رواية أنجاني حبها عبر روايات الخلاصة بقلم مي سيد
رواية أنجاني حبها الفصل الخامس 5
بقولك ي يوسف
= همم ، قولي
_ اي رايك لو نعمل شاي ونقعد ف البلكونه شويه
= طب اي رأيك نعمل قهوه ، أحلي
_ بص خليها المرادي عليك ، والمره الجايه قهوه
= ماشي ي ستي ، قومي البسي نقابك والچوانتي ع م اعملهم
_ خليك طيب انا هخلص واعملهم
= لا لا قومي انا هعملهم
قومت لبست النقاب والچوانتي ، وبحكم ايدي اخدت وقت شويه ، خلصت وخرجت لقيته ظبط قعده لينا ف البلكونه ع الأرض ، وعايزه اقول ان دي اول حاجه اتمنيت اعملها مع يوسف ، نتشارك البلكونه ، وكوبايه الشاي ، والهاند فري ، والنظر للقمر ، وبحكم انه جمبي فهسمع صوته افضل من اي هاند فري ، وبحكم انه جمبي برضه ، فالنظر ليه الطف واجمل واحلي من النظر للقمر
اتكلم وهو بيبصلي بعيونه ال بيخطفوني
_ عندك امتحانات بكره
= مادتك للأسف ، مانت عارف
_ نفسي اعرف بتكرهيها لي
والله م في احب لقلبي منها ، هي ودكتورها
رديت بهدوء من غير م اصرح بال جوايا
_ مش بكرهها بس صعبه
= مريم انتي ف كليتنا دي متخيله انه ف حاجه هتبقي سهله
رديت وانا بمد ايدي من تحت النقاب عشان اشرب الشاي ، الشاي ال عامله بايده ، وال اثبتلي انه اي حاجه يوسف بيعملها بتبقى حلوه
_ لا بصراحه ، بس هي اصعب واحده
= طب استغليني ي ستي
_ ازاي؟
= لو ف حاجه واقفه معاكي هاتي اما اشرحهالك
رديت تلقائيا بفرحه وانا بحط الشاي عشان اقوم اجيب الكتب
_ أيوه كده هو ده قره عيني
اتكلم بهدوء وهو بيقرب عليا لحد م قعد جمبي
= اي ده ! انتي اقتنعتي اني قره عينك؟
رديت بتوتر من قربه ، من عيونه ، من برفانه ، منه هو شخصيا
_ انا مقتنعه انك قره عيني لحد م ننفصل
رد وهو بيقرب اكتر من غير م يلمسني
= ولو قولتلك اني مش عايز ننفصل!
قلبي بيطير ، بيرفرف زي طائر حر بعد مده طويله من الحبس
_اا.. يوسف
رد بسرحان وهو مازال باصص ف عيوني ، عيوني ال _ غصب عني _ رافضه تقطع التواصل البصري ده ، ال نادرا م بيحصل ، او اول مره يحصل بمعني أصح
= هممم
اتكلمت بخجل منه ومن قربه ، ومن فرحه قلبي ال مش قادره اسيطر عليها ولا ع دقاته ، ومن عيوني ال شاكه انه شايفها وهي بتطلع قلوب
_ عايزه اقوم
رد بحزم طفيف = لا
_ هجيب الكتب
رد وهو بيبعد ببطء شديد
= هاتي ي ستي الكتب
_ ف ثانيه
قومت اجيب الكتب وانا سيباه بيبصلي وانا بجري بابتسامه ، ابتسامه مش بترحمني وهي بتوقعني كل مره ف عشقه بدون رحمه ، ابتسامه مجرد م بشوفها بتترسم مثيلتها عندي ، ابتسامه بتعمل خلل ف دقات قلبي ، قلبي ال مش مصدق لحد دلوقتي الفرحه ال انا فيها لمجرد بس اننا مش هننفصل
فرحه بدعي ربناا انها تدوم ...
____________________________
جريت جبت الكتب وانا ضماهم ف حضني بفرح ، روحت لقيته لسه مبتسم زي مهو
_ الكتب اهي ، عيش بقا
= لا ي حبيبتي انتي ال هتعيشي ، انا يدوب هشرح بس
_ طب اتفضل ي سيدي اشرح
= نبدأ منين
_ احم.. يعني بص
قاطعني = مريم متقوليش أننا هنبدأ من الأول
شوحت بايدي _ لي انت فاكرني فاشله ولا ايه!
= حلو ، يعني فاضلك فصل واحد او فصلين صح
_ احم.. يعني مش للدرجادي ، انت هتبدا من اخر حاجه شرحتهالي
= شرحتها ف المدرج قصدك ، خلاص تمام ما...
