رواية الهالكون الفصل الخامس 5 بقلم ياسر عوده
الهالكون ( الجزء الخامس )
توقفنا فى الجزء السابق لما بلغ طارق نوح بجريمه قتل حصلت لاتنين عرايس جداد .
اذكر الله وصلى على الحبيب وادعوا لاخوانكم بفلسطين وكل بلاد المسلمين .
وصل نوح ومعاه طارق للشقه اللى حصلت فيها الجريمه ، طبعا الريحه كانت وحشه اوى ، وكل واحد واقف حاطت منديل على منخيره من الريحه .
دخل نوح وبص حوليه وهو بيحاول يعاين مكان الجريمه وشاف الاتنين المقتولين .
بص نوح لطارق وقاله : عرفت شخصيتهم ؟
طارق : المقتول اسمه عصام شغال ميكانيكى ، والمقتوله اسمها نوال دكتوره .
نوح : دكتوره متجوزه ميكانيكى ؟
طارق : ايوه يا باشا .
نوح : دورلى ورا الموضوع ده واعرفلى حصل ازاى ، واجمعلى كل المعلومات عن الاتنين دوول ومين اخر واحد زرهم فى البيت .
طارق : اعتبره حصل يا باشا .
مشى طارق ينفذ التعليمات .
اتحرك نوح وقعد فى مكان فى الشقه وشاور لعسكرى من العساكر وطلب منه سيجاره ومولعهاش كالعاده وقعد .
بعد كام دقيقه ابتدى يشوف نوح اللى حصل ، او اللى عقل نوح بيورهوله زى الدكتور كمال ما قال .
عصام كان قاعد على كنبه الانتريه قدام التليفزيون ، وكان شغال فيلم كوميدى ، وقدامه على التربيزه طبقين فكها وكل طبق معاه سكينه الفكها .
ظهرت نوال اللى خرجت من المطبخ ومعاها طبق كبير اوى فيه فشار ، وحطته على التربيزه علشان تاكل منه هى وجوزها عصام وهما بيتفرجوا على الفيلم .
نوال مقعدتش بعيد عن جوزها او حتى قعدت جنبه بشكل عادى لا نوال قعدت لزق جنب جوزها وهو فرد دراعه على ظهر الكنبه علشان تحط هى راسها على صدره ، باين اوى من القعده دى ان بنهم حب وحب كبير كمان وده خلى نوح يستغرب لانه عرف انها دكتوره وهو ميكانيكى .
نوال وعصام فضلوا يتفرجوا على الفيلم ويضحكوا وبيكلوا الفيشار وكل ده راس نوال ماتشلتش من على صدر عصام ، والغريبه لما تصادف ايد عصام مع ايد نوال ويلمس ايديها كان بيمسكها ويبوس ايديها ، وهى كانت بتاكل فشار مره وتأكل جوزها مره ، كانت قاعده رومانسيه اوى .
فجأه بعد كام دقيقه ملامح الاتنين اتغيرت شويه بطلوا ضحك وده كان فى نفس الوقت مع بعض ، ومدت نوال ايديها بس مش فى طبق الفشار لا على طبق الفاكهه وممسكتش فاكهه لا دى مسكت السكينه وفجأه غرزت السكينه فى كتف عصام جوزها الشمال وبدون مبررات .
عصام مابنش عليه حاجه ، ولا اكنه انضرب بالسكين ، ولا حتى حاول يشيل السكين من كتفه ، بس مد ايده ومسك السكينه التانيه اللى فى طبق الفاكهه ووضرب بيها نوال فى بطنها .
كل واحد فيهم ضرب التانى اكتر من طعنه لغايه لما ماتوا الاتنين ، والغريبه انهم ماتوا وهما فى حضن بعض .
ده كل اللى شافه نوح لما قعد ، ولما فاق من اللى شافه مكنش مصدق ده ، علشان كده اتأكد نوح ان اللى بيشوفه مش الحقيقه ، لان اللى شافه مش منطقى بالمره ، صعب تصدق ان اتنين قعدين مع بعض قاعده رومانسيه فجأه يقتلوا بعض بالشكل ده .
نوح قام من مكانه علشان يتكلم مع دكتور الطب الشرعى وقاله : بالكشف المبدئي يا دكتور ، تفتكر الجريمه حصلت ازاى ؟
الدكتور : بصراحه يا نوح بيه الموضوع محير اوى ، مفيش اثار عنف فى المكان ، والشبابيك سليمه ومن المعاينه المبدائيه مفيش مسروقات تقريبا لاننا لقينا فلوس ودهب المقتوله فى مكنها والبيت مترتب جدا يعنى مفيش حد حاول يدور ويسرق حاجه .
الاهم من ده كله مفيش بصمات غير بصمات المجنى عليهم ، ومن وضع الطعنات للاتنين هما اللى قتلوا بعض ، القتيل عصام واخد خمس طعنات واحده فى الكتف ثلاثه فى الصدر ووحده فى رقبته ، والمقتوله نوال وخده ثلاث طعنات ، وحده فى البطن واثنين فى الصدر .
