رواية ما بيني وبينه قدر عبر روايات الخلاصة بقلم رقية الأنصاري
رواية ما بيني وبينه قدر الفصل الثالث 3
"سمعنا صوت صريخ جاي من برا ،خرجت من الاوضه بسرعه وقولت بصدمه وخضه
_ دي ماسه!! الصوت جاي من اوضتها
"يوسف جه من ورايا وروحنا على اوضه ماسه ، لقيناها واقعه على الأرض مغمى عليها! ومرات عمي بتحاول تفوقها .."
"جريت عليها بسرعه وقولت بخوف وانا بهزها
_ماسه! .. ماسه فوقي مالك ، تعالى شيلها يا يوسف بسرعه!
"العيله طلعت على صوتنا ، ولأن يوسف مقدرش يشيلها بسبب تعبه ف عمي احمد ابوها شالها وروحنا على المستشفى .."
"وصلنا المستشفى ودخلت اوضه الطوارئ ، وانا مش قادرة امسك نفسي ، وقفنا كلنا ورا الازاز مستنيين اي كلمه من الدكتور .."
"بعد حوالي نص ساعه ، خرج الدكتور وهو بيقول
_ الحمدلله البنت كويسه ، هي بس كانت ف حاله تسمم .. انتو تعرفوا اذا كانت أكلت أو شربت حاجه انهارده ؟
"مرات عمي زينب ردت بصدمه
= تسمم!!
"سكتنا كلنا ، قلبي وقع في رجلي من الكلمه دي!
"يوسف قرب بسرعه وقال
_يعني ايه تسمم حد يفهمني!؟
"رد الدكتور
= واضح انها أكلت أو شربت حاجه مش طبيعيه ، ممكن تكون أكلتها من غير ما تاخد بالها ، او حد حط لها حاجه
«««««««««««««««٭»»»»»»»»»»»»»»
"بعد شويه لقينا الدكتور خارج بيقول أنها فاقت .. ،دخلنالها بسرعه ، كانت نايمه على السرير ، وشها شاحب بس عينيها مفتوحه وبصتلنا بابتسامه ضعيفه "
_ حمدالله على سلامتك يا ماسه ، قلقتينا عليكي ياحبيبتي
"قالها عمي احمد وهو ماسك ايديها ، ويوسف قرب منها وقال
_ انتي كويسه؟ حاسه بحاجه ؟
= لا انا بس كنت دايخه .. وفجأه الدنيا اسودت
"قربت منها وانا بمسح دموعي وقولت بلطف
_ متخافيش ياحبيبتي ، الحمدلله انك فوقتي ، الدكتور قال انك خدتي حاجه مضروبه .. فاكره انتي أكلتي أو شربتي ايه قبل ما تتعبي؟
"ماسه فركت حواجبها وهي بتحاول تفتكر وقالت بصوت ضعيف
= أنا مكلتش انهارده غير الفطار والغدا وماما الي كانت عملاهم "سكتت شويه وكملت " بس من شويه شربت عصير .. بس
_طب انتي شربتي عصير منين؟
= أنا معرفش هي مرات عمي سهير هي الي جبتهولي وقلتلي انو من المطبخ .. وبس وانا بعد ما شربته بشويه أغمى عليا
"ردت مرات عمي زينب بهدوء
_ ما يمكن العصير كان بايظ ولا حاجه يبنتي وهي مخدتش بالها ، اكيد محدش يقصد حاجه شر
" رد يوسف بعصبية
= احنا مش هناخد حاجه كده وخلاص ياماما ، احنا هنستنى نتيجه التحاليل عشان نعرف مين السبب
"رديت عليه بهدوء
_ اهدى يا يوسف هي اكيد مش هتقصد تأذيها
= انتي غلبانه اوي يا أحلام
"بصتله بتساؤل وقبل ما اتكلم كان الدكتور دخل وقال
_ هي حالتها مستقرة ، بس لازم ترتاح الليله دي هنا ، وبلاش انفعال أو توتر
" عمي شكر الدكتور وروحوا كلهم البيت ، وانا ويوسف قررنا نفضل مع ماسه .."
"بعد ما خرجوا ماسه بصتلي وقالت بهمس
_ احلام .. انا كنت حاسه ان العصير طعمه غريب
= متقلقيش يا ماسه ، كل حاجه هتوضح بكره و صدقيني لو حد فعلا حاول يأذيكي مش هنسكتله ، بس هي مرات عمك يعني اكيد متقصدش ممكن يكون بايظ فعلا زي ما مامتك قالت
"يوسف كان واقف عند الشباك ساكت ، وبعدها قال بصوت واطي
= من اول أنهارده مفيش حاجه تتاكل أو تتشرب الا لما تبقوا متأكدين أنها مفيهاش حاجه سامعين ؟
"ماسه بصتلوا وقالت بصوت خفيف
= يوسف .. تفتكر ممكن فعلا حد بيحاول يأذيني ؟
_ توقعي اي حاجه منها يا ماسه انتي عارفه هي عملت ايه ، ف اكيد انها تسم حد هيبقى سهل عليها مقارنة باللي عملتوا
" بصتلو بخوف واستغراب وقولت
_ ليه؟! هي عملت ايه!!
