اسكريبت النصيب بقلم سلسبيل أحمد
اسكريبت النصيب بقلم سلسبيل أحمد
- اوبا.. ده الفستان عمل منك بني ادمه
= وانت القميص و البنطلون عملوا منك إنسان
- طب يلا بقا.. همشي معاكي صدقه مع اني قايلك متلبسيش كعب
= ومين قالك اني همشي معاك؟
- لا اظبطي كده امال هتمشي مع مين بفستانك ده
= هركب مع نور و محمد أكيد
- نور ومحمد؟؟ هو زياد عليه كخه ولا ايه
= لا زياد مش بطيقه ولا بيطقني
- مش مهم هطيقك انهارده انجزي
ضحكت وبصتله: خلاص ماشي هبعت لماما مسدج اني معاك عشان كنت قايله ليها اني هركب معاهم
- هي خالتي لسه فوق! بتعمل ايه
= مع امك
- ايوه بيعملوا ايه كل ده؟
= بيعملوا لفة الاناناسة وبيتخانقوا مع الوليه عشان بتقولهم هعمل لكم لفة تريندي أكتر
" ركبنا العربية و كنت بربط الحزام فا بصلي "
- على الأقل ناس محترمه بخمار يام شعر سايح انتي!!
= ولا!! متنرفزنيش!
- وانتي لمي شعرك ده بيقعد يطير على عيني
= لا حول ولا قوة الا بالله خلتني اتنيل معاك ليه
- اهو كيفي كده.. واربطي الحزام اوي يابت حسسيني اني مبعرفش اسوق
= الحزام سلام وامانه عشان انا راكبه مع طور
- اه يبنتلـ...
قاطعته: ها ايه؟؟ خالتك! هتشتم خالتك؟؟
" برمت شفايفي بغيظ قبل ما اديها بوكس افرتك دماغها.. خصوصا وهي قاصده تستفزني "
>>>>>>>>>>>>>>>>>>>>>>>>>>>>>>>>>>
بقلمي سلسبيل_أحمد
- ايه ؟ وقفت بالعربية ليه؟
= هاخد صحاب نور
- وحيات امك فوزية ؟؟
= فيه ايه يابت انتي
- صحاب نور مين دول
= اميرة.. واتنين كمان مش فاكرهم بس اكيد حلوين
بصتلي بنرفزه: وانا مش عايزه اركب مع حد
- يعني ايه مش فاهم امشي واسيبهم؟
= اه امشي
- مينفعش عيب!
= والله؟ اعمل نفسك بقا هتوصلهم عشان عيب
- انتي هبله يا فريده امال هوصلهم ليه يعني محمد اصلا الى قايلي نور هتبقي مشغولة و احتمال نتأخر فا معلش وصل صحابها انت
= و نور مشغولة في ايه بقا!
- سبحان الله العروسة مثلا!! و محمد العريس لو متعرفيش؟
مسكت علبة المناديل الى قدامها وحدفتها في وشي: انت دمك يلطش
- اه يا..
" قاطعنا دخول اميرة و صحابها.. فا سكت وبصتلها بتوعد.. و كملت سواقة لحد ما وصلنا قدام القاعه.."
" نزلنا من العربية و هي نزلت ورزعت لي الباب قاصده.. بس ماشي كله هيطلع على دماغها البنات كانوا بيشكروني و هي بصتلنا من فوق لتحت بعدين لاقيتها هتدخل فا استأذنت و روحت وراها "
- ! انتي يا زفته.. فريده !
= عايز ايه ؟ مش وصلتني خلاص غور من خلقتي بقا روح شوف البنات
مسكت ايدها: بت اهمدي انا على اخري
- بت لما تبتك يا بلاعه
فتحت بوقي بصدمه: يخربيتك! انتي لسه بتقولي الاسم ده
- وهفضل اقوله كل لما تنسي هفكرك يا بلاعه
= و يا تري كنت برد اقولك ايه!
" سكتت وبصتلي بغيظ وكانت هتعيط العيوطه انا عارف"
- هقولك يا سوكة ازاي دلوقتي وانتي حلوة كده؟
و الفستان بتاعك حلو و شعرك ده!!! مش هتلميه بقا؟
ضحكت وبصتلي: اتلم انت.. امك هناك اهي وصلوا
- امك؟ مش هنبطل سوقيه بقا!
