رواية مهد القدر الفصل العشرون 20 بقلم ملك سعيد
رواية مهد القدر الفصل العشرون 20 بقلم ملك سعيد
قراءة ممتعة ❤
_______________
دخلت نور زي الإعصار لأوضة قدر ووراها فارس ، انتفضوا عز و قدر من الخضة ، قدر لما شافت نور فرحت جدا لإنها كانت مشتاقة ليها ونور جريت عليها و حضنتها جامد ، علاقة نور و قدر مش علاقة صداقة عادية لا دي علاقة اخوة
عز بص لفارس باستغراب من الموقف الي بيحصل و فارس فهم من ملامح وش عز انه مش فاهم حاجة فقرب منه ومال علي ودانه وقاله بصوت واطي : نور بنت خالتي .... ومن الصدفة طلعت ال بيست لحبيبتك
هز عز راسه باستغراب و نقل نظره ل قدر و نور الي لسه حاضنين بعض وابتسم بحنان وهو شايف فرحة قدر
خرجت نور من حضن قدر و مسكت وشها وقالت بدموع : كنتي فين طول المدة دي .... إنتِ متتخيليش كنت خايفة عليكي قد إيه؟!
قدر بابتسامة بتمسك إيد نور الي علي وشها وقالت : اهدي يا نور و أنا هقولك كل الي حصلي
بتقعد نور علي الكرسي الي جنب سرير قدر وبتقول بفضول لسماع الي حصل مع قدر : كلي أذان صاغية
قدر بصت لعز بابتسامة كلها حب و بدأت تحكي ل نور كل الي حصل
♥ ❥ ♥ ❥ ♥
فهد بغضب : إزاي هرب منكم ... عز باشا مش هيسكت عن اهمالكم ده
الضابط : استاذ فهد احنا لما وصلنا للموقع الي خطف مراد فيه الآنسة قدر .... كان البيت بيولع و اضطرينا نستني لحد ما تيجي المطافي .... وبعدها دخلنا نقبض علي مراد بس ملقيناش ليه اثر
فهد بقلق : طب كده ممكن مراد يحاول يأذي قدر مره تانية
الضابط بتأكيد : ده مش ممكن ده اكيد
فهد بص للضابط وقاله بنبره لا تقبل النقاش : تقلبوا عليه الدنيا .... قبل ما يفكر يأذي قدر .... وإلا أنا مش مسؤول عن الي هيعمله فيكم عز .... وإنت عارف كويس مين هو عز السيوفي
الضابط خاف من كلام فهد لإنه عارف عز السيوفي ومكانته الكبيرة فحاول يخفي توتره و قال بثبات ظاهري : أكيد يا استاذ فهد .... احنا هنعمل كل جهدنا علشان نلاقي مراد ... ولو وصلنا لأي جديد هتصل بيك
فهد قام وقف وقال : وأنا مستني اتصالك
خرج فهد برا القسم و ركب عربيته و مسح علي وشه بتعب وقال : أكيد عز باشا مش هيعدي الي حصل علي خير .... وخصوصًا لو عرف إن مراد هرب
.... بس لازم انه يعرف الحقيقة علشان يعمل حسابه لأي هجوم من مراد
بيتحرك فهد بعربيته وبيتجه لفيلا السيوفي
♥ ❥ ♥ ❥ ♥
_ سيف قاعد في اوضته وبيفكر في ندي ومش عارف يشيلها من راسه و قرر يكلمها علي التليفون
مسك تليفونه وجاب رقم ندي وكان متردد انه يضغط علي زر الاتصال بس نهي تردده واتصل عليها
_ ندي كانت بتقرأ كتاب ومندمجة فيه ، وقطع اندماجها صوت رنين تليفونها
مسكت تليفونها ولقت المتصل سيف قلبها دق بسرعة لما شافت اسمه ، حطت إيديها علي قلبها
واتنفست بسرعة وهي بتقول : اهدي يا ندي .... كل ده بيحصل ليكي من اتصال .... اومال لو رديت إيه الي هيحصلي
بصت للتليفون الي في إيديها وقررت ترد
فتحت ندي المكالمة وردت ولسه هتتكلم سبقها صوت سيف وهو بيقول : قبل ما تقولي أي حاجة .... حبيت اقولك اني جبت اخري من الانتظار .... وفي اقرب وقت هاجي مع عيلتي و اطلب إيدك
