رواية لهيب العشق الفصل الرابع 4 بقلم سيليا البحيري

رواية لهيب العشق الفصل الرابع 4 بقلم سيليا البحيري

رواية لهيب العشق الفصل الرابع 4

#لهيب_العشق 

#سيليا_البحيري 

فصل 4

في فيلا سليم الشرقاوي– أوضة شيرين

(أدهم بيدخل بهدوء الأوضة الواسعة اللي شبابيكها كبيرة، ووالدته شيرين قاعدة على كرسيها المتحرك جنب الشباك، ساكتة وباصّة للسماء الرمادي. في حزن باين قوي في عينيها، كأنها شايلة همّ الدنيا ومش قادرة تحكيه. أدهم بيقلع البالطو الطبي بتاعه، وبيبتسم رغم التعب، ويتجه ناحيتها بحنية.)

أدهم (وهو بيقرب منها ويمسك إيدها بحنية):

"مساء الخير يا ماما… عاملة إيه أجمل ست في الدنيا؟"

(شيرين بتحاول تبصله، بتبتسم بصعوبة، بس هو بياخد باله من الدموع اللي بتلمع في عينيها. قلبه بينقبض، ويمسك إيدها بإيده التانية بحنية أكتر.)

أدهم (بصوت دافي):

"لأ بقى… النهارده مفيش دموع. كان يوم طويل، وانتي عارفة إنّي برجع البيت بس علشان أشوف ضحكتك، مش زعلك."

(بيحاول يضحكها شوية، بس بيلاحظ إن الحزن جواها النهارده أعمق من كل مرة. بيقعد على ركبته قدام كرسيها، ويمسك إيديها الاتنين في إيده، كإنه بيحاول ينقللها كل الحب اللي في قلبه.)

أدهم (بلطف):

"ماما… في إيه؟ حد مضايقك؟ حاسة بتعب؟"

(شيرين تومئ برأسها لأ، بس دموعها بتنزل من غير ولا كلمة. أدهم بياخد نفس عميق، بيحاول يفضل متماسك. هو عارف إن والدته جواها كتير، بس مش قادرة تطلعه بالكلام. هو الوحيد اللي بيفهم دموعها ونظرتها.)

أدهم (بيحاول يطمنها):

"عارفة؟ عندي فكرة! هعملّك كوباية الشاي اللي بتحبيها، ونسمع الأغنية القديمة بتاعتك، اللي كنتي بتغنيها لنا وإحنا صغيرين، إيه رأيك؟"

(يبتسم بحنية، ويمسح دموعها بطرف صباعه، وبعدين يقوم يجيب الشال الصوفي اللي بتحبه، ويحطه على كتفها برقة.)

أدهم (بصوت هادي):

"كده دفيتي؟"

(شيرين تومئ برأسها، وأدهم يبتسم ابتسامة صغيرة وهو شايفها بدأت تهدى شوية. بعدين يقعد جنبها على الكنبة، ويحط راسه على كتفها برقة، زي ما كان بيعمل وهو طفل.)

أدهم (بهمس):

"بحبك يا ماما… ووعد مني، هفضل دايمًا جنبك."

(شيرين تضغط على إيده بإصابعها الضعيفة بحنية، كأنها بتقوله: "وأنا كمان يا حبيبي." أدهم يغمض عينيه لحظة، مستمتع باللحظة الدافية دي، رغم الوجع اللي مالي قلبها. هو عارف إنه السند الوحيد ليها، ومش هيسمح لحد يأذيها، مهما حصل.)

***********************

(أدهم قاعد على الكنبة جنب أمه، ماسك إيدها، بس المرة دي باين عليه التوتر. بيبص في عنيها الحزينة، كإنه بيدور على إجابة مش لاقيها. بياخد نفس تقيل وبيتكلم بصوت واطي، كأنه خايف حد يسمعه.)

أدهم (محبط):

"ماما… أنا مش عارف أعمل إيه مع تارا. دماغها ناشفة جدًا، ومصممة تنتقم، ومبتسمعش مني خالص! سافرت مصر لوحدها، وكأنها ماشية في طريق كله خطر ومابتفكرش في اللي ممكن يحصل."

(شيرين ساكتة، بس عنيها دمعت، بتحاول تحرك شفايفها ومش قادرة، وده بيزود إحباطها. أدهم ياخد باله، يضغط على إيدها بلُطف، بيحاول يهديها.)

أدهم (بيتنهّد):

"أنا فاهم إن عيلة العطار غلطوا فيكي… طردوكي وظلموكي، بس همّا مش اللي قتلوا بابا، صح؟"

(شفايف شيرين بترتعش شوية، ودموعها بتنزل على خدها في سُكوت. أدهم بيبص لها بألم، عايزها تقول أي حاجة، بس عارف إنها مش قادرة.)

أدهم (بصوت هادي فيه غضب مكتوم):

"اللي قتل بابا واحد تاني… بس المذكرات الملعونة دي خلت تارا تصدق إن عيلة العطار هما السبب، وأنا… أنا كمان كنت فاكر كده في الأول."

(يسكت لحظة، يبص لوش أمه المتألم، ويكمل بصوت مليان مرارة.)

أدهم:

"بس أنا مش عايز أنتقم، ماما… مش عايز قلبي يتحول لحِتة كراهية زي تارا. حاولت معاها كتير عشان تتراجع، بس مبتسمعليش! بتقولي إني ضعيف، وإني مش عايز آخد حق بابا… بس هي مش فاهمة إن الانتقام مش هيرجع بابا، هيبس هيدمرها ويخلّيها تمشي في طريق صعب تطلع منه."

