اسكريبت حياتي البائسة الفصل الأول 1 بقلم أسماء مصطفى

اسكريبت حياتي البائسة عبر روايات الخلاصة بقلم أسماء مصطفى

اسكريبت حياتي البائسة الفصل الأول 1

_ ارجوك يا بابا سيبني.. ارجوك

_ انتِ لازم تمشي من هنا، انا بكرهك، كانت ليلة سودة ليلة ما اتولدتي، انا هرميكي مش عايزك

كان بيسحبني من شعري وراه وهو نازل وبيقول انه خلاص مش قادر يستحملني وهيرميني في الشارع، حاولت ماما تحوش عني وتخليه يسيبني لكنه حلف عليها بالطلاق

دايمًا بيعاملني وحش وبيكرهني عشان جيت بنت، عمري ما فهت انا عملت ايه لكن كل ذنبي الوحيد اني اتخلقت بنت

ضرب وذل واهانة وعمره مره ما نصفني، دايمًا بيكرهني ويقولهالي عادي من غير ما يراعي مشاعري، عمري ما سمعت منه كلمه حلوه ولا كلمة تراضيني، وعيت على الدنيا مش بسمع منه غير اني ليلته السودة، وان يوم ولادتي اكتر يوم بيكره عشان جيت بنت

كنت بشوف حب في عيون الناس وفخر إلا هو، دايما بشوف في عنيه نظرة كره وحقد

ركبني عربية غريبة بعد ما كتفني وخلا ناس تمشي بيا وتلقحني، فضلت كام ساعة مربوطة ومكتفة في العربية والناس الغريبة دي بتسوق لحد ما وصلنا ورموني في شارع مهجور، تقريبًا خالي من اي حد

رموني زي مانا في الشارع وفي واحد منهم بدأ يفكني وقالي مترجعيش تاني

مشيوا هم وانا اتسبت في شارع مهجور بالليل والدنيا ضلمة، كنت مرعوبة وانا لوحدي في بلد غريبة، مقدرتش اعرف انا فين ولا في محافظة ايه، لكن كنت خايفة وبردانة، جعانة وعايزة مكان انام فيه

قعدت في ركن على جنب لما لقيت المطر بدأت تنزل وانا بترعش ودموعي بتنزل على خدي بقهر، مقهورة على حالي اللي وصلتله والبيئة اللي نشئت فيها.. اب بيكرهني ودايمًا يعذبني وام سلبية ملهاش موقف ولا تأثير على حياتي، مش فاهمة ازاي خافت تطلق ومخافتش عليا وهو بيرميني في الشوارع 

فضلت مستنية اكتر من ساعة ونص عشان المطر يخلص واقدر اتحرك اشوفلي مكان ابات فيه

كنت ماشية متبهدلة على الآخر، لابسة بجامة البيت وشعري باين وانا أصلاً محجبة، مشاني من غير هدوم ولا اي حاجه، اب قاسي مش بيرحم

بدأت اتمشى في الشوارع وادخل من مكان واطلع من مكان تاني، مش عارفه امشي ومش عارفه اروح فين، وفجأة لقيت شابين ماشيين وكان باين عليهم انهم سكرانين، من طريقة مشيتهم الغير متزنة وكلامهم، باين انهم مش في وعيهم

خوفت اوي منهم وحاولت استخبى لكن الشارع مكشوف ومفيش مكان نهائي، لقيت واحد على صوته وبيقول 

_ على فين يا حلوه، تعالي نتكلم كلمتين

التاني اتكلم وقاله

_ باين عليها خايفة، روح هاتها ويلا نمشي

جريت منهم وانا دموعي بتزيد اكتر وصوت عياطي عالي وقلبي بيدق برعب وهم... هم كانوا بيقولولي كلام وحش اوي مكنتش اتمنى اسمعه وحد يقولهولي في يوم من الايام

بجري وانا بصرخ بصوتي كله على أمل ان حد يلحقني، لكن بسبب مية المطر اتزحلقت ووقعت، حاولت اقوم بسرعة لكن رجلي علقت في الطين ولقيتهم بيسحبوني وواحد منهم اتكلم وقالي ببسمة مستفزة

_ ما كان من الاول يا حلوه، ادينا جبناكي، نفع في ايه الجري والزعيق على الفاضي

بدأوا ياخدوني بالإجبار تحت صريخي وانا بحاول استنجد بحد

فجأة لقيت قلم نزل على وشي من واحد فيهم وهو بيقولي بعصبيه

_ مش عايز اسمع صوت لحد ما نروح

لقيت التاني بيقوله 

_ البت دي هتغلبنا معاها عايزين نشوفلها صرفة عشان محدش ياخد باله لما نطلع بره

هم بيتكلموا وبيقوليلي هيعملوا ايه وهم بيضحكوا بشر، قولت انا بصوت عالي

_ ارجوك تعالى انقذني، الناس دي بتخطفني

اللي كان ماسكني سابني واتلفت وراه عشان يشوف لكن ملقاش حد

وانا اول ما ساب ايدي جريت بسرعة وانا بتمنى اني اقدر اهرب منهم، لكن من سوء حظي وقعت تاني بسبب المطر، بس المره دي وقعت على حجر كان موجود في الشارع

وقعت ومحستش غير بالدنيا بتسود قدامي، شايفة كل حاجه ضباب والصورة مش واضحة وحاجة دافية بتزل على وشي ومكنش غير دمي

كنت حاسة بروحي بدأت تتسحب مني ونفسي مبقاش منتظم وقلبي بيدق ببطء، عيوني بدأت تقفل ومحستش بحاجة بعدها

#يُتْبَع

اسكريبت حياتي البائسة الفصل الثاني 2 من هنا

اسكريبت حياتي البائسة كاملة من هنا