اسكريبت " لعل الخير يمكن في الشر " بقلم هبه جاويش
" لعل الخير يكمن في الشر "بقلم هبه جاويش
عارفين مقولة "لعل الخير يكمن في الشر؟"
كنت بسمعها كتير لكن اتأكدت من صحتها لما مريت بالمعنى الحقيقي
للخير يكمن في الشر...
أنا عندي 28 سنة ومتجوزة من سنة ونص
حياتي الزوجية عادية مقدرش أقول إنها سيئة
ومقدرش أقول إنها حياة سعيدة وهادية
يعني هي حياة عادية فيها مشاكل زي أي مشاكل بتحصل بين أي اتنين متجوزين
واحنا في فترة الخطوبة اتفقنا نأجل موضوع الولاد شوية يعني بعد سنتين على الأقل
من الجواز وأعتقد دا كان أفضل قرار أخدناه
اتجوزنا ومر سنة ونص زي ما قولت في حياة عادية
اللي مش عادي بقى إني بقالي أسبوعين حاسة بتعب وإرهاق طول الوقت
نومي مش مظبوط وكل جسمي بيوجعني وكأن مفيش عضمة واحدة سليمة
تعب شديد ومش عارفة أسبابه
ولكني زي أي بنت في مصر قولت يمكن دور برد ولا أي حاجة
التعب زاد ومش بيروح وهنا قررت إني لازم أشوف دكتور
طبعا جوزي مرضيش يجي معايا واضطريت أروح لوحدي
بعد انتظار ساعة في الاستقبال أخيرًا دخلت للدكتور وشرحت له كل الأعراض اللي عندي
وكشف عليا ولقيته سكت لحظات وبعدها بدأ يتكلم...
الدكتور صارحني إنه شاكك في كون عندي مـرض خبيث
وقالي إنه مش هيقدر يقرر غير بعد تحاليل وفحوصات وحاجات كتير كدا
طبعًا أنا مسمعتش نصها من صدمتي
رجعت البيت وأنا زعل الدنيا كله واضح على وشي
ومجرد ما دخلت البيت فضلت أبكي وكل اللي على لساني الحمد لله على كل حال
طبعا جوزي رجع وشافني منهارة كدا سألني في ايه وحكيتله كل اللي حصل
كنت منتظراه يطبطب عليا أو يحاول يحتوي خوفي وهلعي لكن اللي حصل عكس كدا تمامًا...
جوزي بصلي بصة مفيش فيها أي مشاعر وقال.. "انتي طلعتي مـريـضة؟ طب ومعرفتيش دا ليه قبل الجواز وقبل ما أتدبس فيكي؟ أنا متجوز واحدة تراعيني وتاخد بالها من البيت مش واحدة أشتغلها ممرض احنا بالنظام دا مش هينفع نكمل مع بعض"
أنا سمعت كلامه من هنا وحسيت إن الزمن وقف والدنيا وقفت، كل حاجة حواليا اتعطلت حتى حواسي وإدراكي
وكل اللي دار في عقلي سؤال واحد هي دي المودة والرحمة؟!
جوزي سابني ومشي ورزع الباب وراه وهو خارج وكأن تعبي دا بإرادتي
بعد وقت معرفش أد ايه قمت دخلت أوضتي ونمت
تاني يوم سمعته بيكلم مامته تشوفله عروسة
كوميديا مش كدا؟ كان نفسي تكون كذبة إبريل لكن بكل أسف دي كانت حقيقة
الحقيقة أنا سكت تماما وفات أسبوع ومعملتش التحاليل اللي الدكتور طلبها
ولا حتى قولت لحد من أهلي ولا جوزي اتكلم معايا
أنا كنت عايشة في حالة من الصدمة أو مش عارفة لكن أنا كنت ساكتة بشكل غريب
لحد ما لقيت جوزي بيلبس لبس شيك ويحط برفيوم ويسرح شعره
وهنا بصلي وقالي..
أنا رايح أخطب يا ريت تشوفي حد من أهلك علشان نقرر هنعمل ايه
أنا مردتش عليه
كل اللي عملته إني قومت لميت هدومي وطلبت تاكسي ومشيت روحت بيت أهلي
وهناك حكيت ليهم على كل حاجة
طبعا الصدمة كانت واضحة عليهم لكن اللي كان واضح أكتر هو خوفهم عليا
في لحظتها بابا كلم معمل تحاليل وروحنا نعمل التحاليل اللي الدكتور طلبها
وروحنا مستشفى عملت فحوصات وأشعة
بابا كان واخدني من ايدي وبيلف بيا هنا وهنا والرعب مالي عينه
عارفين المفجأة فين؟
المفجأة إني طلعت مش تعبانة ولا عندي أي حاجة
كل اللي عندي شوية نقص فيتامينات والأنيميا كانت عالية شوية
تشخيص الدكتور كان غلط
الحقيقة أنا بكيت
بس بكيت من فرحتي إني مطلعش عندي حاجة خطيرة
وبكيت من اللي عمله جوزي
ولكن سبحان الله زي ما يكون الموقف دا كله حصل علشان يبان على حقيقته
ربنا بعتلي شوية التعب دول والتشخيص الغلط علشان ينبهني إن الراجل اللي متجوزاه غير أمين عليا
موضوع التعب كان شر ولكنه كان وراه خير كبير أوي أصل محدش عارف لو كنت كملت في الجوازة دي كان ممكن يحصلي ايه في المستقبل
عمره ما كان هيتحملني ويشيلني لو تعبت شوية أو حصلي أي حاجة
والحمد لله ربنا كشفلي حقيقته.
#هبه_جاويش
#قصص_من_تأليفي_ولكن_هتلاقي_نفسك_فيها
ملاحظة هامة للمتابعين الجدد
أي قصة بتنزل تحت الهاشتاج دا فهي مستوحاة من مشاكل وحكايات بتحصل حوالينا؛ وارد تكون حصلت ليك أو لحد تعرفه أو حتى شوفت حاجة مشابهة ليها هي في الآخر مش حكايات خيالية
بعض القصص بيكون فيها حكمة لازم تفهمها بين السطور وبعضها بيعرض المشكلة بشكل كوميدي.