(يهز راسه بيأس، يمرر إيده في شعره، ويتنهد، وبعدين يبص لأمه اللي وشها باين فيه وجع أكتر من أي وقت فات. كانت عايزة تصرخ، تقول له الحقيقة، تقول له إن كل حاجة كانت كدبة… بس لسانها مربوط بصمتها المؤلم.)

أدهم (بصوت واطي وحزين):

"إنتي عارفة الحقيقة، مش كده؟ أنا شايف ده في عنيكي، ماما… بس إنتي مش قادرة تقوليلي."

(دموع شيرين بتنزل بشدة، بتحاول ترفع إيدها المرتعشة، فيمسكها أدهم، يضمها بين إيده كأنه بيحاول يديها كل الأمان اللي يقدر عليه.)

أدهم (بهمس موجوع):

"ماما… أنا خايف عليها. تارا بتلعب بالنار، وخايف تتحرق. مش عايز أخسرها زي ما خسرنا بابا."

(يغمض عينيه لحظة، وبعدها يفتحهم ويبص لأمه، يضغط على إيدها بلطف، كأنه بيطمنها… أو بيطمن نفسه.)

أدهم (بصوت خافت بس حاسم):

"أنا رايح مصر، ماما… لازم أكون جنبها، حتى لو هي مش عايزاني هناك."

(عنيين شيرين بتتفتح من الصدمة، بس مش قادرة تقول حاجة. أدهم يبتسم لها ابتسامة دافية، يقوم بهدوء، وينحني يبوس جبينها برفق.)

أدهم (بهمس مطمِّن):

"هحميها، ماما… هحميها حتى من نفسها."

(شيرين تغمض عينيها بقوة، بتحاول تهرب من عجزها، بس دموعها هي اللي بتعبر عن وجعها المكتوم. وأدهم، كان قراره خلاص اتاخد… وسرعان ما هتقابل خطواته خطوات تارا في مصر، وهتبدأ فصول جديدة من المواجهة.)

********************

(بعد لحظات من قراره، بيضغط أدهم على الزر اللي جنب السرير، وبعد شوية بيدخل صوت خطوات هادية، وبعدين بتظهر ماريا، الممرضة اللي في الأربعينات، شكلها طيب وشخصيتها هادية ومهنية.)

ماريا (بابتسامة خفيفة):

"طلبتني، يا دكتور أدهم؟"

أدهم (بيبصّ لمامته بحنية، وبعدين يلف لماريا بنبرة جادة):

"آه، ماريا. أنا مسافر مصر، وعاوز آخد ماما معايا."

(عنَي ماريا بتتسع شوية من المفاجأة، لكن بتفضل محافظة على هدوءها زي ما دايمًا متعودة على قرارات أدهم المفاجئة.)

ماريا (بحذر):

"مصر؟ يا دكتور، دي مشوار طويل أوي، وحالة مدام شيرين مش بسيطة. إنت متأكد إن ده آمن بالنسبالها؟"

أدهم (بإصرار):

"عارف يا ماريا، وبقدّر قلقك. بس أمي لازم تبقى معايا، وأنا كمان محتاجها معايا. هظبط كل حاجة علشان راحتها وسلامتها. هطلب تجهيزات طبية خاصة في الطيارة، وهتأكد إن كل احتياجاتها متوفرة."

ماريا (ببطء وهي بتفكر):

"بس… ليه دلوقتي؟ إيه اللي حصل؟"

(بيبص أدهم على مامته لحظة، وبعدين بياخد نفس طويل، كإنه بيحاول يرتّب الكلام.)

أدهم (بصوت هادي لكن مليان تصميم):

"تارا هناك، يا ماريا. أختي العندة بتحط نفسها في خطر، ومش قادر أقعد هنا وأتفرج من بعيد. وماما كمان… حاسس إنها عارفة حاجات مش قادرة تقولها. يمكن لو كانت قريبة من تارا، تقدر توصلها بطريقة أو بأخرى."

(ماريا بتبص على شيرين، اللي قاعدة ساكتة، وعيونها مليانة قلق ورجاء، وبعدين بترجع تبص لأدهم، وتتنهّد بهدوء وكأنها استسلمت للقرار.)

ماريا (بجدية):

"تمام، يا دكتور. هبدأ أجهز كل المستلزمات الطبية اللازمة لمدام شيرين. ناوي تسافر إمتى؟"

أدهم (بلهجة حاسمة):

"أسرع وقت ممكن. هاحجز أول طيارة متاحة. عايز كل الترتيبات تخلص في 24 ساعة."

ماريا (بإيماءة):

"حاضر، هاهتم بكل حاجة."

(ماريا بتبص لشيرين بابتسامة فيها طمأنينة، وبعدين بتخرج من الأوضة علشان تبدأ ترتّب كل حاجة. أدهم بيقعد شوية مكانه، ماسك إيد مامته تاني، وبيبتسم لها بحنان.)

أدهم (بهمس دافي):

"ما تقلقيش، يا ماما… هنروح سوا، وهحمي تارا، وبوعدك إن مش هاسمح لأي حاجة تأذيها… ولا تأذيك."

(عيون شيرين بتدمع، وكأنها بتحاول تقوله حاجة مهمة… بس الكلام مش بيطلع. وأدهم خلاص كان قرر، ومستعد يواجه كل اللي جاي في مصر.)

*********************

في مصر - شقة تارا الفاخرة - المساء

(تارا قاعدة على الكنبة الفخمة، رجل فوق رجل، وبتشرب عصيرها على مهَل، وعينيها مليانة مكر وهي بتفتكر تفاصيل اللقاء في الجيم. أخيرًا قابلت إياد العطار… الهدف الأساسي لانتقامها. والقدر بنفسه جاب لها بداية مثالية.)

