رواية عمر ويارا عبر روايات الخلاصة بقلم رهف
رواية عمر ويارا الفصل الثاني 2
||في شقة يارا ||
الساعة 11 PM
-ماهر انا هطلع شويه علي السطح ماشي
=ماشي... انا هنام
*كنت مخنوقه ومحتاجة شويه هوا ... عمر مسافر بعد الفجر وانا كل تفكيري انه هيمشي وانا ماشوفتوش كنت مخنوقه وزعلانة بس مش عايزة اشوفه
*طلعت قعدت علي كرسي علي السطح وفضلت باصة للنجوم .. شكلها حلو قوي. بس فجأة قطع شرودي صوت باب الصطح وهو بيتفتح.
-انتي بتعملي ايه هنا في الوقت دا؟!
= إنت ايه اللي جابك هنا؟ انت المفروض تكون نايم.
*اتخضيت لما لقيته هو... عمر اللي قولت هيمشي ومش هشوفه جالي لوحده، قلبي وقع في رجلي، إيدي ارتعشت من غير ما أخد بالي واتلخبطت.
-أعتقد دا سطح بيتي زي ماهو سطح بيتك... وبعدين المفروض أكون نايم ليه؟ من امتى ونومي ليه معاد؟
= تمام... هسيبلك السطح كله وماشية.
-استني هنا... رايحة فين؟
*مسك إيدي جامد... مسكها بقوة، حسيت بحرارة صوابعه بتلسعني وكأني مش قادرة أتحرك، وضربات قلبي بتعلي.
= عمر سيب إيدي... انت عايز ايه؟
-أنا سمعتك وانتي طالعة... أنا ماطلعتش صدفة ولا حاجة.
= تمام ... عايز ايه؟
=عايز أعرف انتي ليه مطلعتيش مع ماهر وسما وهما بيسلموا عليا...انا كمان كام ساعة وهمشي مش عايزة تودعيني؟
*فلتت إيدي من قبضته بقوة... إيدي نفسها بقت بتترعش وأنا ببص في عنيه بحقد وخوف في نفس الوقت.
= مبحبش لحظات الوداع والفراق
-يعني علشان مابتحبيهاش... متسلميش عليا قبل ما أمشي؟ افترضي مشيت ومارجعتش أبدا... افترضي متت.
= اخرس... انت بتقول ايه؟ بعيد الشر.
*حسيت برجفة في جسمي كله... كأني فجأة بردت رغم إن الجو حر .. ليه كلامه بيوجعني بالطريقة دي؟ أنا اللي المفروض أكون مش فارقة معاه في حاجة.
-ايه يا يارا... مش دا واقع وممكن يحصل؟ يارا مالك بجد... بقالك كام يوم بحسك مش طيقاني ومش بتكلميني... هو أنا زعلتك في حاجة؟
*ضحكت ضحكة كلها وجع... ضحكة واحدة مكسورة من جواها.
= برأيك انت عملت حاجة تزعلني؟
-لا... انتي أصلا مش مدياني فرصة بقالك كام يوم أتكلم معاكي.
= طيب امشي يا عمر... الكلام مالوش فايدة.
-مش همشي قبل ما أعرف مالك... أنا هسافر سنة كاملة يا يارا... مش هشوفك سنة كاملة.
*دموعي نزلت غصب عني، كنت بمسحها بسرعة علشان مايبانش ضعفي... بس إيدي نفسها كانت بتتهز وأنا بمسح وشي... نفسي اتحشر جوا صدري وحسيت إني مخنوقة.
= انت شخص جاحد وقاسي يا عمر.
-أنا!!!... أنا عملت ايه؟
= جرحتني... ووجعتني.
-جرحتك ازاي؟... أنا مقدرش أعمل كدا يا يارا.
= كداب ومنافق... علشان قدرت وجرحتني.
*انهارت من جوايا... دموعي بقت شلال على وشي، جسمي كله بيرتعش... حتى ركبي مش شايلاني، صوتي طلع مليان عصبية بس من جوه كنت مكسورة، كأن كل كلمة طلعت مني بتسحب معاها جزء من روحي.
-أنا... أنا عملت ايه؟ أنا مش فاهم حاجة... يارا متعيطيش بالله عليكي... أنا بجد مش فاهم حاجة.
= انا سمعتك... سمعتك وانت بتقول لمرات عمي إنك مستحيل تبصلي... وإنّي دايمًا مبهدلة ومش حلوة... ويوم ما هتتجوز هتتجوز واحدة بتحبها وعجباك.
