رواية بيت بلا روح عبر روايات الخلاصة بقلم مصطفى جابر
رواية بيت بلا روح الفصل الثالث 3
حازم لازم يصدقني يحبيبتي دنا قريب هبقي حامل منه وام الواد اللي نفسه فيه ووقتها هيطردك من هنا
روح ببرود : وقتها هنشوفو مين اللي هينطرد وحازم هيشوف حقيقتك
سما بصدمه : تقصدي اي ؟
روح بقرف: أقصد أن الأيام بينا وهيا اللي هتحكم ولعلمك أنا مش بخاف منك أنا صبرت عليكي كتير ولما ييجي وقت الحق ربنا اللي شايف وعادل هو اللي هيفضحك وبكره تندمي
بصت بحزن وكسرة علي اوضة حازم: يمكن النهاردة حازم صدقك بس مش طول العمر هيعيش مخدوع.
دخلت ل حازم الأوضة ...
روح بهدؤء: حازم ... ممكن تسمعني وتبطل تتسرع كدا.
حازم بجمود: عاوزة اي يا روح ولو فاكرة إن لعب العيال دا هيمشي عليا تبقي غلطانه دهبك اللي اختفى في ثانية وبتقولي مش إنتي طب مين غيرك عارف مكانه ومين هيدخل أوضتك ؟
روح بجمود : ممكن اسالك سؤال.
حازم ببرود: اتفضلي اسألي.
روح بكسرة: هو انت بجد مصدقهم ؟ مصدق أي كلمة تطلع منهم حتى لو على حساب كرامتي ؟ هو أنا مكنتش سندك هو مش انا اللي وقفت جنبك السنين اللي فاتت دي ؟
حازم بعصبية: بلاش تلعبى دور المظلومة قدامي يا روح أنا عارفك كويس.
روح بسخرية : انت لو كنت بتعرفني مكنتش شكيت فيا أنا اللي متخلتش عنك يوم حتى وانت بتهني وتجرح وتكسر فيا وكنت بستحمل وأقول جوزي سندي ضهري. والنهاردة تيجي تصدق كلمتين من عروستك الجديده وتكدب اللي باعت من روحها عشانك.
حازم بتوتر مسك دماغه من الغضب: بقولك كفاية يا روح مش ناقص رغي.
روح قربت منه بصوت موجوع: عارف إيه أكتر حاجة بتوجع إنك تبص في عينيّ وتفتكرني كدابة ... إنك تشوفني غريبة عنك بعد السنين دي واللي لسه داخلين حياتك من يومين تصدقهم ....والله يا حازم جرحك ليا ده مش جرح عادي ... ده جرح ست اتطعنت في ضهرها من واحد المفروض أنه راجلها وسندها.
.. سكتت وخدت نفس مكسور..
روح بهدؤء : بس يمكن أنا الغلطانة عشان حلمت إنك تبقى ابويا واهلي عشان مليش اهل افتكرت انك كل حاجه بس انت بدءت تكسر كل دا.
.. حازم سكت لحظة باين عليه اتأثر لكنه عنيد وشه محمر من العصبية ومسك الباب وخرج وهو حزين من كلامها بس مش قادر يبين.
... في اوضة سما...
حازم قاعد لوحده علي السطح ماسك راسه كلام روح بيرن في ودنه: هيا معايا من زمان استحملتني معقول تكون دي روح اللي أنا بكسرها كل يوم ولسه واقفة جنبي طب ليه وجعها كسرني كدا.
.. تليفونه بيرن ب رقم غريب..
حازم بجمود: الو مين معايا.
شخص مجهول : انا اللي الحلوة مراتك بترتب انها تهرب معايا.
حازم بغضب: انت بتقول اي يا مجنون انت مرات مين.
المجهول بمكر: مراتك روح ... انا اتصلت اقولك لانه بصراحه انا عاوز اخلع منها اصلي زهقت من كتر ما بتطاردني وانا ليا بيت واسرة مش حابب اسيبهم الاول كنت بتسلى لكن معرفش انها هتقلبها جد اوي كدا.
حازم بغضب: قطع لسانك روح اشرف منك ومن اهلك
..قفل في وشه..
دقيقه ولاقي رسائل جت له واتس و فيها ريكوردات ب صوت روح..
المجهول بسخرية: أنا هعديلك انك قفلت في وشي عشان عذرك ومش هتصدقني ... بس الريكوردات دي بتاعتها وبصوتها اسمع واتأكد .
حازم بعدم تصديق: مش هفتحهم عشان انا واثق في مراتي.
المجهول بخبث: والله براحتك تفتحهم ولا لا انت حر خليك كدا متقرطس من مراتك الحلوة اكيد هتشوف غيري وتحط راسك في الطين.
حازم كان هيكسر التليفون لكن فضوله خلاه يفتح الريكوردات..
في الريكورد صوت روح وهي بتتكلم: بقولك اي يلا نهرب انا زهقت من العيشة اللي انا عايشاها معاه دي مش كفايه اتجوز عليا ... لا وعمال يزعقلي كل دقيقه بسببها وانا فعلا خبيت الدهب و عماله اوقعه فيهم لكن دا بيتقلب عليا انا ف خلاص بقي انا ههرب معاك ونعيش احرار.
حازم بدموع وصدمة: معقولة يا روح انتي تعملي معايا كدا وانا اللي كنت فاكر اني فعلا ظالمك.
.. نزل جري ودخل بزعيق: هي فيننن رووح انتي يا خاينةة.
روح بقلق: في اي يا حازم مالك بتزعق لي. .
حازم بغضب : اسكتيييي ما تفتحيش بوقك غير لما أخلص كلامي.