تارا (بضحكة خبيثة، وبتكلم نفسها):

"إياد العطار… أول لقاء ماكانش وحش خالص. باين عليه محافظ شوية، ومغرور كمان، بس ماقدرش يخبي ضيقه من غَزل أحمد ليّا. هو كان غضبان علشان محافظ، ولا علشان أنا فعلاً شدّيته من أول لحظة؟"

(تحط كوباية العصير على الترابيزة، وتسند راسها على إيدها، وبتفتكر أحمد وهو بيكلمها بطريقته المعتادة مع البنات، وهي كانت بترد عليه بسخرية، وإياد واقف بيراقب، ساكت بس عينيه كانت بتكشف عن ضيق واضح.)

تارا (بثقة):

"أحمد معروف، بيحب يلاحق البنات، وكلامه ملوش أي قيمة… لكن إياد؟ إياد حاجة تانية… يمكن لسه مش عارف أنا مين، بس أكيد حس بحاجة… حاجة دايقته، حاجة خلته يراقبني طول الوقت رغم بروده اللي بيمثل بيه."

(تقوم بهدوء، وتتمشى في الشقة بخطوات ناعمة، تمرر صوابعها على الترابيزة الزجاج، وعينيها فيها لمعة تحدي.)

تارا (بابتسامة مليانة تلاعب):

"إنتو لسه ما تعرفوش أنا مين… ما تعرفوش إن البنت اللي شوفتوها النهاردة هتبقى سبب في إن حياتكم تتقلب فوق تحت. إياد… هتحبني، وهتصدق كل كلمة هقولها، وهتثق فيا زي ما ما وثقتش في حد قبل كده… وبعدها؟ هكسّرك."

(تضحك بخفة، وتروح ناحية الشباك، تبص على المدينة المولعة بالنور، وعينيها مليانة غرور وثقة زايدة عن اللزوم.)

تارا (بهمس):

"أول خطوة اتخطت… اللعبة بدأت، وأنا مش ناوية أخسر."

(بس هي ما تعرفش إن الحقيقة اللي مش شايفاها، والخداع اللي بتنسجه حوالين نفسها، ممكن في يوم يرجع عليها… وإن غرورها ده؟ ممكن يبقى أول خطوة في طريق سقوطها.)

**********************

فيلا عيلة العطار – أوضة الجلوس الواسعة، بالليل

(العيلة قاعدة في أوضة الجلوس الفخمة بعد ما رجع إياد وأحمد من النادي. الجد محمود قاعد على كرسيه الكبير، والست مها قاعدة جنبه. أدهم، مهاب، سلوى، وولاء قاعدين على الكنب الفاخر، وأحمد واقف ومتحمس، بيحكي اللي حصل، وإياد ساكت كأنه مش فارق معاه، بس جواه فيه ضيق كبير.)

أحمد (بحماس وهو بيحرّك إيده):

"تخيلوا يا جماعة! النهاردة قابلنا بنت غامضة، جمالها يخض، بس مختلفة عن أي واحدة شوفتها قبل كده… قوية، واثقة من نفسها، وكلامها كأنها عارفانا من زمان!"

الجدة مها (بابتسامة دافية):

"يا أحمد، مش هتبطل تجري ورا البنات بقى؟ كل يوم راجع بحكاية جديدة!

أحمد (يضحك):

"دي مش زي أي بنت يا تيتة… اسمها تارا. مش عارف ليه، بس حسيت إنها مخبية حاجة، وكأنها ماجاتش النادي صدفة. والأغرب من كده، إياد هنا ما عجبهوش الموضوع خالص!"

إياد (مدايق، ورافع حاجبه):

"أحمد، كفاية تهويل كالعادة… البنت كانت عادية جدًا، مش فاهم إنت مبهور بيها ليه؟"

أحمد (مايل عليه بمكر):

"ههه… عادية؟! بلاش تمثيل، أنا شفتك! وإنت بتبص علينا طول الوقت، ووشك كأنك عايز تضربني!"

إياد (بحِدّة وهو بيكتف إيده):

"بلاش هبل، ماكنتش ببص عليكم، كنت بس… مستغرب تصرفاتها وثقتها الزايدة عن اللزوم."

أدهم (رافع عينه من الجرنال اللي بيقراه):

"تارا؟ الاسم ده مش منتشر هنا… مين البنت دي؟"

أحمد (بيهز كتافه):

"معرفناش، كل اللي قالته اسمها، بس كانت بتكلمنا كأنها عارفة كل حاجة، والغريب إنها ماكانتش مهتمة بيا زي ما كانت مركزة مع إياد!"

مهاب (بص لابنه إياد):

"إنت تعرفها من قبل كده؟"

إياد (بسرعة):

"لأ، أول مرة أشوفها النهاردة."

الجد محمود (بهدوء وتحليل):

"أمال ليه كانت بتتصرف كأنها عارفاكم؟ أنا ما بحبش الغرب اللي يدخلوا حياتنا من غير سبب."

(مازن، اللي ساكت طول الوقت، حس بغصة في قلبه… الاسم اللي قاله أحمد خلاه يحس بحاجة مش مفهومة جواه، بس فضل ساكت، متعود دايمًا على الصمت والعزلة.)

الجدة مها (بحنان):

"يمكن تكون بنت جديدة في المنطقة، مفيش داعي للقلق يا محمود."

ولاء (بصّت لأحمد بمزاح):

"بس قوللي يا أحمد، معجب بيها؟ ولا دي كمان هتدخل في اللستة الطويلة بتاعتك؟"

أحمد (حاطط إيده على قلبه بتمثيل):

"أوه لأ يا ماما! دي مختلفة، مش زي أي واحدة!"

إياد (بيتنهّد بضيق وبيتمتم بصوت واطي):

"بس مختلفة بشكل مش مريح خالص…"

(الحوار لسه داير في الأوضة، بس إياد كان حاسس إن في حاجة غريبة بتحصل… وإن البنت دي ما دخلتش حياتهم كده وخلاص.)

