رواية مهد القدر الفصل السابع 7 بقلم ملك سعيد
رواية مهد القدر الفصل السابع 7
#البارت السابع
(بارت الهدية الثاني💕)
قراءة ممتعة ❤
__________________
في أوضة مليانة بصور قدر
كان واقف مراد قدام صورة كبيرة لقدر و بيلمسها والي يشوف حالته دلوقتي هيفكره مختل عقليا
مراد بهوس: إنتِ ليا وبس يا قدري ومش هتكوني لغيري ابدا و مستحيل اخلي عز يوصلك وانا الي هكون العقبة الي في طريقه وهمنعه عنك ويا انا ياهو
في اللحظة دي بيدخل عليه اخوه زياد وكان متعصب منه فقرب من مراد ودور وشه ليه بعصبية
زياد : يا اخي إنت هتجنني سايب كل الشغل عليا ولا كإنك شريك في الشركة كل اسهمنا نزلت الارض بسبب اهمالك للشغل وكله علشان مين علشان البنت دي الي متعرفش بوجودك اصلا و كمان عايز تنتقم من عز لإن اول بنت حبيتها في حياتك سابتك لما قابلت عز وشافت انه اغني منك وبسببك خلتنا أعداء لعز الي كان شريك مهم لينا وبعد ما فضينا الشراكة الي بينا
شغلنا بقي في الارض وإنت ولا علي بالك فوق بقي
مراد بصله ببرود ولف لصورة قدر تاني : خلصت كلامك تقدر تطلع بره ومليون مره هقولك إياك تدخل الأوضة دي تاني وإلا هتزعل وبالنسبة لإنتقامي من عز فأنا منستش الي حصلي بسببه وانا اتدمرت بسببه و بسبب ميرنا الخاينة الي كل همها في الدنيا الفلوس و بس واتخلت عني لما شافت الاغني مني مستحيل اسامحهم
زياد بعصبية : إنت ليه محسسني إن عز كان بيحبها هي ولا كانت علي باله هي الي سابتك علشان توقع عز في حبها فإيه سبب كرهك ليه إنت مكبر الموضوع وبتمني انك ترجع للشغل وتنسي انتقامك و تبطل جنان وتنسي قدر الي جننتك وبطل تراقبها وإنساها واعقل وإلا هخليك تندم
مراد ببرود : وانا عايز اندم بس مش هتراجع عن الي في بالي
زياد بتوعد : متندمش بعدين
خرج زياد وهو متعصب
و دخل اوضته
طلع تليفونه من جيبه واتصل علي واحد من رجالته
زياد : انهاردة تجبلي خبر موت قدر الصباغ
: بس يا باشا إنت عارف اني مليش في القتل
زياد بعصبية : مليون جنيه مقابل قتلها
الراجل بطمع: هو ده الكلام يا باشا انهاردة خبر موتها هيبقي في كل الأخبار
زياد بابتسامة خبيثة : وأنا مستني الاخبار
♥ ❥ ♥ ❥ ♥
الساعة ٨ بليل
كانت قدر قاعدة في اوضتها وحاسة بالملل ومش لاقية حاجة تعملها أبوها كالعادة في الشركة وبييجي متأخر ومفيش حد تتكلم معاه في البيت فقامت بزهق
وقعدت تمشي في الأوضة رايحة جاية وقالت: مش معقول الملل ده و الزفتة نور واخدة موقف ولسه متصلتش عليا علي أساس عندها دم طب هعمل ايه دلوقتي
وبتقول فجأة: خلاص معنديش حل تاني انا هغير هدومي وأخرج والف بالعربية شوية لحد ما شوف هروح ازعج مين
وبتلبس بنطلون اسود و تيشرت اسود وساعة سودا
وبتفرد شعرها وبتلبس كوتش ابيض وبتاخد مفاتيح عربيتها وبتخرج من اوضتها
بتنزل للكراج وبتركب عربيتها
وبتحركها وبتخرج بره الفيلا
♥ ❥ ♥ ❥ ♥
وعند بطلنا كان بيلبس بدلته
وبيرش عطره وبيسرح شعره
وبعد ما انتهي من تجهيز نفسه
خرج من الفيلا وهو مقرر يروح شركته الي كان بيديرها وهو في نيويورك
ولما خرج من الفيلا بيلاقي السائق مستنيه وبيفتحله الباب الخلفي وبيركب عز العربية وبيتجه السواق لشركة السيوفي للإستيراد والتصدير
♥ ❥ ♥ ❥ ♥
عند قدر كانت سايقة العربية وفجأة تليفونها رن برقم ياسين أبوها فبتدوس علي فرامل العربية علشان توقفها وترد عليه بس بتنصدم لما العربية مبتوقفش فبتخاف وبترد علي التليفون وبتفتح الاسبيكر وبتقول
بخوف : بابا الحقني عربيتي مبتوقفش
اتصدم من الي قالتله صوتها الخايف قلقه اكتر فقالها بقلق : إزاي مبتوقفش يعني؟!
