
نصر ادخل بسرعه دخلو وقفلوا باب المكتب عليهم بالمفتاح
ماهر ها خير بقى ايه الكلام اللي مينفعش يستنى للصبح
نصر قعد وهو باصص للملف في التليفون اولا كده الواد داه بينتقم
ماهر معلش مش فاهمها دي
نصر ركز يا ماهر من فضلك الواد داه مبدئيا كده شغال لهدفين الأول انه يعلى ويثبت نفسه والتاني انه ينتقم بس على البارد يعني بيخطط ويتكتك على كبير اوووي
ماهر كل الكلام داه انا خدت باللي منه بس ايه علاقتنا احنا بيه
نصر بمكر: من مصلحتنا ومصلحه الشغل اننا نضمنه وعلشان نضمنه نقدمله السبت واللي زي داه لو قدمتله يوم هايقدملك باقي ايام الاسبوع عن طيب خاطر
ماهر ايوه ودي نعملها ازاي
نصر بحده في ايه ماهر بجد مالك انهارده حاسس ان الغباء متحكم فيك هو ايه اللي ازي هو احنا أولاد امبارح يا جدع ولا إيه داحنا لينا علاقات واصله للرياسه يعني بكلمه منا نرفع اللي مدفون في بطن الارض لسابع سما وبكلمه تانيه ندفن اللي في سابع سما في سابع ارض
ماهر يا نصر عارف كل داه انتا عايز توصل لايه قول على طول
نصر السوق علمني ان مصلحتي مع مين واجري عليه ومصلحتي دلوقتي في ايد الواد داه وداه عرف السوق وانتا ابن سوق على قديم
ماهر كلام معروف بس أهل الواد داه مش سهلين ولا قليلين هما كمان دول عضمه ناشفه وليهم اسم كبير في السوق بردوا
نصر بتقليل: بالنسبه للناس اه بالنسبه ليا مش اقل من عضمه كلب ملهاش لازمه برميها وادوس عليها بجزمتي كمان
ماهر عايز تخطب وده بإنك تضرب اعمامه في مقتل صح
نصر هزله راسه
ماهر طيب هنستفاد ايه لما نعاديهم واحنا مفيش بينا وبينهم اي شغل أو عداوه كمان
نصر اعتبره مهر العروسه
ماهر بتفكير: خلاص تمام معاك مادام انتا مالي ايدك اوي من الموضوع داه
نصر يبقى تمام سيبني الليله اخطط واتكتك وبكره اقولك نبداء منين
ماهر ماشي كلامك سلام انا بقى
مشي ونصر قعد يقراء الملف اكتر من مره لحد ما تقريا حفظ كل معلومه فيه
هارون طلع من بيته وخد باله من عربيه تانيه ماشيه وراه من اول ما طلع عمل نفسه عبيط وكمل فب طريقه عادي
وقف في اشاره وفي ثواني كانت العربيه خبطت فيه من روا نزل ببرود وبص على العربيه
نزلت رهف بعصبيه مفتعله:مش تاخد بالك خبطت عربيتي
هارون بصلها بتركيز لثواني شاف قدامه بنت لابسه لبس ضيق وعامله شعرها كيرلي و صبغاه ومكياج اوفر جدا اتلفت حواليه واتكن ببرود : الكلام داه ليا انا
رهف طبعا اومال لمين مش حضرتك اللي خبطت عربيتي
هارون لو حضرتك مش واخده بالك ان انتي اللي خبطي عربيتي من روا
رهف بسرسعه: انا عربيتي باظت مش تاخد بالك
هارون بسخريه لا والله اصل انا عنيا في قفايا مين اللي ياخد باله يا بت اللي المفروض ياخد باله هو انتي تراعي المسافه بينك وبين اللي قدامك مش انا اللي اخد بالي من اللي ورايا
رهف برقه مصطنعه:اووو سورى خلاص عندي انا دي ممكن تديني مفاتيح عربيتك وانا هاصلحها وابعتها لحد عندك
هارون بتريقهه :سوري يا مودموزيل مش انا اللي اقبل العوض ولا بقبل ان نسوان تحاسبلي بس خدي بالك واحمدي ربنا انها جات معايا انا المرادي وسكت لو جات مع حد غيري مش هايسكت
رهف بعنجهيه وغرور : انتا ازاي بتكلمني كده انتا مش عارف انا ابقى مين
هارون بكشه وشي :لا والله محصلناش القرف ولا عايزه يحصلني يلا يا اختي بالاذن الإشاره فتحت
رهف بتسرع:طيب وعربيتك
هارون بسخريه :هاصلحها من جيبي ها
رهف نو انا مصره انا اللي غلطت وانا مصره اتكفل بيها
هارون بإبتسامه تهكم: لو الفلوس ناقحه عليكي اوووي ابقى طلعيها لله زكاه عني وعنك وعن العربيه منا عارف انها منظوره بالاذن وسابها وركب عربيته ومشي ببرود
