رواية رحمه في رمضان الفصل الأول 1بقلم سلوي عوض
رواية رحمه في رمضان الفصل الأول 1
#سلوي_عوض
#رحمه_في_رمضان
اول بارت
وبعد ما اتعرفنا على معظم أبطالنا، فها هي الساعة العاشرة صباحًا، وفي منزل رحمه نجد والدتها أمينه.
أمينة: بت يا رحمه انتي يا همي الكبير
رحمه: ايه عاوزه ايه
أمينة: هعوز منك ايه يا حسرة
رحمه: أمال بتندهِي عليا ليه
أمينة: خدي يا أختي الـ٢٠ جنيه دي وانزلي هاتي بخمسه فول وخمسه طعميه وخمسه عيش، ولا أقولك هاتي بسبعه بس وهاتي التلاته جنيه الباقي، إياكي تصرفيهم أقطع خبرك
رحمه: أولًا ما فيش بخمسه جنيه فول
أمينة: لاء في رخمي انتي، بس على الوليه انتصار صاحبة المطعم وهي هتديكي، اخلصي ومتتأخريش، أبوكي عايز ينزل الورشه، مش تروحي تموتي، وكمان أختك عندها امتحان
رحمه: امتحان أختي بعد تلت ساعات
أمينة: مش يابت على متوصل للمدرسة
رحمه: ليه هي المدرسة في محافظة تانية؟ وبعدين انتي مالك
رحمه: آه صح عشان يا عيني المسكينة بتمشي على رجليها، حرام عليكي متديها فلوس تركب، البت رجليها باظت من كتر المشي
أمينة: وانتي ايه فهمك ده، المشي رياضة، ياله بقا بطلي رغي وروحي
رحمه: طاب هاتي أجيب كيس شيبسي
أمينة: لاء بيوجع البطن
رحمه: طاب هاتي أجيب اندومي
أمينة: بس يا بت بلاش قرف ده بيموت
رحمه: طاب هاخد الباقي أجيب بيهم لبان
أمينة: وحياه أمك لو جيبتي حاجه غير اللي قولتلك عليه لا كون قاطعه خبرك
رحمه: نهار أسود تموتي بنتك ضناكي البكريه عشان ٣ جنيه
أمينة: غوري بقا
رحمه: طيب ماشي أنا غورت اهو
لتتركها رحمه وتنزل إلى الحارة.
رحمه: كده بردك يا أما مش عايزه تديني أجيب الحاجه اللي نفسي فيها، طيب هنشوف
لتذهب لدكان العم عبده البقال.
رحمه: عم عبده يا عم عبده عايزه كيس شيبسي أبو عشرة جنيه وكيس اندومي
عبده (باستغراب): ومن أمته ده؟ وجيبتي الفلوس منين
رحمه: وانت مالك، انت تبيعلي وانت ساكت، حاجه عجيبه ناس حشرية
عبده: أصلك عمرك ما عملتيها
رحمه: اديني عملتها، اخلص بقا
عبده: خدي يا بنتي
رحمه: شكرًا
لتقف بجانب الدكان لتأكل الشيبسي والاندومي، لترى الطفل يوسف يمر أمامها.
رحمه: واد يا يوسف
يوسف: عايزه ايه
رحمه: فين باقي العيال
يوسف: بيجمعوا عشان هنلعب، ما احنا خدنا الأجازة
رحمه: طاب لعبوني معاكم
يوسف: بس انتي كبيرة
رحمه: وايه يعني أنا بحب ألعب معاكم
يوسف: أفكر
رحمه: طاب خد شوية شيبسي
يوسف: هاتي وتعالي العبي معانا، هنلعب في آخر الحارة
رحمه: هنلعب احنا ومين
يوسف: عمرو وعادل وعبدالرحمن وعلي وذكي
رحمه: ذكي ابن ذكيه الحرامية
يوسف: أصل الكورة بتاعته
رحمه: ماشي أمري لله
أما في شرفة المنزل كانت أمينه تجلس في انتظار ابنتها رحمه.
أمينة: وبعدين في البت دي، كل ما أبعتها مشوار تغيب كده
صابر: فين الفطار يا أم رحمه
أمينة: رحمه راحت تجيبه بس عوقت
صابر: يمكن الفرن زحمة ولا حاجه، اعمليلي كوباية شاي
أمينة: نعم يا أخويا كوباية شاي قبل الفطار وكوباية بعده، باكو الشاي مبياخدش معانا ١٥ يوم ولا كيلو السكر يادوبك مبيكملش الشهر
وهنا تخرج رانيا من غرفتها وهي ترتدي الزي المدرسي.
