رواية ليلى عبر روايات الخلاصة بقلم هبة سيد
رواية ليلى الفصل الرابع 4
دخلت البيت وحطيت الكيس علي الطربيزه وقعدت علي السرير وكنت ناسيه اللي حصل معايا الصبح زي ميكون مبسوطه بعد مقابلتو واتكلمت معاه دايما ببقي عايزه اتكلم معاه واشوفه فيه حاجه من جوايا بتشدني اتكلم واعرف عنو اكتر
______________________________
_شوفي يا ايمان كدا الفستان دا
_انا هجيب قماش وافصل يا ليلي مفيش حاجه حلوه الله
_تفصلي مين بس دي الخطوبه بعد بكرا مش هتلحقي وغير كدا انتي عايزه تفصيله من بتوع البراندات وعم شحاته علي قدوا اصبري بس وهنلاقي احنا لسه ف اول الصبح
_انا عايزه لون كدا يليق علي بدله حسام فهماني
_يادي حسام اللي واكله دماغي بيه مش لازم يا ايمان الموضه دي قديمه اصلا مكل واحد يلبس اللي هوا عايزه
_بس يبت انتي ايه فهمك ف الموضه اصلا
فضلنا نلف ع كل محلات الفساتين واخيرا ايمان اقتنعت بفستان وجبنا باقيت حاجه اللبس والخطوبه
_تعالي بقا نشرب ايس كوفي فيه محل فاتح جديد هناا يلا
_يبنتي خلينا نشوفلك حاجه انتي كمان الأول
_يبنتي تعالي الأول وبعدين هشوفلي حاجه
دخلنا المحل وطلبنا انا وإيمان وقعدنا نشرب ف المحل
_ايمان
_مالو عصام
_نعم ؟ وانتي عرفتي منين اني هتكلم عليه
_عشان مجبتيش سيرته من الصبح ولو بتقولي حاجه بتقولها علطول مش لسه هتنادي عليا يعني
ضحكت علي ردة فعلها
_طيب يختي المهم شوفته امبارح بعد ممشيتي وفضلنا نتكلم بس مرضاش يقول حاجه برضو
_ليلي .. هوا انتي بتحبيه ؟
اول مقالتلي كدا اتخضيت .. اتخضيت من حجات كتير ازاي وليه بتقول كدا
_انتي بتقولي ايه يبنتي انا احب عصام
_اصل مش بطاله كلام عليه طيب انتي مالك بيه اصلا وليه عايزه تعرفي عنو الحجات دي
_ايه يا ايمان انتي فاهمه غلط اصلا كل الموضوع اني حابه اعرف اكتر عنو يعني بشفق عليه والله انتي مش شايفه حالتوا
_لا بصراحه شايفه حالتوا وحد عينه علطول حمرا دا مش بيلفت نظرك لحاجه مثلا يا ليلي انا خايفه عليكي دول ملهومش امان بياخدوكي ع غدر اسمعي مني اه ساعدك مره بس هما بياجوا كدا ف الاول
سمعت كلامها وسرحت شويه بفكر ف كلامها بس مستحيل يكون عصام كدا حتي لو هوا مش كويس وبيشرب انا حاسه ان هوا مظلوم مين يعني اللي يقعد من غير أهل ولا صحاب وعلطول لوحده
_طيب يلا هنمشي عشان منتأخرش اكتر من كدا
طلعنا من المحل وجبنا باقي الحاجه وروحنا علي بيت ايمان قعدنا نتفرج علي الحاجه اللي جبناها وطلبنا اكل وقعدنا
_انا همشي يا ايمان كفايه كدا من الصبح برا البيت
_خليكي شويه بقا يووه لسه المغرب مأذنش
_بصي انا اعيش معاكي أسهل بدل الروحه والجايا كدا منا هاجي بكرا من الصبح بقا عشان عروستنا كبرتي وبقيتي عروسه يا بت يا ايمان امبارح لسه كنا بنلعب ف التراب