أنا شايفني وحشة... أنا مبهدلة وماتحبش!! من امتى ودا رأيك فيا يا عمر؟ من امتى؟
*كنت بكلمه وصوتي بيترعش، قلبي واجعني كأني مخنوقة حد بيضغط على صدري بإيده، عيني مش قادرة تركز... كل حاجة قدامي بقت مغبشة من الدموع.
-يارا... انتي فاهمة غلط... أنا بجد ماقصدش كدا... ولا أقصد أجرحك... بجد أنا آسف... مش قصدي.
*عمر نفسه كان باين عليه الارتباك... بيعض على شفايفه، وإيده بتتحرك بطريقة عشوائية كأنه مش عارف يحطها فين.
*حطيت إيدي على صدري ناحية قلبي... وانا حاسة إن في اللحظة دي قلبي هيقف، ضربات قلبي بتعلي وتزيد بسرعة وأنا مش قادرة أتنفس. يمكن اللي وجعني مش رأيه فيا... اللي وجعني إنه مش بيفكر فيا اصلا.
= وايه الصح؟... أنا سمعتك بوداني... ماحدش قالي ياعمر... انا قلبي وجعني منك قوي يا ابن عمي.
-اسمعيني طيب... بس اهدي الأول.
*قرب مني، خطوته كانت مترددة، كأنه عايز يمد إيده يطبطب عليا بس خايف... كان باين في عينه خوفه يلمسني أرفضه، بس مع كدا مد إيده بحذر، جسمي ارتجف تلقائيًا، رجعت خطوتين لورا وصرخت من وجعي.
= ابعــــــدددد عنيييي يا عمر... أنا مش عايزة أسمع حاجة تاني... كفاية.
*صوتي خرج مبحوح، والدموع مغرقة وشي كنت حرفيًا على وشك الانهيار، ورجلي مش شيطان.
-لا... هتسمعيني. أنا فعلا قولت كدا لماما... بس صدقيني مش قصدي الكلام بجد... أنا بس كنت بحاول أسكتها بكام كلمة بسبب زنها عليا.
*كان بيحاول يقرب خطوة وأنا أبعد خطوتين، صوته باين عليه الندم، إيده ممدودة بس واقفة في الهوا، مش عارف يعمل بيها ايه. عينه بتلمع من الدموع بس مش نازلة، كأنه بيحارب نفسه عشان يبان قوي قدامي.
= لا... انت كان ممكن تقول أي حاجة لو فعلاً نيتك تسكتها... لكن انت جبت سيرتي واستعريت مني... انت فاكر نفسك ايه؟ الأمير اللي مافيش منه اتنين؟
فاكر لما تجرحني بكلامك أنا هسكت وأقول عادي؟
*كنت بكلمه وأنا حاسة إن صوتي بيقطع من كتر البكا، جسمي كله بيوجعني كأني اتعورت في كل حتة، أما هو فوقف قدامي عاجز، عينه أخيرًا نزلت منها دمعة واحدة وهو ساكت، بس نطق
-انا طلبتك من اخوكي يا يارا
= انت بتقول ايه؟
-ايوة طلبتك من ماهر للجواز بس ماهر رفضني
*اتصدمت مش عارفه هو بيكدب ولا دي فعلا الحقيقه.
=انت كداب ... هتبطل كدب امتي، ماهر مستحيل يعمل كدا
*مسح بايده الاتنين علي وشه بنرفزة وعصبية
-لا مش بكدب اخوكي رفضني يا يارا
=وماهر هيعمل كدا ليه؟
-علشان انا..
*سكت فجأة ومكملش كلامه كان متردد يقول ولا مايقولش
=علشان انت ايه؟
-انا... انا كنت مرتبط، بس والله سيبتها
ماهر كان عارف وشافني مرة وانا خارج معاها
الكلام دا من سنتين تقريباً.. بس دلوقتي والله مافيش حد في حياتي
*بصيتله بقرف وانا بمسح دموعي.. وقولت لنفسي انتي بتعيطي ليه ياهبلة دا طلع حريف في نزول دموع البنات ومش اول واحده يجرحها ويخذلها.
= يعني طلعت بتلعب ببنات النااس كمان؟
-والله أبداً يا يارا... دي هي مرة وندمت وقتها وسيبتها والله علشانك.
