رواية قرة عينيها (كاملة جميع الفصول) عبر روايات الخلاصة بقلم مريم محمد
رواية قرة عينيها الفصل الثالث 3
دخلت الأوضة بتاعتي ومسكت التيلفون شوية لقيت فيه أدد علي الفيس مبعوتلي بفتح لاقيتها رفيدة صلاح،
تقريبًا دي البنت للي قابلتها في المحل، غالبًا دي للي مسلم طلع من المحل علشان ميبصش عليها، هي دي غالبًا هي.
قلبت الأدد بتاعها وفي وقتها لاقيتها بتكتب،استغربت عرفتني منين ولا جابت اسمي منين أصلًا البنت دي لغز والله، بس يعني إيه، يعني هسهر يعني ولا إيه عندي جامعة والله، نسيت أقولكم إني في صيدلة معلشي كلية المخترعين بقي وكدة.
قفلت الفون ونمت قبل ما أعرف هي بتبعت إيه بس كان عندي فضول أعرف هي بعتالي إيه برده وبحثت عني وعرفتني إزاي.
- إنتي حبيبة وجدي؟
- لأ أنا حبيبة محمد.
- أنا بعتذر علي إزعاجك بس كنت فكرتك حبيبة وجدي علشان يعني اسمك حبيبة بس.
- لا لا ولا إزعاج ولا حاجة أساسًا كنت فاتحة متشغليش بالك.
- نتعرف بقي طالما كده!
- أوعدك نتعرف بس بكرة إن شاء الله، عندي جامعة والله ولازم أصحي بدري عندي سكشن تسعة الصبح.
أكني في حضانة.
لقيتها بعتالي إيموشن ضحك وبتكتب- وأنا عندي سكشن تسعة برده.
- كلية إيه؟
- علوم وإنتي؟
- صيدلة.
- علوم من صيدلة الإتنين مهمين للمجتمع.
- الأكل أهم حاجة للمجتمع، يا رفيدة غير كده شكليات مش بعترف بيها.
بعتتلي إيموشن ضحك تاني- روحك ما شاء الله حلوة.
تفاعلت بقلب وقفلت التيلفون وأنا بفكر هي عايزة مني إيه، ليه فتحت معايا كلام مسلم له دخل بالحوار طيب، ما أنا مش فاهمة برده ولازم افكر بعقل كده علشان آخد بالي أكتر بدل الهبل للي بعمله ده.
- أنا نسيت ألبس النقاب، ده إيه ده الساعة بقت تسعة إلا ربع والسكشن؟
محدش رد عليا لإن محدش في الشقة أصلًا بابا في الشغل هو وأنس، وماما تحت مع مرات عمي.
-شرابي فين طيب؟ الجونتي؟ إيه اللبخة للي جبتها لنفسي دي ياربي.
خدت نفس عميق بعد ما خلصت لبس ونازلة بقي لقيت مصعب طالع علي السلم، رحت الجنب التاني وهو وقف ولسه هيتكلم ياعيني.
اتكلمت بسرعة- مصعب متكلمنيش لو سمحت.
- ده إيه العبط ده، كنت هقولك شكلك حلو.
- بجد شكلي في النقاب حلو.
- أيوا والله، بس خلاص بقي مش هنشوف وشك اللي إحنا زهقنا منه ده تاني.
سيبته ومشيت جري أنا لسه هقف أتكلم، أنا ممكن اطرد من السكشن، ده مستقبلي مليش فيه لازم أحافظ علي مستقبلي وكدة.
- يعني إيه؟
- إيه يا نورا أنا قلتلك إللي شاغلني وخلاص، وكمان صحيح أنس زعقلي وقالي ملكيش دعوة بولاد عمك.
- أخوكِ أول مرة يفهم يعني، كان فين من بدري؟
حدفتها بالكشكول للي في إيدي-إنتي رأيك من رأيه؟
- كلامه صح بس برده نفسي أفهم إيه للي قام عليه؟
- سيبك من الحوار ده كدة كدة واحدة واحدة مش هكلمهم بقي خفت منه.
