رواية ليلى عبر روايات الخلاصة بقلم هبة سيد
رواية ليلى الفصل الثالث 3
_تخلص عليا؟ مش جديد عليك بصراحه الحق عليا جايه اتكلم معاك واساعدك
بصلي بصه من الرعب رجعت لورا عيونه حاده تخوف ودايما لونها أحمر لقيته حط ايدوا ف جيبو ف خمنت ممكن يطلع مط*وه ولا حاجه رجعت خطوتين وهربت من قداموا مشيت كأني بجري من الخوف اللي كان جوايا لحد موصلت للبيت دخلت وطبعا داخله متوتره ف دخلت الاوضه علطول ومكنتش عارفه نفسي حاسه بخوف ولا توتر او شعور تاني اني اتكلمت معاه وممكن اساعده مثلا اترميت علي السرير وانا باصه علي سقف الاوضه وبفكر وروحت ف النوم
______________________________
صحيت مفزوعه علي صوت التليفون اللي مش بطال رن مسكته ورديت من غير معرف مين المتصل جاني صوت زعيق من ايمان
_اخيرا يختي الحمدلله علي السلامه يا هانم انتي لو حد مات مش هتلحقيه مستنياكي يجي ساعه ف الشمس وانتي نايمه نوم العوافي ع قلبك لا وكمان مش بتردي انتي دلوقتي الاقيكي جمبي ف ظرف خمس دقايق
_يبنتي اهدي انتي بالعه راديو ع الصرح فيه ايه لكل دا
_بصي ف الساعه وانتي تعرفي فاضل يجي عشر دقايق وتيجي لجنه التفتيش وانتي وحظك يهانم لو ملحقتش اعتبري نفسك برا الشغلانه لان ساعتها الدكتور هيطير وراكي
بصيت ع الساعه لقيتها ١١ إلا ربع
_نهار اسود دا فاضل ربع ساعه طب اقفلي اقفلي وانا اهو جايا
قفلت التليفون وقومت اجري يمين وشمال عشان الحق فضلت اطلع اي حاجه من الدولاب جبت الشنطه وبرمي فيها أي حاجه تيجي قدامي لبست وطلعت وقفلت الباب لان امي كانت ف الشغل وريم ف المدرسه وطلعت اجري وامشي بسرعه وف وسط كل الاستعجال دا كنت مستنيه اشوفه برضو دايما ع بالي حتي وانا مشغوله لازم افضي جزء من دماغي عشان افتكره ملمحتوش وحتي الورشه كانت مقفوله وصلت الصيدليه ودخلت بسرعه كانت ايمان هناك ومعاها بتوع التفتيش بصلي واحد وقالي
_انتي بقا اللي بتشتغلي هنا معاها
_اه .. اه انا اسمي ليلي
بصيت ع ايمان وكانت قالبه بوزها ورجعت بصيت عليه كان ماسك ورقه وقلم وبيكتب كان بيكلمني من غير ميبصلي
_وحضرتك مش معاكي ميعاد محدد هناا
_اه انا باجي كل يوم ف الوقت حتي اسأل ايمان بس النهرضه اخدتني نومه معلش
بصلي وبعدين بص علي المكان كدا ومشيوا
_يعني طول عمرك بتاجي بدري جيتي النهرضه ورجعتي لازم اسمع ربع مشكل يعني علي الصبح
_بقولك ايه انا طلعت من غير ما افطر يلا بقا حركي رجلك وهاتيلنا فطار بقا
_انا رايحه البيت اصلا
_نعم يختي ليه احنا لسه ف اول اليوم
_يبنتي هروح اجيب الشاحن وارجع فيه ايه وهجبلك فطار انا وجايا يستي
_متتأخرش طيب
طلعت ايمان من الصيدليه وفضلت ارص العلاج واشوف ايه الناقص خلصت وقعدت علي الكرسي وبقلب ف التليفون دخل عليا شاب
_مساء الخير
_مساء النور