رانيا: صباح الخير
صابر: صباح النور يا بنتي
رانيا: فين الفطار يا أما أنا جعانه أوي وكمان عشان متأخرش
أمينة: أختك راحت تجيبه
رانيا: يبقا مش هفطر في يومي، أنا رايحه المدرسة أحسن أتأخر
صابر: معاكي فلوس
أمينة: وهي هتعوز الفلوس في ايه، اقعدي يا بت أختك زمانها جاية
صابر: هاتيلي أشرب يا وليه
أمينة: عايز تشرب ولا بتوزعني عشان تديها فلوس
صابر: فلوس هو أنا معايا حاجه
أمينة: بقولك ايه أنا طلعت لأم عصام عشان الإيجار قالتلي إنها كانت رايحه تشتري طلبات وقابلتك وادتك الإيجار، فين الفلوس
صابر: أعوذ بالله منك جوه على التسريحة
لتتركهم أمينه وتذهب إلى غرفة النوم، وفي هذه الأثناء يخرج صابر عشرة جنيهات.
صابر: خدي يا بنتي حكم القوي على الضعيف وأوعي تقولي لأمك، ياله يا أبا عشان متتأخريش
رانيا: ربنا يخليك لينا يا أبا
صابر: ويخليكم لينا انتي وأختك
لتنزل رانيا في طريقها إلى مدرستها، أما رحمه فكانت تلعب مع الأطفال.
رحمه: شوط يا يوسف، أوعى حد يقطع عليك
يوسف: متخافيش
رحمه: جون جبنا جون
ذكي: لاء الكورة خبطت في العرضه
رحمه: لاء مخبطتش
ذكي: خلاص مافيش لعب وهاخد الكورة بتاعتي وأمشي
رحمه: تاخد مين انت
ذكي: هاخد كورتي
لتمسك رحمه بالكرة لتخرج دبوس من طرحتها لتحدث ثقبًا في الكرة.
رحمه: هههههه خد كورتك اهيه بوظتهالك عشان تبقا تهددني تاني
ذكي: والله لأروح أقول لأمي
رحمه: اتفلق انت وأمك ذكيه حرامية الفراخ
ذكي: طاب وربنا لأروح أقولها
ليذهب ذكي ليبلغ والدته.
ذكيه: كده طيب هات الكورة وتعالى معايا هنروح نشتكي لأبوها وناخد منه حق الكورة
ذكي: ماشي يا أما
لتذهب ذكيه ومعها ابنها إلى منزل والد رحمه لتطرق الباب طرقًا شديدًا.
أمينة: اهي جات الحلوه، ايه ياله يا صابر زمان الطعميه سخنه عشان تفطر وتنزل تشوف شغلك وتفتح ورشتك
صابر: افتحيلها طيب هتكسر الباب
لتتجه أمينه نحو الباب.
أمينة: أيوه يا زفته
لتفتح أمينه الباب لتجد ذكيه وابنها ذكي وباقي أطفال الحارة.
أمينة: أم ذكي خير في ايه؟ ولمّه العيال دي كلها معاكي ليه
ذكيه: فين جوزك
أمينة: وانتي عايزه جوزي ليه مش ماليه عينك أنا
ذكيه: طيب أنا بقا جايه أشتكي من بنتك رحمه
أمينة: بنتي رحمه مالها
ذكيه: شايفه عملت ايه في الولا وكمان قطعتله الكورة
الأطفال: واحنا شاهدين عليها
أمينة: صابر تعالى اسمع بتك عملت ايه
صابر: استر يارب
أما رحمه فكانت تصعد السلم وهي تأكل الشيبسي المتبقي وتلحس آخر الكيس لتتفاجأ بذكيه أمام شقتهم.
رحمه: ايه يا وليه انتي ايه اللي جابك هنا
أمينة: فين يا بت الفطار والعيش
رحمه: مش انتي قولتيلي خدي العشرين جنيه هاتيلك بيها حاجه حلوه
أمينة: أنا قولتلك كده، الهي ربنا يحل وسطك ويخلصني منك
ثم تضع يدها على رأسها لتنزع منديلها.