اتكلمت بهدوء متعودتش عليه من نورا- لأ بصي يا حبيبة، أخوكِ عنده حق بس مش معني كدة إنك لما متكلمهمش يبقي علشان خايفة من أخوكِ.
- أمال؟
- خليكي مقتنعة إن إختلاطك بولاد عمك ده مينفعش أصلًا لإنهم مش إخواتك.
- يا بنتي لا بس أنا بعتبرهم إخواتي.
كانت هتشد في نقابها مني أنا عارفة، نورا صديقتي في الجامعة بقالها تلات سنين أنا وهي اتخانقنا في الأول في أول يوم رحت فيه الجامعة خالص وبعد كدة بقينا أصدقاء بقي.
- طيب وافرضي مثلًا جيت طالعة علي السلم قابلت مصعب وكلمني أقوله متكلمنيش؟
- وإشمعنا مصعب يعني ما ممكن مسلم يكلمك!
- مسلم؟
- ده مش بيعبرني في الجزمة.
- عنده حق ميعبركيش.
- نورا!!
- سكتنا أهو.
- طب بقولك رفيدة صلاح دي متعرفيهاش؟؟
- رفيدة صلاح؟ دي مش في العلوم؟
- إنتي عارفاها؟
- أيوة جنبنا في كلية العلوم.
- طب هي عاملة إزاي.
- منتقبة كده وهادية.
- مالنا عمالين نقع في الناس الهادية إللي بنكتشف في الآخر إنهم مش هادين خالص.
- لأ دي مؤدبة جدًا وبتعطي دروس قرآن وتجويد، أكبر مننا علي فكرة خلاص هتتخرج أهي.
- كمان؟
- عندها صاحبتها هند بس دي مش منتقبة.
- عارفاها هند دي.
كنت بتكلم وأنا متضايقة، يعني إيه هتتخرج خلاص مينفعش تعيد السنة وتفضل في الكلية شوية، مش حبًا فيها ده أنا مش طايقاها مش عارفة ليه والله بس إحساس جوايا بيقولي، لا مش دي إللي نتعرف عليها، مع إنها في الظاهر كويسة.
- عندنا محاضرة يلا.
- بصي كده يا حبيبة.
بصيت لقيت هند ورفيدة ماشين مع بعض معدين جايين من علوم ورايحين الصيدلة ليه مش فاهمة ولا أنا عارفة لقيت نورا بتنادي عليهم.
- بتنادي ليهم ليه.
- علشان تتعرفي عليها وتعرفي قد إيه هي طيبة.
- مش عايزة أتعرف علي حد يا نورا يلا نمشي،
المحاضرة!!!
- لسه بدري.
جات رفيدة لحد عندنا وسلمت علي نورا هي وهند وبصتلي ف اضطريت اني أبتسم غصب عني لإني كده يعني- حبيبة، حبيبة محمد.
بصتلي وكإنها بتشبهه عليا وبصت علي الكلية- سكشن تسعة الصبح؟
ابتسمت- أيوة، رفيدة إنتي صح؟
لقيتها حضنتني إيه ده مش متعودة حد يحضني كدة ولقيتها بتقول- سبحان الله كلمتها إمبارح علي أساس إنها حبيية وجدي وقابلتها النهاردة.
كلنا طبعًا قلنا سبحان الله، مش عارفة ليه حاسة إن أنا وهي بنستعبط علي بعض،لقيت هند بتتكلم- بس لما قابلتك في المحل مكنتيش لابسة نقاب.
- لسه أول يوم ألبسه والله.
- كنتي رايحة تشتريه بقي ولا إيه؟
- أه مع أخويا.
