رواية حوريات البحر بقلم مصطفي أيمن
رواية حوريات البحر بقلم مصطفي أيمن
عمري ما صدقت أن في حاجة اسمها حوريات بحر ولا مرة فكرت أصلًا ان الموضوع دا حقيقي بس واضح كدا أن القدر بدأ يثبتلي بأشياء لم نسمع عنها من قبل!!
يوم الأحد أول يوم عودة للدراسة كانت عودة للجحيم مش دراسة، بحكم شغلي في التدريس برجع بعد العصر اريح شوية و بعد المغرب اقوم اروح عند ابويا اساعده في شغله شوية ، ودايمًا ابويا مش بيبقى عنده شغل أصلًا كلام في سرك ابويا شغال شغلانا ترعب ، صاحب مركب صغيرة في الحجم، اوقات بيصتاد بيها سمك و اوقات تانية بيجيب بيها جثث!!!
الشيخ (ابراهيم) اللي هو ابويا كان بيحب يعمل الخير و دايمًا عندنا في البلد اي حد يتوه كنا بندور عليه في الترعة، هي ترعة اه بس غويطه و بتودي على حدفات توديك أخر الدنيا وليها دوامة لو دخلت فيها مش هتشوف النور تاني
يومها كنت قاعد أنا و ابويا بنشرب كوباية الشاي في عز الليل و بحكي أنا و هو عن مشاكل الحياة والشغل وخلاص كنت قربت اخد بعضي و اروح لكن دخلت علينا الست (فاطمة) بتصرخ و كل اللي عليها
- الحق ابني يا شيخ ابراهيم ارجوك الحقه
قمنا من مطرحنا مصروعين و قالها ابويا
- في أيه يا ست فاطمة مالك؟!!
- ابني مروان يا شيخ ابراهيم كان بيلعب هو و العيال الصبح على دفة الترعة و كانوا بيتراهنوا على اللي يغطس في المياه و نزل مطلعش لحد دلوقتي ابوس ايدك الحقه
- و كان بيلعب عند أني جهة يا ست فاطمة
- عند الشلال!!
كانت أكتر كلمة ابويا مش عايز يسمعها هي الشلال
الشلال دا بيحدف الجثث في مناطق بعيدة صعب انك توصل للجثة وبالذات لو ناوي تدور بليل
- طيب أرجعي بيتك أنتي يا ست فاطمة و أنا بعون الله هجيبه
- لا يا شيخ أنا مش همشي من هنا غير و أبني على أيدي أنا عارفة انه مات بس جثته في ايدي أحسن ما تبقى مرمية في المياه
حاولت اهدي الست فاطمة و أكدب عليها أننا ممكن نلاقي ابنها حي
بشوية كلام ميدخلش العقل بس بصراحة مستحيل يبقى حي ، على كلامها ابنها في المياه فوق الــ 13 ساعة يعني لو سباح ماهر زمانه مات!!
-ارجعي بيتك يا حجة فاطمة مينفعش تبقى في الشارع بليل كدا و اوعدك لو وصلنا لحاجة أنا و ابويا هجيلك على طول
وافقت بالعافية على كلامي و رجعت بيتها و بدأ ابويا يجهز العدة اللي بيبحث بيها على الجثث و بدأ يفك الحبل الخاص بالمركب ويطلع عليها و أنا طالع وراه
- أنت رايح فين يا مهران يبني
-ل هو أيه اللي رايح فين يابا طالع معاك طبعًا
- ارجع بيتك أنت أنا عارف طريقي كويس وشغلتي متشغلش بالك
- يابا ازاي بس هاجي معاك
- ارجع يبني متتعبنيش ابوس ايدك ارجع
سمعت كلام ابويا حرصًا على أنه تعبان ومش حمل اتعبه اكتر سلمت عليه قبل ما يتحرك بالمركب و بصراحة مروحتش البيت فضلت مستني يرجع تاني
عملت لنفسي كوباية شاي و ولعت سجارة وفضلت اشرب فيها ، خلصت السجارة و خلصت كوباية الشاي الأولى والتانية والتالتة لحد ما شربت خمسة
و مر تلت ساعات وابويا مرجعش ولا وهو معاه مروان ابن الست فاطمة ولا حتى لوحده!
يدأت اقلق بدأت احس بخوف شديد ليكون حصله حاجة، هو أه شاطر زي ما بيقول بس المياه دي ملهاش كبير غير ربنا، البني ادم مهما كان سباح بتغدر بيه، فضلت انتظر و جسمي كله عرق من كتر الخوف عليه بس هديت شوية لحد ما لاقيت المركب بتخبط في الدفة، قمت جري عليها و أنا بقول
- هاا ايه الاخبار لاقيته؟!!!
-!!!!!!!!!!!
للأسف مفيش رد و للأسف اكتر و المصيبة كمان أن المركب فاضية راجعة لوحدها بدون ابويا عليها!!!
- يا نهار أسود!!!