أمينة: كشفت راسي ودعيت عليكي
ذكيه: بقولكم ايه ماليش فيه، عايزه حق الكورة وعايزه فلوس عشان أودي ابني للدكتور
رحمه: فلوس ايه ياله يا وليه من هنا
ليقترب صابر من الباب.
صابر: أم ذكي تعالي خشي
رحمه: تخش فين ياله من هنا
ذكيه: والله ما أنا ماشيه غير لما أخد حقي
لتمسكها رحمه من عباءتها ثم تضربها برأسها.
رحمه: ايه رأيك في الروصيه دي، هتغوري ولا أكمل عليكي
صابر: بس يا بنتي عيب كده
رحمه: مش ناقص كمان إلا ذكيه الحرامية
صابر: والدها عاوزه كام يا ست أم ذكي
أم ذكي: ١٠٠ جنيه
رحمه: جن أما يلخبطك
أمينة: يا نهار أزرق ١٠٠ جنيه بحالها ليه يا أختي
ذكيه: خلاص تعالوا معايا يا عيال نعملها محضر في القسم الطويله الهايفه دي
صابر: اصبري بس
ليدس يده في محفظته.
صابر: خدي يا ستي وحقك علينا ولا تزعلي
أمينة ورحمه: أمي يا رحمه لا كسر عضمك على الغرامات دي كلها
رحمه: لما تلاقيني أبقي كسريني قول يا فكيك
لكن قبل أن تنزل مسرعه تتحدث إلى ذكيه.
رحمه: الموضوع مخلصش يا ذكيه يا حراميه، وحياتك لأهوريكي
لتتركهم وتنزل مسرعه لتطرق الباب على العم خليل ليفتح لها.
خليل: شكلك عامله نصيبه من نصايبك
رحمه: حرام عليك أنا غلبانه، بقولك ايه عندك أكل
خليل: اه في فرخه مشويه اشتريتها امبارح بس مجاليش نفس أتعشى، افتحي التلاجه وطلعيها وسخنيها في الفرن، وعندك سلطات وحاجه ساقعه
رحمه: معندكش شيبسي
خليل: وأنا أقدر مجبلكيش شيبسي، ده أول حاجه بشتريها لما بقبض
رحمه:
والله إنت أجدع واحد في الحارة الهم دي.
أمّا في شقة رحمه، فكانت أمينة تتشاجر مع زوجها.
أمينة:
فلوسك كتير قوي يا أخويا؟ تديها 100 جنيه بحالهم ليه يعني؟
صابر:
جرى إيه يا ولية؟ ما إنتِ عارفة إنها ولية شرانية. مش أحسن ما تروح تعمل محضر لبنتك ويحبسوها؟
أمينة:
طب والله ياريت تتحبس عشان نرتاح منها. 120 جنيه على الصبح، وإحنا ولا كلّنا ولا شربنا!
اه يا رحمة الكلب، ورحمة أمي لأربيكي من أول وجديد!
صابر:
لمّي لسانك يا أمينة! إيه رحمة الكلب دي؟ اتحترمي نفسك.
أمينة:
جاتكم داهية في صباحكم!
صابر:
أنا نازل أشوف شغلي، زمان الواد خشبة واقف قدام الدكان. لما تعملي الغدا ابعتيلي أي عيل يناديني.
أمينة:
اصبر، متنزلش.
صابر:
عاوزة إيه تاني؟
أمينة:
طلّع محفظتك.
صابر:
ليه إن شاء الله؟
أمينة:
ما تطلعش عفاريتي عليك، اخلص.
صابر:
بس خلاص، اقفلي مقلب الزبالة اللي فتحتيه ده.
أمينة:
طيب اخلص طلع.
(يخرج صابر المحفظة)
صابر:
خدي أهي.
(تفتح أمينة المحفظة وتأخذ كل المال)
صابر:
طيب سيبيلي أي حاجة.
أمينة:
ولا مليم.
صابر:
طيب حتى هاتي 10 جنيه أجيب بيها شاي من القهوة.
أمينة:
قلتلك ولا مليم.
وآه، بقولك إيه؟ ابقى كلم السمسار يشوفلنا حد يسكن الشقة الفاضية دي.
صابر:
كلمته، وقاللي الساكن هييجي أول يوم رمضان.