هي كلمة فلتت مني متأكدة أنه هيتبني عليها حوارات كتيرة بعدين، المهم أنا ونورا استأذنا علشان عندنا محاضرة، كدة كدة أصلًا مش هشوفها تاني، إللي عايزة أعمله، أنزل أحفظ القرآن بالتجويد الحمد لله خاتماه، علي ما جيت أحفظ بالتجويد المعلمة تعبت، وبطلت تعطيلنا دروس.
- إنتي عارفة يا نورا ليه صعب عليا؟
- ليه؟
- علشان أنا بنت وحيدة في البيت مفيش بنات من سني معايا، فكبرت لقيتهم هُمَّ.
- فاهماكِ بس لازم يبقي فيه حدود يا بيبة يعني مثلاً مش كل حاجة تروحي تقوليها لمصعب وهكذا مينفعش تهزري معاه زيادة عن اللازم.
- أنا مش بقولهم حاجة علي فكرة.
- خالص.
- يستي مش كله والله.
- أنا هنا أهو عايزة تحكي ولقيتي نفسك زهقانه قوليلي ونخرج.
- طب ما تيجي تقعدي معايا أفضل.
ضحكت- إنتي زيرو في التعامل يا حبيبة والله.
أنا كدة فعلًا لازم بقي آخد كورسات في التعامل مع الناس، في الأجازة إن شاء لله بقي.
- طب ليه يعني؟
- يا بنتي إفهمي، بيتكم كله شباب، وكمان عندك أخوكِ أنا مينفعش أدخل البيت أصلًا.
استغربت- بس إنتي هتيجي تقعدي معايا بس في الأوضة بتاعتي مش هنقعد برة.
- لازم فعلًا يا حبيية تاخدي كورس في التعامل.
أخيرًا روحت البيت بعد تعب وإرهاق يوم طويل فيه سكشن ومحاضرة واحدة، بس كنت حرانه من النقاب شكلنا هنقعد نجاهد لما نتغلب علي نفسنا، إللي بتقولي إقلعيه مالك جايبة لنفسك الفرهدة ليه.
- السلام عليكم ورحمة الله وبركاته.
كلهم ردو السلام- وعليكم السلام ورحمة الله وبركاته.
ماما اتكلمت- مش هتتغدي يا حبيبة!؟
- لا يا ماما الحمد لله هطلع بقي علشان تعبانة شوية.
بس دي إللي اتكلمتها، رغم إنهم كلهم قاعدين، العائلة الكريمة كلها ومسلم ومصعب وأنس وبابا وعمي وكلهم استغربو بس بجد هبدأ أحط حدود بقي.
اتكلم مصعب وهو بيضحك- رايحة فين يا حجة حبيبة.
- طالعة أذاكر عندي كويز.
- ذاكري يا بنتي واجتهدي علشان لما أتعب تصرفيلي العلاج.
- أما تبقي تتعب يا أخي هبقي أصرفلك علاج يجيب أجلك.
قولتها وطلعت وعارفة إني زودتها وهيزعل مني بس مش عارفة أجيبهاله إزاي إني خلاص مش هكلمهم.
- مالها دي؟
رد عليه أنس بهدوء- سيبها يا مصعب دي تعبانة في مخها.
- يعم لو هي عايزاني مكلمهاش تقولي، مش تدعي عليا كده، افرض أبواب السما حالًا مفتوحة؟
اتكلم مسلم - ياريت لو تحط حدود بعد كده يا مصعب.
- ما إنت..
قاطعه- خلاص هحط حدود معاك إنتَ كمان.
بص مسلم لأنس- حلو كده؟
- تسلم يا أخويا.
طلعت فكيت عقدة النقاب وشيلته من علي وشي، واترميت علي السرير بعد ما نفضته تلات مرات، لقيت رسالتين من رفيدة اتنهدت شكلنا هنشوفها كتير، فتحت الشات بتاعها وأنا عندي فضول أعرف ليه هي عماله تبعتلي، وعشمانه أوي كدة...
يتبع..