اتصدمت ندي من كلامه
بقي عامل زي حبة الفراولة من الخجل ومبتردش عليه من كسوفها
فهم سيف انها اتكسفت منه فبيبستم وبيقول بمشاكسة : كان نفسي ابقي قدامك وأنا بقولك الكلمتين دول .... ومضيعش عليا شوفتك وانتي وشك زي الفراولة كده
ردت ندي بكسوف : بس يا سيف
سيف حط إيده علي قلبه بحركة درامية وقال : يا عيون وقلب سيف
اتكسفت ندي أكتر ف معرفتش تعمل إيه غير انها تقفل المكالمة في وشه وبتاخد التليفون في حضنها بفرحة
_ إما سيف بيتصدم لما يلاقيها قفلت المكالمة وقال وهو بيبص للتليفون بابتسامة : حبيت مجنونة أنا .... بس وعد انك في اقرب وقت هتكوني ليا
♥ ❥ ♥ ❥ ♥
في بيت مهجور قاعد مراد علي الكرسي وماسك في إيده كيس التلج وحطه علي وشه وبيتألم بسبب الضرب الي خده من عز
وواقف جنبه مساعده الشخصي ماجد
مراد بتوعد : مش هرحمك يا عز ... وموتك علي إيدي
ماجد : مراد باشا أنا هموت و اعرف إزاي عز قدر يعرف المكان الي كنت خاطف فيه قدر
مراد وقف بعصبية ومسك ماجد من ياقة قميصه قاله بتهديد : إياك تنطق اسمها فهمت .... اسمها ميجيش علي لسانك .... وياريت متنساش إن قدر عندي خط أحمر ..... مراد ساب ياقة قميص ماجد وقال :
بالنسبة لمعرفة عز المكان الي كنت خاطف فيه قدر .... فأنا متأكد إن مفيش غيره هيعملها
ماجد : مين يا باشا؟!
مراد وهو بيجز علي اسنانه : زياد .... هو المستفاد الوحيد من قتلي ... وأنا متأكد انه الي قال لعز بالمكان .... علشان يتخلص مني سواء دخلت السجن ... او عز قتلني .... علشان يلهف كل الاملاك .... بس أنا مش هسيبه وموته هيبقي علي إيدي
♥ ❥ ♥ ❥ ♥
نور بصت لعز وابتسمت ابتسامة بلهاء وقالت : بقي الواد الحليوة الي هناك ده يبقي مهد ... بتقولها نور وهي بتشاور علي عز بصباعها
عز بص لنور برفعة حاجب و بص لنفسه وقال باستنكار : عز السيوفي بقي واد!!
فارس و قدر كتموا ضحكتهم علي تعابير وش عز
ونور اتجاهلت كلامه و كملت كلامها و قالت لقدر : بس بصراحة يا بختك الواد مز اوي ... صبرتي و نولتي يا قدر
عز بص لفارس و قال بنفاذ صبر : لو ملمتش بنت خالتك أنا هلمها
رد فارس وهو كاتم ضحكته : هلمها بعدين ... بس دلوقتي هسيبها تكمل كلامها لإنها بتضحكني اوي
بصله باستحقار وقال: تافه من يومك
وبعدين بيوجه كلامه لقدر و بيقول : احنا هنسيبكم تتكلموا براحتكم ... ونخرج نقعد برا ... لو احتاجتي حاجة ناديلي
ابتسمتله قدر بحب و خرج عز و فارس برا الأوضة
فقالت نور بتريقة : إيه المحن الي كان بيحصل من شوية ده!!
ضربتها قدر علي كتفها بغيظ وقالت: نور اتلمي .... واصلا إنتِ إزاي تعاكسي مهد قدامي
نور بتمثيل الحزن : صحيح من لقي احبابه نسي اصحابه
وبيكملوا كلامهم الي مبينتهيش من تريقة نور علي قدر و عز
♥ ❥ ♥ ❥ ♥
بعد ما عز و فارس خرجوا
اتجه عز لأوضة الدكتور الي هيعمل تحليل DNA
ووراه فارس الي مش فاهم حاجة
بيسأله فارس باستغراب : إنت رايح فين؟!
عز : هنعمل تحليل DNA
فارس بتريقة : وده بيتعمل من غير دم و لا شعرة و لا إيه بالظبط؟!
