رواية مهد القدر الفصل الثالث3 بقلم ملك سعيد
رواية مهد القدر الفصل الثالث 3
عز : جهز نفسك معاد الطيارة كمان ٤ ساعات
فارس : دي خامس مره تقولي
عز بهزار : يعني انا غلطان اني بفكرك
فارس : خالص
عز : طب ماشي دلوقتي جهز نفسك علشان من طايقك
فارس ببرود: لا انا قاعد علي قلبك مش ماشي
بيمسكه عز من هدومه وبيقول: هتطلع بالذوق ولا اطردك واخليك مسخرة للي يسوي والي ميسواش
فارس بيزق عز وبيقول: خلاص يا عم طالع وجهز نفسك ها فاضل ٤ ساعات علي معاد الطيارة
قالها فارس وهو بيقلد عز
عز بسخرية: لو خلصت عرضك المسرحي اطلع برا
وبيطلع فارس بالذوق وبيسيب عز لذكرياته
♥ ❥ ♥ ❥ ♥
عند قدر بتحس بملل في الشركة فبتروح علي مكتب ابوها وبتدخل المكتب من غير ما تخبط
قدر بمرح : مدير الشركة بيعمل ايه
ياسين بتريقة : والمدير المفروض يعمل ايه
قعدت قدر علي الكرسي قدام مكتب ابوها وقالت بهزار : المفروض يشتغل زيي كده والله يا والدي اشتغلت شغل يخرب بيت شركتك لسنه قدام هسكت بس علشان الفضايح
ياسين بيأس من بنته المجنونة: يا بنتي هو إنتِ كنتي بتعملي ايه في فترة تدريبك كنتي بتلعبي
قدر بفخر : طبعا كنت بلعب إنت تعرف عني غير كده خلينا في المهم انا تعبت وعايزة اروح وبعد ما ارتاح هخرج انا و نور ممكن
ياسين وهو بيضرب كف بكف : روحي يا قدر كان يوم اسود يوم ما عرضت عليكي إنك تشتغلي في الشركة روحي صيعي مع صحبتك الهبلة سبحان الله انتوا الاتنين فوله و اتقسمت نصين
قدر بضحك : هههه متقولش كده يا عم الحاج انا و صحبتي اعقل العاقلين بس مش متقدرين
واو تصدق انا أنفع اكتب اغاني والله هجبلك شهرة اكتر من شغل الشركة ولا ايه رأيك ؟!
ياسين بهدوء : هتطلعي برا ولا اقوم اجرجرك قدام الموظفين اعتقد شكلك هيبقي وحش يلا هوينا
بتقوم قدر و بتقول : انا ماشية بكرامتي احسن يلا باي يا معلم
بتخرج قدر بعد ما جابت شلل لأبوها
ياسين باستغراب : باي يا معلم ليه مربي عم عبده الميكانيكي ربنا يهديكي من جنانك
♥ ❥ ♥ ❥ ♥
وفي بيت نور وخصوصا في المطبخ
حنان بزعيق : إنتِ يا مخفية يالي ملكيش لازمة ب جنيه في البيت ده قومي ساعديني في الطبخ بدل ما إنتِ قاعدة ليل نهار علي التليفون
خرجت نور من اوضتها وهي قالبة وشها وبتقول بملل
: ماما مش كل يوم نفس الخناقة غيري الأسباب ممكن تتخانقي معايا في اي حاجة تانية غير اني اطبخ لإني مبعرفش وكمان التليفون مش سايباه اكيد مشتريتهوش علشان اركنه ولا ايه
حنان بعصبية : داعية عليكي صبح و ليل ضهر و عصر يا فاشلة
نور بهزار : ايه ده يا أمي إنتِ مبتصليش المغرب و العشاء كده يا ست الكل بتفرطي بصلاتك اخص عليكي
حنان بنفاذ صبر : لاء ما انا مش هسكت كتير عليكي فين ابوكي وسعي من وشي
بتزق نور و بتخرج من المطبخ و بتنادي علي جوزها بصوت عالي : يا احماااااد
بيخرج احمد من اوضته ببرود بيقولها
: بصي بقي يا حنان لو هتشتكي من بنتك مليش دعوه بيكم اتصرفوا مع بعض مش كل يوم تتخانقي معاها سيبي البنت تعيش سنها