قاطعته _ احم.. لا ، اخر حاجه شرحتهالي ف البكلونه
اتكلم بسخريه = وبتقولي مفكرك فاشله ، ده انتي هترتبي
صدقته فنفشت ريشي وانا برد
_ شوفت ، انا بقول كده برضه
= يلا ي اخر صبري ، هنلم منهج كامل ليله الامتحان
_ م عادي ي يوسف بتحصل
= ولو مبتحصلش ي ستي يلا
_ بس اشرح عدل
= ي اختي افهمي انتي بس
_ بص هتشوف ، هتنبهر
= ي خوفي ، يلا ي ست
بدأ يشرح وانا مركزه معاه جامد اوي ، هههه بهزر معاكو ، انا مركزه مع تفاحه ادم ال عماله تطلع وتنزل طول مهو بيتكلم ، مزاولاني والله العظيم
بس ابص براحتشي ، جوزي وابص براحتشي ، بس لا نتلم شويه عشان لو سال ولا حاجه ، وقبل م احاول اركز لقيته فعلا بيسألني ، مفيناش من كده ي يوسف والله
_ ها ي ستي فاهمه الحته دي
كذبت طبعاً عشان برستيچي وكده
= طبعاً طبعاً
اتكلم وهو بيضيق عينه بشك
_ مريم انتي فاهمه بجد
= اومال
فضل دقيقه كده باصصلي من غير م يتكلم وانا عماله اهرب بعيني ف كل مكان من غير م ابصله لحد م اتكلم تاني فجأه
_ طب اشرحيهالي
رديت بصدمه طبعا = ها
رد وهو بيحاول ميبتسمش _ مش انتي فاهماها ي مريم
= اا.. ايوه
رد بابتسامه مقدرش يكتمها اكتر من كده ، بس حقه والله ، مهو بيشرح لعاهه
_ خلاص تمام ، اشرحيهالي
= تمام تمام ، بص ي سيدي ، هات بس الكتاب ده الاول
بص ، بيقولك يعني انه امممم.. لو حصل يعني.. انت فاهم طبعاً انا قصدي اي ، فلو حصل يعني هيحصل اي.. انت فاهم طبعاً اي ال هيحصل
طبعاً قعدت اهبد هبد مهبدتوش ف امتحان قبل كده لحد م سمعت صوته ضحكته بصوت عالي جداً ، اول مره اسمعه كده
لا ده احنا منركزش بقا عشان نسمع ضحكتك ، ونشوف غمازتك ، ف داهيه الامتحان والله ي جدع
_ مريم دي مساله
هزيت راسي بلا معني وانا مش فاهمه حاجه
= اه اه طبعاً مانا عارفه
ضحك تاني بنفس الصوت
_ مريم انتي بتهبدي
رديت بصدق ، طبيعي ، هكذب اقول اي ، اتعكشت خلاص
= حصل
ضحك تاني _ يخربيت صراحتك
= اكذب يعني؟ اكذب
_ ده ع اساس انك مكذبتيش من خمس ثواني
= لا بص ، دي نقره ودي نقره
_ اي كلام ، انتي بتقولي اي كلام
= اوووه ، خلاص تمام مكنتش مركزه
_ ايوه كده قولي مكنتش مركزه ، مش تهبدي
= م خلاص ي جدع بقا ، مكنوش 100 درجه دول ال يذلوا الواحد بالشكل ده
ضحك تاني وانا فضلت اتامله من غير م اتكلم ، جميل اوي ، جميل اوي اوي ، ولطيف ، لطيف اوي اوي اوي
اتكلم تاني بعد م ضحكته هديت
_ طب خلاص تعالي اعيدهالك
= لا لا ، احنا ناخد بريك
_ بريك اي ي مريم ، انتي مفهمتيش حاجه
كذبت = مش ذنبي ، مش ذنبي ان شرحك وحش
رد بصدمه وانكار _ شرحي وحش ، انتي مش بتشوفي العيال بيبقوا عاملين ازاي ف المحاضره
شردحتله بقا ، هو ال جابه لنفسه ، اسكت؟ مقدرش والله ، اتشل فيها
= مش بيبقوا مركزين عشان بيفهموا ي اخويا ، دول بيبقوا مبحلقين فيك
رد بخبث ، الواد ده مش سالك ع فكره
_ امممم ، وانتي عرفتي منين ؟
رديت من غير م اخد بالي انه البيه تقريباً بيستجوبني ، وانا طبعاً عشان هطله رديت عادشي من غير م اركز
= ماانا كنت بسمعهم وهو قاعدين يعاكسوا ف حضرتك ، ويتأملوا ف جمالك وجمال عضلاتك ، وعينك ، وشعرك ، ولبسك ، وبرفانك ، وكاريزم...
قاطعني وهو مازال بيضحك ، وكده كتير بقا ، الانسان دعيييف قدام ضحكه زي دي والله
_ مريم انتي بتبقى مركزه مع المحاضره ولا مع كلامهم
= لا بص ، متتخابثش ، هما ال صوتهم كان بيبقي عالي
_ اممممم، صوتهم ، قولتيلي
رد وهو بيبعد الكتب وبيقرب عليا ، وكده مينفعش ع فكره
_ طب انتي اي رأيك ف كلامهم
رديت وانا ببعد شويه
= الاه ، وانا مالي ي لمبي
قرب نفس الشويه ال بعدتهم ، بقا يكاد يفصل بينا خطوه
_ لا مالك ازاي ، مش بيعاكسوا جوزك
= اسكت متفكرنيش
_ لي؟
رديت من غير م اركز انه يوسف هو ال بيسال ، واني خلاص بعترف ع نفسي
= كنت بتشل والله ي واد ي يوسف
_ لي بس ي قلبه ؟
فوقت من غير م اركز ف كلامه ، انا بس مركزه اني خلاص كنت هدلق
= هااا ، اه عادي يعني ، عيال ممحونه ف نفسهم كده
رد وهو مازال مبتسم بدون م يبعد
_ امممم ، طيب ، يلا نكمل شرح بقا
= طب والبريك؟
_ مريم انتي مصدقه نفسك ، الامتحان بكره ي ماما!
= اديك قولتها ، بكره ، يعني لسه ف وقت كبير اوي
_ احنا الساعه 12 والامتحان الساعه 10
= يااااه ، وانت مستقل بال 10 ساعات دول ، دول بيقوم فيهم حروب وتقعد خناقات وناس تتولد وناس تموت وليله كبيره اوي سعادتك
_ احنا هناخد بريك ، تدري ليش؟
= ليش؟
_ لانك اجنعتيني والله
= أومال ي بني هو انا اي حد ولا اي
_لا طبعا ، تحبي تعملي اي ي ستي ف البريك ال مش ف وقته خالص ده؟
= نرغي ، بص احكي عن نفسك
_ امممم ، تمام نبدا منين؟
= من الاول خالص
_ تمام، بصي ي ستي ، انا اهلي متوفيين من وانا ف اولي ثانوي ، تقريباً كنت زيك ، بابا وماما كانوا وحدين اهلهم ، فلما ماتوا مكانش ليا قرايب ، مكنش صعب اني اتقبل موتهم بس كان صعب اني اعيش لوحدي خاصه وانا كنت ف ثانوي يعني ، فضلت اشتغل ع نفسي لحد م م جبت الكليه ال كانوا بيحلموا بيها ، بس كانت ف محافظه غير دي ، فكانت فرصه اني أبعد عن مكان موتهم خاصه وانها كانت حادثه، كنا اغنيا الحمدلله ، وده ال ساعدني اني اأسس حياه تانيه ، بعت بيتنا هناك ، وجيت هنا ف الجامعه ، ذاكرت لحد م اتعينت معيد ، وبما اني مكنش عندي اي حاجه تشغلني حضرت الدكتوراه ، خلصت وااسست شركه ليا هنا ، بس
هو كلمه فخر تكفيه ولا متكفيش ، بجانب كل ال عمله ده هو عظيم اوي ، ينفع اقول اني حبيته ضعف مانا بحبه ، ينفع اقول اني بنبهر بيه كل دقيقه اكتر من ال قبلها
_ تعبت انت اوي!
