رواية الهالكون الفصل السادس 6 بقلم ياسر عوده
الهالكون ( الجزء السادس )
توقفنا فى الجزء السابق لما راح نوح للدكتور كمال وحكاله على اللى حصل وكتبله كمال علاج جديد يمشى عليه .
اذكر الله وصلى على الحبيب .
تانى يوم راح نوح لمكتبه ، بعد ساعه تقريبا جه طارق ومعاه نتيجه التحريات ونتيجه تقرير الطب الشرعى النهائى .
طارق : بصراحه يا نوح باشا انا تهت ومبقتش فاهم حاجه .
نوح : خير يا طارق ، حصل ايه ؟
طارق : نتيجه الطب الشرعى ان الاتنين قتلوا بعض وده بيخالف التحريات اللى جمعناها عن الاتنين .
نوح : والتحريات بتقول ايه .
طارق : بص يا ريس ، نوال تبقى بنت عم عصام ، هى دكتوره وهو ميكانيكى ، بنهم علاقه حب من حوالى 15 سنه تقريبا ، الاتنين بيحب بعض حب الاسطورى بتاع عنتر وعابله و قيس وليلى .
اهليهم مكنوش موفقين اولا علشان بنهم مشاكل من زمان ، وتانى حاجه فرق التعليم اللى بنهم ، عصام معاه دبلوم صنايع وهي دكتوره ، ودى من الحجات الغريبه ان دكتوره تحب صنيعى .
المهم لما كانت نوال فى سنه رابعه كليه اهلها كانوا هيجوزوها لدكتور بس هى بتحب عصام ورفضت وسعتها هددوها بانهم مش هيصرفوا على تعلمها علشان يجبروها تتجوز العريس اللى متقدملها .
نوال فضلت ابن عمها وحببها عصام عن التعليم ورفضت العريس وقالتلهم انها مش هتكمل تعليمها وهتقعد فى البيت ، يقوم عصام يعمل ايه ، هو عنده ورشه ميكانيكا ، فيجى اخر كل شهر وياخد اللى كسبه ويديه بنت عمه نوال علشان تكمل تعلمها ، وفعلا هو اللى صرف على كماله تعلمها لغايه لما اتخرجت .
لما خلصت راح عصام لوحده يتقدملها علشان اهله رفضين الجوازه دى ، وسعتها عمه ابو نوال رفضه هو كمان ومقبلش يجوزهاله .
نوال اشتغلت فى مستشفى بعد التخرج وحوشت هى وعصام وجابو شقه وجهزوها وفى يوم راحت معاه وكتبو الكتاب وكل واحد عرف اهله بانهم اتجوز ، واهليهم طردوهم سعتها والاتنين مفرقش معاهم وعملوا فرح على الضيق كده واتجوزا فى الشقه اللى اتقتلوا فيها .
طارق بص ل نوح وقاله : تفتكر يا نوح باشا اتنين بيحبوا بعض بالشكل ده ، ممكن يقتلوا بعض ؟
نوح : يمكن فى حاجه اتغيرت بعد الجواز ؟
طارق : مفيش يا باشا كل التحريات بتقول ان الفتره اللى قعدوها فى منتها السعاده .
نوح : عوزك تستدعى اهلهم وتحقق معاهم بنفسك .
طارق : عملتلهم استدعاء فعلا والنهارده هحقق معاهم ، مع انى عارف انى مش هطلع من ده بحاجه .
نوح : اتحريت على الناس اللى زاروهم بعد الجواز .
طارق : حصل يا باشا ، هما ملهمش علقات بناس كتير ، تقريبا محدش زارهم .
نوح : مفيش حاجه اسمها تقريبا فى شغلنا ، انا عاوز تأكيد .
طارق : اعتبره حصل يا باشا .
نوح : روح كمل شغلك وسبنى دلوقتى .
رغم ان المعلومات اللى قالها طارق غريبه جدا بس نوح ما ابداش اى رد فعل ، زى ما تحس انه جواه حاجه اتغيرت ، متقبل اى خبر مهما كان غريب ، لو دققت جواه اكتر تحس ان جواه حاجه مكسوره ، متفهمش ايه هي بالظبط ، بس ده شعور لما تشوف نوح دلوقتى .
بعد ما خلص نوح شغله روح لبيته ، وبعد ما كل مع عيلته وخد العلاج اللى كتبه الدكتور كمال نوح قال لمراته جنا : انا هقعد فى اوضه النوم لوحدى شويه لو لقتينى نايم متصحنيش .
جنا : ماشى يا حبيبى .
اذكر الله وصلى على الحبيب .
دخل نوح الاوضه وفضل قاعد على السرير وكان شارد تماما ، وفجأه شاف اتنين قدامه ظهروا من العدم ، بصلهم نوح لقاهم عصام ونوال مراته ، نوح استغرب لما شفهم ، دعك نوح فى عيونه وبص تانى لقاهم فعلا هما عصام ونوال .
عصام : مستغرب ليه يا نوح ان انت شايفنا ؟
نوح : انتم مين ؟
نوال : انت عرفنا كويس ، احنا شفناك زى ما شفتنا قبل كده .
نوح : انا مشفتكمش غير لما كنتم مقتولين .
عصام : لا شفتنا مره كمان ، ساعت لما كنا بنقتل بعض .
نوح : انتم عرفتو منين ؟
نوال : منا قولتلك احنا شفناك زى ما انت شفتنا .
نوح : انتم عوزين منى ايه ؟
عصام : عوزينك تجيب حقنا .