=علشاني؟... يعني مش علشان ربنا ، مش علشان حرام ، مش علشان دا مخالف لدينك؟!
-انا عارف اني غلطت بس انا توبت والله
من يوم ماسيبتها وانا معرفتش اي بنت تانيه
علشان اخطبك من ماهر.. بس لما طلبتك منه رفض... شافني بتاع بنات ومش هنفعك او اناسبك
=ماهر معاه حق... انت فعلاً متناسبنيش
وانا مقبلش بواحد عنده مشاعر النااس لعبة... والحرام عادي
-يارا انا اسف والله العظيم مش قصدي حاجه من كلامي اللي قولته لامي... انا قولتلها كدا علشان هي عايزاني اتجوزك .. وانا خوفت اطلبك تانى ماهر يرفض
=الراجل مابيخافش ، الراجل اللي بجد مش جبان، الراجل اللي بجد بيعرف يحافظ علي مشاعر اللي بيحبهم ، الراجل مايعرفش يعني ايه تسلية ويحب الالتزام في كلامه وافعاله.. عارف دينه وبيخاف ربنا
وانت ماكنتش راجل ياعمر لا معايا ولا مع البنت اللي علقتها بيك وسيبتها
-يارا صدقيني والله انا اتغيرت وتوبت وقولت اني مش هرتبط غير رسمي وبس.... بيكي انتي انا بحبك
*رديت بعصبية
=بتحبني!!!... لا انت حبيت يارا اللي بتجري وراك وتطبلك حبيت يارا اللي طول الوقت كانت جنبك
انت اناني.... تعرف ايه عن الحب انت علشان تقول كلمة كبيرة زي دي، انت افعالك غير أقوالك، اللي بيحب ياعمر
مابيقلش من حبيبه قدام حد ولا حتي قدام نفسه ولا بيعامله وحش وكإنه حد عادي ، اللي بيحب بيعرف يحترم ويقدر ويميز اللي بيحبه ويخاف عليه ... وبيستثنيه عن الكل
وانت معملتش حاجه من دي، انت متعرفش يعني ايه حب، ولا بتعرف تحب انت عايز كل حاجه تبقي ملكك وليك وبس.
-لا يا يارا نا بحبك
=امشي ياعمر... امشي مش عايزة اشوفك تاني
-يارا انا.....
*مسحت دموعي وقعدت علي الكرسي
=امشي.... واه انا بقي حتى لو كنت اتقدمتلي وماهر وافق انا ماكنتش هوافق... انا بكرهك ياعمر
*للأسف انا مكرهتوش مقدرش اكرهه قولتله يمشي بس جوايا في طفلة بتدبدب علشان مايمشيش...انا ميزته عن الكل بس هو مميزنيش مقدرنيش ميستاهلش ابقي في حياته.
-دا آخر كلام عندك يا يارا... امشي؟!
=........!
*هرد اقول ايه اللي عايزة اقوله ماينفعش اقوله... مكانش ينفع اسامحه علي كلامه ومعاملته الباردة ليا بالسهولة دي لازم يندم ويحس بغلطه معايا ومع البنت اللي كسر قلبها قبلي ماهو انا اللي مقبلوش عليا مش هقبله علي غيري
_________________
|| تانى يوم _في شقة يارا ||
-يارا... يارا.... قومي
=اايه في ايه؟.... هوفي حد يصحي حد من النوم كدا ياسما في ايه؟
-في واحده علي الباب برا بتقول عايزة يارا
=واحدة!!... مقالتش مين؟!
-لا... قومي شوفيها بقالها كتير علي الباب
*ماكنتش قادرة اقوم من علي السرير جسمي مكسر وعيوني حمرة وتحتها وارم من بكي امبارح وصداع هيفرتك دماغي ... بس كنت مضطرة اقوم وارجع يارا القوية من تاني
-اهلا بحضرتك اتفضلي.
=هتدخليني بيتك وانتي متعرفيش انا مين؟
-شايفة ايديكي فاضية لا فيها سكي**نة ولا فيها آلة حادة
وجاية من صبحية ربنا والناس حوالينا يمين وشمال فوق وتحت .... يعني مش جايه تأذيني اتفضلي.