= يعني الحمدلله ، وبعدين ده كله سهلي حته اني أأسلم
_ الحمدلله
سكتت وانا فرحانه بيه ، فرحانه بيه اوي
_ اي سكتي لي؟
= فخوره بال انت عملته
اتكلم وهو بيقرب تاني بعد م كان بعد وهو بيحكي عن نفسه
_ امممم طيب بقول اي؟
= قول ي سيدي
_ انتي معندكيش مانع نكمل صح ؟
بيسال ، البيه لسه بيسال ، بيسال وانا ال واقعه فيه بقالي 3 سنين
= احم... لو انت موافق فأنا موافقه ، لو حاجه مش هتضايقك يعني
رد بسرعه _ ي ستي انا موافق جداً والله العظيم
رديت بخجل = احم.. تمام
_ يعني انتي موافقه ي مريوم؟
قلب مريوم ي جدع والله
= اا.. أيوه
اتكلم بفرحه بانت عليا قبل م تبان عليه
_ طب يلا نكمل مذاكره
= م تستني شويه كمان
_ الطم ي مريم ! الطم والله
= خلاص ي جدع استهدي بالله ، كمل ي اخوياا ، قال يعني هقفل
_ انتي دخلتي الكليه دي بايه ي مريم
= بالبركه والله ي دكتور
_ طب يلا ي بركه نكمل
= تمام بس تعالي ندخل جوا عشان عايزه اقلع النقاب
_ يلا ي ستي
دخلنا وقبل م نشرح صلينا القيام الاول ، صلي بيا كالعاده وسبح ع ايدي كالعاده وبعدين بدأ يشرح بعد م حطينا ترابيزه الركنه قدامنا ، عشان افهم يعني وكده
شرح شويه والفجر اذن ، قومنا صلينا وقعدنا نفس القعده تاني
اتكلمت بنوم _ يوسف انا تعبت ، عايزه انام
رد بحنيه = معلش ي بابا ، شويه بس
_ طب هو انت حاطط الامتحان سهل ولا صعب
= بصي ، نص نص
_ طيب انا تعبت بقا ، مش لازم الباقي
اتكلم بلطف = معلش ي مريوم ، طب بصي ، هقوم اعملك عصير يفوقك شويه
رديت بنوم وانا بحاول افتح عيني بالعافيه
_ ماشي ماشي قوم
قام يعمل عصير زي م قال وانا نمت، حطيت راسي ع الترابيزه ومحستش بنفسي ، انا كان مالي ومال التعليم بس ي ربي ، ده انا كتكوت ضعيف الجناح وماليش ف الفرهده دي والله
فوقت ع ايده وهي بتطبطب ع كتفي بحنيه وصوته بيتكلم بحنيه اشد
_ مريم.. مريم
= هممممم
_ قومي يلا ي بابا عشان نكمل
= لل.. لا خلاص مش قادره تاني
_ معلش ي حبيبتي ، هو فاضل نص ساعه بس
بصيتله بنص عين = نص ساعه بس والله؟
ضحك _ نص ساعه بس والله
فركت عيني ف محاوله اني افوق عشان ارضيه بس والله ، انما انا أصلا عايزه انام
= تمام يلا
_ اشربي بس العصير ده يساعدك تفوقى شويه وبعدين نكمل
شربت العصير وانا بتلذذ بطعمه ، مش عشان طعمه حلو ، انما عشان هو ال عامله ، خلصت وهو بدأ يشرح ، اقل من نص ساعه فعلا وكنا خلصنا ، نمت ع الترابيزه من غير م اقوم من مكاني لأني مقدرتش اصلا والله
_ مريم قومي نامي جوا
رديت بنوم = لا لا انا هنام هنا
_ ضهرك هيوجعك
مقدرتش ارد عليه وكملت نوم ، بس حسيت بيه وهو بيشلني ويدخلني الاوضه ،
طب انام ازاي بقا بعد الحركه دي ، بالله عليك انام ازاي ، حاولت اكمل ف النوم ال كان مسيطر عليا خلال مهو شايلني عشان بس الاحراج ، دخلني الاوضه وغطاني وباس جبيني ومشي
هو ممكن احبه اكتر من كده اي ، انا وصلت لمرحله انه بقا يوحشني وهو جمبي ، بالله الحنيه دي بتحببني فيه اكتر مانا بحبه اصلا ، بتحسسني ان عمري ال فات من غيره مالوش اي لازمه ، وهو كده فعلا ، حنيته بتطمني ، بتطبطب ع قلبي ، بتديني الطاقه ال تخليني اواجه خوفي
فضلت افكر فيه لحد م نمت ، صحيت ع صوته وهو بيصحيني بهدوء
_ مريم ، قومي يلا ي بابا عشان الامتحان
بصيت لقيت قمر بيصحيني ، لا قمر بجد مش هزار والله ، يجدع تبا لجمالك ال مدوخني ده والله ، هي البدل من امتي وهي بتحلي الواحد كده ، لا بس زوجي هو ال محليها والله مش العكس ، حاولت ابطل معاكسه فيه واسأل
= هي الساعه كام؟
_ تسعه وربع
اتفزعت = طب مصحتنيش بدري شويه لي ي يوسف ، طب هعملك الفطار امتي ولا احضر شنطتي امتي ولا البس امتي ، ينفع كده بالله عليك؟
خلصت كلامي وانا عماله الف حوالين نفسي بدون ادني فايده
مسك كتفي وهو بيوقفني ويتكلم بهدوء
_ ممكن تهدي ، الفطار انا حضرته فاضل بس نفطر ، وكذلك شنطتك حضرتها، فاضل بس تلبسي هدومك ونركب العربيه ونمشي ع طول
هديت = طب مصحتنيش بدري لي بس
اتكلم بحنيه مبقتش غريبه عليه ولا ع تعامله معايا بيها
_ انتي كنتي تعبانه امبارح من السهر ، فقولت اسيبك الشويه دول
= طيب مانا هاجي انام وانت هتفضل ف الكليه
_ مفيهاش حاجه ي بابا ، يلا بس عشان متتاخريش
= لحظه وتلاقيني قدامك
_ تمام
دخلت اتوضيت وصليت الضحي ولبست هدومي فاضل بس الچوانتي والنقاب لبسته فاضل بس انزله
خرجت لقيته قاعد مستنيني ع السفره ، السفره ال عملها بايده ليا ، ي فرحه قلبي والله ، مفيش حاجه تقدر توصفها والله العظيم ، حاسه اني عايزه اجري احضنه واقوله اني بحبه ، وان كل لحظه بحبه أكتر
قعدت اكل بسرعه عشان اخلص لحد م هو لاحظ ف اتكلم
_ مريم ممكن تهدي وتاكلي براحه ، الامتحان مش هيبدأ غير لما انا اروح ، ده غير اني بسيب اول ربع ساعه عشان لو حد عنده سفر ولا حاجه ، فممكن تاكلي براحتك
