رواية الحب في الوقت المناسب بقلم زينب محروس
رواية الحب في الوقت المناسب الفصل الحادي عشر 11
_ خبر الحمل مش مشكلة، كدا كدا انفصلت عن مراتك، يبقى ايه اللي هيمنع الخطوبة؟
خرج صوت إيهاب بنبرة من الحزم:
_ انا اللي همنعها، مروة أكيد لما تعرف مش هتوافق، و أنا مش هبني حياتي على كذبة!
لامته شهيرة بحزن:
_ أنت بتعمل في نفسك كدا ليه يا ابني؟ بتصعب الأمور على نفسك ليه!!
إيهاب بتكشيرة:
_ انتم اللي صعبتوها عليّ يا ماما، كالعادة قررتوا من نفسكم تخبوا عليّ إن سما حامل، من غير ما حد يفكر قد ايه خبر زي ده مهم بالنسبة لي!!
تدخل والده بلهجة تهكمية:
_ كنت هتعمل ايه يعني؟ كنت هتكمل مع سما!!!
انشغل عقله في البحث عن رد للسؤال، فقال والده باستعجال:
_ ما ترد، ساكت ليه؟
رد إيهاب بتوتر:
_ مش عارف يا بابا، كان ممكن أكمل و كان ممكن لاء.
اتنهد والده بقلة حيلة و قال:
_ طالما كدا يبقى أنت مش لازم تاخد خطوة في حياتك مع مروة.
انسحب الوالد من القاعدة، ف اتحركت شهيرة و قعدت جنب ابنها و نطقت بأسلوب رزين:
_ أنت فعلاً محتاج تفكر يا إيهاب، عشان متظلمش حد معاك، عايزة اقولك إننا فعلاً غلطنا باتخاذ القرارات نيابة عنك بس دا خلاص بقى ماضي يا إيهاب، اللوم علينا مش هيفيد بحاجة، عشان كدا لو أنت فعلًا عايز مروة يبقى تعرفها موضوع حمل سما و خدوا قراركم بشأن علاقتكم سوا، بلاش تختار بدلًا عنها.
★★★★★★★
كانت نتيجة تفكيره هو إصراره على إكمال الخطوبة من مروة، و عشان كدا اتكلم معاها و هي لما عرفت إن هيبقى عنده طفل بعد كام شهر، مزعلتش و لا انسحبت، بل هي كمان صممت تكمل معاه، و قدرت بأسلوبها المميز تقنع والدها اللي اعترض على الخطوبة بعد معرفته بخبر الحمل.
و بالفعل الأمور مشيت على خير و اتخطبت مروة لإيهاب، و لأول مرة بدأ إيهاب يعيش حاجة من اختياره، و كانت مروة فعلاً شخصية بتحترم الشريك اللي معاها و مكنوش بيعملوا اي حاجة في شقتهم غير لما يكونوا موافقين هما الاتنين، و الاتنين كانوا مبسوطين جدًا.
الممنوع دايمًا مرغوب و تقريبًا هو دا اللي حصل معاهم، لأن بمرر شهرين فقط بدأ إيهاب يفتقد السعادة الغامرة اللي حس بها في أول علاقتهم، و بقى وجود مروة في حياته شيء عادي مفهوش حماس، يعني مبقاش يتكلم معاها كتير و لا يزورها كتير و لا حتى بقى بيحب يشرب القهوة.
و هنا بقى قدر يفهم إن مشاعره فعلًا كانت انبهار زي ما هاني قال، بقى فاهم إنه انبهر ب مروة عشان لقى فيها الشيء اللي هو مفتقده و بيدور عليه، لكن الحقيقة هو محبهاش، هو حب أسلوبها اللي لما اكتفى منه زال الانبهار و الحب الوهمي.
الساعة عدت أربعة الفجر و هو لحد دلوقت مش عارف ينام، و أخيرًا اتصل على هاني اللي فصل الخط في أول محاولة، و رد في المرة التانية، و اتكلم بصوت نعسان:
_ ايه يا إيهاب؟
إيهاب بزعيق:
_ قوم بسرعة و ركز معايا.
هاني اتخض من نبرة صوته، فقام بسرعة و سأله بقلق:
_ المديرية بتولع و لا ايه؟
إيهاب بضيق غير مبرر:
_ دا أنا اللي هاجي أولع فيك، بقى يا عديم الدم جايلك نوم و أنا مش عارف أنام!!!
اتسعت عيونه بذهول:
_ أنت متصل الساعة أربعة الفجر عشان تقول كدا!!!
_ لاء مش عشان كدا، في حاجة تانية.
هاني بانتباه:
_ حاجة ايه؟ ايه اللي حصل؟
_ مش مبسوط، و مخنوق و مش عارف أنام؟
سأله هاني بتخمين:
_ ليه اتخانقت مع خطيبتك؟
إيهاب زفر بضيق:
_ مش بنتكلم أصلا عشان نتخانق! طلع معاك حق.....