بتسقف نور بمرح وبتقول لأبوها : هو ده الكلام يا بابا بصراحة كده مراتك مطلعة عيني اينعم انا مبمسكش مقشة في البيت بس مراتك تاعبة نفسيتي اقولك حاجة طلقها و انا اجيبلك ست ستها اه والله
بيضحكوا نور و احمد علي شكل حنان المتغاظ منهم
وبتقولها
: عايزة تجوزي ابوكي عليا هي دي اخرة تربيتي فيكي يا بوز الأخص انا خلاص فقدت الأمل فيكي من النهاردة لا إنتِ بنتي و لا اعرفك خليكي بنت ابوكي
نور بضحك : كده يا ست الكل ماشي انا مش هرد علشان إنتِ امي ادخلي بقي كملي الغدا لإني جعانة
بتبصلها امها بنظرة حادة
فبتبلع نور ريقها و بتغير كلامها بسرعة: ولا اقولك يا ست الكل اعملي الغدا براحتك كده كده هتغدا برا مع قدر يلا سلاموعليكو هدخل اجهز
بتدخل نور اوضتها علشان هتقابل قدر بعد ما سببت شلل نصفي لأمها
♥ ❥ ♥ ❥ ♥
وفي مكان لأول مره نروحه
قاعد شاب بغرور وحاطط رجل علي رجل وواقف جنبه مساعده الشخصي وهو مراد المسيري وبيتكلم بعصبية
: يعني ايه الي انت بتقوله ده بعد كل السنين دي افتكر يرجع
مساعده بخوف : والله يا مراد باشا ده الي عرفته السيد عز السيوفي قرر يرجع علشان يدور علي قدر بنفسه
مراد بتوعد : خليه يرجع بس وقسما بالله ما هخليه يوصلها هخليه يتعذب علشان يلاقيها ومش هيطولها ابدا مش دايما هيكون الكسبان قدر ليا وبس
♥ ❥ ♥ ❥ ♥
إما عند عز كان مع فارس و فهد في المطار مستنيين موعد الطيارة
فارس بعملية : عز فرع شركتنا في مصر فيه شغل كتير مستنينا فيه بما إننا صفينا كل شغلنا هنا ومن يومين عرفت ان فيه شركة رجل الأعمال ياسين الصباغ وعملت ابحاث عن الشركة وشغلهم ماشي مظبوط ف بإذن الله هندخل في شراكة معاهم ها اي رأيك
عز بموافقة : وانا واثق في قراراتك اذا كانت شركتنا هتستفيد من الشراكة دي فمعنديش مشكلة بس مش عايز حاجة تشغلني عن اني الاقي قدر إنت اهتم بالموضوع
فارس : مفيش حاجة هتعطلك إنك تلاقي قدر بس الشغل شغل ومفيهوش هزار وانت الي قولتلي كده
عز ببرود : وانا مغيرتش كلامي الشغل شغل
وبيقطع كلامهم النداء علي المسافرين علشان يطلعوا الطيارة وبيطلع عز وفارس و فهد وكل واحد فيهم ميعرفش ايه الي مخبيه القدر ليهم وازاي هتتقلب حياتهم لما يرجعوا مصر
وعز الي قضي سنين بيدور علي قدره ف يا تري ايه هتكون نهاية عذاب السنين في بحثه عنها هيلاقيها ولا للقدر رأي تاني
♥ ❥ ♥ ❥ ♥
في المطعم
قدر و نور قاعدين بيشربوا عصير و بيتكلموا
نور بهزار: سمعت طراطيش كلام إنك مقطعة نفسك شغل ولا دي اوشاعات
قدر بفخر : يا بنتي اصلا الشركة دي هتخسر من غيري صدقيني
نور بتريقة: اه ما هو باين
قدر باقتراح : بقولك ايه بدل ما انتي فاشلة في الطبخ وكل يوم تدبي خناقة إنتِ وامك تعالي واشتغلي معايا وسليني بالمره اصلي بزهق من الفضا الي في الشركه
نور بتفكير : اممم علي حسب مرتبي لو كان عالي وابن ناس انا جاهزة
قدر بتريقة : انتي هبلة يا بت إنتِ اصلا تطولي تشتغلي معانا خليكي قاعدة في وش امك ليل نهار لحد ما تجيب آخرها منك و تطردك