*********************

(الجو مشحون بعد كلام أحمد عن تارا، لكن فجأة، علا بتكسر الصمت بكلام غريب، بيخلّي الكل يتفاجئ.)

علا (بتحط فنجان القهوة على الترابيزة وبصّة حواليها بتفكير):

"على فكرة... في حاجة دايمًا كانت محيراني من وأنا صغيرة... الأوضة المقفولة فوق في الدور اللي فوق، ليه مقفولة بقالها سنين؟"

(السكوت يعم المكان فجأة، كأن الهوا اتسحب من الأوضة، وكل العيون بتتوجه للجد محمود، اللي قاعد ثابت، وعيونه ديقت شوية، كأنّه متجاهل اللي اتقال.)

أحمد (بفضول):

"أنهي أوضة؟ أنا عمري ما خدت بالي إن فيه أوضة مقفولة فوق!"

إياد (مكشر شوية):

"وأنا كمان... بس دلوقتي لما قلتي كده، افتكرت إني شفتها مرة، بابها دايمًا مقفول... ليه؟"

الجدة مها (بقلق وبصّة لجوزها):

"يا علا يا حبيبتي، إنتِ ليه بتسألي عن كده دلوقتي؟"

علا (متجاهلة قلق جدتها وبصّة لجدها محمود):

"علشان كنت بفكر... إحنا عايشين هنا طول عمرنا، ومع كده عمرنا ما اتسمحلنا ندخل الأوضة دي، كأن فيها سر كبير... هو إيه اللي مخبيه علينا يا جدو؟"

(وش الجد محمود بيتغير، وعيونه تبقى زي التلج، بس بيحاول يتهرب من السؤال.)

الجد محمود (بصوت هادي بس نبرته حادة):

"دي أوضة قديمة خلاص، مالهاش لازمة... مفيش داعي نفتح مواضيع ملهاش أي لزمة."

علا (بعند):

"أوضة قديمة؟ طب ليه مقفولة بقالها السنين دي كلها؟ وليه محدش مسموحلُه يدخلها؟"

(إيد أدهم، أبو علا، تتحرك بعصبية على دراع الكرسي، وبعدين يلف لبنته ويتكلم بغضب مكتوم.)

أدهم (بحدة):

"علا، كفاية! مش لازم كل حاجة يبقى ليها تفسير، لما جدوك يقول إن الموضوع مقفول، يبقى مقفول وخلاص!"

(علا بتسكت شوية، بس نظرتها لسه فيها شك ناحية جدها، وأحمد وإياد شكلهم محتارين.)

أحمد (بيبص لأبوه أدهم وبعدين لجده محمود):

"ده غريب... مكانش في بالي إن عندنا أسرار في العيلة."

إياد (بهدوء وهو بيراقب وش جده):

"شكلها أوضة فيها حكاية محدش عايز يحكيها."

الجد محمود (بحسم وهو بيقوم من على الكرسي ببطء):

"قلتلكم الموضوع مقفول! وخلونا نكلم في حاجة أهم."

(يضغط الجد محمود بعصايته جامد وهو خارج من الأوضة، سايب وراه سكات تقيل... العيون بتتلاقى، والشكوك بتزيد، بس محدش قادر يكسر الحيطة اللي الجد بناها حوالين السر الكبير ده.)

**********************

  في مكان نروحله لاول مرة في فيلا  عيلة الشرقاوي – الصالة الكبيرة الفخمة

(الفيلا بتصميم كلاسيكي شيك، والإضاءة الدافية مديّة المكان جو أرستقراطي. الجد "عادل" قاعد في مكانه المعتاد، والجدة "صفاء" بتحضّر القهوة بنفسها، رغم إن الخدام حاولوا يمنعوها. زين وإياد قاعدين مع ولادهم ياسر وتميم، والدنيا هزار وضحك… لحد ما الكلام ياخد اتجاه مختلف.)

تميم (بمزاح وهو راكن على الكنبة):

"ياسر، إمتى هنشوفك عاقل ومستقر؟ ولا هتفضل تجري ورا البنات لحد ما شعرك يشيب زي بابا؟"

إياد (يضحك وهو يضربه على كتفه):

"يا ابني، لو شعري هيشيب، فهيبقى بسببك إنت وابن عمك، مش البنات!"

ياسر (بابتسامة فيها سخرية):

"وأنت يعني يا بابا كنت قديس؟! ده أنت كنت أسطورة في المغامرات، ولسه لحد دلوقتي بتتكلم عن الستات كأنك حكيم العشاق!"

زين (يضحك وهو بيراقبهم):

"إياد كان ومازال أخطر مما بتتخيلوا… بس شاطر يخبّي تحت وش الوقار ده!"

الجد عادل (يحط فنجانه على الترابيزة بنبرة جدية مفاجئة):

"كفاية هزار… اتكلمنا كتير في الهوا. قولولي، حد فيكم اتواصل مع شيرين الفترة اللي فاتت؟"

(السكوت يخيم على المكان… الجو اللي كان مليان ضحك، فجأة اتبدّل، وأي حد سمع اسم شيرين سكت.)

ياسر (يعدّل قعدته):

"أنا كمان كنت ناوي أسأل… في جديد عنها؟"

الجدة صفاء (بحزن وهي تبص على صورة قديمة لسليم على الترابيزة):

"كلمتها من أسبوعين، بس كعادتها… ماقدرتش تتكلم. الممرضة قالتلي حالتها زي ما هي، لا في تقدم ولا تراجع."

تميم (بصوت فيه لمحة حزن):

"لو بس وافقت ترجع عندنا… أمريكا مش مكان ليها وهي في الحالة دي لوحدها."

