رواية مهد القدر الفصل الثالث عشر 13 بقلم ملك سعيد
رواية مهد القدر الفصل الثالث عشر 13
آسفة علي التأخير والله اليوم كله كنت مشغولة
وخاصة لإن انهاردة اني كانت في العمليات
قراءة ممتعة ❤
__________________
في عربية عز
كان هو وقدر في طريقهم للفيلا
طبعا تحت رفض قدر للرجوع إلا أنه خدها غصب عنها كانت قدر بعكس حالتها وهما خارجين
كانت قالبة وشها ومش طايقة نفسها
إما عز كان مستمتع وهو شايفها قالبة وشها زي الأطفال
فحاول يخرجها من صمتها وقالها بهزار : في حالة إنك مكلتيش 5 آيس كريم بالشوكولاته كنتي اقلبي وشك براحتك .... إما إنتِ كلتي بيتزا و آيس كريم قالبة وشك ليه ... شايلة طاجن ستك ليه؟!
بصتله بضيق وقالت: والله علي أساس إنك مش عارف أنا قالبة وشي ليه؟! .... حضرتك مودتنيش الملاهي وكمان رجعتني بدري ملحقتش انبسط... قد إيه إنت ممل
بصلها بصدمة و استنكار لاتهامها ليه أنه ممل وقال بدفاع عن نفسه: انا ممل !! ولا إنتِ الي ناكرة للجميل ... ده بدل ما تشكريني وتقوليلي كتر خيرك ... بجد محدش بيقدر عمل الخير
بصتله باستغراب وقالت: عمل خير إيه؟؟ استني كده هو أنا بشحت منك علشان تقولي عمل خير... بص متسمعنيش صوتك ... علشان أنا علي أخرى منك
ابتسم باستهزاء وقالها بسخرية : من ساعة ما شوفتك وإنتِ مش طايقة نفسك ... مفيش جديد
وصلوا الفيلا
فتحت قدر باب العربية وقفلته بعنف
فصرخ عز بسبب خوفه علي عربيته وقال : يخربيتك الباب هيتكسر
بصتله ببرود وقالتله: أحسن
سابته و دخلت بلامبالاه وبإنزعاج واضح
إما عز فدعي عليها بغيظ وقال: حسبي الله ونعم الوكيل في كل ظالم مفتري
ركن عز عربيته ونزل ورا قدر
دخل الفيلا جري علشان يلحقها ولما دخل لقاها
طالعة علي السلم فقالها بصوت عالي علشان تسمعه : متنسيش تاخدي علاجك
وقفت قدر لما سمعت صوته وإبتسمت علي اهتمامه بيها برغم الطريقة الي اتكلمت معاه بيها وقالتله من غير ما تبصله : متقلقش مش هنسي
طلعت لأوضتها ، إما عز بص علي طيفها وهي بتطلع بابتسامة هادية وطلع وراها لأوضته علشان ينام بعد تعب اليوم الي قضاه مع الطفلة المجنونة قدر
♥ ❥ ♥ ❥ ♥
عند مراد
كان بيتكلم مع ماجد في التليفون
بعد ما عرف إن قدر مع عز وطبعا اتعصب من فكرة ان عز عرف الحقيقة بس أمر ماجد انه يراقبهم ٢٤ ساعة
مراد بعصبية: يعني طلعت عايشة معاه ... وانا الغبي الي كنت مفكرها غير ... بس انا مش هسيبهالوا قدر ملكي انا وبس
ماجد : مراد باشا ... تحب أتصرف واجيبها
مراد بشر : لاء سيبها للوقت المناسب أهم حاجة عايزك تحط رجالة تراقبهم .... والوقت الي عز هيخرج فيه من الفيلا لوحده هيكون الوقت المناسب علشان أخدها
ماجد : تمام يا باشا
قفل مراد المكالمة ومسك صورة قدر وقال بخبث : كنت مفكرك بريئة بس طلعتي زيهم ... بس أوعدك هتكوني بين إيديا في أقرب وقت ... ووقتها مش هسيبك ابدا لإنك ملكي
♥ ❥ ♥ ❥ ♥
رجعت نور مع أبوها البيت بعد ما قابلوا ياسين وقالهم انه ميعرفش اي حاجة عن قدر حتي الشرطة مقدروش يعرفوا هي فين ونور كانت بتعيط من حزنها و خوفها علي صاحبة عمرها وأمها كانت بتواسيها وبتطمنها علي قدر
إما احمد فكان خايف علي قدر لإنه بيعتبرها بنته
وفي الوقت ده نزل فارس مع أمه لشقة نور ورنوا الجرس فقامت حنان تفتح الباب ولقت صباح و فارس واستقبلتهم بحب ودخلتهم للصالة وأول ما دخلوا لقوا نور بتعيط صباح جريت عليها وقعدت جنبها وخدتها في حضنها وسألتها بتعيط ليه بس نور زاد عياطها عن الاول
فارس حس بإحساس غريب لما شافها بتعيط حس ان قلبه بيوجعه وفي لحظة كان عايز ياخدها في حضنه ويهديها ويمسح دموعها
فاق من شروده علي صوت خالته حنان وهي بتقول بحزن : من الصبح وهي في الحالة دي وبتعيط
صباح مسدت علي شعر نور وقالت بخوف : بتعيط ليه يا حنان إيه الي مزعلها ؟!
