رواية سفاح الجيزه بقلم محمد مهني
رواية سفاح الجيزه بقلم محمد مهني
من حوالي سنتين اتعرض مسلسل اسمه "سفاح الجيزة" على منصة شاهد،
المسلسل ده عمل ضجة كبيرة وقتها لأنه بيحكي عن قصة حقيقية مرعبة حصلت فعلاً في مصر!
النهارده هاخدكم في رحلة مرعبة أوي مع واحد من أذكى وأخطر المجرمين اللي عرفهم التاريخ الحديث...
الراجل اللي عاش سنين بين الناس بأسماء مزيفة، ودفن ضحاياه جوه شققهم...
اسمه الحقيقي قذافي فراج، والكل عرفه باسم:
💀 سفاح الجيزة 💀
قذافي كان مجرم ذكي ودارس قانون في كلية الحقوق،
وده اللي خلاه يفلت من العقاب لمدة خمس سنين،
لأنه كان كل ما يعمل جريمة يتخفّى باسم جديد وببطاقة جديدة.
قذافي كان من سكان الجيزة، وكان عنده مكتبة،
وكانت شغالة عنده بنت اسمها نادين.
دخل معاها في علاقة غير شرعية، وبعد فترة حبّ أختها وعايز يعمل معاها علاقة زي أختها،
لكن أخت نادين رفضت وقالت له: "عايزني؟ تعالى اتقدم لي!"
قذافي ما كدبش خبر وقرر يتقدم، لكن لما نادين عرفت عملت معاه مشكلة كبيرة وهددته إنها هتفضحه.
فـ قذافي استدرج نادين عنده في الشقة اللي في منطقة بولاق عشان "يحلوا المشاكل"،
ولما راحت له، شربها عصير كان فيه سم.
البنت لما السم دخل جسمها وقعت على الأرض وفضلت تتألم،
وقذافي راح ضربها بآلة حادة لحد ما ماتت.
وبعدها حفر في أوضة الشقة ودفنها، وراح بلّط الشقة تاني كأن مافيش حاجة حصلت!
وبذكاء، مسك تليفونها وفبرك محادثات بينها وبين شاب على إنهم على علاقة،
وراح اداها لأهلها وقالهم إن بنتهم هربت مع الشاب ده على دبي عشان تشتغل في التمثيل!
أهل نادين صدقوه فعلًا…
ومش كده وبس، ده كمان اتجوز أخت نادين،
لكن ما عاشوش مع بعض كتير وانفصلوا.
بعد كده قذافي كان ليه صديق من الطفولة اسمه رضا،
كان شغال بره مصر ومعاه فلوس كتير.
قذافي اتصل بيه وأقنعه يستثمر فلوسه في العقارات،
ورضا صدقه وبعت له مبلغ كبير، وكمان عمل له توكيل يتصرف في أملاكه في مصر.
بعد فترة، رضا شك إن فيه حاجة غلط وقرر ينزل مصر.
ولما قابله، قذافي دعاه لبيته عشان "يصفّوا الحسابات"،
لكن الحقيقة إنه كان مرتّب للجريمة التانية…
شربه عصير وأكله مسموم، وبعدها ضربه بآلة حادة.
ولما مات، حط جثته في شنطة كبيرة ونقلها لشقته في بولاق،
وحفر في نفس الأوضة اللي دفن فيها نادين، ودفن فيها رضا كمان!
وبعدها بعت لأهل رضا من رقم مجهول على إنه رضا،
وقال في الرسالة إنه "اتقبض عليه في مظاهرة ومش عارف هو فين"!
أهله فضلوا يدوروا عليه في السجون ومفيش أي أثر،
وعملوا بلاغات كتير باختفاءه.
قذافي في الوقت ده انتحل شخصية صاحبه رضا،
زوّر أوراق باسمه وعاش باسمه، واتجوز ست اسمها فاطمة.
عاش معاها 6 شهور، ولما اكتشفت بالصدفة بطايق كتير بأسماء مختلفة،
عرفت إنه نصّاب وهددته إنها هتبلّغ عنه، فقتلها!
قذافي كان ساكن في شقة رضا اللي قتله،
لحد ما ظهرت أخت رضا اللي ما كانتش بتفقد الأمل في البحث عن أخوها،
كانت بتروح تشوف أي جثة مجهولة يمكن تكون جثة أخوها.
ولما عرفت إن رضا كان ليه صديق اسمه قذافي، بدأت تسأل عليه،
ولما اكتشفت إنه عايش في شقة أخوها، استغربت جدًا!
سألت ليه عايش فيها؟ أهلها قالولها إنه اشتراها من رضا قبل ما يختفي.
وقذافي قالهم إن رضا "اتقبض عليه في مظاهرة ومش عارف هو فين".
قذافي حِس إن العيون بدأت تتركز عليه، فهرب على إسكندرية،
وهناك بدأ من جديد…
اتجوز واحدة باسم "رضا" وفتح محل أجهزة كهربائية،
واتعرف على ست وأوهمها إنه بيحبها واتجوزها،
وخلاها تبيع بيتها القديم وتديه الفلوس (45 ألف جنيه).
ولما طلبت الفلوس، قالها: "خدي بيها بضاعة"،
خدها للمخزن وهناك قتلها ودفنها في المخزن!
وبعد فترة، اتجوز دكتورة صيدلانية وخلف منها طفل،
وعاش حياة مستقرة لحد سنة 2019،
لحد ما قرر يسرق فيلا أبو مراته!
لبس نقاب ودخل الفيلا وسرق دهب وفلوس بـ750 ألف جنيه،
ولما فرّغوا الكاميرات شافوا ست منتقبة خرجت ومعاها شنطة،
وبعدها دخل نفس المكان وخرج قذافي ومعاه نفس الشنطة!
اتقبض عليه واتحاكم بسنة سجن باسم "رضا".
ولما حاول يهرب من المحكمة، خد 3 شهور كمان،
وفي الوقت ده أخت رضا لقت محضر في قسم سيدي جابر بالإسكندرية،
ولما راحت شافت المتهم، اكتشفت إنه مش أخوها رضا… ده قذافي صديقه!
قذافي أصر قدام الكل إنه "رضا"،
لكن بعد تحليل DNA واعترف بكل جرائمه بنفسه،
وقع أخطر وأذكى سفاح في مصر!
الشرطة اكتشفت إنه انتحل 7 شخصيات بعد ما قتل أصحابها،
واتحكم عليه بـ7 أحكام إعدام،
وهو دلوقتي منتظر تصديق رئيس الجمهورية لتنفيذ الحكم.
تتخيلوا الذكاء راح بيه لفين؟
يقتل، ويزوّر، ويعيش باسم الضحية نفسها!
كل الناس اللي عرفوه قالوا نفس الجملة:
> "مش مصدقين إنه يعمل كده… كان طيب جدًا!"
انت ممكن يكون عايش جنبك سفاح…
بس انت ما تعرفش حاجة!
#محمد_مهني
#القصة_الحقيقية_لسفاح_الجيزة
#سفاح_الجيزة