" جت خالتي و بصتلها "
- يعني قعدتي تزني عليا اركب مع نور ومحمد و خلتيني عرفتها انك هتركبي معاهم و في الاخر تغيري رأيك وتيجي مع زياد
" بصتلها بثقة "
- هو زياد اي حد ولا ايه يا هدي
لقيت ماما بصتلي: يا قليل الادب بتناديها بأسمها
فريده ردت بضحك: فيه ايه يا فوزية ما طول عمرنا كده
- مهزقين شبه بعض فعلا غوروا قدامنا
" قعدت تضحك عليا.. الأم جيشك الوحيد صحيح"
" جوز خالتي و بابا وصلوا هما كمان و قعدنا كلنا سوا على الترابيزة.. لحد ما العرسان وصلوا.. و كا عادة اي فرح مصري هيصنا ورقصنا وبعدين راحوا يقعدوا واحنا رجعنا تاني على الترابيزة بتاعتنا "
هدي: شايفه نور طالعة حلوة ازاي ماشاءالله
فوزية: اه و العريس برضو
" لقيت فريده بتميل عليا "
- بقولك ايه ما تيجي تقوم نبارك لبنت خالتك بقا
= مفيش حد هيتحرك انا لو قومت متعرفيش هيحصل ايه
- مش فاهمه
= امي وامك هيقوموا يعملوا الواجب
بصتلي وهي بتضحك لما فهمت: متقلقش ماهو ابوك و بابا قاعدين مش هيسبوهم
- شوية و هيقوموا يخرجوا بره في الجاردن عشان مش بيحبوا الدوشة
= انت تنح اوي على فكره
" قامت وسابتني بنت الغداره.. فضلت متابعها بعيني لحد ما لقيت عيل ملزق عمال يبصلها و من نظراته فهمت انوه شوية وهيجر معاها ناعم "
- ماما.. خالتو.. انا خمس دقايق وراجع لو حد فيكوا اتحرك هفـ. ـجر الفرح ده
" قومت ناحيتها و بصتله بـ نظرات خلته يعملها على نفسه وهي مكانتش فاهمه حاجه "
- جيت يعني اهو
= طب ارجعي الترابيزة بقا ممكن؟؟
- عايزه ارقص! تعالي ارقص معايا
= رقص ايه يا زفته انتي اترزعي بقولك
" فضلت تتنطط بعفوية وكانت فرحانه "
"بصتلها وانا مبتسم وبعدين فوقت من التبليم الى كنت فيه"
- ده منظر واحده داخله اولة ثانوي يا فريده؟
= عادي.. ده منظر واحد رايح اولة جامعه
- انتي بتكلمي واحد خارج من ثانوي عام بمجموع 78% و تسعه من عشره ها؟
= هحط عليك كدا كدا السنه الى بعد الجاية هتشوف
- طيب يلا بقا نقعد؟
" لقيتها باصه قدامها وميتة ضحك"
- فيه ايه؟
= امي وخالتك.. وكمان خالتك اسراء مولعنها هناك
بصيت ناحية ما بتشاور: يا الله..
- خلاص ام العروسة شدتهم انسي.. شوية و نور هتقوم ترقص مع امها وخالاتها برضو عارف ده معناه ايه؟
بصتلها بنص عين: مش هترقصي بفستانك وشعرك ده يا فريده اديني نبهتك اهو
" فضلت تضحك بنت المستفزه.. لكن انا افتكرت حاجه شوفتها واحنا داخلين وابتسمت بخبث"
- فريده! انا لازم اوريكي حاجه بره
بفضول: ايه؟
= تعالي تعالي بسرعه
" خرجت الجاردن و شوفت الورد ومسكت ايدها ومشينا"
- اتفرجي
" فتحت عينيها بدهشه "
- ورد بنفسجي !!! ده حلو اوي
= ومش بس كده.. عند الشجره الى هناك في قطه مع عيالها
- متهزرش!!!