ضحكت نور علي كلامها وقالت : هههههه والله ما عارفة هي ليه مش طايقاني بس سيبك مني وقوليلي إنتِ عاملة ايه وياتري لسه شاغلة تفكيرك ب مهد
اتنهدت قدر بحزن : يا نور لو تعرفي انه مش بس شاغل تفكيري ده محتله
مسكت نور ايدها وقالتلها باعتذار : خلاص بقي يا قدر انا اسفة اني فكرتك بيه
قدر بابتسامة حزينة : انا اصلا منستهوش علشان تفكريني بيه
نور بحيرة : بصي يا قدر انا اصلا مش فاهمة قصتكم اوي فياريت لو تحكيهالي من الاول ممكن
ابتسمت قدر لما افتكرت ماضيها مع مهد وبدأت تحكيلها عن مواقفها معاه : وليه مش ممكن اسمعي يا ستي انا ومهد اتربينا في دار أيتام او بالأدق عشنا فيه مدة قليلة هو كان موجود قبلي في دار الايتام والدادة ماجدة هي الي كانت بتهتم بينا وفي يوم كنت تميت ٤ سنين سألتها انا ازاي جيت هنا فين ماما و بابا قالتلي اني اعتبرها ماما وبعدين قالتلي ان اول يوم جيت فيه دار الايتام كنت لسه مولودة بيوم يعني اهلي اتخلوا عني وقتها قعدت في الجنينة و قعدت اعيط و قتها جه مهد و قعد جنبي وبدأ يهديني ويقولي مفيش حد يستاهل انك تعيطي علشانه وحضني و قتها وقالي اعتبره كل عيلته من هنا و رايح هو ابويا و امي و اخويا و صاحبي كان دايما يهتم بيا وكنت بحس قد ايه هو حنين معايا وكنا قريبين من بعض اوي حتي كان معانا ولد بس مش فاكرة اسمه كان دايما يزعقلي ويتريق عليا وكان مهد دايما يتخانق معاه علشاني بس في يوم وليلة راح
قالتها قدر ببكاء ولما لاقتها نور في الحالة دي قامت من مكانها وقعدت جنب قدر و خدتها في حضنها وقالتها : خلاص يا قدر بطلي عياط انا استاهل ميت شبشب لإني خليتك تعيطي
قدر و هي بتخرج من حضنها و بتمسح دموعها : خلاص يا نور يخربيتك خليتني اعيط وابوظ الميك اب بتاعي ربنا يهدك يا بعيدة
نور بضحك : هههههه يا بنتي بتدعي عليا بس سيبك بقي من جو الحزن ده واعملي حسابك هشتغل معاكي في الشركة انشالله عاملة نظافة مقدرش اسيبك لوحدك ايه رأيك
قدر بابتسامة: ايوا كده هكلم بابا واقوله يكلم مسؤل النظافة في الشركة علشانك
نور بغيظ: تعرفي اني غلطانة اني وافقت قال نظافة قال لو مفيش شغل محترم يليق بيا مش لاعبة قصدي مش شغالة دا انا اشتغل رقاصة و لا اشتغل عاملة نظافة
قدر بضحك : هههههه خلاص يا بنتي بهزر ده إنتِ مسخرة هخليكي سكرتيرتي الخاصة يا ستي ايه رأيك
نور بموافقة : طبعا ومالو سكرتيرة سكرتيرة بس الي انا اعرفه ان البطلة بتبقي سكرتيرة البطل مش صاحبتها ايه الحظ الي عندي ده
قدر بتريقة: الي انا اعرفه ان البطلة بتبقي سكرتيرة البطل مش صاحبتها ايه الحظ الي عندي ده بطلي هبل احنا مش في مسلسل ولا رواية
اتجاهلت نور كلامها وقالتلها بجوع : خلاص يا ستي يلا بقي اطلبيلنا الغدا لإني هموت من الجوع وعلي حسابك
قدر بضحك : خلاص يا مصلحجية هطلب
وطلبت قدر الغدا ليهم
♥ ❥ ♥ ❥ ♥
رأيكم في البارت يا حبايبي
#مهد القدر
#بقلمي ملك سعيد
دمتم سالمين ❤
يتبع
رواية مهد القدر الفصل الرابع 4
لقراءة باقي فصول الرواية اضغط هنا ( رواية مهد القدر )