فضل يبص بنظرات غريبه مكانش بيتكلم وكل شويه يقرب من الكاونتر
_بقولك ايه
_لو سمحت يا استاذ اطلع برا لو مش محتاج حاجه
_ومين قال اني مش محتاج دا إلا محتاج كمان
فضل يقرب اكتر وانا بالعافيه ماسكه نفسي وايدي بدأت تترعش مش عارفه المفروض اعمل ايه بدأت اطلع الكلام بالعافيه وصوت عالي
_لو سمحت اطلع برا
ايدي بدأت تروح يمين وشمال بدور علي التليفون مش قادره انزل عيني من عليه كنت خايفه يدخل بصيت عليه لقيته دخل ايدو ف جيبه فضلت ازعق وانا مرعوبه
_انت بتعمل ايه
_تقريبا الجو مش حلو من هنا وانا بعيد كدا أقرب صح ؟
اول مسمعته دموعي بدأت تتجمع ف عيني وفضلت اصوت وانادي علي ايمان او اي حد يلحقني وهوا فضل يقرب ولسه هيتكلم قاطعه صوت حد دخل الصيدليه
_ولما انت دكر كدا بتتهجم ع حُرمه ف نص النهار ليه غشيم
بصيت علي الصوت ف وسط دموعي وكان عصام رجع الشاب لوا زي مكان وبدأ يتكلم
_وانت مين يا رجوله
_انا اللي هعلقك عريان يا روح الرجوله
ولسه مخلصش كلمته رفع رجلو وزق الشاب ف بطنو كان وراه قزاز وقع عليه والقزاز اتكسر فضلت اعيط اكتر اول ملقيت الدنيا اتقلبت مسكتش علي كدا مسكو من ياقة قميصه وفضل يضرب فيه وهنا الناس اتلمت وانا كنت منهاره من الموقف مش عارفه اطلع وامشي ولا عارفه اكلم حد يجي واقفه وبعيط وحاطه ايدي علي بوقي
_مش هحل امك يالا
قالها ف وسط ما الناس كانت ماسكه والتاني من كتر الضرب مش قادر يسند طولو والناس ماسكينو من ايدوا هنا كانت ايمان جات جريت عليا وهيا مصدومه من اللي حصل
_فيه ايه حصل ايه حد لمسك
حضنتني وانا مسكت فيها وكنت بعيط ورديت عليها ف وسط العياط بكلام مقطع وشهقه من العياط
_لا .. لا مفيش حد لمسني
_اهدي خلاص اهدي
فضلت تطبطب علي ضهري وجابتلي ميه والناس خرجت برا بس كانوا بيزعقو مش عارفه ايه اللي كان بيحصل برا الناس كانت بتدخل تطمن وانا كنت عايزه امشي من المكان قومت من علي الكرسي ومسحت دموعي
_استني رايحه فين
_عايزه امشي يا ايمان عايزه امشي من هنا
_طيب تعالي انا هروح معاكي
حطت ايديها علي كتفي وطلعنا من الصيدليه كانت الناس لسه ملمومه وكانت فيه شويه شباب حوالين عصام بس مشوفتش الشاب اللي اتهجم معرفش اخدوه علي فين اول ماطلعت بص عليا وجاه لعندي
_انتي كويسه حصلك حاجه؟
_آه .. آه كويسه
مشيت من قدامو انا وإيمان وفضلت تهدي فيها طول الطريق
_خلاص بقا يا ليلي فكي وشك بدل ما خالتي تقلق وندخل ف سين وجيم اهو الحمد لله انتي كويسه وكتر خير الشاب
_انا كويسه يا ايمان متقلقيش اتخضيت بس من الموقف
وقفتني وحضنتني وباست خدي
_انا اسفه اني سبتك ومشيت حقك عليا لو كنت معاكي دلوقتي كنت هعيط معاكي علي الاقل مسبكيش لوحدك ومنلقاش حد يهدينا احنا الاتنين
