رواية بوابات العالم الآخر الفصل الثاني 2 بقلم محمود فايز
رواية بوابات العالم الآخر بقلم محمود فايز
سكت شويه وسمعت نفس الصوت خارج من التليفون بيقول نفس الجمله سمعت الصوت جسمي اتنفض التليفون وقع من ايدي مديت ايدي اجيب التليفون من ع الارض وايدي عماله تتنفض قلتلو
= انت بتقول ايه يا استاذ احمد
ـ بقولك تمام بس خليك لحد المغرب لحد مايجي حد يقعد مكانك
كان صوته طبيعى قلتلو تمام وقفلت معاه ورحت جهزت شنطتي ولميت حاجتي كنت عايز اخد الكتاب لكن كنت خايف لا ان كل اللي بيحصلي ده اكيد منه لكن افتكرت شخص بيعرف فى علم الروحانيات والسحر والكلام ده كان معرفه قديمة جدا وبقالى فترة مش بتواصل معاه
قلت اخد الكتاب معايا يمكن يعرف يفهمني ايه اللي بيحصل معايا والكتاب ده بيتكلم عن ايه لانه بيفهم حج دا فى الطلاسم ولغتها
اخدت الكتاب وحطيته وسط الهدوم فى الشنطه وفضلت مستني لحد ما اذن المغرب والشخص اللي هيقعد مكاني جه بس اتأخر شويه جه قبل العشى مباشرة المهم هو اصلا قريب صاحب المزرعه بيجي يقعد مكاني الفتره اللي بنزل فيها اجازه سلمتو كل حاجه
روحت بيتى بليل متأخر لأن بلدى بعيده تلت ساعات عن مكان شغلى والطريق كان واقف حتى ولادى كانوا نايمين يدوب سلمت على مراتى وجهزتلى لقمة كلتها ونمت
تانى يوم اخدت الكتاب فى شنطه ورحت بيت محمد اللي ممكن يقدر يساعدني او يفهمني الكتاب ده بيتكلم على ايه رحتلو البيت هو بيتو قريب مني رحت قابلته
بعد السلامات قلتله انى عاوزه فى موضوع
ـ خير عايزني ف ايه
= بص انا هوريك حاجه
فتحت الشنطه وخرجت الكتاب اول ماشاف الكتاب اخده من أيدي وفضل يبص فى الكتاب اوي وقلي
ـ انت جبت الكتاب ده منين؟
= مش مهم تعرف جبته منين انا عايز اعرف الكتاب ده بيتكلم عن ايه
ـ هقولك بس قولي انت جبتو منين؟
= يعم مش مهم دلوقتى انا عارف ان ليك فى الكلام ده وتعرف تفهمنى
اخدته من ايدو وقلتلو
= لو مش عايز تقولي هخده وهمشي
ـ استني بس كده وانا هقولك طول بالك
= طب يلا قولى
ـ ف البدايه كده الكتاب اللي معاك ده خطير جداً والنسخه اللي معاك مفيش غيرها يعني الكتاب ده مفيش غير النسخه دي منه في العالم كله لأن باقى النسخ اتعدمت من خطورتها والنسخة دى كانت متهربه مع ساحر سودانى هرب بيها زمان ومحدش لقاه تانى
= طب تمام برضو مفهمتش هو بيتكلم عن ايه
ـ الكتاب بيتكلم عن ازاي تقدر من خلاله تدخل العالم الأخر
= مانا عارف عنوان الكتاب بيتكلم عن كده بس مش فاهم يعني ايه عالم اخر اصلا
ـ يعني عن طريق الكتاب ده تقدر تدخل عالم الجن
سمعت منه عالم الجن حسيت بسخونه جامده فى جسمي مش عارف ايه سببها قلتلو
= عالم الجن ازاي يعني
ـ شفت الدواير اللي مرسومه ف الكتاب
= ايوه مالها بقى
لو وصلتها ببعضها بالطريقه الصحيحه هتقدر تدخل العالم بتاعهم بس فى حاجه ،الدخول فى العالم ده صعب جداً وممكن تتأذى أو حتى تموت
=طب يعني مثلا لو دخلت ايه اللي هيحصل
ـ لو نفذت كل الشروط المطلوبه ف الكتاب ووصلت الدواير بالشكل الصحيح هيبقا يا سعدك يا هناك
= هيبقى يا سعدي و يا هنايا ازاى بقى
ـ هتكون من الأعيان
ضحكت وقلتلو
= ازاي يعني
ـ هيكون فى خدمتك ملوك من ملوك الجن واي حاجه هتطلبها منهم هينفذوهالك
= يعني لو طلبت فلوس هيجبوهالي
ـ واكتر من كده بكتير ده كنوز الارض تتفتحلك
= طب ،،انا عايز اعمل كده اعمل ايه ؟
ـ بس لو عملت كده ودخلت ساعتها مش هتعرف تخرج تاني احب انبهك العالم ده صعب جدا وممكن ماتعرفش تخرج منه تانى
فضلت ساكت شويه و فضلت افكر فى الكلام اللي قالهولى وان هيكون فيه ملوك من الجن هتبقا في خدمتي وبيني وبينكم الحاله ع القد ومعايا مراتي و اولادي والمصاريف غاليه اوي والظروف صعبه وبصراحه انا تعبت كتير اوي عشان أجيب القرش الحلال اللي اصرف بيه على مراتي واولادي وبعدين قطع هوا تفكيري وقلي
ـ سكت ليه
= لا مفيش طب انت تعرف الطريقه اللي تخليني ادخل العالم ده واوصل الدوائر دى
ـ اه اعرف
= طب انا عايز اتعلم الطريقه اللي تدخلني العالم ده
ـ بص يا حسين انا قلتلك الدخول صعب والاصعب منه الخروج
= عارف وانا خلاص قررت اني ادخل وليك الحلاوه لما ابقى من الأعيان زى ما بتقول
ـ طب فكر وف ايدك الاختيار ياإما توافق انك تدخل ياامه تروح ترجع الكتاب ده مكان مانت جبته عشان طول ماهو معاك هتفضل مطارد من الجن وممكن يحولو حياتك لجحيم انت لسه ف اول الطريق حاول تراجع نفسك وحساباتك الموضوع فيه خطورة على حياتك
"يتبع"