=يزيد فضلك... اللي سمعته عنك طلع بجد ... بنت اصول وجدعة
-وياتري سمعتي من مين؟... وهتشرف بإسم حضرتك ولا اسمك ممنوع تقوليه
=انا إسمي إسراء.... وسمعت عنك كل خير يا يارا
-عاشت الاسامي يا إسراء... ياتري أقدر أساعدك في ايه؟
=عاشت أيامك... انا جايه من طرف عمر
*برقت بعيني لما سمعت اسم عمر وجه في بالي ألف احتمال لوجود البنت دى هنا... وأسرار عمر اللي إبتدت تطلع
-من طرف عمر ازاي يعني تعرفيه منين.
= انا كنت مرتبطه بعمر بقالنا 3 سنين ووعدني انه هيخطبني بس فجأة عملي بلوك من كل حتة حتى من غير مايقولي السبب فجأة اختفي من حياتي حاولت أوصله بكل الطرق معرفتش
كنت خايفه اجيله البيت هنا يفضحني ومايقبلش يكلمني... لما عرفت انه سافر فورا جيت
كان بيتكلم عنك وبيقول انك جدعة وبتاعة حق فا جيتلك
*مصمم يكسرني ويجرحني حتى وهو مش موجود
وانا اللي كنت هصدق انه بالفعل بيحبني طلع مقضيها مع كل واحده شويه وكأن البنات دول لعبة ... كنت مصدومة من اللي بسمعه وحسيت اني تايهه ومش فاهمه حاجه
-الكلام دا من سنتين فاتوا؟!.... وليه جاية تتكلمي دلوقتي واشمعنا انا؟!
*نظرة البنت وهي بتكلمني حسستني ان وجعي ولا
حاجه قصاد وجعها علي الاقل هما كان في بينهم حب متبادل او كان بيرسم عليها الحب انما انا .. انا
اتعشمت
=لا.. من 6شهور تقريباً انا حبيته واتعلقت بيه مش عارفه انا عملت ايه علشان يختفي فجأة كدا من حياتي... قولتلك اني حاولت أوصله معرفتش وكنت خايفه اجيله هنا
جيتلك علشان انتي بنت زي واكيد ماترضيش بالظلم
*من اللحظة دي بالفعل بدأت أكرهه انا كنت شيفاه ملاك كنت شيفاه حاجة كبيرة قوي
بس ميستاهلش.... ميساهلش دموعي اللي نزلت بسببه ولا يستاهل اني ازعل من النهارده بسببه كفايه بقي مش هدي لحد قيمة هو ميستحقهاش
-انا بالفعل مايرضنيش الظلم ولا يرضيني اللي عمر عمله معاكي ... عارفه انك اتوجعتي ومجروحة منه علشان حبتيه وهو خذلك بس تستاهلي دا
=أستاهل؟!!
*دموعها نزلت قدامي وباين عليها حبته بجد رجفة ايديها وصوتها الموجوع بيقول انها حبته بس كل واحد فينا لازم يدفع تمن أخطاؤه وهي دلوقتي بتدفع التمن
-أيوة تستاهلي… ماحدش ضربك على إيدك لما قررتي تدخلي العلاقة دي، انتي دخلتيها بإرادتك وانتي عارفة إنه ماينفعش وحرام. انتي اللي وافقتي تعصي ربنا، وتخوني أهلك، وتخسري نفسك ومشاعرك. ماحدش خيرك، انتي اللي اخترتي دا بنفسك وثقتي في حد مكانش ينفع تثقي فيه.
بس بصي… أنا أيوة بنت زيك، وعارفة وجعك وحاسة بيكي، بس مقدرش أساعدك في حاجة حرام، ولا أهون عليكي غلط انتي عارفة إنه يغضب ربنا. اللي أقدر أقوله إنك لو رجعتي لربنا هتلاقي راحة وسكينة أكبر من أي حب دنيوي وتنسي الارتباط دا خالص لحد ماربنا يرزقك بحد يخاف عليكي ويصونك ويستاهل حبك
*بصتلي واتكلمت بصوت موجوع بطريقة قطعت قلبي ووجعتني انا كمان
=بس هوا حبني وعدني انه هيتجوزني قالي أثق فيه وانا وثقت فيه وحبيته ازاي عمل كدا فيا ليه؟
-انتي جايه هنا علشان أساعدك ترجعيله؟!