= شوفتهم واحنا داخلين تعالي نروح براحه
" وفعلا روحنا... وقلبت طفله فوق ماهي طفله!! فضلت تلعب معاهم وتضحك و القطط الصغيره تطلع عليها.. فضلت اتابعها وانا مبتسم.. و فرحان..! "
- يابني بكلمك
= ها؟ ايه؟
- ممكن تروح تجبلهم اكل عشان خاطري؟ زبادي و جبنه مثلثات
" قالتها بترجي.. وانا عمري ما رفضت لها طلب.. بصيت حواليا "
- تفتكري فيه سوبر ماركت هنا يعني
= اكيد فيه
- طيب هاروح و تفضلي هنا فاهمه
= انا مش هسيبهم اصلا
" و فعلا روحت ادور ولفيت شوية حلوين عشان خاطر ست هانم.. ورجعت لقيت الحال كما هو عليه فا ضحكت على طفولتها.. وتعلقها بالقطط بسبب رفض خالتي الشديد انها تربي قطه.. قعدنا نأكلهم وفضلنا معاهم لحد ما الفرح خلص حرفيا.. واحنا مش حاسين و الهانم شرطت عليا نركب معانا ماما و خالتي بدل البنات.."
>>>>>>>>>>>>>>>>>>>>>>>>>>>>>>>>>>>
- امك و خالتك نامو تقريبا
= طبعا مهو من كتر الرقص و الفرهده
- القطط هيوحشوني
= ابوس ايدك بلاش عياط كفاية اننا مكلناش من البوفيه
- ما سوسو قالتلك هتبعتلك الله
= وهي خالتك اسراء من امتي قالت حاجه ونفذتها
ضحكت: طب سوق بسرعه الطريق ده مش بيخلص
- عاملين فرح في اخر بلاد المسلمين
" كملت سواقه ولقيتها بتنام هي كمان بس مراحتش اوي فالنوم صحيتها لما وصلنا و كانت خالتو طلعت و سابتها "
- قومي امك اتبرت منك
فركت عينيها وصحيت: وايه الجديد
- اشيلك ولا ايه
= بس يا بلاعه
" قالتها بنوم وعدم وعي فا ضحكت "
- باي باي يا سوكه..
" طلعت وانا اتحركت بالعربية و رجعنا البيت يومها مجاليش نوم.. معقول سوكه واخده كل تفكيري.. فضلت اقاوح مع نفسي او مع مشاعري ناحيتها.. دي لسه صغيره.. وانا كمان لسه صغير.. مش هينفع.. "
" فضلت افكر كتير اوي واكتشفت ان الحب نوعين.. واحد بيحب الحب نفسه.. و واحد بيحب حبيبه ويخاف عليه.. وانا غالبا حبيتها.. وبخاف عليها قررت وقتها اني لازم أبعد.. ولو هقرب يبقي قدام الكل.. ومبقاش خايف من علاقتنا قدام ربنا.. لكن كان قرار صعب بحكم اننا ولاد خالة و ساكنين جمب بعض.."
" عشان وقتها يحصل الى مكنش حد متوقعه.. وكانت خالتي مخبياه.. قرروا يمشوا من القاهره و يروحوا إسكندرية بسبب شغل جوز خالتي الى اترقي في فرع الشركة هناك.. وقتها حسيت قلبي بيخرج من جسمي.. مفهمتش.. هو كده ربنا بيساعدني.. ولا بيجرحني "
" كانوا مظبطين كل حاجه ورق مدرسة فريده وكله بس مرضيوش يقولوا غير بعد فرح نور بنت خالتى
لكن امي عملتها زعله.. وخالتي إسراء مكنتش بنفس درجه القرب الى بين امي وخالتي هدي لكن برضو زعلت و الزعل المره دي معرفناش نلمه خد يوم و اتنين و شهور..لحد سنه.. وانا و فريده متكلمناش كل الفترة دي.. لكن خالتي إسراء بدأت بالسلام.. وصالحت خالتي هدي.. وبعدها صالحتها هي و ماما على بعض.. لكن اليوم الى جت فيه فريده مكانتش معاها وقالت إنها مشغولة عشان بدأت دروس تالته ثانوي.. "
" مكنتش بعمل حاجه غير انى بدعي ليها.. وبدعي بيها ليا.. كنت عارف انها إنسان متردد وجبان و كان نفسي ابقي جمبها من اول السنة لكني كنت مستغرب بعدها.. وليه مبقتش تكلمني مكنتش قادر امنع نفسي اني اقرب لكن المسافات كانت قايمه بالواجب بس مش لوقت طويل.. في نص السنة كانت وحشتني اوي.."
