رواية مدرسة الشبراوي الفصل الأول 1بقلم عمرو خالد ليث
رواية مدرسة الشبراوي الفصل الأول 1
• رفضتي العريس!
: أيوة
• أنتي عارفة دي المرة الكام يجيلك؟
: مش مهم باين عليه ملزق كده، ما من أول مرة رفضت يبقىٰ خلاص يحس علىٰ دمه وميجيش تاني
• أي البرود ده يبنتي ماهو واضح أنه بيحبك
: حب أي يا نور دلوقتي أنا مش فاضية للكلام ده، وبعدين أنا مبحبوش أصلًا
• براحتك يا شمس
: ماهو أكيد براحتي يعني
كان نفسها تجيبني من شعري بس الحمدلله مشيت من غير ما تعمل كده، ليه يعني يجي مرة واتنين وتلاتة وهو عارف أنه هيترفض، لي وجع القلب ده يبني، قولتله أنا مش جاهزة أدخل أي علاقة دلوقتي، لما احس أني جاهزة هفكر بس كده بسيطة، وبردو مفيش فايدة لحد ما زهقت .
• محافظة تانية؟
: أيوة التكليف بتاعي في محافظة تانية
• وهتفضلي رايحة جاية كل يوم علىٰ كده
: أكيد لا يعني في سكن للمدرسين المغتربين
• وأنتي ناوية علىٰ أي؟
: هكلم حد ينقلني يجيبني هنا
• ولحد ما تلاقي حد يجيبك هتروحي هناك طبعًا
: أيوة
• علىٰ خير ان شاء الله
جه التكليف بتاعي في مدرسة في المحافظة إللي جمبنا، طبعًا لو فضلت رايحة جاية كل يوم الموضوع هيبقىٰ شاق جدًا، فـ طبيعي يكون في سكن هناك، الوظيفة إللي كنت طول عمري بحلم بيها أني أكون مُدرِسة، واقعد مع الطلاب واعلمهم حاجة تفيدهم، واتناقش معاهم وافهم دماغهم، ولحد ما نجحت واتخرجت، ربنا كرمني التكليف أنه يكون في محافظة تانية، سرحت في الدراسة وأنا في العربية رايحة العنوان بتاع المدرسة، ولحد ما فقت من سرحاني علىٰ صوت السواق وهو بيقولـ ..
• وصلنا يا حضرات حمدلله علىٰ السلامة
نزلت من العربية لقيت نفسي في مكان زراعي، وسط زرع من كل حتة حرفيًا، سألت حد كان معدي علىٰ المدرسة وقالي أنها علىٰ أول الشارع، فضلت ماشية في وسط البلد لحد ما وصلت للمدرسة، لقيت البواب بيسألني ..
• حضرتك مس شمس بتاعت العربي؟
: أيوة أنا
• سُعاد هانم مستنية حضرتك جوه
: سُعاد هانم مين؟
• المديرة
: هي المديرة إسمها سُعاد هانم!
• لا هي إسمها سُعاد وأنا بقولها يهانم
: أنا افتكرته إسم مركب
• لا منفصل
: ماشي
استغربت من اللهجة الغريبة إللي بيتكلم بيها، عرفت أجمع الكلام بالعافية لحد ما فهمت أن سُعاد هانم مستنياني في المكتب، روحت للمكتب بتاعها سلمت عليها وقعدت معاها ..
• الموضوع هيبقىٰ صعب عليكي في الأول بسبب أن التكليف جابك هنا في مكان بعيد
: هحاول اتأقلم أن شاء الله لحد ما أشوف هعمل أي أو أقدم طلب نقل للمحافظة بتاعتي
• مفيش مشكلة بالتوفيق يا شمس
سلمت عليها ومشيت عشان اشوف السكن إللي هقعد فيه، وكان عبارة عن بيت دورين جمب المدرسة كده بشوية، وكانت ليا أوضة خاصة بيا، وكل إللي في سكن واخدين أجازة ومفيش حد فيهم موجود دلوقتي، رتبت الحاجة بتاعتي، وظبطت كل حاجة عشان الحق أرتاح شوية من السفر والمواصلات .
جهزت شنتطي، الايس كوفي بتاعي، الأقلام والنوت، أخدت نفس عميق وأنا واقفة قدام باب المدرسة في أول يوم ليا فيها ..