إياد (بياخد نفس عميق ويتكئ على ضهر الكنبة):

"شيرين دماغها ناشفة… بالظبط زي سليم، مش عايزة ترجع رغم إن إحنا أهلها، ورغم إننا مستعدين نرعاها."

زين (بهدوء وتحليل):

"الموضوع مش هي بس… تارا وأدهم هناك برضو، وهم مش متقبلين فكرة العيش هنا بعد موت سليم، مش كده؟"

الجد عادل (بصوت هادي لكن فيه معنى):

"بالظبط… أدهم عاقل أكتر، بس متعلق بأمه وأخته. أما تارا…"

الجدة صفاء (تقطب حواجبها وتشبك إيديها بقلق):

"تارا دي فيها حاجة غريبة، عمري ما حسيت إنها مرتاحة لما بتيجي تزورنا… كانت دايمًا عينيها فيها نظرة… كأنها شايلة سر أو حاجة."

تميم (بفضول):

"يعني حضرتك شايفة إنها مخبية سر؟"

ياسر (يبتسم بخبث وهو يشبك إيده):

"أنا شايف إنها بس متحفظة شوية، زي باباها، أو يمكن زعلانة مننا عشان بعدنا عنها السنين دي كلها."

إياد (يبص لوالده):

"بابا، تفتكر تارا ممكن توافق ترجع هنا يوم؟الجد عادل (يحط إيده على عصاه وهو بيفكر):

"مش عارف… بس إحساسي بيقولي إن تارا بتخطط لحاجة… وأتمنى إنها تكون حاجة كويسة."

(يسود الصمت تاني… وكأن الكل حاسس إن في عاصفة جاية، بس مش عارفين نوعها.)

*********************

(بعد لحظات من السكوت، دخلت ثريا الأوضة بخطوات واثقة، شايلة فنجان قهوتها في إيدها وباصّة للكل بنظرة متحفزة. قعدت جنب جوزها إياد وبدأت تسمع الكلام عن شيرين، فكرّشت وشها بضيق.)

ثريا (بصوت ساخر وهي بتحط فنجانها على الترابيزة):

"أنا مستغربة منكم والله! بتتكلموا عن شيرين كأنها ملاك نازل من السما! محدش فيكم يعرف هي كانت مين أصلًا… بنت صغيرة اتجوزت أخوكم فجأة، وإحنا لا نعرف عنها حاجة، غير إنها كانت دايمًا غامضة!"

(الكل بصّ لها بوشوش فيها استياء، بس ثريا كملت كلامها من غير ما تهتم بنظرتهم.)

ثريا (بتتكلم بتصنع وهي بترفع حواجبها):

"ليه ما نعترفش بالحقيقة؟ شيرين عمرها ما كانت واحدة مننا! محدش فينا يعرف جت منين، أو كانت مخبية إيه. ودلوقتي، بعد السنين دي كلها، مش عايزة ترجع لينا رغم إننا فاتحينلها بيتنا! مش ده دليل إنها مش عايزانا أصلاً؟

الجدة صفاء (حطّت فنجانها بعصبية على الترابيزة وبصّت لثريا بحدة):

"كفاية، يا ثريا! ما اسمحلكيش تتكلمي عن شيرين بالطريقة دي! دي كانت مرات سليم، الله يرحمه، وهو اختارها بإيده. وإحنا حبيناها كأنها بنتنا، فما لكش حق تشككي فيها!"

زين (شابك دراعاته وباصص لها بنظرة تحذير):

"أحسنلك ما تتكلميش عن شيرين كده قدام أمي، ولا قدامنا إحنا كمان… إحنا عارفين قيمتها أكتر منكِ."

ياسر (بيضحك بسخرية وباصص لثريا):

"يا طنط ثريا، ليه دايمًا لازم تدلقي السم؟ أي موضوع نفتحه، لازم يكون ليكي تعليق لاذع يبوّظ الجو."

تميم (بيحط إيده على كتف أمه بيحاول يهديها):

"ماما، مش وقته بصراحة نحفر في الماضي كده. إحنا بنتكلم عن شيرين كواحدة من العيلة، مش كغريبة زي ما بتصوريها."

إياد (بيتعصب فجأة وبيخبط بإيده على الترابيزة):

"كفاية يا ثريا!"

(سكت الكل فجأة، وثريا بصّت له بصدمة.)

إياد (بغضب وهو بيقف):

"إنتي عدّيتي حدودك المرة دي! ما اسمحلكيش تتكلمي عن مرات أخويا الكبير كده! شيرين جزء من العيلة دي، غصب عنك!"

ثريا (بتحاول تبرر بتوتر):

"إياد، أنا بس بقول الحقيقة، مفيش داعي للعصبية دي—"

إياد (بيقطع كلامها بعصبية):

"حقيقة إيه؟ الحقيقة الوحيدة إن قلبك مليان حقد على واحدة عمرها ما أذتك! شيرين ما عملتش حاجة غير إنها عاشت بعيدة عنك، فإيه السبب في كرهك ليها؟"

الجد عادل (بحزم وببرود وهو باصص لها):

"كفاية كده يا ثريا. مش أول مرة نسمع منك كلام ملوش لازمة، بس مش هسمحلك تتجاوزي أكتر من كده."

الجدة صفاء (بحزن وهي باصة لـ إياد):

"يا ابني، ما تتناقشهاش… اللي قلبه مليان ضغينة مش هتغير رأيه، مهما قلتله."

إياد (بيبص لأمه وبعدين بيرمي ثريا بنظرة تحذير قبل ما يقعد تاني):

"يا ريت ما اسمعش منك ولا كلمة تانية عن شيرين فيها سوء، لأن ساعتها مش هيبقى بيني وبينك أي كلام."