" فا قررت وقتها اخد ماما زنيت عليها عشان نروح نزورهم..! "
>>>>>>>>>>>>>>>>>>>>>>>>>>>>>>>>>>
بقلمي / Slsbell Ahmed
- عامل ايه يا زياد ياحبيبي في الكلية؟
= الحمدلله.. و فريده اخبارها ايه
اتكلمت ماما: هي فين صحيح مش شيفاها! وحشتني البت دي!
- عندها درس والمستر الرخم بتاع التاريخ ده بيقعدها بتاع خمس ساعات فاضلها ساعه ونص وتيجي
= هو السنتر بعيد عن هنا؟
- مش اوي هي بتركب له البتاع الى مسمينه مشروع ده
= طيب ما توصفيلي فين و اروح اجيبها علطول
- ماشي.. هديلك اسم السنتر
" طَلعت المكان من على الفون و روحت استنيت هناك وطلبت من خالتي متعرفهاش حاجه فضلت مستني في العربية لحد ما لقيتها طلعت اتصدمت معقول هي؟؟.. دي اتحجبت!! عبال ما فوقت من صدمتي لقيتها اتحركت شوية فا نزلت من العربية و قبل ما اقرب منها لاحظت انها قعدت في المحطه ودموعها بدأت تنزل"
" روحت لعندها بسرعه "
- فريده!!
" رفعت عينيها وبصتلي ولما شافتني اندهشت "
= زياد!!؟؟
مسحت وشها وقامت بصتلي: انت بتعمل ايه هنا؟
- انتي بتعيطي ليه!
" سكتت ومردتش عليا فا اتنهدت "
- طب تعالي العربية هناك
" اتحركنا بصمت و ركبت لقيتها بتعيط تاني اكتر "
- ايه مضايقك طيب!!
= الى كان مضايقني اني جبت درجه زي الزفت وتعبت من السنه دي.. بس الى مضايقني دلوقتي هو انت
- انا!!!
بصتلي وعينيها مليانه دموع: كل ده مفكرتش تكلمني!!
بدأت تتكلم بعياط: مفكرتش تسأل عليا وانا جيت هنا وبقيت لوحدي ومعرفش حد انت بجد مفكرتش فيا خالص مكنتش مهمه عندك للدرجه دي..!! انا كنت خايفه اكلمك تعمل زي خالتي و تبقي زعلان مني و قولت استني شوية الموضوع يهدي لكن انت مبعتليش حتي!
" مكنتش متخيل انها موجوعه كل الوجع ده!! مكنتش بتعدْب لوحدي انها بعيد.. شوفت مشاعرها ناحيتي الى ظهرت يومها.. و برغم من اني مفروض افرح لكني اضايقت..! "
" سحبت منديل ومديت ايدي بيه فا اتجاهلته "
- مش عايزه منك حاجه ابدا يا زياد.. لو هتروحني اتفضل عشان مش عايزه اقعد معاك اكتر من كده
= ولا حتي عايزه تسمعي ليه كنت بعيد!
- مش فارق معايا! طالما انا مفرقتش معاك
= بس ده غصب عني كل حاجه كانت غصب عننا
- متجمعناش في جمله واحده فاهم؟
= انتي كمان مجتيش وقت لما خالتو جت
- متستاهلش تعرف ليه
" استغربت ان فيه سبب.. غير الى خالتو قالته؟!"
= طيب فريده ممكن تـ
قاطعتني بأندفاع: روحني يا زياد او سبني انزل اخد المشروع و أروح !
" كنت وقتها بين اختيارين.. يا اما اصارحها بأسبابي..و اعترف بحبي.. ومعرفش ده هيترتب عليه ايه او افضل ساكت! و انا اخترت افضل ساكت.. هي مش حمل حورات السنه دي! "
" وصلنا تحت البيت وجت تفتح الباب عشان تخرج بس انا كنت قافله.. كنت علطول بعمل فيها الحركه دي عشان اضايقها كانت وقتها بتحدف عليا مناديل العربية.. بس هي سكتت وبصت قدامها"
- افتح الباب..
" اتنهدت بتعب وبصتلها "
= عموما عاوزك تعملي الى عليكي السنه دي و متركزيش في درجات الامتحان انتي بتغلطي عشان تتعلمي و تعملي احسن ما عندك اخر السنة.. ومتنسيش انتي قولتي هتعدي مجموعي.. خليكي قد كلامك.