ردت حنان بحزن : إنتِ عارفة صحبتها قدر ...مختفية من يومين ومحدش يعرف عنها حاجة
صباح خبطت علي صدرها بصدمة وقالت : يا لهوي مختفية فين ... يا حبيبتي يا بنتي دي زي النسمة وانا كنت بحبها زي بنتي بالظبط ... ربنا يحميها مطرح ما كانت
حنان بحزن : يارب
فارس لما سمع اسم قدر افتكر البنت الي بيدور عليها عز وشك للحظة انها ممكن تكون نفس البنت بس نفض
الفكرة دي من راسه وقال في نفسه : أكيد تشابه أسماء... معقول مفيش غير قدر واحدة في الدنيا؟!
بص لنور وهو زعلان عليها فقرر أنه يهزر معاها علشان يطلعها من الحالة الي هي فيها
راح قعد جنبها وقالها بغنا : متبكيش يا بنتي دموعك غاليين عليا
وبعدين سكت وقال وهو بيفرك في رأسه : قال إيه يا ربي؟!
خرجت من حضن خالتها وبصتله والدموع مغرقة وشها وسألته بإستغراب: مين ده الي بيقول إيه؟!
فارس : المغني مش فاكر قال إيه استني كده .... متبكيش يا بنتي دموعك غاليين عليا _____ لا مش فاكر قال إيه
كان فارس بيغني بصوت أقل ما يقال عنه أنه يستحق الدفن وده طبعا خلى نور تموت من الضحك علي موهبته العظيمة في الغناء
وده كان هدف فارس أنه يضحكها وده خلاه مبسوط لضحكتها
إما صباح وحنان بصوا لبعض بابتسامات خبيثة
وطول القعدة كانت عبارة عن هزار فارس وضحك نور و العيلة عليه لحد ما انتبهوا ان الوقت اتأخر واستأذنوا وطلعوا يناموا في شقتهم
♥ ❥ ♥ ❥ ♥
وفي أوضة سيف كان قاعد بيفكر في كل الي بيحصل في حياته من جهة قدر والي فجأة يكتشف انها أخته وكمان مختفية ، و من جهة ندي البنت الي بيحبها من زمان وعارف انها زعلانة منه بسبب تصرفه معاها آخر مره قابلها فيها وقرر إن بكره هيصالحها ويعتذر ليها وكمان يعترف ليها بحبه وإن عصبيته عليها كانت بسبب غيرته
♥ ❥ ♥ ❥ ♥
إما في أوضة رضوي كانت بتفتكر الشاب الي انقذها من الشباب الي كانوا بيضايقوها وقالت : ياربي مش عارفة من ساعة الي حصل وهو مبيخرجش من بالي ليه... بس بصراحة الواد قمر يخربيت امه كانت بتتوحم علي ايه لما كانت حامل فيه ... أكيد أمه مش مصرية ايوا ما هو مفيش شاب مصري بالحلاوة دي ده شبه الواد كنان ايوا شبهه اوي
رفعت إيديها وهي بتدعي وقالت: يارب اجعله من نصيبي يارب الواد قمور و انا نفسي فيه وشبه ممثل تركي أنا بحبه يارب
♥ ❥ ♥ ❥ ♥
والصبح الساع 7:00
صحي عز وخد شاور سريع
خرج من الحمام لابس فوطة علي وسطه وفي اللحظة دي وبدون مقدمات
فتحت قدر الباب ودخلت بسرعة ، إتفاجئ عز من دخولها المفاجئ وبصلها بنظرة ثعلب ماكر واترسمت علي وشه ابتسامة خبيثة
قدر أول ما شافته اتصدمت من هيئته لأنه مكانش لابس حاجة غير الفوطة علي وسطه ولاحظت نظراته الخبيثة ليها ف بتتدور وبتديه ظهرها وبتقول بتوتر : أنا أنا أسفة مكنش لازم أدخل بالطريقة دي من غير استأذان
ابتسم علي توترها وحط ايده علي وسطه وسألها بمكر : وايه سبب دخولك بالطريقة دي؟!