ضحكت علي كلامها وفضلت تهزر عشان افك لحد موصلنا البيت ودخلنا مكانتش امي لسه رجعت دخلت غسلت وشي وإيمان دخلت تعمل عصير ليمون عشان اهدي شويه
_مش عايزه يا يبنتي بقيت كويسه خلاص
_امسكي بس اشربي
قعدت علي السرير وانا ماسكه الكوبايه وبشرب وإيمان قاعده جمبي
_بقيتي كويسه
_كويسه بس مخضوضه وقلبي مقبوض من الموقف
_كل الناس بتحصل معاها المواقف دي يا ليلي متخافيش يا حببتي
مسكتني من كتفي وضمتني ليها
_بس تعرفي الود عصام طلع كويس هوا اه شمام بس طلع راجل يعني
اول مجابت سيرته افتكرته وافتكرت الموقف تاني وازاي دخل الصيدليه بهيئته كان لابس تيشرت اسود وبنطلون اسود ووشه ميبشرش بالخير وحصل اللي حصل بعدها كل مفتكر الموقف افتكره هوا حطيت الكوبايه علي الطربيزه وانا بتعدل علي السرير
_انا عايزه انام
_طب انتي كويسه يا ليلي نروح الدكتور طيب ولا ارن علي خالتي
_لا يا ايمان هنام عادي قولتلك كويسه متقلقيش
سبتها ونمت وهيا رفعت البطانيه عليا وطلعت وقفلت الباب وانا روحت ف النوم
_______________________________
_ايه يا ايمان رجعتوا بدري ليه وفين ليلي
_مفيش يا خالتي ليلي نايمه بس
_ليه حصل ايه هوا في حاجه
_لا بس حصل موقف ف الشغل كدا واحد كان بيزعق وهيا اتخضت بس
_ليلي يا ليلي
سمعت صوت امي بعد مدخلت وفتحت الباب قومت لاني مكنتش نايمه يدوب نايمه وصاحيه ف نفس الوقت قومت وقعدت نص قعده علي السرير
_ايه يا ماما فيه حاجه
كانت ايمان واقفه جمبها وعرفت انها اكيد قالتلها
_حصل ايه يا ليلي ومين اللي زعقلك دا
استغربت من كلامها وبصيت علي ايمان وفضلت تبرق فيا وعرفت انها مقالتلهاش الحقيقه
_دا واحد كان مستعجل يا ماما مفيش حاجه يعني
_مال عنيكي انتي كنتي بتعيطي ولما هوا زعق ليه رجعتي بدري
_يا ماما يا حبيبتي والله كويسه بس موقف كدا والحمد لله عدي احنا مشينا بدري النهرضه بس الدكتور هيكمل باقي اليوم
بصت عليا بشك وفضلت اطمنها لحد ميعتبر اقتنعت سابتنا وخرجت برا جات ايمان تقعد جمبي
_مش لو كان بابا عايش كان زمانوا جمبي دلوقتي
_ايه اللي بتقوليه دا يا ليلي اهدي بس وانا اهو جمبك انا وخالتي
مسكت ايديها وانا الدموع اتجمعت تاني ف عيني
_يا ايمان انا كذبت ع امي عشان مش ف ايديها حاجه انا لو كان حصلي حاجه برضو مكنتش هعرف اتكلم
سابتني وراحت تقفل الباب رجعت وقعدت جمبي
_ بعيد الشر عنك دا اول حاجه تاني حاجه متقوليش كدا انتي لو عايزه اجبلك الزباله دا تحت رجلك هجبهولك انا جمبك اهو
_ اكيد هتعرفي تجيبيه منتي اخوكي جمبك بس انا ولا اخ ولا اب يا ايمان انا من النهرضه بقيت خايفه بجد ليحصل حاجه ومعرفش اعمل ايه
_متقوليش الكلام دا بقا خلاص ونبي
اخدتني ف حضنها وفضلت تهدي فيها وانا كنت تايها ب أفكاري الخوف كان مسيطر عليا مكنتش عايزه ف اللحظه دي غير اني افضل نايمه طول العمر ومطلعش من البيت