حضنتها وعيني دمعت من الفرحه وانا شايفه اختي مش صاحبتي هتتخطب خلاص ايمان معايا من واحنا صغيرين وفضلنا مع بعض لحد مخلصنا كليه واشتغلنا مع بعض مقدرش اعيش من غيرها لاني مليش غيرها اتكلمت مبين دموعها
_مخلاص يست ليلي احنا هنعيط ع اخر اليوم يعني
_طيب يا ايمان انا همشي بقا
طلعت معايا لحد الشارع وسلمت عليها وبعدين مشيت كنت ماشيه وانا سرحانه بأفكاري
_عامله ايه دلوقتي
اتخضيت لاني كنت سرحانه بصيت جمبي وكان عصام
_خضتني يبني هوا انت بتطلع منين
كان ماسك سيجاره وبيشرب فيها وحاطط ايدو التانيه ف جيبوا
_انا الحمد لله انت عامل ايه
_احسن منك
_ايه يعم الرد دا
_مريض بقا اعمل ايه
_مريض؟ من ايه وليه مش بتتعالج
_ابتدينا بقا فقرة الاسئله
_طب ولما انت مش حابب تتكلم جاي تمشي معايا ليه متتكلمش معايا ولا تقف جمبي وانا مش هسألك
حسيت اني اتحرجت وكنت همشي وامد قدامو بس قبل ممشي اتكلم بنبره هاديه
_انا كنت ف مصحه قبل كدا
بصيت عليه وانا شبه مصدمه مش لدرجة مصحه يعني وليه كل دا وفين اهلو
_طب وانت كنت ف مصحه ازاي وانت لسه بتشرب
_خرجت منها بعد سنه ورجعت اشرب تاني
_تشرب تاني ايه
_اشرب تاني ايه؟ اشرب شاي بلبن
_انت علطول كدا تهزر لا بجد يعني اقصد ليه رجعت تشرب تاني
بصلي كدا خمس دقايق وكان ساكت بيشرب في السيجاره بتاعتو وبصلي
_هترتاحي يعني لما تعرفي
_ايوه طبعا قولي بقا
اتنهد كدا وبص قداموا
_انا مدخلتش برضايا ف يوم كنت داخل البيت عادي وامي فضلت تزعق فيا عشان ابطل ف اللحظه دي دخل اخويا حسام الكبير اخدني المصحه غصب عني عمري مهنسي اليوم دا قالي لو متعالجتش متدخلش البيت تاني وامك تحرم عليك شوفتها ويحرمو عليك صحابك واخواتك وتمشي من هنا مشوفش وشك وفضل يضرب فيا لحد مكنتش قادر أسند طولي وانزف ف دمي اخدني وجرجرني علي المصحه زي الكلب دخلت وقعدت هناك سنه وفعلا بطلت مكنتش بشوف حد فيهم ولما طلعت حسام اللي استلمني وقعد يتكلم معايا اني مرجعش تاني للشرب والكلام دا بس خونت نفسي وخنتو ورجعت تاني مدخلنيش البيت وقالي لما تعالج نفسك ابقي ارجع اترميت ف الشارع حتي صحابي بعدو عني بسبب حسام فضلت ابيع ف المخ*دات اللي بشتريها لحد مدخلت شرك مع واحد ابن حرام هوا اللي عرفني ع الورشه واني اشتغل هنا انا ساكن ف الشقه اللي ف العماره اللي جمب الورشه وبس من ساعتها وانا مش بشوفو ولا بشوف حد فيهم
بصيت عليه وانا مش مصدقه اللي بسمعه قلبي وجعني فكرت ف امو حالها ازي دلوقتي وابنها بعيد عنها السنين دي مش بتشوفوا وحتي لو شافته منظرها هيبقي عامل ازاي واخواته بيفكروا ف ايه ولو شافوه صدفه بيحسو بأيه واخدين فكره عن اخوهم ازاي
_وانت ليه سايب نفسك كدا طب فين ابوك من كل دا