نوح : حقكم ؟ من مين ؟
نوال : انت واحنا عرفين كويس اننا اتظلمنا .
نوح : انتم قتلتم بعض ، محدش ظلمكم ، انتم ظلمتم نفسكم .
عصام : تفتكر يا نوح اتنين بيحبوا بعض زى حبى انا ونوال ممكن نقتل بعض ؟
نوح : انا شفتكم وانتم بتقتلوا بعض .
نوال : طيب ايه السبب اننا نقتل بعض ؟
نوح : معرفش .
عصام : لازم تعرف .
نوح : طيب سعدونى وقلولى ليه عملتم كده ، ليه ؟
نوال : دى حاجه لازم تعرفها بنفسك ، انت ظابط شاطر وهتوصل للسبب .
نوح : انا تعبت سعدونى ، ليه قتلتم بعض .
فى الوقت ده عصام كرر كلام نوال وقاله : لازم انت تعرف بنفسك .
نوح بعصبيه وبصوت عالى : مش عارف ، قولولى ليه قتلتم بعض ؟ ليه ؟
فى الوقت ده سمعت جنا صوت نوح وهو بيزعق ، وسعتها فتحت باب الاوضه براحه من غير ما نوح ياخد باله علشان تعرف ايه اللى بيحصل ، وسعتها اترعبت جنا لما شافت جوزها بيتكلم مع الهوا ، زى ما يكون بيتكلم مع حد مش موجود .
فى الوقت ده نوح كان بيكرر كلامه وسؤاله على عصام ونوال عن سبب قتلهم لبعض ، لغايه لما اختفى عصام واختفت نوال من قدامه .
جنا خافت من تصرف نوح ، لدرجه انها قفلت الباب ومشيت عند ولادها وهى خايفه ولما سألها ابنها مالها قالتله ان مفيش حاجه .
تانى يوم راح نوح للشغل كالعاده ، بس كان باين عليه التعب والارهاق .
طلب نوح مقابله اللواء ممدوح ودخل مكتبه .
لواء : عامل ايه يا نوح ؟
نوح : بخير يا فندم الحمد لله .
لواء : مش باين وشك باين عليه الارهاق والتعب .
نوح : انت عارف طبيعه شغلنا يا فندم .
لواء : اه الله يكون فى العون ، قولى وصلت لفين فى قضيه الاتنين العرايس اللى قتلو بعض ؟
نوح : منا كنت جيلك يا فندم علشان الموضوع ده .
لواء : اتكلم يا نوح انا سمعك .
نوح : انا شايف يا فندم ان فى ربط بين الجريمه ديه وجريمه القتل اللى حصلت قبل كده بتاعت عادل حضرتك فكره ؟
لواء : اه فكره مش ده المحاسب اللى دبح مراته وعياله ؟
نوح : بالظبط يا فندم .
لواء : ايه الربط اللى بينه وبين الجريمه الجديده ديه ؟
نوح : الجرمتين من غير سبب يا فندم .
لواء : يعنى ايه مش فاهم .
نوح : جريمه قتل عادل لعيلته مكنش ليها سبب ، وجريمه قتل عصام ونوال برضو من غير سبب .
لواء : انت جاى تهزر يا نوح ولا ايه ؟
نوح : اسمعنى بس سيادتك ، انا اقصد ان ممكن فى حاجه اتسببت فى اللى حصل فى الجرمتين ، سبب الجرمتين واحد ، استنتاجى انه يكون نوع فيرس جديد بينتشر وبيسبب خلل معين فى جسم المصاب بيخليه يقتل من غير سبب .
لواء : اللى انت بتقوله ده يا نوح فيلم خيال علمى ، مش كلام ظابط كبير زيك .
نوح : اكتشاف الفيرس او الوباء مبكر بيفرق كتير يا فندم فى العلاج .
لواء ممدوح بعصبيه : الكلام اللى انت بتقوله ده يمس الامن القومى يا نوح ، ده ممكن يعمل هيجان وبلبله مش بس فى البلد ، ده يقلب العالم كله ، الناس والعالم لسه مخفوش من موضوع كورونا ، نيجى احنا نقول فى فيرس او وباء بيخلى الناس تقتل بعض من غير سبب ، انت عوزنا نطلع معاش مبكر ولا ايه يا نوح ؟
نوح : يا فندم فعلا الموضوع ممكن يبقى وباء ولازم نبلغ الجهات السياديه بالموضوع .
لواء بعصبيه : انت شكلك تعبت وخرفت يا نوح ، القضيه بتاعت العرايس دى خلصانه ، اتنين قتلو بعض وخلصنا ، قفل محضرك وابعته للنيابه وهى تشوف شغلها .
نوح : بس يا سياده اللواء ...........
هنا قاطع اللواء نوح وقاله : لو الكلام اللى انت بتقوله صح ، اكيد النيابه هتكتشفه ، وسعتها هما يعرضوا الموضوع زى ما هما عوزينه ، انت كل اللى بتقوله مجرد تخمينات مش اكتر ، انا مش هضيع تاريخى فى الخدمه طول العمر ده علشان تخميناتك يا حضره الضابط .
نوح لسه هيتكلم ، بس اللواء قال بعصبيه : نفذ الامر يا نوح .
نوح قام وادى التحيه وقاله : تمام يا فندم .
خرج نوح من مكتب اللواء ، وفعلا قفل القضيه اللى كانت معاه ، وبعتها مع طارق للنيابه .
اذكر الله وصلى على الحبيب .
يتبع