" فتحت الباب فا نزلت بصمت وطلعت ماما تحضن فيها وكانت فرحانه بحجابها انا كمان كان نفسي اقولها قد ايه فرحان انها خدت القرار ده.. لكن فضلنا طول اليوم بنتجاهل بعض.. لحد ما مشيت"
" رجعنا القاهره و كنت حاطط املي في ربنا.. اننا هنبقي سوا في الاخر.. كان عندي يقين تام ان ربنا شايل لينا الأفضل "
>>>>>>>>>>>>>>>>>>>>>>>>>>>>>>>>>>
صلي على محمد
|| بعد مرور شهور ||
- زياد.. يا زيزو
= يا امي بكره اسم زيزو ده وانا كبرت والله
- طيب يا كبير.. فيه عريس متقدم لفريده لسه خالتك بتقولي.. ومستني تخلص امتحاناتها عشان يروح البيت وكده.. قالتلي انها عاوزانا نـ
قاطعتها بعدم استيعاب: عريس لمين لماما!
- لفريده بقولك يوه !
= فريده دي عيله !!! عريس ايه دلوقتي؟؟
- انت بتزعق كده ليه يا واد انت
= عشان اختك شكلها مخها لسع
فتحت عينيها بصدمه: خد هنا يا زياد!!! انا هعرفك طريقتك دي !!
" سيبتها ودخلت اوضتي.. فضلت تزعق ومكانتش فاهمه حاجه طبعا.. حاولت اهدي يومها عشان مكسرش اوضتي كلها وفضلت اصبر نفسي بأنها مستحيل توافق.. اكيد لا.. انا حسيت انها بتحبني!! "
" لكن للأسف كل ده مكنش مجرد كابوس.. كان حقيقه.. الحقيقة الى ظهرت لي بعد امتحانات الثانوية وانا قاعد بفطر معاهم في البيت "
- يعني هتروحي إسكندرية بقا
طيب ياسيدي ابقي اتفسحلك حبه عشان متقعدش تقول الكلية قرفتني
" بدات اركز في كلام بابا وسيبت الفون "
- اتفسح فين مش فاهم؟
= ماهي بتقولك خطوبة بنت خالتك الاسبوع الجي وعايزه تقعد عند خالتك شوية بما اننا في اجازه
فا هي تقعد عند خالتك و انت ابقي انزل في فندق كده ولا حاجه
- انتي بتتكلمي عن فريده؟ هي وافقت عليه!!
>>>>>>>>>>>>>>>>>>>>>>>>>>>>>>>>>>>
|| بعد مرور فترة ||
- يا عيني يا عيني ولابساله فستان ابيض كمان؟؟ انتي مفروض تلبسي فستان اسود عشان لما اطربق الخطوبة علي دماغك
= ينهار مش فايت انت ازاي تدخل اوضتي
- ازاي؟ هو ده الى هامك؟؟ بقا بتوافقي على عريس تاني؟؟ ده انتي لسه صغيرة بشخه يابت
= انا صغيرة بشخة!!!!!
- اه واسمك سوكه العبيطه !!! ولا نسيتي
= وحيات امك يا زياد ماشي اطلع بره اوضتي
- مش طالع !! ومحدش هيسمعك بره من الصوت
= ولو حد دخل دلوقتي ولاقانا واقفين !!!
- الباب مقفول
= ينهارك ابيض!! افتح الزفت ده مينفعش كده
- انتي مش هتحضري الخطوبة دي فاهمه؟؟
= انت مجنو ن !!! كريم شوية وهيجي هو وأهله و هننزل و
قاطعتها: وكمان اسمه كريم ؟؟ كريم !!! تسيبي زياد عشان كريم
- اسيب زياد !!! ايوا ايوا صح انا الى سبتك وبعدت عنك ومفكرتش حتي ابعتلك مسدج
= انا عندي أسبابي الى بعدت عشانها
- كل سنه وانت طيب انا مش عاوزاك في حياتي تاني
= مهو مش بمزاجك
- لا بمزاجي مترجعش تعيط بعد لما انت الى سبتني
= وحيات امك هدي ما هتتخطبي له برضو
- بطل هبل !! انت جاي دلوقتي تعمل الشويتين دول
" بصيت حواليا لقيت كوبايه عصير مانجا "
= اظن الخطوبة تبوظ لو الفستان باظ صح؟
" فتحت عينيها بصدمه وعدم تصديق "
- اياك يا زياد انا بحذرك تـ
" مكملتش كلامها و كبيت الكوبايه كلها عليها و الفستان بقي كله مانجا "
- يبن الجرْمه !!!!!
