اسكريبت المانيكان بقلم مصطفي أيمن شحاته
المانيكان بقلم مصطفي أيمن شحاته
من أغرب الحكايات اللي ممكن تسمعها عن المانيكان!!
في محل شهير مخصص لبيع ملابس النساء حصلت واقعة تسببت في فزع رهيب عند جميع العاملين في المحل دا!!
و اللي اكتشفت الموضوع دا هي (كارلا) بتقول أن كان عندهم نقص في المانيكان اللي بيستخدموها في العرض الملابس و طلبت من الادارة كذا مرة تزودها بمانيكان بس محدش كان بينفذ طلبها و الرد اللي كان بيجلها انهم هيبعتوا ليها المانيكان في خلال اسبوع لكن كانت الأيام بتعدي ومفيش حد بيسأل فيها ومفيش حاجة بتيجي
كارلا كانت المسؤلة عن المكان و هي اللي بتوزع الناس اللي شغالة تحت ايدها و بتعرفهم يعملوا ايه في المحل و ازاي يبيعوا للزبون وبتعرفهم بردوا يجيبوا أيه من المخزن ويتعرض وأيه اللي يفضل وميطلعش، كارلا من كتر ما هي زهقت من عرض مشكلتها على الادارة اللي اعلى منها بخصوص المانيكان نزلت تدور في المخزن تحت على واحد زيادة يمكن يكون موجود و مش واخدين بالهم لكن هي مالقتش حاجة خالص
اثناء البحث دا نزل عامل ليها و قالها أن في راجل وصل فوق و معاه المانيكان الجديد اللي طلبناه من الادارة طلعت كارلا بسرعة عشان تشوف المانيكان دا وتشكر الراجل، بس الغريب أن كارلا لاحظت المانيكان مش زي الشكل اللي شغالين بيه ، كان شكله واحد تاني خالص اينعم هو مانيكان لبنت زي مااهي عايزة لكن جسمها فيه كسور كتير وتحسه متلزق و تم اعادة تصنيعه حتى وشها كان واخد علامات وخدوش كتير ، أمر كان غريب ومضحك في نفس الوقت ، كارلا كان أهم شيء عندها أن لازم يكون المانيكان شكله حلو عشان الزبون لما يشوف الشكل ميخفش و يجري و بسبب المنظر الوحش بتاع المانيكان دا
قررت متعرضش الملابس على المانيكان و تحطه في المخزن وتبلغ الادارة انها تبعت واحد تاني، و خدت المانيكان ونزلت للمخزن و حطيته و بعتت رسالة للادارة و هي تحت بس الغريب بقا إنهم بعتو ليها رسالة مريبة شوية و مضمونها
"إنهم مبعتوش لسة المانيكان اللي كانت طالبه أصلا"
كارلا كانت فاكرة أن دا هزار بس ازاي و دايمًا الناس دي مش بتهزر في شغلها بعتت ليهم للتأكيد و عرفت فعلاً أن المانيكان لسة مجاش أما مين اللي جه و أيه المانيكان اللي وراها دا متعرفش؟!!
كارلا بصت ناحية المانيكان و الرعب بيجري في دمها لأنها لاحظت ان الكسور اللي في الجسم اختفت و الجروح اللي في الوش مبقاش ليها اثار، كارلا خرجت من المخزن جري و طلعت من تحت مرعوبة بس مرديتش تبين دا لحد عشان شكلها قدامهم
في التوقيت دا كان اخر ساعة في الشغل، قفلوا المتجر بتاعهم و كل واحد رجع بيته إلا كارلا اللي فضلت في الشوارع بتفكر في المانيكان الغريب دا رجعت بيتها ونامت وصحيت على عدد مكالمات رهيب من المساعدين اللي معاها في المتجر عشان يعرفوا منها هي ليه حطت المانيكان الجديد لعرض الملابس رغم أنها هي اللي قالت مش هتستخدمه!!!
كارلا لما سمعت كدا قامت مفزوعة من النوم وانكرت انها عملت كدا امرتهم أنهم يسيبوا كل حاجة زي ماهي لحد ما تيجي ، وبعد ساعة وصلت كارلا قدام المتجر اللي شغالة فيها وشافت المانيكان في العرض لابس ملابس مش بتتعرض عندهم أصلا و الغريب كمان أن المانيكان دا مبتسم !!!!!!!!!