رهف بغيظ خبطت كاوتش العربيه بحده وهي بتطحن ضروسها: ايه داه مين داه علشان يكلمني انا كده ولا يتأثر بيا وبجمالي بقى جربوع زي داه يرد عليا انا رهف هانم المالكي بالشكل داه عنيها اتحولت لشر اصبر عليا وانا وعد اخليك زي الخاتم في صباعي واخليك تتمنالي الرضا ارضى ووعد يا بيئه لأخليك تبقى زي ممسحة الجزم عندي كان غيرك اشطر وسلم رايا وبكره نشوف
ركبت عربيتها وساقت بغيظ وجنون
هارون ركب عربيه ابتسامه مرسومه على وشه بغموض محدش قدر يفهم مغزاها ووصل الشركه ودخل بهدوء على مكتبه دخل عليه مالك ومصطفي زي القضا المستعجل
هارون رفع وشه خير منا مبقاش ورايا كل يوم غيركم خير في جديد
مالك حط ملف قدامه
هارون بص على الملف وبص لمالك: ايه داه
مالك انا عملت امبارح حصر لكل شركات الديكور اللي في السوق ودي كل أسمائهم عنواينهم وكمان الاماكن اللي اشتغلو فيها بس في شركه مميزه اسمها The white rose
شغلها مميز جدا جدا وبتستخدم ماتريال عاليه وجوده شغلها فوق الممتازه واسعارهم اظن كويسه جدا ومناسبه بخلاف ان ليهم ورش خاصه بيهم يعني تضمن جوده ومواعيد شغل مظبوطة
هارون لو كلامك اكيد يبقى ممتاز اوووي خدلنا معاهم ميعاد معاهم ونروح ونتفق
مالك وليه نروح ممكن هما يجيولنا ونتفق هنا
هارون اظن انتا مش جديد في السوق معروفه اللي عايز حد بيروحله مش بيطلب يجيله واللي مبقبلوش على نفسي مبقبلوش على غيري داه اول هام تاني هام لازن نروح ونعاين بنفسنا جوده الشغل على أرض الواقع ونطلع على كل الشغل اللي قدموه قبل سابق لان الشركات اللي زي دي اكيد بتبقى عامله ملف كامل بكل شغلها ومصوره المكان قبل وبعد التسليم
مالك ايه اديا ابني انتا دماغك دي ايه
هارون منا سبق وقولتك انا في الشغل معنديش يا أما ارحميني
مالك قعد قدامه لسه بردوا مفيش اي خبر من مجموعه الشبراوي ولا مجموعه الورداني محدش منهم رد عليك
هارون تؤ هما لحقو يا جدع لسه بدري دول يادوب متكلمين امبارح
مالك :هو انتا ليه بتتكلم ببرود اوي كده وبإستهتار مش متعود عليه منك ولا كأنها صفقه العمر
هارون بغموض لاني واثق ان قبل الميعاد هايبلغونا الرد بالموافقه داه يا دوب ممرش الا سواد الليل
مالك وايه اللي ماكدلك اوي كده والله يا خوفي لتبقى سواد علينا احنا
مصطفي هو انا ليه حاسس انك بتتكلم بثقه وبرود اوووي
هارون فعلا وداه لأسباب كتير اوي لو كنتوا تعبتو نفسكم وركزتو فب اخبار السوق كنتوا عرفتوا ان الاخبار ماليه السوق
مصطفي اخبار ايه دي بقى اللي مخلياك بتتكلم بالثقه دي
هارون ان المشروع بتاعنا اتصدر الوجهه وان الشركه الاماراتيه نفسها المسؤوله عن المشروع هي اللي بتسعى علشان تتعاقد معانا
مالك بصدمه انتا بتقول ايه عارف معني كلامك داه ايه
هارون طبعا عارف
مصطفي طيب وناوي على ايه مهو بردوا مينفعش نخسر شركات زي دي بعلاقاتها واسمها
هارون بهدوء ومين قالك اننا هانخسرها
مالك لا فهمنا كدم واحده واحده
هارون بتوضيح:هما جايين عايزين يحكوا معانا علشان يدخلو شركا وانا هوافق بس بشروطي لان المشروع كبير وتقيل على ان شركتنا عي اللي تنفذه لوحدها وانا لو وافقت هاخد المكسب صافي
مالك مش فاهم
هارون بشرح يعني هما هايشيلو الليله من حيث المعدات والتكلفة واحنا علينا التصميم وجزء من المعدات وإشراف التنفيذ فهمت
مصطفي بص لمالك ورجع بص لهارون بفخر :يا ابن ال
هارون بإبتسامه اومال انتا فاكر ايه هو انتا فاكرني حتى لو في بيتي قاعد بلعب داه حتى عيبه في حقي
مالك لو على كلامك داه شوف الصح واحنا معاك ونمضي ونبصم بالعشرين كمان مش بالعشره بس
هارون تمام سيبوا بقى الموضوع على الله ثم العبد لله
يا ترى نصر بيخطط لايه…؟
يا ترى رهف هاتقدر تنجح ومين داه اللي كان اقوي من هارون…؟
يا ترى رقيه ورفعت رأفت هارون نسيهم ولا إيه.. ؟
يا ترى االي جاي مخبي لسه ايه..؟
يتبع…