= بتشتمي خالتك؟ الى هتبقي حماتك! حلو اوي
بعد اذنك
" خرجت من الاوضة بسرعه وسيبتها تحت صدمتها واول لما خرجت سمعت زغاريط كتير "
- احمم.. هو العريس وصل ولا ايه يا ماما
= اه هدخل انادي فريده
ابتسمت: اتفضلي ياحببتي..
" دخلت و اول لما سمعتها زعقت ابتسمت معرفش لو كانت فريده قالت اني انا الى عملتها ولا لاء "
" سمعت زغاريط فا عرفت ان المغفل وصل وبعد شوية خالتي دخلت هي كمان شوفت فريده بتعيط لما فتحوا الباب.. مش هنكر اني اضايقت.. لكن مش بعد كل ده هسمح لحد غيري ياخدها ؛ البيت كله اتقلب و اخيرا.. أجلو الخطوبة.. بعد لما اعتذروا لأهل العريس والمصيبه مكانتش كبيرة اوي عشان مكنش معاه غير اسرته لأنها خطوبة بين الأهل بس على الضيق.. "
- انا هفضل معاهم يابني هنا بنت خالتك زعلانه اوي
عقدت حواجبي بتمثيل: فعلا.. مشكلة ربنا معاها هو ازاي ادلق عليها كده وبهدل الفستان كله؟
= بتقول فلت من ايدها
- اممم متعوضه ان شاء الله
كملت في سري: بيا..
= طيب يا حبيبي روح انت .. هتبقي في الفندق الي جمبنا هنا صح؟
- اه خالتو الي قالتلي عليه
= طيب
" اخدت مفاتيح عربيتي و نزلت عشان امشي.. لكني اتفاجئت بحد بيخبط على الازاز ولاقيتها فريده لابسه الاسدال و واقفه فا نزلت من العربية و لفيت روحت عندها "
- ايه نزلك دلوقتي!!! ايه غيرتي رأيك؟
" ضربتني بالبونيه في وشي بكل قوتها وانا اتفاجئت من ردة فعلها و سابتني وطلعت "
" حطيت ايدي على خدي وانا بحاول استوعب "
" اه يابنت هدي !!!!! "
>>>>>>>>>>>>>>>>>>>>>>>>>>>>>>>>>>
|| في الشقة ||
" طلعت لقيت خالتي قاعده جمب ماما بتحكي لها "
- وبس يختي راح داخل اوضته و رزع الباب في وشي ابن المجنو نه و نفس القصة لما قاعدين بنفطر اقوله خطوبة بنت خالتك يقولي ايه! فريده؟ هي وافقت !
= غريبة فعلا.. يكونش غيران يابت يا فوزيه
" بصتلهم قد ايه الاتنين عندهم سذاجه مفرطه !! "
- خدي يابت يا فريده تعالي اوعي تزعلي
"قعدت جمب خالتي وانا بترمي"
- انا مش زعلانه
ردت ماما بشماته: طبعا واحده غيرك تفكر فالنتيجه الى شوية وهتطلع
- والله؟ على اساس ان حضرتك مكنتيش بتقولي كل شوية اتجوزي و ريحيني
= جواز ايه يابنت الجرْمه انتي ده انتي بتحرقي البيض المسلوق يابت
مسحت على وشي بضيق وبصيت لخالتي: شايفه !!
- معلش يا يا فوفو مهي برضو خايفه عليكي حد يتخطب صغير كده؟
= اه انا..
" سيبتهم و دخلت اوضتي استغربت الدمعه الى نزلت من عيوني عليه.. عشان بحبه.. وعشان من كتر عنادي وغبائي كنت هتخطب لواحد مش طيقاه ولا كنت عايزه اتخطب اصلا بس عشان اثبتله اني مكنتش ضعيفه!! مش انا الى ابان ضعيفه!! "
" حاولت اهدي شوية وبقمه السخافه افتكرت الى عمله على فستاني المهزق بس غصب عني ضحكت.."
" قررت انسي كل ده لما افتكرت النتيجة.. وفضلت اتابع لكن لسه مفيش اخبار.. "
>>>>>>>>>>>>>>>>>>>>>>>>>>>>>>>>>
بقلمي سلسبيل_أحمد
|| تاني يوم الصبح | في الفندق ||
" صحيت بصيت على البحر الي كان قدامي وافتكرت زمان لما فريده خلتني اوعدها اني اوديها البحر بليل وافضل معاها عشان بتخاف.."