(سكتت ثريا، بس باين عليها الغضب والإهانة، وساد السكوت المكان. الكل حاسس إن الكلام عن شيرين مش هيمر بسلام طول ما ثريا موجودة… لكن اللي محدش يعرفه إن الماضي لسه مخبّي أسرار كتير.)

********************

(بعد لحظة صمت مشحونة، ثريا تبتسم فجأة بخبث، تبص لإياد بنظرة مستفزة، وتميل راسها شوية كأنها فكرت في حاجة شيقة.)

ثريا (بابتسامة ساخرة ونبرة تريقة):

"دلوقتي فهمت… كل الدفاع المستميت ده عن شيرين… كل الحماس والزعل… أكيد في سبب أعمق، مش كده يا إياد؟"

(الكل بيبصلها بدهشة، وإياد بيضيق عينه بغضب.)

إياد (بنبرة حادة):

"ثريا، ما تلعبيش بالنار."

ثريا (بتضحك بخبث وتغمز له):

"ليه ما نعترفش بالحقيقة قدام الكل؟ مش باين عليك إنك كنت بتحبها من زمان؟ مش دي الحقيقة اللي مخبيها؟"

(الجو بيتجمد، وعيون الكل بتتوسع من الصدمة. الجدة صفاء تحط إيدها على صدرها، وزين بيحدق في إياد بذهول، وياسر وتميم بيتبادلوا نظرات متوترة.)

الجد عادل (بصدمة وحزم):

"ثريا! إيه الكلام ده؟!"

ثريا (بتتجاهل صدمتهم وبتكمل بوقاحة):

"إنت طول عمرك بتحلم بيها، مش كده يا إياد؟ كنت بتتمنى تكون مكان سليم! يمكن عشان كده متضايق دلوقتي، عشان أنا اتكلمت عن حبيبتك!"

(الغضب يولّع في عين إياد، وعضلات وشه بتتوتر، وبيقوم من مكانه بخطوات هادية ناحيتها.)

إياد (بصوت واطي بس مليان غضب):

"إنتي عدّيتي حدودك يا ثريا…"

ثريا (بترفع حاجبها بتحدي):

"إيه؟ قلت الحقيقة اللي إنت كنت مرعوب حد يعرفها؟"

(وفجأة، ومن غير أي إنذار، إياد بيرفع إيده ويضربها بالقلم، ثريا تترنح لورا وهي بتحط إيدها على خدها بذهول، والجدة صفاء تشهق.)

الجدة صفاء (بصوت مخنوق):

"إياد! عملت إيه؟!"

إياد (بصوت واطي وصارم، وهو بيبصلها ببرود قاتل):

"ده آخر تحذير ليكي… اسم شيرين ده مايتقالش على لسانك تاني، فاهمة؟ ولا هتشوفي مني اللي عمرك ما كنتي تتخيليه."

(ثريا ترجع خطوتين لورا، تبصله بنظرة غضب وإهانة، وبعدين تدور بعنف وتطلع على السلم وهي بتخبط بكعب جزمتها على الأرض.)

ياسر (بهمس وهو بيتابعها):

"واضح إن العاصفة بدأت خلاص…"

تميم (بصوت واطي وهو بيبص للمشهد بدهشة):

"ماما عمرها ما هتسكت على اللي حصل ده…"

زين (بيبص لإياد بحدة):

"إيه اللي بيحصل هنا بجد؟!"

الجد عادل (يمرر إيده على وشه بتعب):

"ده اللي كنت خايف منه… الماضي لسه مخلصش."

(يسود الصمت تاني، بس الكل حاسس إن الليلة دي مش هتعدي على خير، وإن ثريا بدأت حرب مش هتخلص بسهولة.)

**********************

(إياد واقف مكانه بعد ما ضرب مراته، أنفاسه سريعة، وعينيه مولعة غضب، والكل لسه مصدوم من اللي حصل.)

الجدة صفاء (بقلق وهي حطّة إيدها على صدرها):

"يا ساتر يا رب… عمري ما كنت أتصور إن الأمور توصل لكده!"

الجد عادل (بغضب مكتوم):

"ثريا فعلاً زوّدتها… بس يا إياد، حتى إنت ما كانش المفروض تمد إيدك عليها!"

إياد (بصوت قوي بس باين عليه القهر):

"آسف، بس أنا مش هسمح لأي حد يهين شيرين… مش هسكت على الافترى اللي بيتقال عنها!"

(زين اللي كان ساكت طول الوقت، بص لإياد بنظرة حادة، وبدأ يقرب منه بخطوات هادية، بيتأمل ملامحه المتوترة، وبعدين اتكلم بصوت ثابت بس حازم.)

زين (بجدية):

"إياد، أنا عايز أفهم… هو في حاجة إحنا مش عارفينها؟ هو فعلاً كنت بتحب شيرين؟"

(ياسر وتميم بصوا لبعضهم بعدم تصديق، وإياد زفر بقوة، وبص لأخوه الكبير بعينين مليانة وجع.)

إياد (بصوت ناشف وواضح):

"أنا أحب شيرين؟! إنتو اتجننتوا؟! دي زي أختي الصغيرة، يمكن أكتر… كنت دايمًا شايفها طفلة من يوم ما اتجوزها سليم. إزاي ممكن أفكر فيها كده؟!"

تميم (بهمس وهو بيهز راسه):

"أنا عارف إن أمي ممكن تكون حقودة، بس تتهمك كده قدام الكل… ده جنان!"

إياد (بغضب مكتوم وصوت فيه مشاعر):

"أنا مش بدافع عن شيرين عشان زي ما ثريا قالت… أنا بدافع عنها لأنها مرات سليم! لأنه كان أخويا الكبير، وكان أكتر من كده… كان زي أبوي التاني!"

