رواية أسرار خافيه الفصل العاشر 10 بقلم مصطفي محسن
رواية أسرار خافيه الفصل العاشر 10
الشيخ عيسى بص للعمدة نظرة طويلة تقيلة وكأن عينه شايفة زمن قديم مش قادر يطلع منه، صوته خرج كأنه بيستدعى روح من تحت التراب وقال: السر ابتدا من الدوار بتاعكم يا عمدة، والكلمة وقعت على صدر ابن العمدة زى حجر تقيل وقال بتوتر واضح: ازاى يا شيخ عيسى؟ الشيخ خد نفس عميق وكأنه بيسترجع ذكريات سوداء وقال: جدك الحج بدر الله يرحمه اكتشف إن ابنه جابر كان ماشى فى طريق حرام مع حنان أم غريب، والمصيبة إن حنان كانت حامل، وقتها الحج بدر قال لازم نخلص من الموضوع ده قبل ما الفضيحة تكبر.
-
لكن أبوك الحج عبد الستار دخل وقال له سيبنى أنا أتصرف عشان ما نغرقش نفسنا فى مصيبة أكبر، وبما إن الحج بدر كان واثق فى حكمة ابنه وافق، عبد الستار راح لحنان واداها فلوس كتير وجوزها لراجل اسمه عنبرى كان شغال فى الدوار، ومشّوهم من البلد فى هدوء وكأنهم ما كانواش موجودين، وعدت سنين طويلة لحد ما غريب عرف الحقيقة من جوز أمه قبل ما يموت، وساعتها قلبه اتحول لنار وقرر يواجه العمدة عبد الستار، والعمدة كان قلقان على سمعة العيلة فاستدعاه للدوار وقال له تعالى اطلب سكن فى القرية وأنا أجبلك بيت محترم، وغريب صدّق وفرح إنه هيطلع من الفقر ويبدأ حياة جديدة هو ومراته.
-
وبالفعل عبد الستار جاب له بيت وقعدوا فيه، لكن جوا عقلة كان بيخطط لحاجة أبشع، خلّص على مرات غريب الأول بطريقة محدش قدر يثبتها عليه، وبعدها قال لغريب خلي ولاد أخو عنبرى يقعدوا معاك فى البيت، وغريب وافق من غير تردد، لكن عبد الستار كان عامل كده عشان يشتت الشبهة لو حصل حاجة، وفى الآخر خلّص على غريب نفسه، ابن العمدة وقف فجأة كأنه اتصعق وقال بصوت مبحوح: إنت بتقول إيه يا شيخ عيسى؟ إنت بتتهم أبويا وجدى وعمى؟ الشيخ مسكه من كتفه بقوة وقال: يا بنى أنا بقول الحقيقة اللى اتدفنت سنين تحت الأرض، ومش هاشيل ذنب حد يوم القيامة.
-
هانى تدخل بسرعة وقال: اهدى يا عمدة خلينا نسمع للنهاية وبعدين نحكم، الشيخ كمل وقال إن غريب ومراته ما اندفنوش فى المقابر أصلاً، وإن تصريح الدفن كان ملعوب فيه عشان ما يتعرضوش للطبيب الشرعى، ابن العمدة قال بغضب: إيه الهلاوس دى يا شيخ؟ الشيخ قال بثبات: دى مش هلاوس… دى الحقيقة اللى هتطلع رغماً عن الكل، هانى قال بقلق: طيب لو الكلام ده صح… ليه الج/ثة ما تحللتش؟ وليه بتطارد عمر؟ وفين شادى اللى اختفى؟ الشيخ بص للأرض وقال: اللى عرفته إنهم اتدفنوا فى مكان محرم، ومحدش يعرفه غير شخص واحد كان ملازم العمدة عبد الستار اسمه خلف، ابن العمدة قال بسرعة: خلف الدهشورى؟ الشيخ هز راسه وقال: أيوه هو.
-
هانى بص لابن العمدة وقال بصوت هادئ: انت تعرف خلف؟ ابن العمدة قال بثقه: طبعًا أعرفه، بس الكلام اللى قاله الشيخ عيسى ده أنا مش مصدقه، الشيخ عيسى اتنهد وقال بنبرة مليانة رهبة: والله يا بنى إحنا فى دنيا وبكرة آخرة، لو ما صدقتش فى الدنيا هتعرف الحقيقة قدّام ربنا، وأنا معنديش أى مصلحة عشان أكذب عليكم، هانى لف ناحية ابن العمدة وقال له: لو عايز تتأكد فعلاً… لازم نسمع من خلف بنفسنا، ابن العمدة شد نفسه وقال بثقة: أنا واثق إن أبويا عمره ما يعمل كده، هانى قال: طيب… خلينا نواجه خلف، وقتها بس هنعرف الحقيقة كاملة، ابن العمدة بص له بنظرة تحدّى وقال: وأنا هثبتلك إن كل اللى اتقال كذب وافتراء.
-
الشيخ عيسى ابتسم ابتسامة صغيرة وقال: الله يسامحك يا ولدى… بس لما الحقيقة تطلع هتيجى لى وتعتذر، ابن العمدة ما ردش، لف وخرج من الباب، هانى وقف لحظة وبص للشيخ عيسى وقال باعتذار صادق: سامحنا يا شيخ، وخرج وراه، وهما ماشيين فى الطريق كان الجو تقيل وصوت الريح بيخبط فى البيوت القرية، هانى قال لابن العمدة: لازم نقابل خلف النهارده… مفيش وقت نضيّعه، ابن العمدة بص له وقال: إنت لسه مصدق تخاريف الراجل ده؟ أنا هقعدك مع خلف بنفسه، وساعتها هتتأكد إن كل اللى اتقال كلام فاضى.
-
يا ترى يا جماعة… الشيخ عيسى بيقول الحقيقة ولا بيلفّ ويدوّر؟
وإيه اللي تتوقعوا خَلَف هيقوله للعمدة وهاني لما يوصلوا له؟
والأهم… إيه السر ورا ظهور غريب بالطريقة دي؟ 🤔
قولوا رأيكم…
-
انتظروا بكرة ان شاء الله الجزء الحادى عشر
#قصص_رعب_حقيقية #قصص_رعب #رعب #مصطفى_محسن
يتبع
رواية أسرار خافيه الفصل الحادي عشر 11
الرواية كامله من( هنا )