_خلاص بقا امسحي دموعك دي عشان امك متدخلش دلوقتي
_انا هدخل الحمام
سبتها وقومت دخلت الحمام وغيرت هدومي وصليت عشان اهدي شويه قعدت ايمان اتغدت معانا وانا كنت بالعافيه باكل عشان امي متحسش بحاجه فضلت ايمان قاعده جمبي لباقي اليوم تخرجني من المود اللي فيه وانا كنت طول الوقت ساكته مبتكلمش
_انا هرن علي الدكتور اعرفه انك مش هتيجي لكام يوم لحد متهدي ماشي
هزيت راسي ليها
_كفايه يا ايمان انتي من الصبح قاعده جمبي روحي كفايه
_لا انا هبات معاكي
_لا يا ايمان انتي امك تعبانه ومعاها علاج مينفعش تسيبيها كدا
_احمد ف البيت هيخلي بالو منها
_يا ايمان انا كويسه متقلقيش روحي بس عشان امك يبنتي
_عايزه تخلصي مني يعني
_لا والله دا انتي اللي مهونه عليا
_ونبي خلاص وفكي كدا انتي عارفه انا لو مكانك كنت هرجع واكل وانام عادي جدا
_دا اللي هوا انتي
فضلنا نضحك علي بعض ونتكلم شويه
_تعالي بقا عشان هدلعك ف السوبر ماركت يلا قومي
_سوبر ماركت ايه يبنتي بس ف اللي احنا فيه دا
_دي فرصة العمر يبنتي اغتنميها
ضحكت علي كلمتها وقومنا نروح السوبر ماركت اللي جمب بيتنا دخلنا وحرفيا ايمان كانت بتجبلي كل حاجه بحبها نستني اللي حصل اشترينا وخرجنا برا
_انا بجد مش عارفه اقولك ايه يا ايمان عمري مهنسي وقفتك جمبي
_ضربتي بخفه علي دماغي وهيا مبتسمه
_ يبنتي انتي هبله انتي اختي يبنتي مفيش بينا الكلام دا اهم حاجه عندي تبقي كويسه وبتضحكي
_يلا بقا يا ايمان امشي الوقت اتأخر امك لوحدها
_شوف البت اخدت المطلوب وبتمشيني
ضحكت علي كلامها
_ماشي يستي همشي وبكرا هتلاقيني عندك بقا جهزي الغدا
مشيت وانا مكنتش عايزه اروح البيت كنت عايزه اشم هوا فضلت امشي وانا سرحانه بمشي براحه عشان مش عايزه اروح البيت كنت نفسي ايمان تفضل جمبي عشان محسش بالوحده قاطعني صوت حد من ورايا ف وسط أفكاري
_بقيتي كويسه دلوقتي
بصيت للصوت وكان هوا حاطط ايدوا الاتنين ف جيبو ولابس كاب ملامحه مكانتش باينه كويس
_انا كويسه
_طيب .. سلام
_ايه دا استني انت هتمشي
_كنت بطمن وانتي قولتي كويسه
_لا مش كويسه اا أقصد يعني لسه الموضع مأثر
_لا يومين وتنسي
_ هوا انت ازاي عرفت ان فيه حد دخل الصيدليه هوا انت بتراقبني ودلوقتي طلعت مره واحده
بصلي وطلع سجاير نوعها غريب كان لونها بني وفضل يولع فيها وهوا بيشرب
_بدل متشكريني
_لا طبعا شكرا ليك اوي والله بس برضوا مجاوبتش ع سؤالي
_هوا انا مفروض اجاوب علي سؤالك ؟
_هوا انت ليه كدا دايما تحسس الناس انهم قاتلين ليك قتيل مثلا
بصلي وملامحه اتغيرت كأني قولت حاجه غلط فضل باصصلي وكان بيشرب السجاير بسرعه شويه
_هوا انا قولت حاجه غلط انا بهزر بس عشان مش بتتكلم يعني وعلطول ساكت دايما يعني ببقي عايزه اتكلم واعرف فيه ايه ممكن مثلا اساعدك و..