أمينة:
يعني بعد بكره، يبقى يوم 8 في الشهر؟ يبقى يدفع الإيجار كامل.
صابر:
طيب.
أمينة:
اعمل حسابك في 2000 جنيه عشان أجيب خزين رمضان وأستر البيت.
صابر:
في طلبية هسلّمها بكره، هبقى أديكي مكسبها.
أمينة:
ومكسبها كام؟
صابر:
إنتِ مالك؟ مش عايزة 2000 جنيه هديهملك؟
أمينة:
أما نشوف… راجل متعب، الجنيه بيطلع من تحت جلدك.
صابر:
أنا برضه؟ أمال إنتِ تبقي إيه؟
أنا نازل من وِشّك.
أمينة:
مع السلامة يا أخويا.
ينزل صابر على السلم، ويصل إلى شقة العم خليل، فيطرق الباب.
خليل:
أيوه… جاي.
(يفتح الباب)
خليل:
تعالي يا معلم صابر، خش.
صابر:
رحمة عندك طبعًا؟
خليل:
الصراحة آه، بس أمانة عليك متزعلهاش.
صابر:
مقدرش، دي حبيبة أبوها والبِكرية بتاعتي.
خليل:
طيب خش يا راجل.
(يدخل صابر، وتخرج رحمة بالطعام)
رحمة:
أبويا!
صابر (ضاحك):
أقول يا فكيك أبوها! تعالي متخافيش، بس متعمليش كده تاني.
رحمة:
حاضر.
تعالى بقى كُل… فراخ مشوية.
صابر:
حد يفطر فراخ؟
رحمة:
وحياتك، ولا فطار ولا غدا ولا عشا حتى.
صابر:
وبعدين معاكي؟
رحمة:
يعني عاجبك عمايل مراتك دي يا أبا؟ ده أنا قربت أنقُط عدس وبصّارة.
صابر:
خلاص، كل سنة وإنتِ طيبة… رمضان بعد بكره.
وأدي أمك فلوس تشتري خزين الشهر الكريم.
رحمة:
هاااااه هاااه هاااه!
صابر:
عندك شاي يا خليل؟
خليل:
آه عندي. خشي يا رحمة اعملي شاي لأبوكي، واعمليله لقمة جنب الشاي.
رحمة:
فوريرة.
خليل: ربنا يخليهالك يا صابر.
صابر: يارب، ويهديها وتبطل مشاكل بسبب جنانها ده، مافيش ولا عريس جالها، والبت كبرت، ونفسي أفرح بيها.
خليل: إن شاء الله تفرح بيها وبنجاح أختها، ويعينك عليهم.
(تخرج رحمة عليهم حاملة صينية، وعليها إفطار لوالدها)
رحمة: افطر يا أبا، بألف هنا وشفا.
صابر: ربنا يكرمك يا بنتي يارب.
(وبعد أن أنهى صابر إفطاره)
صابر: اطلعي لأمك يا رحمة واتأسفيلها.
رحمة: يا سلام، ولما تعضّني؟
صابر: يا بت عيب عليكي، أمك مهما كان، وانتي غلطانة برضه.
خليل: خلاص يا صابر، روح إنت على شغلك، وأنا هطلع معاها ونستسمح الست أمينة.
صابر: ربنا يكرمك يا خليل ويسعدك يا رب.
خليل: هو إنت فاكر إن رحمة بتك لوحدك؟ دي بتي أنا كمان.
صابر: ربنا يديم المعروف بينا يارب.
(يتركهم ويذهب إلى ورشته)
رحمة: بقولك إيه يا عم خليل، إنت مبتتجوزش ليه بعد وفاة مراتك الله يرحمها؟
خليل (بحزن): مستحيل واحدة تاخد مكان المرحومة.
رحمة: مش أحسن ما تقعد لوحدك كده؟
خليل: أهي أيام وبتتقضي.
رحمة: طب إيه رأيك أجوزك ذكية الحرامية وتبقى معايا في نفس البيت وأطلع البلا الأزرق على جتتها؟
خليل: حرام عليكي يا رحمة، عاوزه تبليني بيها؟
رحمة: بلاش ذكية الحرامية، خلينا في خالتي بمبة.
خليل: يا بنتي إنتِ حد مسلطك عليّا؟ بمبة اللي مش سايبة حد في حاله!
رحمة: حيّرتني معاك.