اذكر الله وصلى على الحبيب .
نوح لما سمع الكلام ده اتبرجل واتصدم ، الكلام ده متطابق مع اللى شافه ، وسعتها حب يتأكد من حاجه وسأل الدكتور وقاله : تقدر تحدد كل واحد فيهم اول طعنه خدها كانت فين ، ولا لسه مش دلوقتى ؟
الدكتور : لا الموضع باين اوى ، اول طعنات بنعرفها من اقدميه النزيف ، ودى بقينا نحددها فى المعاينه الاوليه .
يعنى عندك القتيل عصام اول طعنه خدها كانت اللى فى كتفه الشمال ، واخر طعنه اللى كانت فى رقبته .
اما نوال اول طعنه كانت فى البطن ، والاخيره فى الصدر .
نوح بتوتر وقلق شكرا لحضرتك يا دكتور ، وهستنا التقرير النهائى بعد التشريح .
الدكتور : انا تحت امرك يا فندم .
اتحرك الدكتور يشوف شغله ، وفضل نوح يبص حوليه مش عارف يقول ايه ولا يعمل ايه .
بعد ما خلص نوح شغله نزل ومشى من الشقه ، وسعتها مروحش للبيت راح للدكتور النفسى كمال ، رغم ان معاده مجاش بس كان محتاج انه يتكلم معاه ضرورى .
استنا نوح فتره طويله فى العياده لغايه لما قدر يدخل للدكتور كمال .
قعد نوح مع كمال واتكلم الدكتور وقاله : خير يا دكتور نوح ايه اللى حصل خلاك تجيلى بدرى عن معادك اللى متفقين عليه اخر مره .
نوح : بعتذر على المجى من غير معاد ، بس الموضوع مهم .
كمال : خير يا دكتور نوح انا سمعك .
نوح : انا اتأكدت ان اللى بشوفه من حوادث حقيقى .
سعتها قعد كمال باهتمام وقاله : تقصد اللى بتشوفه زى فيلم ؟
نوح : ايوه .
كمال : واتأكدت ازاى ؟
نوح : حصلت جريمه وشفت اللى حصل قبل عمليه التشريح ورفع البصامات .
كمال : شفت ايه ؟
نوح : شفت اتنين لسه متجوزين قتلوا بعض ، وبعد المعاينه التقرير المبدئى اثبت كلامى بالتفاصيل اللى شفتها .
كمال باهتمام وحيره : انت متاكد من الكلام ده ؟
نوح : زى ما انا متأكد انك قاعد قدامى .
كمال : اسمعنى يا دكتور نوح كويس ، معظمنا بيحصلنا حاله بنستغربها ، يعنى ممكن يعدى عليك موقف وتحس ان الموقف ده اتكرر قبل كده ، وسعات بتبقى متأكد ان انت شفت الموقف ده وكمان بتحاول تفتكر ايه اللى هيحصل بعد كده علشان تأكد لنفسك ان انت حصلك الموقف ده ، وتقعد تفكر فى الموضوع وتقول لنفسك يمكن حلمت باللى حصل ده قبل كده ، وتحط احتمالات كتير للموضوع ده .
انت حالتك مشابه للى بيحصل معانا كلنا ، بس انت حالتك متقدمه شويه ، عقلك الباطنى بيصورلك صوره كامله عن حاجه مشفهاش ، بس الحقيقه بتبقى مختلفه .
نوح : يا دكتور بقولك عرفت اللى حصل فى الجريمه قبل التشريح عرفت ان العريس والعروسه قتلوا بعض من غير تشريح الجثث وكمان بطريقه القتل .
كمال : انت روحت مكان الحادث وبصيت على الجثتين واكيد شفت سلاح الجريمه ، وسعتها عقلك الباطنى ربط الاحداث ونسج الفيلم بالشكل اللى ظهر وده مش دليل ان دى الحقيقه كامله .
نوح : انا متأكد يا دكتور ........
سعتها قطعه كمال وقاله : اسف اقولك يا دكتور نوح ان انت داخل على مرحله جديده فى المرض ده ، انت داخل على مرحله الهلوسه البصريه والسمعيه .
نوح : يعنى ايه ؟
كمال : هتبتدى تشوف حاجات مش موجوده من الاساس ، وانا هكتبلك انواع تانيه من العلاج علشان نلحق نداوى اللى حصل واللى هيحصل .
نوح : انا هيحصلى ايه بالظبط ؟
كمال : ربنا يستر عليك عوزك تلتزم بالعلاج الجديد يا دكتور نوح وممنوع تنسى مواعيده ابدا .
نوح : هحاول .
كمال : مفيش هحاول ، لازم تلتزم اللى هيحصل بعد كده صعب اوى عليك .
نوح : تمام يا دكتور .
مشى نوح من عياده الدكتور واشترى العلاج اللى كتبله عليه وروح البيت .
اذكر الله وصلى على الحبيب