قدر بتحاول تتحكم في اتجاهات العربية بتقول
بخوف : مش عارفة اوقفها الفرامل مش شغالة
ياسين بيحاول يهدي بنته برغم خوفه عليها: اهدي يا قدر وحاولي توقفي العربية بأي طريقة
قدر ببكاء : هحاول
وبتدخل في طريق فاضي وهي مش عارفة تتحكم في العربية
♥ ❥ ♥ ❥ ♥
في عربية عز كان قاعد بيفكر في قدر الي ساب حياته في نيويورك بس علشان يلاقيها ومش عارف يبدأ منين علشان يوصلها
بيدخل السواق في نفس الطريق الي قدر فيه
و عز كان شارد بيفتكر قدر وبيفتكر قد ايه كانت طفلة بريئة وشعور جواه بيقوله ان قريب جدا هيلاقيها ومش هيخليها تروح من ايديه
وفي اللحظة دي بينتبه السواق علي عربية قدر وإن حركتها مش متوازنه فبيقول لعز : عز باشا شايف العربية الي قدامنا دي
عز بيبص علي العربية بعدم اهتمام : اه فيها إيه؟!
السائق وهو بيبص علي العربية : حركة العربية مش متوازنه الواضح إن الي بيسوقها مش عارفة يتحكم فيها وممكن يعمل حادثة في اي وقت
عز بيبص للعربية بتركيز وبيقول بقلق : فعلا حركة العربية مش متوازنه، وبيفكر شوية و بيقول : وقف العربية
السواق وهو بيبصله باستغراب : اوقفها ليه يا باشا؟!
اتنفس عز بنفاذ صبر وقال للسواق بلهجة آمرة : قولت وقف العربية إيه مبتفهمش
بيحرك السواق راسه بخوف وبيوقف العربية
وبينزل عز وبيفتح باب مقعد السائق وبيقوله : انزل واركب في الكرسي التاني
نزل السواق باستغراب وركب في الكرسي الي جنب كرسي السواق وبيركب عز العربية و بيسوق عربيته بأقصي سرعة علشان يساعد سواق العربية التانية من انه يعمل حادثة وياه لو عرف إن الي بتسوق العربية هي نفس البنت الي شاغلة تفكيره والي قالب عليها الدنيا
♥ ❥ ♥ ❥ ♥
ياسين بخوف : اهدي يا قدر وحاولي تتحكمي في العربية وانا جايلك فورا بس متخافيش
قدر ببكاء: العربية مش عايزة توقف انا خايفة
خرج ياسين من شركته وركب عربيته وبيسوق بأقصي سرعة علشان يوصل لبنته
وفي اللحظة دي عربية عز بتقرب من عربية قدر وبتبقي جنبها وعز بيفتح ازاز عربيته علشان يكلمها
بص علي العربية وشاف قدر بتعيط وبتحاول تتحكم في العربية و فبيقولها بصوت عالي : يا انسة وقفي العربية هتعملي حادثة
بتتفاجأ قدر بالصوت وبتبصله بدموع وبتقوله بسخرية : ما هو لو عارفة اوقفها مكنتش بعيط يا اذكي اخواتك
اتصدم عز من ام ردها وحاول يهدي وقالها :طب اهدي شوية وانا هساعدك
ياسين بيسمع صوت حد بيتكلم مع قدر فبيسألها بقلق : قدر مين ده ال بيكلمك ده؟!
قدر مبتنتبهش لصوت أبوها وبتوجه كلامها لعز وبتقوله بخوف : هتساعدني ازاي انا مش عارفة اوقفها وشكلي هموت
عز ببتعصب من كلامها وبيقولها بحدة: يا انسه اهدي شوية قولتلك هساعدك
قدر بتحاول تهدي و بتبصله بأمل وبتقوله بهدوء : يعني مش هموت؟!
عز بيبصلها بابتسامة هادية وبيحاول يطمنها : لا مش هتموتي بصي عدي لعشرة وهتشوفي ازاي هوقفها
قدر بتهز راسها بنعم والسائق بيبص لعز باستغراب و بيسأله : هتوقفها ازاي يا باشا؟!