=أيوة انتي بنت عمه واكيد هيسمع منك انا بجد مش قادره اعيش من غيره وبيتقدملي غيره كتير واهلي بيضغطوا عليا بس انا بحب عمر
-تبقي جيتي للشخص الغلط
علشان انا مش هساعدك ترجعي للحرام والغلط دا تاني واخد ذنب بسبب اني بساعدك علي الحرام... اللي حصلك دا حصل علشان تفوقي وتفهمي ان دا جزاة اللي يعصي ربنا ويخون ثقة اهله
=بس أنا…
*قاطعت كلامها بنرفزة كإني بكلم نفسي اصل
دا الكلام اللي كان نفسي حد يقولهولي.
-يا بنتي فوقي، أنسي عمر وقربي من ربنا… هو اللي هينفعك. عمر سابك ومفكرش فيكي، انتي ليه لسه ماسكة في حد مش عايزك؟ فين كرامتك وعزة نفسك؟ ليه تجري ورا واحد خانك من الأساس؟
*دموعها غرقت وشها، كانت بتهز راسها بنفي وكأنها مش عايزة تصدق و صوتها بيترعش
=أنا مش قادرة اعمل كدا … مش قادرة أنساه.
-انا عارفة وجعك، عارفة الإحساس ده، بس صدقيني، التعلق بغير ربنا عمره ما هيجيبلك إلا خيبة وجع. لو حبيتي ربنا بجد، قلبك هيتنضف من اللي جرحك، وهتلاقي نفسك أقوى. الحب الحقيقي مش في وعود فاضية ولا في الكلام الحلو… الحب الحقيقي هتلاقيه في حد يخاف عليكي ويخاف على دينه قبل أي حاجة ويخاف يعصي ربنا فيكي.
*سكتت إسراء وبان في عيونها لحظة إدراك لكلامي وبدأت تستوعبه مسحت دموعها وقربت مني
=يعني... يعني مافيش امل انه يرجعلي.
-ولو في امل ورجعلك انتي مش هترجعي لو عايزة مساعدتي بجد اسمعي مني عمر واللى زيه ميستاهلوش غير كدا لا تعبريه ولا تعمليله قيمة لان دا مش راجل اصلا
=بس دا ابن عمك ازاي بتقولي عليه كدا
*معاها حق هو ابن عمي... بس الغلط مابيفرقش بين قريب او غريب الغلط غلط واللى غلط يتعاقب.
-وهو علشان ابن عمي ابررله الغلط واقول معاه حق..لا هو غلطان زيك بالظبط ويمكن اكتر وهيتحاسب علي اللي بيعمله دا لو مش في الدنيا يبقي في الآخرة ربنا قال كما تدين تدان ... عمر كان ابن عمي لاكن من النهارده انا معرفوش
*بدأت تركز لكلامي وحسيت انها هديت
=هو انتي كمان ارتبطتي قبل كدا؟
- انا مارتبطتش ولا اديت مجال لحد يدخل حياتي... بس غلطت غلطة زيك برضو حبيت حد ميستاهلش حبي حد معندوش قلب ولا ضمير
- من طرف واحد قصدك.. وعملتي ايه؟
= لا كانو شويه مشاعر من عشمي يعني.... وقفت قدام نفسي وعاقبتها قولتلها ان اللي عملته غلط عرفتها ان كرامتها اهم من الحب عزة نفسها واحترامها لنفسها اهم من اي حاجه
والاهم من دا كله علاقتي برنا اللي اهم من اي حد في الدنيا
واخدت قرار بالبعد عن الشخص دا والقرب من ربنا اكتر.
-معاكي حق انا حبي ليه عماني
خلاني اعمل الغلط وانا مقتنعة بيه انا مش هفكر فيه تاني انا خلاص فوقت
وهنساه وأبدا من جديد
=متزعليش من كلامي، أنا بنت زيك وحاسة بيكي… بس لو سمحتِ، اعتبري اللي حصل دروس مش جروح. ارفعي راسك، وخلي قلبك عند اللي يستاهله … عند ربنا.
*واخيرا ابتسمت .. ابتسامة باين عليها الرضا
الرضا بالمكتوب باللي راح واللى جاي.
-ازعل منك ازاي بس دا انا بشكرك من كل قلبي
انتي فتحتي عيوني علي حاجات كتيرر انا ماكنتش شيفاها.
=الحمد لله إنك فوقتي، خلي دا يكون بداية جديدة ليكي. متخليش حد تاني يستغلك أو يكسرك… إحنا بنات ولينا قيمتنا، واللي يفرّط في واحدة فينا يبقى ما يستاهلهاش.
