رواية نور عبر روايات الخلاصة بقلم إيمان شلبي
رواية نور الفصل الأول 1
-نعم يافندم حضرتك بتهزر عايزني اتنكر واعيش وسط عصابة!
-ايه بهزر دي ياحضرة الرائد؟
قالها وهو بيهبد علي المكتب فأتنفضت من مكاني وانا ببلع ريقي بتوتر وبحاول اصلح الكارثة
-ا انا اسفة بس بس يعني حضرتك أنا اتفاجأت الحقيقة و....
اخد نفس عميق وهو بيطرقع دماغه يمين وشمال بعدها قال بجدية وحِدة:
-في شقة معروضة للأيجار في نفس العمارة في وش الشقة المشبوهة بالتحديد،هتروحي زيك زي اي مستأجر تشوفي الشقه تبدي إعجابك الشديد بيها تدفعي المبلغ المطلوب وتسكني
-وبعدين ؟!
بص قدامه بغموض وهو بيقول:
-الباقي عليكي يا حضرة الرائد!
-بمعني؟
-هفهمك
***************************
-بقي انا انااااا حضرة الرائد ريم الابنودي اتنكر في هيئة ست خليعة؟؟
كنت متغاظة،دمي محروق،عروقي هتنط من مكانها وانا بفتح شنطة هدومي اللي كان كلها لبس بشع،مش ذوقي
مش شبهي
مش انا اللي المفروض اقدم المهمة دي من الأساس
خليعة؟؟
ست خليعة هتروح تشغل العصابة علشان تطلع بأي معلومات،انا ايه بس ياربي اللي دخلني كليه الشرطة،ايه اللي خرجني من بيتي بس،كنت قاعده في بيت ابويا ملكة متوجة،انا اللي اخترت اكون ست قويه ومستقله و...هو انا لو عيطت دلوقتي هيجرا حاجه ؟ والله ما هيجرا حاجة
قعدت علي طرف السرير وبدأت اعيط،مكانش عياط طبيعي،كنت بعيط بحرقة،لأول مرة احس اني ضعيفه بالشكل ده،يمكن لاني لاول مرة اتدبس في مأمورية لوحدي بدون مساعدة،مأمورية مطلوب مني فيها اعرف كل التفاصيل الصغيره قبل الكبيرة،حسيت اني في ضغط وخطر،يمكن انا قويه في نظرهم بس الحقيقه انا ضعيفة،انا بخاف،انا عايزة اهرب من المكان ده حالاً
فجأة الباب خبط،مسحت دموعي بسرعة،اخدت نفس طويل،حطيت طرحة فوق راسي بطريقه عشوائية وخرجت من الأوضة روحت نحيه الباب
"مساء الاناناس علي اغلي الناس"
رفعت حاجبي وانا ببص للشخص اللي واقف قدامي من فوق لتحت بأحتقار
-افندم اتفضل؟!
رد وهو بيغمز بوقاحة:
-انتِ الساكنة الجديدة!
بلعت ريقي ورديت بنبرة حاولت متبقاش مهزوزة:
-ايوه خير حضرتك
بص جوا الشقه وهو بيعمل حركات مُريبة بوشه خلي قلبي يتنفض من مكانه بس اضطريت اسأله بحدة رغم خوفي
-خير ياحضرة في حاجة؟
قرب خطوة وقال بنبرة مُريبة:
-الصراحة محتاج مساعدتك في حاله إنسانية
بلعت ريقي وحاولت ارد بثبات:
-م محتاج مساعدتي في ايه بالظبط؟
-اعرفك بنفسي سعيد كحرته جارك في الشقة اللي تحت عندي 30 سنة،اعزب،و.....
-استاذ سعيد السجل المدني مش هنا حضرتك انا مش هطلعلك بطاقة!
-بتقفشي ليه بس يا مدام ده انا....
قاطعته بغيظ:
-انسة من فضلك
بصلي بصة حمدي الوزير وهو بيسند دراعه علي الباب:
-هي الرجاله اتعمت ولا ايه
رديت ببلاهة:
-ليه؟
-ازاي واحدة زي القمر زيك لسه متجوزتش
غمزلي بعيونه فأتوترت وانا ببص يمين وشمال:
- ا ا هو حضرتك كنت عايز ايه؟!