_اتوفي
_يبني بصلي قولي ليه بتعمل كل دا انت عارف حالة امك عامله ازاي دلوقتي
بصلي مره واحده وكان قريب شويه مني كانت ملامحه قريبه شوفتها لأول مره عن قريب دقنه الخفيفه عيونه الحاده الحمرا شعرو المبعتر الناعم
_اهو بصيتلك هاا
بعدت عنو وقعدت شويه مش بتكلم
_ايه صعبت عليكي
_اكيد يعني طب وانت ليه مش بتتعالج عشان امك حتي
_هيا امي نفسها مش عيزاني حسام بقا مالي عنيها
_وانت ايه اللي عرفك مش يمكن بتتقطع عليك وانت مش عارف
_مهي لو كانت بتتقطع كان زمانها قالت لحسام رجع اخوك مكانتش سكتت
قالها بنبره مكسوره قالها وبعدين سرح ف الطريق قداموا
_طب وانت مش نفسك تروح وتشوفهم مش نفسك تبطل
افتكرت الراجل اللي جالوا الورشه وفضل يزعق معاه ساعتها
_طب مين الراجل اللي جالك ساعتها دا وفضل يتكلم معاك ويزعق
بصلي وكشر حواجبه ف بعض وابتسم
_دا انتي بتراقبني بقا
_اكيد لا انا كنت معديه صدفه والله
_ماشي يستي.. دا عمي بياجي كل فين وفين يشخط فيا ويسمني بكلمتين ف بدني ويمشي
_طب واخوك حسام يعرف مكانك هنا يعني وانت تعرف مكان اهلك
_انتي ليه محسساني انك بتكلمي عيل تايه ايوه يستي عارف بيتنا اكيد وكمان اكيد حسام عارف مكاني يعني
بصيت عليه وكان حالو يقطع القلب ازاي حد عايش من غير أهل لا وعارف اهلو فين بس مش قادر يروح هناك
_انت بجد لازم تتعالج ليه يبني حارم نفسك من كل حاجه عشان حاجه ملهاش اي تلاتين لازمه بجد
_ممكن عشان مش عايز ادخل المصحه تاني واخد بالسنين هناك
_طب لو انا ساعدتك هتوافق
قولتها بلهفه وانا منتظره يوافق ومستنيه اليوم اللي يرجع يشوف اهله تاني بصلي وكان مبتسم
_وابقي زي بتوع الأفلام وجات البطله غيرت حياة البطل بقا وساعدته من الادمان
_انت مش طبيعي بجد ف كل اللي انت فيه عندك وقت للهزار ؟
_هاا بقا قولت ايه وافق عشان اهلك يبني حتي يعني اخواتك موحشوكش ولا امك حتي وخليك عارف ان مفيش ام ف الدنيا بتكون مش عايزه ولادها وبتبقي دايما شيفاه عيل وبيغلط مهما كبر
بصلي بصه بدون ملامح ورجع بص ع الشارع تاني
_ايه اعتبر انك موافق
_ماشي يستي لو دا يخليكي تبطلي زن وتنزلي من دماغي
_يبني بطل تكابر بقا
قولتها وانا بضحك بصيت عليه لقيته مبتسم وقال
_قوليلي بقا ايه الحجات اللي معاكي دي
_دا فستان عشان خطوبة ايمان بعد بكرا سيبك مني المهم انت بكرا تروح وتعمل تحليل مخ*درات ماشي وتبعتهولي انا هديك رقمي عشان مش هبقي ف الصيدليه بكرا وهبقي اقولك تجيب ايه علاج
كان لسه باصص عليا ومبتسم وكنت خلاص قربت اوصل البيت اديته الرقم وكنت لسه هدخل البيت
_شكرا ليكي اول مره لاقي حد يسمعني وميمشيش
قالها وبعدين رجع يمشي تاني بصيت ف اثروا وانا مش مصدقه انو بيشكرني كنت مبسوطه انو اخيرا اتكلم
يتابع...