" ابتسمت و حطيت ايدي على خدي لاقيته وجعني شوية اثر صْربتها.. ماشي يا فيرو.. مردوده..! "
|| في البيت ||
- اخيرا يختي صحيتي قومي كلمي أبوكي
" اوقات الواحد بيصحي واخد قرارات.. متفهمش بقي خدها فالحلم ولا حصل ايه.. "
- نعم؟ عايزه تلغي الخطوبة!!
= اه يا بابا مش مرتاحه مش عايزه أكمل
- انتي يابنتي مجنونه هو لعب عيال
= انا لسه صغيره
- مانا قولتلك كده!!! قولت وقعدتي تعيطي
= كنت غلطانه انا آسفه!
اتعصب وقام: ادي اخرت الى يمشي ورا عيال
" رجعت اوضتي تاني وفضلت طول اليوم مقريفه عرفت ان الزفت جاي يتغدي معانا "
>>>>>>>>>>>>>>>>>>>>>>>>>>>>>>
" الجرس رن فا روحت افتح الباب بعدم اهتمام وكان هو "
- يا بجاحتك تديني بونيه وكمان مش عاجبك
= متتكلمش معايا أصلا
- احسن ده انتي خسارتك مكسب
= تمام
- تمام ايه ده خدي هنا
= انت هتصاحبني!
- بيبي احنا اوردي صحاب
= ولا اعرفك.
" سيبته و دخلت الأوضة وبعدين سمعت ماما بتنادي عشان اجيب معاهم الأكل و لقيت موبايلي بيرن كذا مره فتحته كانت واحده صحبتي باعته مسدج "
- مبروك يا فريده مبروك النتيجه طلعت وجبتهالك اهي جبتي 86%
" بصيت في الصورة ومصدقتش نفسي وفضلت اصوت بفرحه خرجت لهم وانا عماله اتنطط ومش مصدقه "
- يا ماما !!!! ماما !!!!! يا خالتو !!!!
= فيه ايه يا بت !!
- النتيجه طلعت جبت 86 % !!!!!!
" حضنتني وفضلوا يزغرطوا و يهيصوا !! وسط كل ده كنت شايفه نظره فخر فظيعه في عيون زياد.. كانت كفيله تهون عليا كل حاجه.. "
" منمتش اليوم ده من الفرحه ولا من تفكيري فيه.. لاقيته باعتلي مسدج يستفزني و بيقولي جدعه عشان سبتي العريس المغفل مردتش عليه بس ضحكت.. لكن احنا رجعنا نبعد تاني بعد لما رجع القاهرة.. "
" مفاتش أسبوع ولقيت بابا بيكلمني عن عريس تاني.. قولت خلاص بقا مش كل شوية هلعب.. و رفضته و بابا محاولش يضغط عليا.. "
>>>>>>>>>>>>>>>>>>>>>>>>>>>>>>>>>
صلي علي محمد
- انا مش قولتلك جايلنا ضيوف قومي اللبسي
= مانا لابسه اهو!!
- لا مش حلو غيري
= اللبس ايه يعني يا ماما
- فستان من فساتينك
= ليه هو فرح
- اسمعي الكلام
= طب مين جي؟
- اخلصي يا فريده متتعبيش قلبي معاكي !!
" قومت بملل لبست الوليه دي عامله لي كمين ابسلوتلي عامله كمين..! "
" غيرت واستينت و الشقه كانت بتبرق.. كمين وش والله.. و كمان بابا قاعد مستني هتجوزني على غفله ولا ايه الست دي.. "
" شوية والباب خبط قعدت بهدوء ولقيت خالتي و جوزها داخلين و وراهم خالتي اسراء كمان !؟؟ و فالاخر زياد! وشايل ورد و لابس قميص و بنطلون..!"
"لاقيت بابا مبتسم وبيتكلم"
- منورين يا جابر
جوز خالتي بنفس الابتسامه: بنورك يا حج
فوزيه: انا بقول ندخل فالموضوع
" نهت كلامها وهي بتضحك!!؟ هو ايه الى ندخل في الموضوع هيهيهيي؟؟ موضوع ايه بجد "
هدي: انا بقول كده برضو
زياد اتكلم: احمم.. انا جاي اطلب ايد فريده يا عمي
رديت بدهشه: نعم !!!