= متشغليش بالك يا أحلام مفيش حاجه ، المهم دلوقتي يلا نخرج عشان ترتاح
" خرجت معاه وانا قلبي مش متطمن ، وحاسه أن في حاجه غريبه .. "
««««««««««««««««٭»»»»»»»»»»»»»»
" تاني يوم ، كنا قاعده جمب ماسه على السرير ووشها لسه مرهق ، ويوسف من بعيد واقف بيتكلم مع الدكتور ، كنت شيفاه من بعيد وهو بيهز راسه بعصبيه .. "
" قرب علينا ، ملامحه مكنتش مريحه ، قعد جمبي وهو بيقول
_ النتيجه طلعت
= قالوا ايه؟
_ الدكتور بيقول إن في فعلا ماده مسممه
= يعني ايه يا يوسف؟!
_ يعني مش ممكن تكون بالصدفه يا أحلام ، الدكتور قال النسبه الي في جسمها مش نتيجة غلط في الاكل او حاجه بايظه ، دي كانت مقصوده
"رديت بقلق
= طب وهنعمل ايه؟
_ ولا كلمه دلوقتي ، هنروح البيت كأن مفيش اي حاجه حصلت .. وانا هتعامل
««««««««««««««««٭»»»»»»»»»»»»»»
"عدا كذا يوم وماسه بقت كويسه ، وعلاقتي بيوسف اتحسنت عن الأول ، صحيت في يوم لقيت الساعه 5 ، وكان يوسف لسه نايم ، صحيته وانا بقول
_ يوسف ... يلا قوم .. يلا يا يوسف الفجر أذن
"رد بنوم
= ماشي ماشي
_ يلا يا يوسف هقوم اتوضى تكون صحيت عشان نصلي
" قومت اتوضيت وخرجت لقيته صحي وماسك الموبايل .."
_ يلا يا يوسف قوم اتوضى
= ماشي يا أحلام ماشي
_ طب يلا قوم الضحى قرب!
= ما تصلي انتي ملكيش دعوه بيا
_ مليش دعوه بيك!! لا يا يوسف قوم يلا عشان تصلي بيا
"رد بعصبيه
= قلت صلي انتي مش هصلي يستي
"روحت قعدت جمبه وقولت بهدوء
_ وهو ينفع متصليش؟
" مردش عليا ف قولت
= انت عارف ده ركعتين الفجر خير من الدنيا وما فيها يعني لو صليت الفجر بس خير من الدنيا كلها
_ مش قادر اقوم ، وبعدين انا متعودتش اصليه
= طب منت لازم تتعود ، يلا قوم
"شديته قومته من على السرير ودخل اتوضى ، صلينا جماعه وبعد ما خلصنا بصيتله بابتسامة وقولت
_ قرأتك حلوه اوي على فكره
" باسني على راسي وقال
= أنا هقوم عشان رايح الشغل
" رديت بتوتر
_ ماشي
"ضحك جامد ف بصتله باستغراب وقولت
_ بتضحك على ايه؟!
" رد وهو ما زال بيضحك
= أصل شكلك حلو اوي وانتي خدودك شبه الفراولة كده ، "قرب مني وكمل بهمس" طب ده انا بوستك على راسك حتى
" رديت بتوتر اكبر
_ يو..يوسف ابعد
"بعد وهو بيضحك وقال
= أنا هبعد عشان متأخرش على شغلي بس ، لكن المره الجايه مش هسيبك
_ اسكت بقا ، وبعدين هو حضرتك ناسي أن احنا هنتطلق ولا ايه؟
"قرب خطوه وقال
= مين قالك؟
_ مين قالي ايه؟
= مين قالك أن احنا هنتطلق؟
_ انت! ، مش ده كان اتفاقنا ، انك فتره وهتطلقني؟!
= وانا مش هطلقك
" رديت بعصبية
_ ازاي يعني؟!!
= ايه هو الي ازاي ؟ يعني مش هطلقك مش هسيبك ايه الي مش مفهوم
_ لا طبعا!! ده كان اتفاقنا! وبعدين هو انت مش في واحده في حياتك؟!
= ملكيش دعوه باللي في حياتي ، اعتبريها مش موجوده
" رديت بعصبية اكتر
_ يعني ايه مليش دعوه!! أنت هتطلقني يعني هتطلقني يا يوسف!!