*إسراء مسحت دموعها واخدت نفس وابتسمت...ابتسامة واحدة كانت تايهة ولاقت طريقها اخيرا قامت من مكانها وهي كلها تفاؤل باللي جاي خير، خرجت من باب الشقة وهي بتبصلي بنظرة امتنان وعنيها كانت بتشكرني
*فضلت واقفة قدام الباب بعد ما قفل، حسيت لأول مرة إني مش ضعيفة… يمكن أنا موجوعة، بس على الأقل أنا مش لوحدي. يمكن كلامي ليها كان في الحقيقة علاج ليا أنا كمان… آه عمر كسرني، بس النهارده حسيت إني أقوى منه وأقوي من اي وجع
من النهارده هيكون في يارا تانيه خالص.
_________________________
||بعد مرور 6أشهر ||
-سما... يارا ... يلا يابنات بسرعه العربية واقفة بقالها كتير.
=انا جاهزة ياماهر اهو جاية.
-كل دا بتجهزي ياسما ... فين يارا؟!
=يارا جوة لسة مخلصتش.
-يا يارا يلا يابنتي اتأخرنا.. انا مش عارف انتو كنتوا بتعملوا ايه بقالكم ساعه
-جاية ياماهر ثواني.
=ادخلي ياسما شوفيها بتعمل ايه كل دا... وهاتوا الشنط يلا
-حاضر
بعد مرور عشر دقايق...
-خد ياماهر دي شنطتي الحمرة ودي شنطة يارا البينك
=طيب وفين يارا؟!
-انا هنا اهو... يلا بينا
*ماهر وسما بصولي من تحت لفوق وبصوا لبعض وبيضحكوا
- ايه ياجماعة بتبصولي كدا ليه الفستان مش حلو؟!
*ماهر قرب مني ولف حوليا وبعدين مسك ايديا ولفني
=ايه القمر والحلاوة والشياكة دي يابت... انتي خسيتي واحلويتي كدا ليه؟
*سما قربت هي كمان والاتنين في بوق واحد
=دا انتي بقيتي مزة
منكرش فرحتي بكلامهم بس ولاد الايه كسفوني قوي... لفيت بالفستان تانى
-بجد ياسما بجد ياماهر... الفستان حلو!
=إلحقي يا سما دي بتسأل الفستان حلو ولا لا ... احنا اصلا مش شايفين الفستان احنا شايفين القمر اللي لابس الفستان
*حطيت ايدي علي وشي من الكسوف وانا بتمايل بالفستان
-خلاص بس بقي بتكسف ياماهر.
*فات 6أشهر كاملين.. حصل فيهم حاجات كتيره قوي وأهمهم اني اتغيرت ... بقيت قريبة من ربنا ورميت كل حاجه وجعتني وكسرتني ورا ضهري بقيت ما بفكرش غير في نفسي واخواتي وبس اهتميت بنفسي وبشكلي وبلبسي وبشرتي ووزني
بقيت يارا تانيه خالص عن يارا القديمه.
*قرب مني وشدني في حضنه ومد ايده وشد سما كمان
=كبرتوا وبقيتوا عرايس زي القمر .. بقيت بخاف عليكم أكتر ربنا يحفظكم ويفرحني بيكم يارب بناتي حبايبي
*دمعت اه والله دمعت وماهر قلبها محزنة انا بجد ماليش غيره هو سما في الدنيا دي خلاص هما عيلتي ودنيتي بحالها
-بس خلاص بقي انت وهي الميكب هيبوظ وهأخركم تاني!
=لا أبوس ايديكي انا مش حمل تشطيب دلوقتي
*ضربته علي دراعه بخفة وانا بضحك
ضحك هو وسما وباسوني من خدودي.
- كفاية بقي بتكسف ياجماعة اللاه... وامشي يلا احسن ما ادخل اشطب تاني
*سما خلصت امتحانات ونجحت الحمدلله ورايحة أولي ثانوي .. قررت انا وماهر نقضي الاجازة عند جدو (ابو ماما) في المنوفية
_________________________
||في المنوفية _بيت الجد ||
*وصلنا واخيرا بعد طريق طويل .. وطبعا دي مفاجأة لجدو لانه مايعرفش اننا جايين
سيبت سما وماهر ينزلوا الشنط علي الطريق وجريت انا اعدي الطريق واروح علي بيت جدو.
*فجأة سمعت صوت جاي من ورايا
- حاااااسبي يا يارا..
...........يتبع
_________________________