وكمل بمشاكسة : ولا كنتي ناوية تتغرغري بيا اعترفي
فتحت عينيها بصدمة وبلفت ليه وقالتله باستنكار : نعم اتغرغر بيك ... ليه إنشاءالله توم كروز و أنا مش عارفة
عز بغرور: أجمل طبعا
قدر باستنكار : بلا نيلة قال أجمل
اتعفر بغرورك ده .... وكمان أنا دخلت بالطريقة دي علشان أقولك إني جعانة والخدامة قالتلي ان الفطار جاهز فقولت أكسب فيك ثواب وأقولك ... وكمان علشان أقولك توديني الملاهي
عز برفعة حاجب : قولي كده ناوية تستغليني لمصلحتك
قدر بابتسامة بريئة : ايوا
لسه هيرد عليها تليفونه رن برقم فهد فرد بسرعة وجاله صوت فهد وهو بيقول : لقيناها يا باشا
عز بعدم تصديق : لقيتوها بجد لقيتوا الدادة ماجدة
فهد : ايوا يا باشا هبعتلك عنوان بيتها في رسالة
حس إن الدنيا بتلف بيه من الفرحة وأخيرا وصل للدادة ماجدة وده يعني أنه قريبًا جدًا هيوصل لقدر فقاله بفرحة: بسرعة يا فهد أنا مستني رسالتك
قفل عز بفرحة
بصتله قدر باستغراب وسألته بفضول : إيه الي مفرحك كده ما تفرحني معاك
ضحك علي فضولها وقالها : لا مش هقولك ويلا بقي من غير مطرود علشان عايز البس ... وكمان افطري إنتِ لإن عندي شغل مهم مضطر اروحه
بصتله قدر بغيظ وخرجت من الأوضة وهي هتموت وتعرف إيه سبب فرحته المفاجأة دي
إما عز كان ماسك تليفونه مستني رسالة فهد بفارغ الصبر لحد ما اتبعتتله الرسالة وعرف العنوان فجهز نفسه ولبس بدلته وساعته
وخرج من أوضته بسرعة
نزل تحت لقى قدر قاعدة علي السفرة و بتاكل أنتبهت عليه فبصتله بغيظ وهو ضحك علي شكلها الطفولي وقالها : متخليش قلبك اسود ... هصالحك لما أرجع وهاخدك الملاهي ... ها رضيتي عني؟!
قدر فرحت انه بيصالحها بس قالت بغرور مصطنع : هفكر واقولك
ضحك عز علي عنادها وحرك رأسه بيأس وخرج من الفيلا
ركب عربيته ومرضاش ياخد السواق معاه
وساق بأقصي سرعة وعنده أمل أنه يعرف مكان حبيبته قدر
♥ ❥ ♥ ❥ ♥
ماجد في التليفون : خرج لوحده يا باشا
ابتسم بشر وقال: جهز الرجالة لحد اما اجي
ماجد : امر و ينفذ
قفل مراد الخط وقال بخبث : جه الوقت الي تكوني بين إيدي يا قدري
♥ ❥ ♥ ❥ ♥
توقعاتكوا؟؟
وإيه رأيكم في البارت يا حبايبي
#مهد القدر
#بقلمي ملك سعيد
دمتم سالمين ❤
يتبع
رواية مهد القدر الفصل الثالث عشر 13
لقراءة باقي فصول الرواية اضغط هنا ( رواية مهد القدر )