"قاطع كلامنا تليفونه الي رن ، مسكه وقالي بهدوء
= هنكمل كلامنا بعدين
" ومشي راح يلبس ، وانا نزلت تحت "
«««««««««««««««٭»»»»»»»»»»»»»»»
كنا بنجهز انا وماسه عشان اتفقت معاها اني أخرجها عشان تفك شويه وتنسى الي حصل .."
_ يلا يا لولو انا جهزت
= ماسه
_ نعم ؟
= هو انا ممكن اطلب منك طلب
_ اكيد قولي
= ممكن تجربي شكلك بالخمار؟
"سكتت شويه وقالت
_ ماشي يلا
"جبتلها دريس واسع من عندي على خمار خاص بيه ، لبسته وفضلت تلف بيه بفرحه وقالت
= شكلي حلو ؟
_ قمر والله ، تعالي يا ماسه اقعدي جمبي
" جت قعدت وانا قولت
_ بصي انا هسألك سؤال وتردي عليا بصراحه
= اتفضلي
_ انتي مقتنعه بحجابك؟
= يعني ايه؟
_ يعني انتي شايفه ان اللبس بتاعك ده حجاب ومقتنعه بيه؟
= ايوا .. مش انا لابسه طرحه؟ يعني محجبه اومال ده مش حجاب؟
_ طب بصي يمسموستي انا هقولك على حاجه ، وانتي اسمعيني واعتبريها نصيحه مني ليكي ، عايزه تاخدي بيها يبقى حلو جدا ، لو مش عايزه اسمعي واعتبريها نصيحه بس ماشي ؟
= ماشي قولي
_ ربنا سبحانه وتعالى قال في القرآن
{وَلْيَضْرِبْنَ بِخُمُرِهِنَّ عَلَى جُيُوبِهِنَّ وَلَا يُبْدِينَ زِينَتَهُنَّ}
يعني الحجاب مش أن احنا نلبس تيشيرت على بنطلون ونحط الطرحه .. الحجاب يعني تغطيه كل الجسد الا الوجه والكفين بطريقه محتشمه وواسعه وميكونش موضح تفاصيل الجسم ومعنى وليضربن بخمرهن على جيوبهن دي انك لما تلبسي الحجاب لازم يكون الخمار الطويل لحد الجيب ، والجيب الي هو لحد تحت الصدر
"هزت راسها ف كملت
يعني لازم يكون اللبس واسع وميبينش مفاتن الجسم ، وده الي بيحقق الحشمه والستر الحقيقي ، والي انتي لبستيه ده مع أنه فيه طرحه ، بس مش ده الي ربنا أمرنا بيه ، عشان كده حبيت انصحك ، واخد بإيدك للطريق الصح
"خلصت كلامي لقيتها بتحضني جامد ، ربت على ضهرها وهي بعدت وقالت
_ انا هنزل بيه
"رديت بفرحه
= بجد؟
_ ايوا .. انا حاسه ان شكلي حلو اوي وحاسه اني مرتاحه فيه اكتر ، ايه رأيك قبل ما نخرج نروح ليوسف الشركه نفاجئه؟
= خلاص ماشي يلا هجيب شنطتي ونتحرك
_ ماشي
«««««««««««««««٭»»»»»»»»»»»»»»
_يعني ايه؟ يعني بيحبها؟!
= معرفش يا يارا انا بقولك سمعته امبارح بيكلم صاحبه في التليفون وبيقولو ماسه مش لغيري وبتاع
_ ازاي يعني!!
= انتي لازم تيجي هنا يا يارا لازم آسر يعرف انك بتحبيه هو مش يوسف
_ يوسف ايه ، هو انا عمري حبيت يوسف منتي عارفه اني معاه عشان فلوسه ، وبعدين اجي ازاي
= يعني ايه تيجي ازاي ، مهو انا مش هعرف اعملها حاجه تاني ، يعني سمتها ولحقوها مش هعرف اعمل اكتر من كده
= طيب ، انا هاجي ، بس انا مش عارفه ه خلع من يوسف ازاي
_ يوسف خلاص كده كده اتجوز وجده مش هيخليه يسيبها ، يعني سهله
= هو اتجوز!؟
_ ايوا اومال ايه هو مقالكيش؟
= لا مقاليش خالص "وكملت بعصبية" طب والله لوريها الي اتجوزته دي ، انا لازم امشي من القاهره واجي في اقرب وقت
_ ماشي .. هستناكي
«««««««««««««««٭»»»»»»»»»»»»»»
" وصلنا مكتب يوسف ودخلنا بفرحه واحنا متحمسين لرد فعله ، بس الابتسامه اختفت فجأه اول ما دخلت المكتب ... ، بصيتله بصدمه من الي شوفته ... "
يتبع ....