قاطعني ف وسط كلامي
_هوا انتي علطول كدا مبتفصليش
اول مقالي كدا حسيت نفسي زي ميكون كنت مستنيه اشوفه عشان اتكلم معاه او مثلا مدلوقه عليه فضلت ساكته وكنت بفكر امشي بس هوا وقفني بكلامه
_انا عملت اللي عليا وازاي عرفت فيه حد دخل الصيدله كنت معدي صدفه يعني
_طيب انا همشي بقا
_هوا انتي كنتي بتعيطي ؟
بصيت عليه ومش عارفه اقول ايه بس كنت مبسوطه انو اتكلم ومخلانيش امشي
_بصراحه اه وبالمناسبه انا اسمي ليلي بقولك عشان انت متعرفش اسمي يعني
بصلي وكان مبتسم وكان لسه بيشرب ف السيجاره اللي ماسكها
_علفكرا انا بخاف منها الابتسامه دي لتخلص عليا ولا حاجه
_لا يستي متخافيش عشان كنتي بتعيطي بس مش هخلص عليكي النهرضه
_انت اكيد بتهزر يعني صح
كان باصصلي برضو والابتسامه متشالتش من عليه مش عارفه ف ثانيه بحس انو طيب وثانيه بحس انو ممكن يخلص عليا فعلا
_وانت بقا بتشتغل ايه
رد عليا بنفس الابتسامه
_قتال قتله وتاجر مخ*درات
اول مسمعته مصدقتش دا بيقول ايه دا هوا بيتكلم جد ومن اللي سمعته.. كنت واخده الموضوع بهزار
_انت اكيد بتهزر صح
_والله يا دكتوره كان نفسي اكون بهزر بس دي الحقيقه بقا
_انت لو بتتكلم بجد ف حرام شكلك دا يكون بيعمل كل دا هوا انت اه ممكن تكون بتش*رب بس مش لدرجة انك تتاجر يعني
الابتسامه بقت تختفي واحده واحده من عليه وبص قداموا وكان سرحان كدا وماسك السيجاره ف ايدو بصلي مره واحده وقال بنبره هاديه
_ هوا انتي عايزه مني ايه
_ايه اللي عايزه مني ايه انت كل شويه تسأل السؤال دا
_اصل انا ممكن اخلص عليكي عادي لان مفيش حاجه حلوه بتقعد دايمالي ف اخدها من قصرها احسن
بصيت عليه وانا مش مستوعبه هوا بيقول ايه مش فاهمه ايه حصل معاه لدرجة انو يقول كدا وممكن فعلا يعمل كدا ويخلص عليا
_هوا انت ليه بتقول كدا يعني حصل ايه معاك عشان تبقي كدا
_وانتي يهمك ف ايه
_هوا طبيعي تقول كدا لأنك متعرفنيش ومش واثق فيا بس انا ممكن اساعدك يعني احكيلي بقا
_روحي البيت كفايه كدا
_ طب هوا انت عندك صحاب وليه مش بشوفهم معاك طب وأهلك اهلك فين
_ طب وبعدين معاكي ليه تخليني اركب العِوج
_خلاص يعم مش عايزه اعرف الله
كانت دايما فيه حاجه بتشدني اتكلم معاه حتي لو مش راضي يتكلم اكيد هياجي يوم ويحكيلي
_طب ايه انا همشي بقا بس قبل ممشي عايزه اقولك ان مش كل حاجه بتعملها بتبقي عايزها احيانا الشيطان بيبقي ماسك الريموت
بصلي دقيقه كدا بدون ملامح وبعدها ضحك
_حلوه دي تنفع تتكتب علي حيطة سجن
_ماشي اضحك اضحك ان شاء الله يجي علي دماغك
قولتها وانا ماشيه وراجعه البيت وف نفس الثانيه اتمنيت ف سري ان متجيش حاجه علي دماغه ولا حاجه ويبطل ويفوق عشان كان صعبان عليا من البدايه
يتبع ..