قرب مني خطوه تانيه فرجعت لورا وقلبي هيخرج من مكانه:
- عمار ابني يا آنسة
قولتيلي اسمك ايه؟؟
رديت بسخافة وانا ببتسم ابتسامة مصطنعة:
-مقولتش اصلا!
رد بأحراج وهو بيمسح علي ذقنه:
-آ اه ما علينا المهم ابني عمار لا بياكل ولا بيشرب وانا مش عارف اعمل ايه؟
رديت بتلقائية:
-جربت تجبله دواء فتح الشهيه!
-ولا عمل اي حاجة
-طب جربت تروح للدكتور
-روحت لدكاترة كتير وبرضو مفيش فايدة
سكت شويه بتفكير بعدها ادركت أنه لا الوقت المناسب ولا المكان المناسب للأجتماعية اللي عندي!
-طب يا استاذ سعيد وانا مطلوب مني اعمل ايه؟
-تتجوزيني اصل الواد من وقت ما شافك في البلكونه وانتي طالعة العمارة عمال يقولي ماما ماما ماما اصل ياعيني عليه أمه ماتت وهي بتولده و......
"انت مش هتطبل حركاتك الرخيصة دي ياسعيد يا كحرتة مع أي واحدة بتسكن جديد!"
قالها شخص فجأة وهو بيفتح باب الشقه اللي في وشي مباشرة
اتنفضت مع خروج شهقة بسيطة مني وانا ببص نحيته وبحط ايدي فوق قلبي بخوف
-جرا ايه يا عم انت علي طول كده هادم اللحظات الرومانسية والعواطف الجياشة؟!
رديت بذهول:
-عواطف جياشة ايه يابني آدم براس بخاخة انت!
ربع الشاب أيده وقال بهدوء وثبات:
-انزل ياسعيد روح شوف مراتك
-مراتك نهار اسود انت طلعت متجوز؟؟
بصلي الشاب ورد بسخرية:
-ومش بس كدة عنده خمس عيال
شهقت بعنف بعدها اتحولت وانا بزعق فيه بعصبية:
-تصدق انك راجل عرة يعني متجوز وعندك عيال وجاي تعمل عليا حوار ده انا هفضحك ومراتك هتعرف و.....
-للأسف مراته مش هتقدر تعمل حاجة أصلها تعبانه في غيبوبة بقالها سنة،ضحت بنفسها عشان يعيش
ابتسم بسخرية ومرارة وهو بيكمل:
-كان متخانق مع شويه عيال بلطجية وفي وسط الخناقه كان واحد هيغزه بس علي أخر لحظة هي اخدت الضربه مكانه واهي بتاخد جزائها دلوقتي خيانه وقرف وقله تقدير
اتغاظت،دمي كان بيغلي جوايا،عيوني لمعت بالدموع
وانا بتخيل نفسي مكانها،بتخيل بعد الحب والمشاعر والتضحية يكون ده جزائي،خيانه،قله تقدير،راجل معندوش مشاعر،راجل مستعد يتجوز واحد واتنين وتلاته يحب يعيش حياته يخلف وانا في مكاني،عايشه لكن ميته،بتنفس بسمع وبحس بكل حاجة لكن مش قادره انطق
وقتها محستش بنفسي غير وانا بمسك زهريه كانت قريبه مني وبكسرها فوق دماغه
وقع علي الارض فوراً وهو بيأن بوجع وبينزف
-يخربيتك ايه اللي انتِ هببتيه ده
قالها الشخص اللي كان واقف علي باب الشقه وهو بيجري نحيته،وقتها حسيت دماغي بتلف،الرؤية بدأت تنعدم
مسكت في الباب جامد لكن مقدرتش اقاوم،استسلمت
ووقعت علي الارض واخر صوت سمعته قبل ما السماعة تقع من ودني صوت "عصام باشا" في اللاسلكي وهو بينادي بأسمي
يتبع...