(بيسكت شوية، بياخد نفس عميق وبيكمل بصوت مخنوق بالمشاعر.)

"سليم ماكنش مجرد أخ… ده كان قدوتي، كان مُعلّمي، الراجل اللي كنت دايمًا نفسي أبقى زيه. لما مات، حسيت إني فقدت جزء مني. إزاي ما أدافعش عن مراته؟ عن الست اللي اختارها، واللي استحملت معاه كل حاجة؟ إزاي أسمح لأي حد يهينها؟!"

(سكتة في القعدة، الكل ساكت بيتأمل كلام إياد اللي طالع من قلبه، حتى زين بص بعيد وكأنه بيعيد حساباته.)

الجدة صفاء (بصوت مرتعش وهي بتحط إيدها على بقها):

"إياد… يا ابني، أنا ماكنتش أعرف إنك شايل كل ده جواك."

الجد عادل (بهدوء وهو باصص لابنه):

"أنا كنت شايفك دايمًا الأقرب لسليم… بس ماكنتش متخيل إن العلاقة كانت عميقة كده."

زين (بصوت واطي وهو بيفكر):

"يعني كل السنين دي، كنت بتحمي شيرين عشان بتحمي ذكرى سليم؟"

إياد (بحسم وقوة):

"بالظبط! شيرين مش مجرد ست، دي مرات أخويا، أم ولاده، جزء من سليم اللي فضل عايش معانا بعد ما راح. إزاي أسيب حد يمسّها بكلمة؟!"

ياسر (بضحكة خفيفة بيحاول يخفف التوتر):

"يعني على كده، كنت هتدافع حتى عن كرسي في بيت سليم!"

(تميم بيضحك بهدوء، بس الجو لسه تقيل، والكل حاسس بخطورة اللي حصل.)

الجد عادل (بحزم وهو بيبص للجميع):

"كفاية كلام في الموضوع ده، من النهارده مش هاسمح لحد يوقع بينّا. إياد، أنا فخور بولائك لأخوك، بس ما تخليش غضبك يخليك تعمل حاجات تندم عليها."

إياد (بهدوء وهو بيمسح وشه من التعب):

"بوعدك… بس برضو مش هاسمح لأي حد يطعن في شرف شيرين، أو يجيب سيرتها بسوء، وده آخر تحذير."

(زين بص بعيد، وياسر وتميم تبادلوا نظرات مش مرتاحة. الكل عارف إن الليلة دي مش هتعدي على خير، وإن ثريا مش هتسكت، لكن في نفس الوقت، كلهم متأكدين إن إياد مستعد يعمل المستحيل عشان يحمي شرف أخوه اللي راح.)

*******************

(الصمت يعم في الصالة، وكل واحد في العيلة غارق في أفكاره... فجأة يرن موبايل الجد عادل، ويكسر رنينه الجو المشحون. الجد بيخرج موبايله، يبص على الشاشة، وبعدين يبتسم ابتسامة دافية.)

الجد عادل (بحماس): "دي تارا!"

الجدة صفاء (بفرحة مفاجئة وهي تحط يدها على صدرها): "يا حبيبة قلبي! افتح الخط بسرعة، وحشتني صوتها!"

(الجد عادل بيضغط على زر الرد، ويشغل الموبايل على مكبر الصوت، وبيطلع صوت تارا مليان حيوية.)

تارا (بحماس وفرحة): "جدو! عامل إيه يا وسيم؟"

الجد عادل (بضحكة وهو يهز دماغه): "هاه! عايزة تضحك عليا بالكلام المعسول زي العادة؟!"

تارا (بمزاح): "أبدًا! ده أنا بقول الحقيقة... بس على فكرة، أعتقد إن الجدة صفاء أجمل منك!"

الجدة صفاء (بتضحك بفخر): "ده اللي بتقوله الحقيقة يا حفيدتي الذكية!"

(ياسر وتميم بيبصوا لبعض بدهشة، وبعدين بيقربوا من الموبايل بحماس لما يعرفوا إن تارا على الخط.)

تميم (بحماس): "تاراااا! يا متسللة الشطرة، أخيرًا قررتِ تكلمينا؟!"

تارا (بضحكة ماكرة): "تميم، يا مشاغب! لسه زي ما إنت؟"

ياسر (بمزاح): "لو كنتِ بتقصدين وسيم، رائع، ولا يُقاوم، أكيد هو زي ما هو!"

تارا (بسخرية): "هاه! قصدت مزعج، وبيعمل مشاكل، ومتورط في حاجات مشبوهة!"

ياسر (بتصنع الصدمة): "مشبوهة؟! ده افتراء! أنا ضابط محترم في المخابرات، سمعتي زي الذهب!"

تارا (بضحكة ساخرة): "ذهب؟ ممكن يكون ذهب مغشوش! أنا متأكدة إنك لسه بتطارد البنات، صح؟"

تميم (بمزاح): "صدقيني، هو مش اللي بيطارد البنات، البنات هما اللي بيطاردوه! بقى أسطورة رومانسية، بيسموه 'كازانوفا الشرقاوي'!"

ياسر (بضحكة): "على الأقل أحسن منك، إنتَ من زمان ما شوفتش بنت! حتى جدتي عندها حياة اجتماعية أفضل منك!"

الجدة صفاء (بافتخار): "ده صحيح، عندي معجبين أكتر منك يا تميم!"

تميم (بصدمة): "جدتي!! ماتخونيش معاهُم!"

تارا (بتضحك بشدة): "أقسم بالله إنكم زي ما إنتوا، ما تغيرتوش أبدًا! وحشتوني كلكم!"