في اللحظة دي مترددتش و جريت بسرعة على المركب و لاحظت بقع دم موجودة!! زادت ضربات قلبي أكتر حسيت أني هفقد ابويا اتحركت بالمركب بسرعة لداخل البحر و أنا مش عارف هعمل ايه ولا هدور عليه ازاي فضلت ماشي في العتمة و مش معايا غير كشاف موبايلي اللي نوره بسيطة بالنسبة للعتمة الشديد اللي أنا فيها!!
كانت أول مرة احس بخوف كدا!! كل ما اتعمق للداخل أكتر اخاف اكتر بحر فظيع ملوش اخر وضلمة واصوات معرفش سبب وجودها ، صوت المياه كان مرعب بالنسبالي ، فضلت ماشي و أنا مش عارف رايح فين لحد ما لاقيت المركب وقفت بين اعشاب كتير و ورق شجر مهول وسط المياه ، مبقتش عارف اتحرك و لا قدام ولا ورا
بدل ما الحق ابويا اللي معرفش هوا راح فين بقيت مش عارف الحق نفسي من الورطة اللي أنا فيها، ضلمة و مياه و مركب دا كل اللي استحوذ عليه حاليًا و زاد عليهم صوت الحركة اللي بيحصل حوالين المركب!!
صوت حد بيتحرك حوالية!! المياه عمالة تتحرك كأن حد موجود بيراقبني ، فضلت اتلفت حوالين نفسي اتابع اصوات المياه و الحركة اللي بتحصل بس مش شايف من العتمة فضلت أنده على ابويا و معرفش كان هيرد عليا ازاي؟!!
و سط كل دا لاقيته!!!!!!
بس مش ابويا دا كان جثة مروان ابن الست فاطمة ، جثمانه على وش المياه حاولت بكل مقدرتي اقرب منه لحد ما قدرت اجيبه رفعت الجثة على المركب و اتخضيت من شكل وشه اللي كله ازرق بس مش دا اللي رعبني اللي خوفني أكتر العلامات اللي على جسمه خطوط سودة و مش كدا وبس دا اثار عضة في رقبته!!!
شكل العضة ميقولش خالص ان اللي عمل فيه كدا حيوان لأن اثار العضة و العلامات اللي موجودة بتقول أن دي اسنان بني ادم، معقولة يكون مرض الزومبي انتشر في البلد !!!
كلها توقعات ملهاش اثبات مادي أن اللي بقوله حقيقي بس ممكن دا يكون سببه أيه؟!
قبل ما افكر تاني في العلامات اللي موجودة على جسم مروان لاقيت المركب بتتسحب للخلف لوحدها لاء دا مش لوحدها دا في حد بيسحبها
بصيت ورايا بسرعة لاقيت في ايد ماسكة في المركب بس باقي جسم الشخص دي في مياه مش ظاهر جريت بسرعة ناحية الأيد دي و اتفاجئت من شكلها مش ايد طبيعية زي بتاعتنا لاء!
الفراغات اللي مابين الصوابع مش موجدة الجلد لازق في بعضه و الجلد كمان مش زي بتاعنا خالص دا عامل زي جلد السمكة!!!
حاولت اضرب الأيد اللي بتسحب المركب دي لحد ما سابتها
- انتوا مين؟!!! و فين ابويا!
كنت بقولها بحرقة جامد اوي، حسيت أني محاوط بخلق غريبة مش معروفة ، بدأت اسمع اصوات كتير حوالين المركب في حد موجود معايا بس في المياه ، فضلت كتير اتابع اللي بيحصل لحد ما لاقيت الأيد دي ظهرت تاني بس مش واحدة ولا اتنين دول كانوا كتير جدًا على المركب ، بدأت اسمع صوت جميل صوت بيهمس بطريقة غريبة و فجأة ظهرت!!!
لو مستني مني اجابة اقولك ايه اللي ظهر ، فأنا مش عارف اقول هي بني ادمة ولا جنية بس هي حلوة حلوة اوي كمان
بيضة و شعرها أحمر وعينها زرقة طالعة من المياه وبتنور في العتمة ، اول ما شوفتها مقدرتش انطق كلمة فضلت مصدوم و عيني هتخرج من مكانها بسبب اللي شايفه ، بعد فترة قدرت اتمالك اعصابي و قدرت انطق
- أنتي.....أنتي......أنتي مين؟!!
ابتسمت و زادت جمال فوق جمالها أكتر ومدت ايدها ليا و هي بتقول
- تحب تكون معانا؟!!
بدون تفكير في كلامها أنا حسيت نفسي مسحور و بعمل كل دا بدون إرادة مديت أيدي ليها لاقيتها اتحولت فجأة والابتسامة الجميلة بقت غضب و شر نابع منها شدت أيدي ليها وسحبتني داخل المياه و بدأت تسحبني لتحت أكتر كنت بغرق بطلع اخر انفاس ليا و أنا شايفها وهي بتحاول تموتني كانت مبسوطة بموتي و اللي بتعمله فيا لحظت أنها مش واحدة بس دول كتير واقفين حولية في قاع المياه و أنا بموت، خرج جسمي اخر انفاس ليا و قبل ما عيني تقفل و روحي تطلع شوفتهم و هما بيجروا بعيد عني اجسامهم مش زينا خالص دول زي ما تقول كدا حوريات البحر!!!!!