= دي ميزه انك تتجوز دكتورك ف الجامعه والله
اتكلم بغيظ وهو بيقرب عليا
_ يعني بالله عليكي دي الميزه الوحيده من جوازك مني؟
= احم... يعني مش قصدي
ابتسم بخبث _ اومال اي قصدك؟
= الإمتحان ي يوسف ، الامتحان انا نسيت كل حاجه اصلا
_ يلا ي ستي ده انتي فصيله
قومت لبست الچوانتي ونزلت النقاب ، وقبل م اخرج لقيته بينادي بعصبيه
_ انتي راحه فين كده بس معلش؟
رديت بستغراب = ف اي بس؟
شدني ليه جامد ، لدرجه اني خبطت فيه فبعدت سنه
_ ف اي ي يوسف؟
قرب هو وهو بيبصلي بعمق ، لا مش وقت رومانسيه ي عسل والله
بس طبعاً عشان انا فقر طلع كان بيعدلي النقاب عادي ، ومفيش رومانسيه ولا حاجه
اتكلم بعصبيه _ شعرك باين ي هانم
رديت وانا بعدل شعري بعد مهو عدله اصلا
= والله مدخلاه كويس من الخمار
_ طب يلا انا عدلته
خرجنا ركبنا العربيه زي امبارح ، بس الفرق بقا اني مطلبتش اني انزل قبل الجامعه بشويه ، ولا هو كان هينزلني أصلا
طول الطريق بحاول اراجع ومتوتره ، حقيقي لو عاوزه انجح فعشان خاطره ، فضلت أفرك ف ايدي بتوتر بالحركه المعتاده لحد م اخد باله واتكلم
_ مريم ممكن تهدي ، الامتحان سهل والله متقلقيش
اتكلمت بتوتر وخوف = يعني هحل؟
_ انا واثق انك هتحلي ، حتي لو كان صعب
حفزني ، حقيقه حفزني ، اصلا بال عمله طول الليل وال عمله الصبح فهو بيديني طاقه من غير م ياخد باله ، وحقيقي انا لحظه عن التانيه بتأكد اني كنت صح لما قررت اني مش هنفصل ، واني هحارب عشانه
وصلنا الجامعه سوا ، ومفيش اكتر من كده حاجه تفرح قلبي والله ، هو راح مكتبه وانا دخلت ع المدرج
قبل م اسيبه وامشي نادي عليا ، فروحلته
اتكلم بهدوء وهو بيشجعني
_ مريم ، اهدي وانتي بتحلي ، انا مش هعرف اتكلم معاكي جوا عشان هبقي براقب ، بس اهدي ، ممكن
= حاضر
_ يلا اتكلي ع الله ، ومتقلقيش انا جمبك
بالله العظيم انا لو محلتش حاجه فانا مطمنه برضه عشان الكلمه دي _ متقلقيش انا جمبك _ ده انا ممكن احارب العالم كله بعد كلمته دي مش احارب خوفي بس
دخلت عشان الامتحان وانا براجع بهدوء بعد م اتطمنت منه ومن كلامه ، دخل بعد صمت من المدرج كله ،
ونفس ال حصل الامتحان ال فات حصل ف الامتحان بتاعه ، دخل ، حرق دمي وقلع چاكيت البدله وفضل بالقميص ، ونفس ال حصل برضه بعد نفس الحركه الامتحان ال فات هو ال حصل المرادي ، معاكسات بقا وبجاحه وحاجه تقرف ، هما تقريباً المحنكين كلهم بيقصدوا يقعدوا ورايا عشان يسمعوني معاكستهم ليه
نقل كله من مكانه وكذلك انا ، وقعدني ف نفس المكان بتاع امتحان ال فات ، وقعد هو كمان ف نفس المكان ، جمبي ، سلمنا الورق والمفروض ااننا بدأنا الحل ، بس انا مش قادره اركز وانا شايفه البنات دي بتبص عليه اكتر من ورقه الامتحان ال هيسقطوا فيه ان شاء الله
رميت القلم ع الورقه واتنفست بعنف وانا بحاول اهدي ومقومش اجيب شعره وشعرهم ف ايدي
بصلي وبعدين بص قدامه وهي بيتكلم
_ مبتحليش لي؟
رديت بعصبيه وانا بحاول احافظ ع صوتي بدون م يعلي
= هو ممكن تلبس الجاكيت؟!
رد بعدم فهم وهو بيبصلي
_ لي؟
حاولت مبكيش وانا بتكلم
= هو كده ، ممكن بعد اذنك تلبسه
رد بحزم قاطع وهو مازال باصص قدامه
_ لا
حاولت اتحكم ف دموعي وانا برد بهدوء
= تمام
مسكت القلم وبدأت احل ، بس معرفتش وايدي بدأت تترعش ، سبت القلم بهدوء وانا بحاول اظبط نفسي عشان متعبش كالمعتاد ، غمضت عيني وحاولت اخد نفسي بالراحه، قبل م اسمعه وهو بيتكلم بحنيه زي م اتعودت
_ ف اي بس ي مريوم ، عايزاني البسه لي؟
رديت بطفوليه وانا ببكي براحه بعد م فقدت السيطره ع عيني ، وغيرتي
= البنات بيعاكسوك
ضحك بهدوء قبل م يقوم يشيل الچاكيت من الكرسي ال انا قاعده عليه ويلبسه
رد بعد م لبسه وهو بيبتسم بلطف
_ مبسوطه كده ي ستي
رديت بتوتر خوفاً من عصبيته
= لا
رد وهو بيجاريني بحنيه لطيفه زيه
_ عايزه اي تاني بس؟
رديت بخجل = احم.. اقفل زرار القميص
_ م كده هتخنق ي مريم
= خلاص اقفل واحد وسيب واحد
رد بعد م قفله فعلا _ مبسوطه كده ي ستي
رديت بابتسامة منشكحه من تحت النقاب
= احم.. اه
_ طب يلا ي جميله حلي بقا
طب بالله العظيم بالله العظيم م في جميل غيرك هه
حليت وقام لم الورق ، وقبل م امشي او حد من المدرج يمشي
نادي بصوت جهوري ، مسيطر ، ورزين بيخطف قلبي خطف
_ لحظه واحده ي شباب ، عايز اقول حاجه
استنيته تحت عشان اعرف هيقول اي لحد م بصلي بحنيه وهو بينادي
_ تعالي ي بشمهندسه مريم لحظه
________________________________
جت بهدوء وهي بتتلفت حواليها بتوتر اتعودت عليه منها ، قربت لحد م طلعت ع المنصه وهي مازالت خجوله ،