الجد عادل (بحب ودفء): "وإحنا وحشناكي أكتر، بس ليه الاتصال المفاجئ ده؟ كله تمام؟"

تارا (بصوت حماسي): "طبعًا! بس عندي خبر مفاجئ ليكم... أنا في مصر!"

(الغرفة بتسكت لحظة، كأن الكل جمد في مكانه... بعدين فجأة، يصرخوا ياسر وتميم في نفس اللحظة.)

ياسر وتميم (بحماس): "مــــاذاااا؟!!"

الجدة صفاء (بحماس ودهشة): "يا حبيبة قلبي! إمتى جِيتِ؟ ولماذا ما قلتيش لنا قبل كده؟"

تارا (بضحكة مرحة): "علشان بحب المفاجآت! بس ماتقلقوش، هاجي أزوركم قريب جدًا، استعدوا ليا!"

ياسر (بمزاح): "آه، لا! ده معناه إني هخسر لقب العيلة؟! كنت أنا الأذكى والأكتر شغبًا، لكن دلوقتي تارا رجعت، وكل حاجة هتخلص!"

تميم (يحط إيده على دماغه بمبالغة): "أيوه... هاضطر أهرب لكوكب تاني! مش قادر أواجه تارا لما تبقى بكل قوتها!"

تارا (بضحكة خبيثة): "استعدوا... علشان المرة دي مش هكون سهلة معاكم!"

(الكل بيضحك، والجد عادل والجدة صفاء بيبتسموا بسعادة، بينما ياسر وتميم بيتبادلا نظرات تحدي وكأنهم عارفين إن أيامهم الهادية انتهت برجوع تارا.)

******************

فمكان مظلم، أوضة مليانة شاشات بتعرض شخصيات مختلفة كانت جزء من الفوضى اللي عاشتها تارا طول حياتها. قاعد قدام الشاشات رجل مجهول الهوية، بيبص على الكل بعينيه الحادتين اللي مليانة غموض وتحدي

(بيشعل سيجارة بهدوء، وبعد كده بينفث الدخان ببطء، وبيبص على الصور اللي على الشاشات واحدة واحدة، وابتسامة ساخرة على وشه وهو بيكلم نفسه.)

المجهول (بصوت هادي لكن فيه نبرة سخرية):

"تمام... نشوف معانا إيه هنا..."

(عينيه تقع على صورة شيرين، الست اللي عانت كتير، ونظرته بتبقى أكتر جدية.)

المجهول (بصوت واطي):

"شيرين... الست اللي كُسرت روحها، واتسرق حقها... بس إنتي قوية، صح؟ ورغم كده، لسه ما عرفتيش مين السبب الحقيقي في كل ده؟"

(بيحول نظره لصورة أدهم، أخو تارا الكبير في أمريكا، واللي باين عليه إنه جاد ومنشغل في شغله.)

المجهول (بابتسامة ماكرة):

"أدهم... الأخ الحامي، القوي... بس إنت بعيد، فاكر إنك عارف كل حاجة، صح؟ للأسف، إنت مش عارف نص الحقيقة!"

(بعد كده، بيبص على صورة عيلة العطار، عيلة شيرين، اللي وقفت ضدها يوم ما.)

المجهول (بساخر):

"عيلة العطار... يا مغفلين... صدقتوا كذبة، وبعدها ندمتوا، ودلوقتي بتحاولوا تعوضوا غلطكم... هل الزمن هيسامحكم؟ هل شيرين هتسامحكم؟"

(بعد كده، عينيه بتقع على صورة عيلة الشرقاوي، بالذات الجد عادل والجدة صفاء.)

المجهول (همس وهو مبتسم):

"آه... الشرقاوي... العيلة اللي خسرت واحد من أولادها بسبب مؤامرة خبيثة... ودلوقتي بتحاول تجمع نفسها... بس هل هيصمدوا لما تنكشف الحقيقة؟

(بعد كده، بيضيق عينيه لما بيوصل نظره لصورة سعاد، العجوز الحقودة اللي كانت سبب المأساة دي.)

المجهول (بضحكة ساخرة، نبرة صوته بتزيد خبث):

"وأنتِ يا سعاد... الست اللي بتعرفي تزرعي السموم أكتر من أي حد تاني... مش ممتع إنك تمثلي دور العجوز الضعيفة، و في الحقيقة إنتِ أفعى سامة؟"

(بيقترب من الشاشة اللي فيها صورة سعاد، بيمرر أصابعه عليها زي ما بيعبث بمصيرها.)

المجهول (بهدوء خطير):

"لكن الأفاعي... حتى لو عاشت كتير، بيجي وقت لازم تتقطع رؤوسها... وأنا... هكون السكينة اللي هتقطع راسكِ!"

(بيحول نظره لصورة تارا، البنت اللي رجع علشان يغير حياتها للأبد.)

المجهول (بابتسامة غامضة):

"وتارا... البطلة الصغيرة... مستعدة؟ لأن الحقيقة جاية ليكي، سواء كنتِ مستعدة ليها أو لأ!"

(بينقر على لوحة المفاتيح، وبتظهر على الشاشة مجموعة ملفات سرية، بعض منها صور قديمة، رسائل مخفية، وأدلة حاسمة عن دور سعاد في كل اللي حصل.)

المجهول (بصوت واطي ومليان تحدي):

"اللعبة جديدة بدأت... بس المرة دي، القواعد هحطها أنا!"

(بيطفّي سيجارته، ويقفل الشاشات واحدة واحدة، وبعد كده بيقوم من كرسيه بهدوء، بيلبس معطفه الأسود، وبيختفي في الظلام... وبيترك وراه خطة بدأت تتنفذ!)

*☆يتبــــــــــــــــــــــــــــــــــــــــــــع☆☆*

رواية لهيب العشق الفصل الخامس 5 من هنا

الرواية كاملة من هنا (رواية لهيب العشق)