عز بصله وهو مبتسم بثقة : امسك في العربية كويس
مسك السائق في العربية بخوف وقدر بدأ تعد لعشرة وعز زاد من سرعة العربية واتخطي عربية قدر ودور عربيته بالعرض قدام عربيتها
اما هي بتتفاجأ بتصرفه وفجأة عربيتها بتتخبط في عربيته
وراسها بتخبط في الدركسيون وبتنجرح جامد
والدم سال علي جبينها واغمي عليها
♥ ❥ ♥ ❥ ♥
عند ياسين لاقي الخط قطع وقعد يحاول يتصل ب قدر بس مبتردش فبدأ القلق يتملك منه وخاف علي قدر من إنها تكون عملت حادثة وان ممكن يخسرها زي ما خسر مراته سهر وقف عربيته في نص الطريق ومش عارف يتصرف ازاي ولا هيوصل لقدر ازاي وندم انه نسي يسألها هي في اي طريق وفجأة افتكر انه كان حاطط جي بي اس في عربية قدر علشان يعرف كل تحركاتها لأنه كان خايف عليها من حمدي ليأذيها
مسك تليفونه بسرعة واتصل علي حد من رجالته وقاله
ياسين : فورا تعرفلي عربية قدر فين
: امرك يا باشا بس اديني وقت وهتصل بيك لما اوصل لمكانها
ياسين بعصبية : معاك ١٠ دقايق وتكون عارف مكانها
وبيقفل الخط وبيستني اتصال الراجل الي وكله يعرف مكان عربية قدر بقلق وخوف علي خسارة بنته
♥ ❥ ♥ ❥ ♥
عز بص علي عربية قدر بصدمة وشافها وهي مغمي عليها بص للسواق وقاله : اتصل بحد يبعتلنا عربية تاخدنا
فك حزام الأمان بسرعة ونزل من العربية جري وقف جنب باب السواق الي قاعدة عليه قدر وبيلاقي راسها بتنزف فبيحاول يفتح الباب بدون فايدة
بيخرج السواق الخاص ب عز من العربية بصعوبة وبيقف جنب عز وهو بياخد نفسه بسرعة وبيقول بقلق : هنعمل ايه يا باشا البنت بتنزف
عز بيحاول يفتح باب العربية بعنف : لازم نخرجها بسرعة ونوديها المستشفي
السواق بيساعد عز علشان يفتحوا الباب بس بردو متفتحش فبيقول السواق : الباب مقفول من جوا مش هنعرف نفتحه
عز بيلف حولين نفسه وبيدخل ايده بخصلات شعره الأسود بتوتر وبيقول : هنكسر الازاز مفيش حل تاني
السواق بيهز راسه بموافقة وبيدور حواليه علي اي حاجة تساعدهم يكسروا الازاز بس الوقت كان متأخر ومفيش الا نور كشافات العربية في الطريق فده يصعب عليهم انهم يدورا علي اي حاجة تساعدهم لحد ما عز لف للباب الي جنب السواق وحاول يكسر الازاز بإيده قعد يخبط ايده في الازاز بقوة لحد ما الازاز اتكسر وايده انجرحت بس جرحه مهموش في اللحظة دي كل الي يهمه انه ينقذ قدر دخل ايده جوه العربية وفتح الباب ودخل قعد علي الكرسي وقرب من قدر وعدلها ولاقاها بتنزف جامد ف حس بالندم لأنه هو السبب في الي حصلها فقرب منها علشان يفك حزام الأمان وكان وشه قريب من وش قدر بصلها عز وانتبه قد ايه ملامحها بريئة وحس ان فيه حاجة بتجذبه ليها بس طلع الأفكار دي من راسه وفك حزام الأمان وفتح باب كرسي السائق
كان السواق واقف جنب الباب بيراقب عز ولما شافه فتح الباب قرب علشان يطلع قدر بس لما شافه عز هيقرب منها وقفه بإشارة بإيده انه يقف وهو من جواه مش عارف ليه اضايق لما شافه هيقرب منها
نزل من العربية ولف عند قدر وشالها وخرجها من العربية وفي الوقت ده جت العربية الي طلبها عز من السواق جري علي العربية والسواق فتحله الباب الخلفي
دخل عز قدر العربية وقعد جنبها وحط راسها علي رجليه وهو بيبصلها بقلق وخوف عليها وهو مش عارف ليه خايف عليها للدرجادي مع ان دي اول مره يشوفها فيها ليه منجذب ليها وكل أفكاره متلخبطة
♥ ❥ ♥ ❥ ♥
رأيكم في البارت يا حبايبي
ومن هنا وأحب اقولكم إن الأحداث الي بجد بدأت
#مهد القدر
#بقلمي ملك سعيد
دمتم سالمين ❤
يتبع
رواية مهد القدر الفصل الثامن 8
لقراءة باقي فصول الرواية اضغط هنا ( رواية مهد القدر )