اجمل بنت ف المدرج كله، لا ، أجمل بنت ف الجامعه كلها ، بل أجمل بنت ف الدنيا كلها والله ، جميله بخجلها وتوترها وشقاوتها ، جميله بروحها وشكلها وحنانها ، جميله بنقابها ،
جميله زي بدر ف سما صافيه ف ليله صيفيه فيها نسمه هوا منعشه ، جميله زي فنجان قهوه الصبح ف بلكونه كلها ورود ، جميله زي مج نيسكافيه دافي ف ليل شتا بارد ، جميله زي اول حاجه عينك بتيجي عليها بعد ظلام طويل ، جميله زي انعكاس الشمس ف عنيها ال بلون القهوه ، زي ضحكتها وهي صافيه ، زي طفولتها ال بتظهر لما بتبقي عايزه حاجه ، جميله بكل حاجه فيها ، حتي خوفها
فضلت متابعها بعيني وهي بتطلع ، بدون ادني اهتمام مني لاي حاجه سواها ، بدون ادني اهتمام للاستغراب ال نزل ع المدرج كله واولهم هي ،
كم اهتمامي كله منصب عليها وع جمالها ال مش ظاهر منه حاجه ، غريبه يبقى لبسها كله أسود وانا شايفها منوره ، غريبه تبقي خاطفه قلبي كده ، غريبه تبقى جميله اوي كده بملامح عاديه
وصلت لعندي بعد م ارهقت قلبي ف انتظارها ، متوتره زي مهي
وصلت ووقفت قدامي ، ابتسمتلها عشان اطمنها واهدي توترها
اتكلمت بهمس بعد م وصلتلي
_ ف اي ي يوسف؟
= مفيش حاجه ي بابا ، تعالي بس
مسكت ايديها وانا بحركها تقف جمبي وبعدين اتقدمت وانا لسه محافظ ع كف ايديها داخل كفي ، هو اينعم انا بحب الچوانتي ال مغطي ايديها بس كان نفسي أحس ملمس ايديها ف اللحظه دي ، بس مش مهم ، اهم حاجه انه مفيش حاجه فيها باينه
بصتلها وابتسمت وبعدين بصيت للشباب واتكلمت
_ طبعاً انتو عارفين اني كنت مسيحي
سمعت صوتهم وهما بيردوا بأه فكملت
_ وطبعاً عارفين اني الحمدلله اسلمت
ال مكانش عارف عرف وفرحلي ، والشباب سقفت وهيصت كعادتهم ع اي حاجه يعني
اتكلمت تاني وانا ببص لمريم وبشد ع ايديها
_طيب انا والبشمهندسه مريم اتكتب كتابنا ، والفرح كلكلوا معزومين عليه لما نحددوا ان شاء الله
مفيش حاجه شجعتني ع موقفي ده ، الا موقفها من نظرات البنات ليا ، عشان تبقي حافز ليا اني اعلن جوازنا قدام الطلبه ال مفكره اني بحب واحده منهم ، وتبقى حافز اني اقرب منها وافهم ، واهزم خوفها
___________________
ابغي احضنه ، بالله العظيم ابغي احضنه ، ودلوءتشي ، هه
هو ينفع اصرخ من الفرحه، طب ينفع اترمي ف حضنه بجد بقا ،
مش قادره امنع دقات قلبي ال اختل توازنها بفرحه شديده مش قادره امنع عيني انها تطلع قلوب والله ، ولا قادره امنعها انها تدمع من الفرحه ، فرحه مكانتش متوقعه ولا كانت ع بالي والله ، غصب عني بكيت ، مين كان يتوقع اني اقف هنا عشان اسمع يوسف وهو بيعلن جوازنا ، مين كان يتوقع انه يمسك ايدي بالحنيه دي قدام المدرج كله ، ي الله ع حبه ال عمال يتغلغل جوا خلايا جسمي اكتر
حبه زي سرطان بس والله العظيم م عايزه اتخلص منه
بعد كلامه الشباب فضلت تباركله وهو لسه مكانه ، فضل يهزر معاهم وانا بدأت ابص ع ريأكشن البنات
وكان المتوقع ، الناس ال اعرفهم ف ال فرحلي وف ال مهتمش ودول كانوا يتعدوا ع صوابع الايد الواحده ، والباقي زي م توقعت ، تقريباً كله بيبصلي بأرف ، او بحقد ، بس مش عارفه لي والله ، معملتش حاجه حرام انا عشان يبصولي كده ،
بس ف وسط كل النظرات دي لفت نظري شخص واحد ، مارينا ، نظرتها خوفتني ، خلتني تلقائي اشد ع ايد يوسف بخوف منها ومن نظرتها ،
نظرتها كأنها كانت بتحذرني ، بتهددني ، كانها بتقولي مش هسيبهولك ، مش هسيبك تتهني بيه ، وحقيقي مش عارفه هي زعلانه ع اي اكتر ، عشان أسلم ولا عشان اتجوزنا
شديت ع ايد يوسف وانا ببصله ، وبحكم فوق الطول _ الكبير _ ال بيننا نزل بمستواه ليا
_ ف اي؟
= يلا نمشي من هنا
اتكلم بخوف _ ف حاجه ولا ايه، انتي كويسه؟
= مفيش انا كويسه الحمدلله بس يلا نمشي عشان خاطري
_ طب يلا ، اتفضلوا يلا ي شباب
الشباب بدأت تمشي وقبل م ننزل نمشي احنا كمان لقينا مارينا جايه علينا، فشديت ع ايده اكتر ، بهدوء وكأنه خد باله من تفكيري طبطب ع ايدي وهو ساكت ،
جت وقفت قصادنا وهي بتبتسم عادي كأنه مفيش حاجه ، وبدأت تتكلم وهي بتمد ايديها ليا
_ مبروك ي مريم ، ولا اقول ي مدام بقا
حاولت اهدي وانا قدامها بدون م ابين قلقي منها
= الله يبارك فيكي
مدت ايديها ليوسف وهي بتبتسم بس بطريقه مختلفه ، كأنها نسيت اني موجوده اصلا
_ مبروك ي چو
قبل م يمد ايده كنت خطفت ايديها انا وسلمت عليها وانا بتكلم ببرود واستفزاز ف محاوله اني اردلها شويه من استفزازها ليا
= الله يبارك فيكي ي حبيبتي ، انتي عارفه بقا انه أصبح مسلم ومينفعش يسلم ع نساء اجانب عنه ، اصله حرام ف ديننا
_ لا عادي ، حقك طبعاً ، استعمتي بيه شويه
خلصت كلامها ومشت وهي مازالت بتبتسم ، وانا أكون كذابه لو قولت اني مقلقتش من كلامها
فوقت لما يوسف مسك ايدي _ ال سبتها وانا بسلم ع مارينا _ وهو بيتكلم
_ يلا ي مريوم!