• مس شمس صباح الخير
: صباح الخير يا عم خيري
• حضرتك داخلة من هنا ليه باب المدرسين الناحية التانية، ده باب الطلاب بس
: معرفش والله أن في باب للمدرسين وباب لطلاب
• ولا يهمك يا مس شمس تقدري تعدي من أنهي باب عادي
: شكرًا يا عم خيري
• الشكر لله وحده
عم خيري بسم الله ماشاء الله عليه عنده طاقة تفائل رهيبة موت، بيستقبل أي حاجة بابتسامة باردة جدًا، وغير لهجته إللي بحاول افهمها عشان افهم هو بيقول أي، هتقولي ماهو الكلام واضح، هقولكم واضح عشان مكتوب، إنما انتو مبتسمعوش إللي أنا سمعاه اسكتوا اسكتوا .
• إزيك يا شمس عاملة أي؟
: بخير الحمدلله
• أنا مس سهام مدرسة الانجليزي هنا
: وأنا شمس
• مدرسة العربي عارفاكي سُعاد قالتلي عليكي
: سُعاد هانم!
• أي سُعاد هانم دي إسمها سُعاد عادي بس بنقولها أبلة سُعاد
: أصل البواب بيقول سُعاد هانم
• لا سيبك منه عم خيري ده علىٰ الله
: لاحظت والله بس قولت لسه معرفش الدنيا عاملة إزاي هنا
• هتعرفي وهتتأقلمي متقلقيش، المهم أنتي والأستاذ سيف مقسمين الحصص عليكم أنتي هتاخدي الصف الأول والتالت والرابع وهو التاني والخامس والسادس
: معاكي جدول الحصص؟
• ايوة هاتي رقمك ابعتهولك علىٰ الواتس
: حاضر
أخدت رقم الواتس وبعتتلي الجدول بتاع الحصص، لقيت نفسي متدبسة في حصتين زيادة فوق العدد بتاعي، قولت مفيش مشكلة عشان لسه في البداية بس .
كان ليا حصتين النهاردة، دخلت الفصل كانوا الطلاب اغلبهم بنات وعدد الولاد نصم تقريبًا، حاولت افصل ما بينهم، وعملت حركة لذيذة جدًا معاهم، قولتلهم كل واحد يقولي نفسه لما يتخرج يبقى أي، في إللي قال دكتور واللي قالت مهندسة واللي قال محامي، المهم خليت الدكاترة مع بعض، والمهندسين مع بعض والمحاميين مع بعض، وكل ما انادي علىٰ حد فيهم بناديه بأسم الوظيفة إللي نفسه لما يتخرج يبقىٰ فيها، كان جرس الفسحة ضرب بعد الحصة التالتة، خرجت أنا وقفت في البلكونة بتاعت أوضة المدرسين، وطلعت الايس كوفي بتاعي لحد ما الفسحة خلصت وأنا كنت واقفة بتفرج علىٰ العيال وهما بيلعبوا .
عدىٰ اليوم الأول الحمدلله علىٰ خير، ومشيت رجعت السكن إللي قاعدة فيه، لقيت مس سهام بعتالي علىٰ الواتس ..
• يومك الأول كان عامل إزاي؟
: عدى علىٰ خير الحمدلله
• طب كويس أهم حاجة أول يوم لما بيعدي الدنيا بتبقىٰ تمام معاكي
: دي حقيقة
• المهم تخلي بالك ومتتعامليش مع حد متعرفيهوش عشان البلد هنا مش أمان
: مش أمان إزاي؟
• لما أشوفك هحكيلك
: ماشي
قفلت معاها ودخلت عملت أكل، وكانت الساعة 2 الضهر أكلت ونمت علىٰ طول، صحيت بعد العصر بشوية، لبست ونزلت قولت اتمشىٰ أشوف البلد شكلها أي واتعرف علىٰ الأماكن، روحت اشتريت شوية حاجات من محل البقالة إللي علىٰ أول الشارع ..
• كده الحساب 170 جنية يست البنات
: خد 200 يا حج
• مش معايا فكة تاخدي حاجة بيهم؟
: ماشي هات أي حاجة اتسلى بيها
أخدت شوية شيبسي علىٰ لب حاجة كده تسليني مع نفسي، أخدت الحاجات ومشيت علىٰ طول، وقبل ما أوصل الشارع إللي فيه البيت سمعت صوت صراخ وزعيق وناس بتجري، مشيت وراهم لقيت أن فيه حريقة نار مسكت في بيت حد، بصيت من بعيد لقيت البيت إللي مسكت فيه النار هو البيت إللي ساكنة فيه! .
طفوا النار إللي ميعرفوش أي السبب إللي خلاها تولع رغم أني قافلة الأنوار أصلًا، والانبوبة مشغلتهاش خالص، ولكن العلم عند الله، مش عارفة أعمل أي دلوقتي، فضلت واقفة كأني تايهة وأنا فعلاً تايهة في مكان غريب معرفش أي حاجة ولا أي حد فيه، فضلت واقفة لحد ما سمعت صوت حد بينادي عليا ..
• شمس يا شمس تعالي
: أنت تعرفني!