فوزيه: جرا ايه يابت يا فريده الله!
" كملوا كلام و اتفاق ولا كأني موجوده!!! و بابا بيقولهم اه موافق!!! الو محدش بيكلمني ليه! "
زياد: استاذنك يا عمي بعد ما نقرا الفاتحه عاوز اخد فريده ساعه بس ونرجع..
- فريده مين.. ما حد يرد عليا.. هو انا شفافه ولا ايه انتوا شايفني؟
لقيت خالتي بتنكشني: يلا ياحببتي اقري الفاتحه
- لا اقروا انتوا اصلي مش متوضيه ههه
= اقري يابنت الجرْمه
بصيت لماما: اختك قالت عليكي جرْمه
" وفعلا قارينا الفاتحه و سابوني انا و زياد ننزل و اول لما نزلت عند عربيته انفجر ت بقا "
- انت بتهزر معايا يبن الظريفه؟
= فين ياحببتي الهزار ده؟
- جاي تخطبني فجأه؟؟ ايه صحيت من النوم قولت لما اخطبها
= ممكن تيجي معايا الأول وبعدين نتكلم
- انا مش موافقة خد بالك!!
= بصي تعالي معايا وهعمل الي يريحك
- اجي فين يا زياد!!
= هتعرفي لما نوصل
" قررت اركب و أروح معاه.. وافتكرت زمان لما كنت بركب العربية وافضل اتنطط زي العيال.. واحدفه بالمناديل وكان بيستحملني.. ابتسمت وانا حاسه فا بصلي "
- افتكرتي ايه؟
= ملكش دعوة!
- عموما احنا وصلنا
" بصيت جمبي و شوفت البحر ورجعت بصتله بستغراب "
- انزلي يلا مبلمه ليه
" نزلت وعدينا الطريق و روحنا قدام البحر.. روحنا قدام البحر بليل.. "
بصتله وعيوني بتلمع: يعني لسه فاكر؟
- وعمري ما نسيت اي حاجه تخصك!
= انت عارف كنا قد ايه!
- كنتي في اوله إعدادي.. بس قولتيلي انك هتستني لما نكبر و نقف سوا قدام البحر ويمكن وقتها تكوني مش بتخافي بس قولتي انك هتفضلي عاوزاني معاكي و انا مكنش قصدي ابعد يا فريده.. انا كنت خايف.. كنت خايف عليكي مش عاوز نعمل اي حاجه غلط.. او علاقتنا تبقي غلط حاولت والله بكل جهدي
لحد ما وصلت لهنا.. نبقي سوا قدام الكل
عيوني دمعت: وليه مقلتش كل ده قبل كده! قولي اننا هنبعد.. وهنبقي سوا بعدين!
- عشان مينفعش اقول حاجه مش متأكد منها النصيب بيخبي كتير افرض موت!
صْربته في كتفه: بعد الشر !!
ضحك: متعيطيش طيب يا سوكه
- بكرهك بجد بطل الاسم ده بقا يا بلاعه!
انت ازاي تدلق عليا العصير هاه؟
= امال اسيبك تخدي قرار اهبل شبهك
يعني انا استني كل ده ويجي كريم بيه يهد كل حاجه ده طلع من انهي داهيه ده؟
- ده كان اسستنت في السنتر وبكرهه اوي
بصلي بدهشه: بتكرهيه!!
- ءءء اقصد يعني ءءانا
= والله كنت حاسس انك عايزه تغظيني يا سوكه
- بكرهك تاني
= وانا يحببتي من القلب للقلب.. المهم انا فيه كلام كتير عايز اقوله بصراحه بس مش هينفع دلوقتي لازم بعد كتب الكتاب..
- احسن برضو مش ناقصه محن
= بس فيه حاجه هموت و اقولها دلوقتي
- ايه يا بلاعه قول
= الفستان ده عامل منك بني ادمه يا سوكه.
ضحكت جامد: وانت القميص و البنطلون عاملين منك إنسان..!
>>>>>>>>>>>>>>>>>>>>>>>>>>>>>>>>>>>>>
تمت
#النصيب
#سلسبيل_أحمد #بيلا
وفر وقتك… لو بتدور على رواية كاملة وممتعة… اضغط (هنا)