التفتله وانا بحاول اهدي = انت كنت هتسلم عليها ي يوسف
_ لا ي بابا ، انا عارف الحديث والله
= امممم حديث اي؟
_ "لئن يطعن ف رأس احدكم بمخيط من حديد خير له من ان يمس أمرأه لا تحل له "
= لا براڤو
قرب عليا وهو بيضحك بهدوء
_ وانتي بتختبريني بقا ولا ايه؟
بعدت = انا هموت وانام ع فكره
_ طيب يلا عشان اروحك
= وانت مش هتيجي معاياا
_ لا عندي لسه امتحانات للدفعه ال قبلكوا
رديت بخيبه = طيب
لحظه بس يعني اي مش هيروح معايا ، احنا مفيناش من كده ، اقعد ازاي من غيره انا يعني ، ادخل البيت أصلا ازاي ، حتي لو قولت هنام ع م يجي مش هعرف انام ، يخربيت الحب وسنينه
قبل م نخرج من باب الجامعه كنت ناديتله بتوتر
_ يوسف
التفتلي = اي ي بابا
_ انا مش عايزه اروح البيت
اتكلم بحنيه وهو بيقرب عليا وبيبعد بينا عشان نقف ف مكان فاضي شويه
= اومال عايزه اي بس ي حبيبتي؟
بدون م افكر انا بقول اي ، بدون م افكر اني بعدت اصلا عن الموضوع الاساسي ، اتكلمت
_ يوسف هو انا حبيبتك فعلاً؟
رد وهو بينزل لمستوايا وهو بيبصلي بعيونه ال مفشلوش مره ف انهم يخطفوني لدنيا تانيه
= امممم ، سؤال مهم وجوابه أهم ، بس ده مش مكانه ، ف احنا هنجاوب عليه براحتنا لما نروح ، المهم دلوقتي نشوف ست مريم عايزه تروح فين
رديت بخجل وانا بفرك ف ايدي شويه واشد ع النقاب شويه
_ عايزه اقعد معاك
رفعتله عيني وانا بكمل ، ينفع؟
ابتسم = يلاهوي ده ينفع وينفع وينفع ، احنا نطول ست مريم تقعد معانا
ابتسمت بخجل وانا برد
_ احم.. شكراً ، بس يلاهوي دي حرام ، ف اقوال بتقول انه لما حد يقول كده الملائكه بترد عليه وتقول لهو دائم ، يعني تتلهي ف الدنياا عن ربناا يعني
= لا منكررهاش تاني بقا
_ احم.. طب اي ، مش هنرجع؟
= لا ي حبيبي هنرجع يلا بينا
مسك ايدي ورجعنا تاني مكتبه، مكتب يوسف ، جوزي
فتح الباب ودخل ، وانا داخله بعده خبطت ف الباب غصب عني ف اتوجعت بصوت عالي بالنسبه لأننا لوحدنا ، فجه عليا بسرعه
_ بالله عليكي مش عارفه تركزي
شدني عليه بسرعه وقفل الباب ورفع النقاب عشان يشوف الخبطه ال جت ف جبهتي
= م اخدتش بالي والله
فضل يدعكها وهو بيرد عليا بغيظ
_ بالله دي نفس الكلمه ال قولتيها لما اتحرقتي امبارح
= مهو عادي بقا مش....
فصلت كلامي لما حسيته بيهبط ببوسه ع جبهتي مكان الخبطه ،
من الصدمه متكلمتش ، سكت وانا حاسه انه حرفياً خدودي بتطلع نار
اتكلم وهو بيبتسم عليا وع خجلي
_ بعد كده ابقي خلي بالك ي بابا ، ماشي؟
= حاضر
دخل قلع چاكيت البدله ال لبسه غصب ، وفتح زرار القميص ال قفله برضه غصب
اتكلم وهو بيبصلي بخبث
_ عادي اعمل كده هنا ولا بلاش؟
حاولت استهبل بس نظراته مدتنيش الفرصه
= احم... اه عادي ، براحتك
_ طيب ، انا قولت اسألك برضه
اتوترت= ل. لا لا براحتك
قعد ع مكتبه ولبس نضارته ال بتحليه اكتر وفتح اللاب توب يشتغل عليه، وانا قعدت الف ف المكتب شويه بدون هدف لحد م قعدت ع الكنبه ال ف مكتبه بملل ، ف اخد باله مني
اتكلم وهو مازال باصص ف اللاب قدامه
_ انتي زهقتي من دلوقتي ولا اي
= مفيش حاجه اعملها
_ افتحي فونك العبي بيه شويه
= لا خلاص ، هقرأ شويه ف المصحف ع م تخلص ، هو الامتحان امتي؟
بص ف الساعه ال ف معصم ايده وبعدين رد
_ يعني ، نص ساعه تقريباً
= تمام
فتحت الشنطه طلعت المصحف ال كان حاطه بايده وبدأت اقرأ ، اندمجت ف القراه بدون م احس انه صوتي علي ، وانه ساب شغله ع اللاب وفضل يبصلي ، مفوقتش غير ع صوته وهو بيتنهد بصوت عالي فبصيتله
_ احم.. هو ف اي؟
= صوتك حلو اوي
اتكسفت_ بس صوتك أحلي ع فكره
ساب المكتب وجه لحد م قعد ع الترابيزه ال قدامي وهو بيحاوطني بجسمه بدون م يلمسني
= بجد؟
اتوترت من قربه ال بيربكني _ احم... أيوه
= يعني عجبك؟
_ أيوه ي يوسف والله
قرب شويه كمان = طيب كويس والله
اتكلمت وانا بحاول ابعد _ طب يلا النص ساعه عدت ، يلا عشان الامتحان ، وانا كمان عايزه انام
= تعرفي انك فصيله
_ اه مانت قولتلي الصبح
= طب كويس ، اقولك تاني بقا ، انتي فصيله ي مريم
_ ماشي ي سيدي شكراً ، كفايه
وقف = طب قومي يلا
وقفت انا كمان _ الچاكيت والزرار ي بيه
قرب عليا وهو بيبصلي بعيونه السود ، ومكدبتش لما قولت انهم بيخطفوني ، عينه سودا جدا ، تخطفك ، تخليك بدون ارداتك عايز تعوم فيهم ، تجيب اخرهم ، عشان تثبت لنفسك ف الاخر انك مش هتعرف
= هو انتي بتغيري ي مريومي ولا اي؟
قربت انا كمان ، عشان تبقى اول مره اخد خطوه ناحيته ، وناحيه هزيمتي لخوفي وال اخدتها تحدي بيني وبين نفسي
مديت ايدي وانا بقفله زرار القميص بعد م نزلت النقاب عشان م يشوفنيش ، وعشان خجلي ميخلنيش اتراجع ، قفلتهوله وانا بتكلم بنفس اجابته ال قالها من نص ساعه تقريباً
_ امممم ، سؤال مهم وجوابه أهم ، بس ده مش مكانه ، ف احنا هنجاوب عليه براحتنا لما نروح ، أنما دلوقتي هنشوف امتحان طلبه سي يوسف
انطلقت ضحكته بصوت عالي ، خلت دقات قلبي تزيد وكذلك خجلي ، فبعدت ايدي بسرعه وكذلك بعدت خطوتين ، قبل م اكملهم لقيته بيشدني ليه وهو مازال بيضحك
_ احنا فينا من كده ي مريوم
= احم ، أيوه
_ تمام ، يبقى لما نروح ي ست البنات
يلا عشان نروح الامتحان
= يلا
مسك ايدي ومشينا ، وانا بدعي اننا بس نستمر ع كده ، ع الفرحه دي
بس هي الفرحه عمرها استمرت؟!