• أيوة أعرفك تعالي معايا
كان راجل كبير في السن بيتسند علىٰ عصاية بيتعكز عليها، فضلت ماشية وراه لحد ما وصلنا لبيت كبير، تقريبًا البيت إللي هو عايش فيه ..
• ادخلي
: هعمل أي؟
• هتكملي باقي الفترة بتاعتك هنا
: بس أنا معرفش حد هنا
• وأنا ساكن لوحدي متقلقيش
: حضرتك أنا مش قلقانة بس ..
• أنا مش حضرتك أنا توفيق قوليلي يا عم توفيق وبعدين لو علىٰ الإيجار في اعتبريه وصل، هتقعدي في أوضة ليلىٰ بنتي في الدور التاني وانا بنام هنا تحت
• وهي ليلىٰ بنتك فين؟
: ربنا يرحمها
• ربنا يرحمها أنا آسفة
طلعت الدور التاني فوق، دخلت أوضة ليلىٰ إللي كانت شكلها حلو خالص ومترتبة، كل حاجة فيها متنظمة ونضيفة وكأن حد ساكن فيها، حسيت بوجع في بطني جامد لدرجة أني مقدرتش أقف، ومفيش ثواني ولقيت عم توفيق بيخبط علىٰ الباب وداخل عليا بصنية أكل ..
• الأكل ده عشانك شكلك ماكلتيش حاجة من إمبارح
: تسلم
• مالك أنتي كويسة؟
: بطني وجعاني بس
• طب الدرج هنا جمبك في الحاجة بتاعت ليلىٰ كنت بجيبهالها كل شهر، وفي المطبخ في ينسون ونعناع وكل حاجة تقدري تعملي أي حاجة متتكسفيش
: شكرًا يا عم توفيق حقيقي مش عارفة كنت هعمل أي والله
• ولا حاجة أنتي زي بنتي ليلىٰ ربنا يرحمها، بعد إذنك هسيبك ترتاحي
مشي وأنا اكلت بصراحة لأني كنت جعانة جدًا، الأكل كان يفتح النفس حقيقي، وانا ما صدقت لقيت أكل، وبعد ما خلصت الأكل شربت حاجة سخنة ونمت علىٰ طول .
صحيت الصبح بعد ما لبست ونزلت ملقيتوش موجود في البيت، قولت أكيد راح يعمل أي حاجة وأنا روحت المدرسة، وقابلت صاحب الوجه البشوش والابتسامة المتلجة ..
• مس شمس صباح الخير يا مس شمس
: عم خيري صباح الخير يا عم خيري
• أنتي بقيتي بتقلديني دلوقيتي
: هعمل أي يا عم خيري بجاري الدنيا
• ربنا يكون في عونك يا مس شمس، أنا عرفت أن البيت إللي أنتي قاعدة فيه النار مسكت فيه إمبارح بليل
: ايوة والله
• وغير أن في عيل اتخطف إمبارح
: اتخطف إزاي؟
• ده كان يوم طويل إمبارح، خابرة أنا بمشي من هنا الساعة 3 بعد ما كله بيمشي وبقفل وراهم، ولكن إمبارح مشيت العشا بسبب ابو وام عيل كانوا بيدوروا عليه ملقيهوش، وقالوا أنه راح المدرسة ومرجعش
: وهو جه المدرسة فعلاً؟
• ايوة كان موجود واتسجل حضوره
: يعني مكنش متاخد غياب
• لا يا مس شمس كان حاضر
: ماشي يا عم خيري الله يبشرك بالخير
• يبشرني بعمرة نفسي ازور الكعبة
: ربنا يكرمك ان شاء الله
• يسمع منك ربنا
دخلت عشان الحق الحصص بتاعتي، ولكن قابلت سهام في وشي ..
: أنتي كويسة؟
• ايوة كويسة
: سمعت أن البيت إللي قاعدة فيه ولع إمبارح وبرن عليكي تليفونك مغلق
• ايوة النار مسكت فيه والفون كان فاصل شحن
: المهم انك بخير أمشي عشان تلحقي الحصة بتاعتك
سبتها ومشيت دخلت الفصل وأنا في حالة شتات، أول يوم ليا في المدرسة البيت يولع وعيل يتخطف مفيش بداية أسوء من كده نهائي، حاولت استجمع قواي عشان أكمل باقي اليوم من غير ما يبان عليا، أول مرة اخرج بره محافظتي، أول مرة اتعامل مع ناس واماكن غريبة، أول مرة أنام في فرشة وسرير غير فرشتي وسريري، الموضوع مجرد التفكير فيه مرهق حرفيًا، كملت الحصة للآخر مع العيال إللي باين علىٰ وشهم أنهم خايفين بعد ما عرفوا أن زميلهم اتخطف، الموضوع صعب عليهم كأطفال في السن ده أنهم يسمعوا حد من وسطهم اتخطف، ولكن حاولت اظبط الدنيا معاهم واشغلهم في الحصة لحد ما خلصت .