روح اتجمدت مكانها من منظره.
حازم رفع الموبايل في وشها: إيه دا يا حلوة تسجيل بصوتك بتقولي فيه إنك هتهربي مع واحد! مين الواد اللي اللي خونتيني معاه هااا مين العشيق اللي أنا مأوي مراتي ومخليها بتضحك عليا و مخلياني مسواش لا وعاوزة تهرب من ورا ضهري.
.. روح عينيها وسعت من الصدمة،..
روح بغضب : إنتَ اتجننت يا حازم أنا أهرب بعد كل اللي عملته عشانك بعد ما صبرت على ظلمك وخيانتك ... أقسم بالله لولا العِشرة كنت مشيت من بدري بس عمري ما هقصر في حاجة إلا شرفي دي الخط الأحمر واللي يحاول يمسه هخليه يندم انت فاهم.
حازم صرخ: كفاية تمثيل انتي اي مبتشبعيش قرف التسجيل موجود وسمعته بودني خدي اسمعي يا حلوة.
... روح سمعت بصدمة..
روح بصدمة: دا مش انا مستحيل اعمل كدا اكيد حد مفبركه ... التسجيل ده مزيف زي اللي حواليك لأنك لو لفيت الدنيا كلها مش هتلاقي ست زيي.
.. سما وامها كانوا واقفين عند الباب يتفرجوا متوقعين يشوفوا روح مكسورة
حازم بغضب: انتي عارفة اني ممكن ادفنك دلوقتي ومحدش هيلومني.
روح بسخرية : ادفني ولعلمك أنا من النهارده مش هقدر أكمل معاك خلاص طلقني يا حازم."
حازم اتنفض وصوته عالي: إيهههه ... إنتي كمان اللي بتطلبي الطلاق والله لأطلّقك دلوقتي وأوريكي قيمتك إيه من غيري.
روح ببرود: هكون احسن من غيرك الف مرة.
حازم بغضب اعمي : روح إنتي طالق.
.. سما واقفه بتضحك بخبث وفرحانه.
.. لكن فجأة روح بصت لحازم بسخرية وقالت: حلو بم انك طلقتني يلا دلوقتي اتفضل إنت و مراتك شوفوا هتناموا فين
حازم بصدمة : البيت دا بيتي يا روح وانتي اللي روحي شوفي هتنامي فين
روح بصوت ثابت: ههه بيت مين يا حازم دي الشقة بأسمــي ودا كان مهــري شكلك نسيت ولا عملت نفسك ناسي.
.. حازم وشه قلب ألوان واقف مصدوم مش قادر يرد...
روح كملت وهيا بتفتح الباب: يلا يا حضرات كلكم من غير مطرود تتفضلوا تطلعوا بره الشقة دي لان ده بيتي أنا بس وحقي اللي مكتوب بورق رسمي ... أنا اتحملت الذل عشان العِشرة لكن بعد الطلاق وجودكم هنا بقى اسمه تعدي.
سما بغضب : انتي بتهزري صح يا روح.
روح ببرود: وانا من امتي وانا بهزر مع اشكالكم دي يلا يا حلوة اطلعي برّه قبل ما أجيب البوليس يرميكي انتي وجوزك دا في الشارع.
ام سما بصوت عالي: ما تنطق يا حازم قولها حاجة.
.. حازم واقف متجمد عينه في الأرض مش قادر يفتح بوقه من الصدمة...
روح فتحت الباب على آخره، بصوت عالي مليان قوة لأول مرة: لا خر مرة هقولكم برا ... اوعي تكون فاكر اني هسيب لكم حقي لانك متستهلش
بعد ساعه حازم ومراته لمو هدومهم وخرجوا
.. سما وامها كانو خارجين وهما مش طايقين نفسهم وحازم واقف تايه حاسس لأول مرة إنه هو اللي اتذل واترمى دا غير وجعه انه طلقها .
.. بعد شويه...
حازم راح بيت امه أول ما دخل أمه كانت قاعدة في الصالة وشهها قلب ألوان لما شافته.
أمه بأستغراب : اي ده في اي يا حازم جايب مراتك ليه هنا واي الشنط دي ؟
حازم بغضب : أنا طلقت روح يا ماما وكنت ناسي أن الشقه بأسمها فطردتنا منها وجينا نبات هنا لحد ما نشوف شقه نعيشو فيها .
أمه بغضب : بتقول اي ؟؟ طلقت روح ؟ ليه يا حازم هو ده اخرتها تطلق البت اللي شالتك وشالت بيتك سنين.
حازم بعصبية: ما تدخلنيش في نقاش يا أمي الست دي خاينه وخليني ساكت عشان انا علي اخري.
أمه قامت واقفة عينيها مولعة: مين دي اللي خاينه يا بن بطني روح ؟ روح دي طول عمرها زي االالماظ دي عمرها ما رفعت صوتها عليك و دايما بتحبك وتراعيك وتخاف عليك وتخدمك وبتخدمني وبتراعي ربنا فينا ... إنت اللي بقيت مغيب وبتسمع كلام الهانم بتاعتك من وقت ما عرفتها من ورا مراتك واتجوزتها وانت حالك بقي مايل
..
سما بسخرية: هو إيه دا يا طنط إنتي ناسية إني مرات ابنك برضه يعني المفروض تحترميني وبعدين حازم مغلطش في حاجه علي حاجة هيا اللي خانته وعلي علاقه براجل تاني وكانت ناويه تهرب لولا أن حازم كشفها علي اخر لحظه.
ام حازم بصدمه : روح كانت علي علاقه براجل تاني ؟
#يتبع..