بدأ إيهاب يشرح الوضع و إنهم من اكتر من أسبوع مش بيتكلموا و محدش فيهم بعت رسالة حتى عشان يطمن على التاني، سأله هاني بفضول:
_ و ناوي تعمل ايه دلوقت؟؟
إيهاب بهدوء:
_ هنفصل عن مروة، هقابلها واتكلم معاها.
اتنهد هاني و قال بجدية:
_ كنت عارف إن دا هيحصل، أنت قلبك ذوقلك الموضوع عشان لاقيت فيها الصفة اللي اتمنتها، بس أنا سيبتك تجرب عشان متحسش إنك خسرت حاجة.
إيهاب بتردد:
_ بس انا خايف مروة تزعل، مش عايز اكون شخص وحش.
_ هتبقى وحش فعلًا لو كملت معاها و انت مش مقتنع بحبها و لا بها، هتزعل شوية بس هتروق بعدين و دا هيبقى أحسن لكم انتم الاتنين.
★★★★★★
كانت ماسكة قلم و بتشخبط في ورقة بعقل شارد، قربت منها ملك اللي بقت شاريكة شغلها، ضربتها على كتفها بخفة و قالت:
_ سرحانة في ايه يا كتكوته؟
انتبهت لها مروة، و ابتسمت بسخرية:
_ في الكتكوت اللي ناسيني.
_ إيهاب؟
ابتسمت اكتر:
_ صاحب العلاقات الهباب، تعتقدي علاقتنا دي هتنجح!
_ ليه بتقولي كدا؟ متخانقين و لا ايه؟
_ أبدًا، بقاله اسبوع مش بيكلمني.
_ طيب ما تكلميه أنتي؟
اتنهدت و رمت القلم من أيدها:
_ و الله يا بنتي زهقت، كنت بحاول أكلمه انا لما بدأت أحس بفتور من تجاهه، لكن هو كان بيرد على قد الكلام و كأنه بيكلمني بالقطارة، و مبقاش في مواضيع نتكلم فيها كأن كل المواضيع خلصت، و بصراحة أنا محبتش أحس نفسي تقيلة على حد، عشان كدا أنا كمان مبتقش اتصل و لا ابعت رسايل.
حاولت تنصحها ملك:
_دا خطيبك يا بنتي، و بعدين ما تشوفي يمكن تكون حاجة مزعلاه و يكون هو من النوع اللي بيحب يعيش حزنه مع نفسه و ياخد جنب من اللي حواليه وقت زعله!!!
تغاضت مروة عن كلام ملك، و مررت سؤالها:
_ تعتقدي هنكمل؟
_ أكيد هتكملوا، و إلا مكنتوش عرفتم بعض و هو متجوز، و حبك و حبتيه و اتخطبتم!! لو مش نصيبك كان القدر هيحطكم في طريق بعض ليه؟؟
ردت مروة بغموض:
_ حتة القدر دي بتاعة ربنا سبحانه و تعالى، ملناش نعترض عليها و لا نقول ليه، بس اللي أنا اعرفه فعلاً إن النصيب مش لازم يبقى جواز بس، ممكن يكون نصيبنا من بعض إن حد فينا يكون درس للتاني، أو ممكن يكون وجودنا في حياة بعض في فترة معينة بيبعد عننا بلاء أو حاجة مش نصيبنا.
في اللحظة دي وصل إيهاب اللي سلم عليهم بابتسامة تكلفية، و لما كانت مروة هتحضر له القهوة، اعترض لأول مرة و دا خلاها تستغرب جدًا لكنها معلقتش، فهو قال بجدية:
_ ممكن نتكلم شوية يا مروة؟
انسحبت ملك بحجة إنها هتهتم بالزباين اللي كانوا على وشك المغادرة، بدأ كلامه بسؤاله عن أخبارها، فردت عليه ببعض الحزن:
_ الحمدلله بخير، أنت كويس؟
اكتفى بحركة من دماغه، و سكت لثواني و هو بيفكر يتكلم و لا لاء، فهي شجعته بسؤالها:
_ عايز تتكلم معايا في ايه؟ حصل حاجة.
بلع ريقه بتوتر و استجمع شجاعته:
_ أنا مش عايزك تزعلي مني.....
قطع كلامه لما فقد ترتيب الكلام، فهي ابتسمت وقالت:
_ تقصد يعني عشان مش بنتكلم من فترة؟ عادي و لا يهمك، أنا عارفة إنك مضغوط في شغلك.
غمض عيونه و هو حاسس إن حد بيحط أحجار تخل توازن تنفسه و تشل تفكيره و تخنق الكلمات اللي عايز يقولها، و هي لاحظت إنه فعلاً مش كويس فسألته بفضول:
_ شكلك عايز تقول حاجة تانية.
سحب نفس طويل و قال بجدية:
_ خلينا ننفصل يا مروة.....
"مش سهل حياتك تتأسس على شخص ما، و في لحظة تلاقي وجوده بقى طيف
و إن كان موجود أوبشن لبقاء، فمن المحتوم الوضع مخيف
★★★★
يتبع...
