رواية بوابات العالم الآخر الفصل الثالث 3 بقلم محمود فايز
رواية بوابات العالم الآخر بقلم محمود فايز
هتفضل مطارد من الجن وممكن يحولو حياتك لجحيم انت لسه ف اول الطريق حاول تراجع نفسك وحساباتك الموضوع فيه خطورة على حياتك
= انا فكرت خلاص وموافق اني ادخل
ـ براحتك انا حذرتك وفهمتك الموضوع كله ودلوقتي انت اللي في ايدك كل حاجه
= قلتلك موافق ياعم
ـ تمام بس الشروط اللي هتطلب منك صعبه عليك
= مش مهم مش هتكون اصعب من ظروف الحياه والمعيشة والشغل إلى مش ملاحق على المصاريف
ـ على راحتك
= طب يلا بقا قلي اعمل ايه
ـ دلوقتي انت هتروح وبكره ان شاء الله على الساعه 10 بليل هتجيلي وهتجيب معاك شوية حاجات هقولك عليها وكمان هتفهم مراتك انك رايح الشغل لا ان الموضوع ده ممكن ياخد وقت يعني ممكن ياخد يوم أو اتنين او ممكن يتعدي للشهور
= طب ماشي بسيطه ايه الحاجات اللي هجبها
ـ اول حاجه هتجيب ثلاث شمعات ملونين واحده لونها احمر والتانيه لونها اسود والتالته لونها ازرق
= ليه الالوان دى بالذات
ـ دول الوان ملوك الجن الاسود والاحمر والأزرق العالم ده ف تلات بوابات بس موجوده ف العام بتاعنا اللي من خلالها انك تقدر تدخل منها بس مش اي شخص يقدر يدخل منها بدون الكتاب ده
=طب البوابات دي موجوده فين فى العالم بتاعنا
ـ كل بوابه فيهم ليها طقوس وطلاسم معينه والطقوس والطلاسم دي موجوده فى الكتاب يعني مثلا فى بوابه منهم تحت الهرم الأكبر وفى بوابه منهم ف مثلث برمودا بس دي أخطر بوابه فيهم
وصعب انك تدخل منها عشان مسكنها ملوك كتير من الجن ويقال والله واعلم ان عرش ابليس موجود فيها بس مش متاكد من المعلومه دي عشان ماكدبش عليك .
= تمام والبوابه التالته دي موجوده فين
ـ البوابه التالته موجوده ف المرايه كل المرايات اللي موجوده فى العالم فيها بوابه بتوصلنا للعالم بتاعهم ودي تعتبر اسهل بوابه فيهم لكن برضو مش سهل تدخل منها انا كده فهمتك كل حاجه وعرفتك كل البوبات دلوقتي بعد كل اللي حكتهولك لسه موافق انك تدخل العالم ده
= اه لسه موافق وهعمل كل اللي هيتطلب مني .
ـ تمام على راحتك امشي دلوقتي علىى البيت و معادنا بكره
مشيت على البيت قعدت مع اولادي العب معاهم شويه وبعدين نزلت اشتريت الشموع اللي قلي عليها وروحت البيت لكن فضلت افكر فى كل اللي قلهولي ودماغي من كتر التفكير كانت هتنفجر حسيت بصداع من كتر التفكير دخلت اوضت النوم فردت جسمي ع السرير حسيت بهوا سخن ف ضهري التفت وريا لكن ماكنش فيه حاجه وفجأة دخلت مراتي فضلت بصالي شويه بس نظراتها كانت مخيفة قلتلها
= فى ايه بتبصلي كده ليه؟
بصتلي وخرجت تاني بره ف الصاله استغربت وقلت
ـ مالها دي بتبصلي كده ليه ومش بترد عليا ليه ؟
قمت من ع السرير خرجت بره الصاله لاقيت مراتي واولادي قدام التلفزيون بيتفرجو على فيلم قعدت معاهم وقلت لمراتي
=مالك فيه ايه ؟
ـ ايه مالى ؟
= من شويه دخلتي الاوضه فضلتي تبصيلي بنظرات غريبه وكلمتك ماردتيش عليا وخرجتي تاني
ـ سلامتك ي حسين انت شكلك كنت بتحلم
= كنت بحلم ايه بقولك لسه كنتي من شويه ف الاوضه وكلمتك ماردتيش عليا وخرجتي قدامي
ـ والله انا من ساعة مانت كنت هنا ودخلت الاوضه وانا قاعده مكاني ماتحركتش
= بطلي هزار بكلمك بجد
ـ والله بجد مش بهزر معاك
= الله امال مين اللي انا شفتها دي
ـ تلاقيك غفلت وكنت بتحلم
حسيت بخوف شديد وكنت هموت من الرعب بس قلت مش مهم اكيد كان بيتهيالي ولا حاجه مع اني متاكد ميه ف الميه ان شفتها بجد لكن قلت مش هشغل بالي المهم طنشت الموضوع وفضلنا نتفرج على التلفزيون لحد تقريباً الساعه 12 بليل اولادي نامو
اخدتهم نيمتهم فى اوضتهم وقفلت التلفزيون ودخلنا ننام رحت فى النوم صحيت على صوت عياط طفل صغير قمت مخضوض من الصوت الصوت كان خارج من الصاله خرجت واتفجات بابني كريم قاعد على الارض و بيعيط جريت عليه قلتلو
= بتعيط ليه ي حبيبي مالك
ـ العفريت صحاني قلي تعالى معايا و كان شكله وحش اوي ي بابا خفت منه خرجت بسرعه من الخوف
= عفريت ايه ي حبيبي متخفش شكلك كنت بتحلم
ـ والله مش بحلم
= طب تعالا معايا وريني العفريت اللي بتقول عليه
مسكت ايدو كانت سخنه اوي كأني ماسك جمره من النار استغربت من حرارة جسمه، وقلت يمكن سخن وبيخرف ،
فتحت باب اوضتهم وهو فى أيدي اتفاجات ان كريم نايم ع السرير وكمان محمد نايم جنبه اول ما شفت كده نبضات قلبي بدات تزيد جامد وحسيت بخوف شديد وكنت خايف ابص نحية اللي انا ماسك ايدو حاولت اشيل ايدي من ايدو من غير ما ابصلو بس كان قافش فى ايدي جامد كأن ايدي لزقت في ايده والسخونه زادت اوي بصيت بطرف عنيا اتفجات انه طفل صغير بس كان شكله بشع جدآ عيونه مفهاش نن خالص بتنزف دم ووشه وهدومه كلها دم بصلي وفضل يضحك وانا هموت من الرعب فضلت احاول اشيل ايدي بس ماكنتش عارف وهو عمال يبصلي ويضحك غمضت عيني وانا منهار من الخوف وحاسس اني هموت عمال اصرخ واقوله
= سبني انت عايز ايه مني انت مين
وهو عمال يضحك وانا عمال اصرخ جامد فجاه
"يتبع"