وقف عز وبصله ببرود وقال
: ما هو أنا مش غبي زيك .... سيف قبل ما يمشي خدت منه شعره علشان التحليل .... ولما كنت مع قدر خدت منها شعره من غير ما تحس
فارس بمشاكسة: اه يا خبيث .... خدتها إزاي؟!
عز بضيق : هو ده وقته احكيلك؟!
سابه عز ولحقه فارس وهو بيجري
دخل عز مكتب الدكتور واداله شعرة قدر وقاله
: كده تقدر تعمل التحليل .... ياريت تسرع لإني عايز النتيجة بكره
الدكتور بعملية : بكره بالكتير و النتيجة هتطلع ... وأنا هتواصل معاك لما تظهر النتيجة
مد عز إيده للكتور والدكتور سلم عليه
و عز قاله : شكرا يا دكتور .... وأنا هكون منتظر اتصالك
خرج عز و فارس من المكتب و بيتجهوا لأوضة قدر
♥ ❥ ♥ ❥ ♥
ياسين دخل أوضة قدر ولقي قدر و نور قاعدين بيتكلموا
ياسين باستغراب : نور !! .... إنتِ بتعملي ايه هنا .... وعرفتي ازاي ان قدر في المستشفي
نور لسه هترد عليه قاطعها صوت فارس وهو بيقول : أنا الي قولتلها
التفت ياسين وراه لقي فارس واقف جنب عز فقال باستغراب
: وإنت تعرف نور منين؟!
فارس بتريقة : من سوء حظي طلعت بنت خالتي
قامت نور بغيظ وحطت إيديها علي وسطها وقالت:
قصدك إيه يا فارس بسوء حظك ... إنت تطول اصلا اني بنت خالتك
فارس كان مبسوط انه غاظها بكلامه فقال : قصدك من تعاسة حظي انك بنت خالتي .... حد يحب إن بنت خالته تبقي بلوة و لا مصيبة
نور وجهت كلامها لياسين وقالت بغيظ : سامع يا عمو كلامه .... يعني لما اضربه متبقوش تنصدموا
ضحكوا كل الي في الاوضة عدا فارس و نور الي كانوا بيبصوا لبعض بنظرات غيظ
قاطع نظراتهم صوت ياسين وهو بيقول : بس بقي يا ولاد ... بطلوا خناق ..... وبص لقدر و قال : انا سألت الدكتور إن قدر تقدر تخرج من المستشفي ووافق
قدر بفرحة : ايوا كده أنا اصلا مش بحب جو المستشفيات يلا خرجوني
عز ضحك علي طريقة قدر في الكلام و قالها : نخرجك فين بلبسك ده .... استني لما نجيبلك هدوم تلبسيها
قدر بتذمر : يعني أنا لسه هستني
فارس : لاء مش هتستني أنا هاخد نور و نروح نشتري ليكي هدوم من اي مكان
عز بص لفارس برفعة حاجب وقال : اي مكان الي هو إزاي .... أنا هتصرف وهجيب احلي هدوم لقدر .... وبص لقدر وقال بابتسامة: قدري ميلقش عليها غير الغالي وبس
همست نور بصوت واطي وصل لقدر : أنا قولت إيه المحن ده محدش صدقني
ضربتها قدر بكوعها في وسطها وبصتلها بغيظ
ردتلها نور نفس نظرة الغيظ
وبعد ساعتين وصلت هدوم قدر الي طلبهالها عز
ونور ساعدت قدر في اللبس وبعد مدة خرجوا من المستشفي واتجهوا لفيلا الصباغ
♥ ❥ ♥ ❥ ♥
زياد قاعد في اوضته ورايح جاي وبيفرك فروة راسه وهيتجنن ويعرف مراد راح فين وإزاي هرب من الشرطة او الحريقة
وقال بضيق : هيكون راح فين يعني .... طب لو هرب ليه متصلش بيا لحد دلوقتي .... معقول يكون عرف اني الي قولت لعز بالمكان الي خطف فيه قدر .... لو عرف أكيد بيفكر يأذيني .... يا تري هيعمل فيا إيه المجنون ده؟!