• مش غريب ان دي السنة التالتة إللي يختفي فيها عيل من المدرسة في أول يوم؟
: تفتكري الموضوع له علاقة بالورث؟
• الأطفال ملهمش ذنب دول جايين يتعلموا
: يمكن إللي بيعمل كده عنده غرض معين
• أو بيتاجر في الاعضـاء
: لا يا سهام مش معقول، حتىٰ لو بيتاجر في الاعضـاء موضوع الخطف مش هيقف علىٰ الأطفال بس، ومش هيخطف في نفس اليوم في كل سنة
: تفتكري يكون فعلاً في سبب غير تجارة الاعضـاء أو الخطف عشان الفلوس؟
• أنا حاسة أنه كده فعلاً عشان إللي بيخطفهم مبيطلبش حاجة
: ايوة صحيح
• والغريب أن بعد فترة دي ومحدش بيشوف حاجة غريبة
: ماهو الموضوع غريب فعلاً
سمعت سهام بتتكلم مع واحدة من المدرسين في موضوع العيل إللي اتخطف إمبارح، وازاي بيحصل الموضوع ده من تلات سنين ومازال مستمر من غير ما حد يدور أو يهتم بالموضوع، دخلت عليهم أفهم ولكن لقيت إللي مع سهام أول ما قربت منهم مشيت علىٰ طول ..
• هو في حاجة؟
: حاجة أي!
• أصلها أول ما شافتني مشيت
: متشغليش بالك سيبك منها
• ماشي
: أنتي أي الدنيا معاكي
• متلغبطة والله خالص مش عارفة حاسة أني تايهة كده، ولكن بحاول اتأقلم مع الوضع
: متقلقيش هتتعودي
• ياريت بجد
مشيت سهام وراحت تخلص إللي وراها، وأنا فضلت اتمشىٰ في المدرسة لأني مشفتهاش كلها، إللي لفت إنتباهي أني لقيت كذا جملة مكتوبة بالاحمر، وتقريبًا ده دم مش مجرد لون بس ..
• سوف تلاحقك خطيئتك دائمًا .
مشيت شوية كمان لقيت جملة تاني مكتوبة ..
• الوجه البشري، في النهاية ليس أكثر أو أقل من قناع .
ولكن إللي صدمني أكتر لما شفت حاجة كان قلبي هيقف لما شفتها، رسمة كانت لشخص، وجهه مليان أسنان حادة، بؤقة مفتوح للآخر كأنه بيبتسم إبتسامة شيطانية، وتحت الرسمة مكتوب ..
• الوحوش لا يرتدون أقنعة، إنهم يبتسمون فحسب .
جريت من قصادها ورجعت الفصل تاني وقلبي بيدق جامد، خايفة لأول مرة من ساعة ما جيت هنا، حسيت أن في حاجة مريبة مش طبيعية، إزاي المدرسة فيها حاجة زي كدا وساكتين، إزاي العيال بتتخطف ومش بيعملوا حاجة، دخلت الفصل وببص علىٰ العيال لقيتهم كلهم ساكتين، كلهم باصين عليا إلا بنت وسطهم، عيونها مدمعة، بتتلفت حواليها كأنها خايفة من حاجة، لحد ما نظرها ثبت علىٰ الشباك كأن في حد واقف ورا الشباك، حاولت المح حاجة مشفتش أي حد واقف، ولكن بصيت علىٰ الشباك المفتوح في آخر الفصل شفت في الازاز بتاعه صورة البواب، البواب واقف ورا الشباك بيشاور للبنت، ببص علىٰ البنت لقيتها بتمسح دموعها ..
• ممكن أروح الحمام يا مس؟
: روحي يا هاجر
راحت الحمام وببص علىٰ الشباك الناحية التانية لقيت البواب اختفىٰ، عدى خمس دقايق وهاجر مرجعتش، فات ربع ساعة وكملت نص ساعة، الحصة خلصت لحد ما جه الوقت إللي بينادوا فيه علىٰ اسامي الطلاب بعد الحصة الرابعة عشان يتأكدوا من وجودهم، هاجر اسم هاجر اتكرر مرة واتنين وتلاتة، هاجر اختفت، بيدوروا عليها ملهاش اثر، معقول البواب هو إللي بيخطف العيال! .
يتبع ..
#مدرسة_الشبراوي الجزء الأول
لـ عمرو خالد لـيث
#الكاتب_ليث
الرواية كامله من( هنا )