حاولت تشيل المانيكان من مكانه لكن ماكنش بيتحرك من مكانه ولا واحد ضمن اللي موجودين كانوا عارفين يشيلوا من مكانه، بعد محاولات كتير باتت بالفشل قالت كارلا أنهم يسيبوا مكانه و محدش يحركه و ياريتها ما عملت كدا!!
بعد ساعات من العمل سمعوا واحدة واقفة قدام المانيكان بتصرخ و لما قربوا منها عشان يعرفوا منها سبب الصريخ ايه؟!! قالت أن المانيكان دا شبه اختي اللي مختفية من سنة!!!!!!!
الشرطة حضرت في ساعتها بسبب البنت دي اللي قدمت بلاغ ضدهم و اتهمت أن المتجر دا هو السبب في اختفاء اختها اللي مش لاقينها لحد دلوقتي!!
الشرطة وصلت و فضلت كارلا تشرح لهم اللي حصل ولما فرغت الشرطة الكاميرات كانت واقفة معاهم الشابة (ماديسون) اللي قالت أن المانيكان زي اختها و شافت لحظة وصول المانيكان و أول ما لاحظت ملامح الشاب الي كان شايله فضلت تصرخ تاني و تعيط كتير و فجأة فقدت الوعي!!
حاول الجميع يفوقها وبعد ما فاقت قالت أن اللي شافته بيوصل المانيكان دا يبقى اخوها (سيمون) و دا كان بيكره اختها جداً و هو أصلا ميبقاش اخوها من ابوها وأمها لأنهم متبنينه من ملجأ من زمان و دايمًا كان في مشدات بينه وبين اختي المختفية و في مرة ابويا اللي هو يبقى ابوه بردوا بالتبني زعق فيه و طرده من البيت وقاله مترجعش هنا تاني لأنك بقيت شاب ويعتمد على نفسه سيمون طول حياته كان بيصرف عليه ابويا و لما اطرد حياته بقت صعبة و شبه متشرد و في الوقت دا اختي اختفت!!
الشرطة لما سمعت كلام ماديسون قررت تبحث عن اخوها وبعد أيام وصلوا و قبضوا عليه كان عايش في مخبئ صغير بعيد عن عيون الناس المكان كان كله تماثيل و ادوات رسم ، ماديسون في التحقيقات قالت أنه اخوها دا هوياته الرسم و النحت
و الشرطة لما وجهت تهمة القتل لسيمون قال أنه ميعرفش عنها حاجة بو قاله فترة بعيد عن أهله لما سألوه ليه وديت المانيكان في المحل الملابس و ازاي اصلا عملت المانيكان شبه اخته بظبط، معرفش يرد لأنه معرفش ينكر اللي الشرطة شافته قدامها أصلا
و اتضح بعدين أن سيمون هو اللي قتل اخته بسبب إنها كانت بتكرهوا و بتقول عليه أنه مش من العيلة و دايمًا كانت بتقول عليه متشرد، وعمل كدا فيها لأنها سبب في طرده من البيت، و لما قتـ.ــلها حس بالذنب وبدء يجيب مانيكان و يصمم شكلها بظبط و يوزعهم على المحلات عشان لما يمشى يشوفها في كل حتة، سيمون شبه بقا مجنون وحكاية كره لأخته دخلته في دوامة الجنان أكتر تم سجنه مدى الحياة واتقفلت القضية اللي كانت بقالها سنة محدش يعرف عنها حاجة و اتحلت بالصدفة.
بس الغريب بقا و اللي شاغل بال كارلا و مش لاقية ليه أي تفسير لحد وقتنا هذا هو أزاي المانيكان اتحرك من المخزن و طلع للزباين و اتعرض عليه ملابس؟!!!! لو عندك تفسير ياريت تقول في الكومنتات!
لو وصلت لحد هنا متنساش تدعمني بلايك و شير وكومنت وتقولي رأيك في القصة
#مصطفى_أيمن_شحاتة
#رعب_عالماشي
#قصص #رعب #غريبة