: أنا هقولك المجنون ده هيعمل فيك إيه
♥ ❥ ♥ ❥ ♥
في فيلا الصباغ مجتمعين قدر و ياسين و عز و فارس و نور
وعز و قدر بيسرقوا بعض النظرات مع بعض من غير ما حد يلاحظهم
و فارس و نور قاعدين جنب بعض ومش محتاجة اقولكم انهم مش طايقين بعض بمعني الكلمة
وياسين قاعد يراقبهم بحب
وبعد مدة استأذن عز و فارس علشان الوقت اتأخر ولازم يمشوا
اعترض ياسين علي انهم يمشوا بس مع اصرار عز وافق انهم يمشوا مع وعد انهم ييجوا بكره
خرجت قدر مع عز و فارس و نور علشان تودعهم
وحضنت نور وقالتلها : أنا مستنياكي بكره .... متتأخريش عليا
نور : هو أنا اقدر .... وبتبص بطرف عينيها علي فارس وبتقول لقدر : همشي أنا بقي لإن لو فضلت ثانية اكتر من كده دراكولا هيهب فيا .... أنا عارفاه مجنون
ضحكت عليها قدر و قالتلها : طب والله مفيش غيرك مجنون هنا
نور : هنتناقش في موضوع مين المجنون ده بكره يلا باي
قدر : باي
عند عز و فارس
فارس : همشي أنا بقي مع المصيبة دي
عز : ربنا يكون في عونك بجد .... دي مش مصيبة دي بلوة واتحدفت عليك
فارس : ادعيلي يا صاحبي
عز بتريقة : بدعيلك في كل صلواتي
ركب فارس و نور العربية ومشيوا
وفضل قدر و عز واقفين يبصوا لبعض نظرات طويلة مليانة حب
عز كان واقف وساند علي عربيته وكان فيه مسافة بين عز و قدر فقطعت قدر المسافة و قربت من عز و هي بتبص لعينيه بتوتر و بتفرك ايديها ومكسوفة تكلمه
انتبه عز لحركة ايدين قدر وبصلها بحب
اتعدل وقرب منها مسك إيديها بين إيديه وقال بابتسامة هادية : ليه كل التوتر ده .... متنسيش اني مهد الي كنتي دايما مجنناه ومطلعه عينه .... مش عز السيوفي .... يبقي تتكلمي معايا من غير توتر فهمتي؟؟
هزت قدر رأسها وقالت : تعرف اني لحد دلوقتي مش مصدقة انك واقف قدامي .... بعد كل السنين دي كلها
مسك عز وشها وقال : صدقي يا قدري و نصيبي .... من هنا و رايح مش هبعد عنك ابدا .... والي هيبعدني عنك هو الموت
قالت بسرعة : بعد الشر عليك
ابتسم ليها بحب وقال : للأسف هضطر امشي دلوقتي .... لإن لو فضلت أكتر ممكن اتهور .... قال آخر جملة بغمزة
قدر وشها قلب احمر من الخجل وبصت في الارض
عز بيلاقي وشها جاب الوان فبيضمها لحضنه و بيقولها بمشاكسة : إنتِ الي بتجريني للرذيلة بخدودك الحمر دول
قدر بخجل : عز اتلم
خرج من حضنها وقالها : خلاص يا ستي اتلميت ... ادخلي إنتِ علشان ترتاحي .... وأنا كمان هروح لإني هموت و انام
قدر بابتسامة: تمام .... تصبح على خير
عز بحب : وإنتِ من اهلي
دخلت قدر الفيلا وعز وقف لحد ما اطمن انها دخلت وركب عربيته واتجه ل فيلته و الابتسامة مش مفارقة وشه
♥ ❥ ♥ ❥ ♥
دخل عز الفيلا وهو بيصفر ، لقي فهد قاعد مستنيه ، اول ما فهد شافه قام وقف بسرعة وقرب من عز و
قاله : عز باشا في موضوع مهم لازم تعرفه
عز باستغراب : ايه هو الموضوع الي مش هيقدر يستني للصبح ده
فهد بتوتر من ردة فعل عز : مراد .... مراد هرب قبل ما البوليس يمسكه
عز بعصبية : ______
♥ ❥ ♥ ❥ ♥
البارت 1852 كلمة فقدروا تعبي
وتفاعلوا يا حبايب ❤
#مهد القدر
#بقلمي ملك سعيد
دمتم سالمين ❤
لقراءة باقي فصول الرواية اضغط هنا ( رواية مهد القدر )