مسك ايدي ودخلنا المدرج عشان الدفعه ال هتمتحن دلوقتي ، دخلنا المدرج وطلعني مكان م كنت قاعده من شويه وفضل يتكلم معاهم شويه وبعدين بدأ الامتحان وهو تحت من غير م يطلع ع المنصه ، يدوب بس قلع الچاكيت ف اتكلمت
_ يوسف انت بتعمل اي؟
= هيضايقني والله ي مريم
_ معلش ي يوسف ، مش هتقعد كتير
= مش هقدر والله ي مريم
مردتش عليه وسكت بزعل فعلاً ، اتنهد بصوت عالي وبعدين اتكلم ف محاوله انه يراضيني ، ميعرفش انه مجرد المحاوله رضتني فعلا والله
_ طيب ي مريم هقلعه ومش هفتح القميص ، ينفع
= مااشي
ابتسملي ونزل يوزع الورق وانا سندت ايدي ع الترابيزه ال قدامي وفضلت متابعه ادق تفصيله فيه واقل حركه منه
اتكلم بصوت عالي مع الطلبه ال قدامه
_ مش اول مره نتعامل مع بعض ، ف ال هيعمل صوت هزعله مني فعلا ، اتفضلوا حلو
هما بدأو يحلوا فعلاً وانا فضلت اراقبه وهو عمال يتحرك بدون م يقف وهو بيراقب عليهم
لحد م ف حربايه كده قربت منه وهي بتبتسم بسماجه وبتتكلم بصوت عرسه كده
_ احم.. لو سمحت ي دكتور ، السؤال ده مش فاهماه
رد عليها وهو مازال بيبص حواليه بدون م يبصلها
= اي سؤال؟
ردت وهي بتقرب لحد م وقفت جمبه وهي بتشاور ع السؤال
_ ده
بص ع السؤال وبعدين اتكلم بدون م يبصلها برضه ، وده ال خلاها تنفخ
= السؤال واضح جدا اي ال مش مفهوم فيه مش فاهم!
ردت بدلع _ مانا مش فاهماه
رد بحزم وهو بيزعقلها ويبرد ناري منها الحربايه دي
= مانتي لو كنتي ذاكرتي كنتي فهمتيه
_ احم ، تمام شكراً ي دكتور
مردش عليها بس لقيته بيتحرك ناحيتي لحد م طلع ع المنصه وجه وقف جمبي واتكلم بابتسامة خبيثه
_ هتاكلي البت بعينك ، براحه
= يوسف
_ ي قلبه
= هو ينفع اجبها من شعرهاا ال ضرباه اكسجين ده
حاول يكتم ضحكته وهو بيرد
_ لا انا حبيبي ميعملش كده
= لا اعمل عادي والله
_ خليكي انتي الكبيره
بصيتله بغيظ وانا بحاول مزعقش
= مانت ال قالعلي الچاكيت ، وبعدين دقنك دي مبتتحلقش ليه ، عايزه افهم دقنك دي مبتتحلقش ليه
_ لا اله الا الله ، هي عملتلك حاجه ي بنتي
= ماشي ي يوسف ، ماشي
_ طيب هنزل انا مدام هتنكدي
= اثبت مكانك لتولع وانت واقف ، رايح فين؟
_ هنزل تحت عشان اعرف اراقب
= اوعي تتحرك من هنا عشان منزعلش
قعد ع الكرسي ال جمبي _ طيب ي ستي زي م تحبي
فضلنا شويه ساكتين وانا ببص ع الطلبه ال تحت ، لحد م سرحت فنمت غصب عني ،
معرفش عدي اد اي بس فوقت لما لقيته بيحاول يصحيني
_ مريم ، يلا ي حبيبي عشان نروح
والله ي يوسف م هحلك غير لما اطمن من ناحيه الكلمه ال بتخطفني كلي دي ، حرفياً بحب الكلمه دي جدا ، وبحبها منه بالذات ، انا ممكن اعترف باي حاجه لمجرد بس انه بيقولها وهو باصصلي بحنيه
بصيت لقيته لبس چاكيته ومحدش ف المدرج غيرنا ، فركت عيني عشان افوق واخدت شنطتي وقومنا
روحنا المكتب ودينا الورق بتاع الامتحان وقفل مكتبه ومسك ايدي ومشينا
فتحلي باب العربيه وبعدين لف ركب ، وانا مقدرتش امنع نفسي من اني أكمل نوم تاني ، فوقت لما حسيت بيه بيشيلني بعد م وصلنا ، قفل باب العربيه برجله وانا مازلت بين اني فايقه وبين اللاوعي ، فايقه لل بيحصل بس مش قادره أفتح عيني ،
وقفني ع رجلي وهو بيسندني عشان يطلع المفتاح ويفتح الباب ، دخلنا الشقه وبعدين اتحركت براحه لحد م وصلت للركنه ، رفعت النقاب وسندت عليها وانا بغمض عيني عشان اكمل نوم ، فجالي
_ مريوم ، يلا ي بابا عشان نصلي وبعدين نامي براحتك
قومت ببطء وانا مش قادره افتح عيني عشان اتوضي ، اتوضيت وصلي بيا وانا بحاول اخشع بالعافيه
خلصنا صلاه ومسك ايدي عشان يسبح عليهم زي م عودني ، بس مقدرتش افتح عيني وعماله انام ع نفسي ف مسك دماغي حطها ع رجله وانا مش مستوعبه ال عمله ، فضل يطبطب عليا ويقرأ قران بصوته اللطيف لحد م روحت ف النوم تاني
________________
طب بالله ف حد قمر كده حتي وهو نايم ، انا متجوز قمر مش بشر والله ، جميله وهي صاحيه وهي نايمه ، جميله ف كل حلاتها
واجمل حاله بقا وهي غيرانه ، ينهار جمال عليها وهي غيرانه ، الإنسان بيدوب ف غيرتها والله ، لا بصراحه انا بدوب فيها ف كل حلاتها
بس هي مدام بتغير لي كانت عايزانا ننفصل ، بغض النظر عن فكره انها مفكره اني بحب واحده تانيه ده ، مش طبيعي يعني ، بس مش مشكله ، تفوق الست مريم براحتها وبعدين نشوف الموضوع ده منها بقا
لقيتها نامت خالص فشيلتها عشان انيمها ع السرير عشان ترتاح اكتر
دخلت نيمتها وغطيتها وبوست جبهتها وبعدين خرجت ، حاولت اشتغل ع اللاب شويه وبعدين زهقت من نومها وانها مش معايا ، العصر اذن وانا بصراحه زهقي وصل لاقصي حد ، فقومت عملت غدا وبعدين صحيتها ، ف البدايه رفضت بس بعدين الحيت وانا برخم عليها بمشاكسه
_ مريم ، قومي بقا كفايه كده
= ي يوسف عايزه انام
_ لا قومي انا زهقت ، بقالي كتير قاعد لوحدي
= خلاص روح نام
زعقت بعصبيه مزيفه _ مريم قومي
انتفضت من ع السرير ، وبعدين بصتلي بغيظ بعد م فاقت
ردت وهي بتحاول متبكيش عشان قامت من النوم ، بحب غيبوبه انا
= قومت ي يوسف قومت
_ لو عايزه تكملي نوم كملي
ردت بفرحه = بجد؟
رديت بمسكنه _ اه ومش مشكله أموت من الجوع عادي
= اووووه ، خلاص ي يوسف قومت
_ شاطر حبيبي شاطر
بصتلي بغيظ وسكتت
_ يلا عشان نصلي العصر ، انا مرضتش انزل اصلي ف المسجد واسيبك
اتكلمت بعد م فاقت شويه وابتدت تقوم
= طيب حاضر ، هتوضي واجي
_ تمام
اتوضت وجت، صلينا وسبحت ع ايديها وجت عشان تقوم تعمل الأكل لقته معمول ف اتكلمت
_ والله مش عارفه اعمل اي، اشكرك عشان عملته ولا اعيط عشان صحتني وخلاص
= لا اعملي مكس ي عسل
_ طب اتفضل ظبط السفره ع م اجيب الاكل
= عنيا ي جميله
طلعت ظبطت السفره ، بس سمعت صوت حد بيرن جرس شقه مريم فخرجت اشوف مين
فتحت الباب لقيت فيه تلات رجاله لابسين لبس صعيدي وواقفين ف اتوجهتلهم
_ سلام عليكم
التفتولي = وعليكم السلام ورحمة الله وبركاته ي ولدي
_ حضراتكوا عايزين حد
ردوا بلغه الصعيد الجميله
= عايزين مريم ال ساكنه اهنه تعرفها؟
_ انا زوجها ، حضراتكوا مين
بصولي بصه غريبه كده وبعدين كبيرهم اتكلم
= احنا اعمامها
احم ، اعمامها ، مش متفائل والله ، بس ايزي ، انا وراكوا ومعاها لحد الآخر
سلمت عليهم بترحاب وهما مقصروش بصراحه ، سلموا بطريقه بارده شويه بس عادي
اتكلمت وانا بحاول اعدي طريقه مقابلتهم ال مش مبشره خالص
_ اتفضلوا بس لحظه هبلغ مريم عشان النقاب وكده
رد عمها التاني وهو مستغرب من كلامي
= وه ، احنا اعمامها ي ولدي
حاولت ابتسم بهدوء وانا برد عليه
_ معلش اسمحلي بس هي ف بيتها وكده
اتكلم كبيرهم تاني بحكمه وهدوء
= حجك ي ولدي ، براحتك، اتفضل احنا واجفين اهنه اهو
_ تمام بعد اذنكو
دخلت وسيبت الباب مفتوح شويه لقيت السفره متجهزه ، بعدين دخلتلها المطبخ ملقتهاش فدخلت اوضتها ، لقيتها قاعده سرحانه وباين عليها انها متضايقه ، اتكلمت وانا بحاول اعرف مالها
_ اي ي بابا مالك؟
فاقت ، سكتت شويه وبعدين ردت
اتكلمت بصوت خافت حزين
= يوسف
_ ي قلب يوسف
= هو ينفع اثق فيك؟
جريت عليها وانا برد بلهفه
_ ينفع جدا والله
= ينفع اطمنلك طيب؟
_ ينفع ي حبيبي والله
= مش هتخذلني ي يوسف
_ هبقى خذلت نفسي قبلك والله
= الوجع هيبقى منك صعب ي يوسف
قربت عليها لحد م قعدت جمبها ومسكت ايديها
_ ف اي بس ي مريوم ، مالك
اتنهدت بصوت عالي وهي بترد بصراحه وتوتر
= خايفه
_ من اي ي بابا
= من ساعه ال حصل وجوازنا ومفيش اي اخبار عن عمتي ولا اعمامي ، فقلقانه
خبطت جبهتي بكف ايدي وانا بفتكر اني نسيتهم برا وانا جمبها ، كالعادي يعني ست مريم منسياني الدنياا كلها وانا جمبها
ضحكت وانا بمسك ايديها وبقومها ، فاستغربت
_ بتضحك ع اي ي يوسف؟
= اصل انتي فيكي شيء لله
ردت بعدم فهم _ ازاي يعني مش فاهمه؟
= أصل اعمامك برا وانا اصلا داخل عشان اناديكي ليهم
_ ...........
يتبع ....
