رواية اه يا ولد الهلالي (كاملة جميع الفصول) عبر روايات الخلاصة بقلم أماني سيد
ولد الهلالي...
اللي اتربّى على ضهر الخيل، وشبعان كرامة من صغره،
اللي لو غاب، تفضل الهيبة تمشي مطرحه،
ولو نطق، يسكت الكبار قبل الصغار
فى أرض الرجولة.... لايحكم إلا ولد الهلالى
جليله ، ست كبيرة، بس هيبتها تسبقها، كانت قاعدة في "الفسحة" تشرب فنجان القهوة، والهدوء ساكن حواليها.
فجأة، دخل عليها الغفير وهو بيجري، ووشه مفزوع:
ـ "يا حاجّة جليله ! يا حاجة جليله !"
ـ "خير يا غفير؟ مالك مفزوع كده؟"
ـ "العمدة... العمدة يا حاجه جليله... اتضرب بالنار! دلوقتي في المستشفى وبينزف!"
قامت جليله بسرعة، ووشّها اتغير، والفنجان وقع من إيدها واتكسر على الأرض:
ـ "إنت بتقول إيه يا غفير الشوم؟ نهارك اسود! جبت الكلام ده منين؟!"
ـ "الغفير عوّض هو اللي بلغني بنفسه... وأنا جيت أجري أقولك."
عدّلت جليله طرحتها على راسها، وخرجت تِجري من البيت والغفير وراها.
وصلت المستشفى، وكانت مقلوبة فوق تحت، الناس بتجري والدكاترة مشغولين.
شافتها واحدة من الممرضات، راحت عليها بسرعة:
ـ "حاجّة جليله، إنتي جاية تدوري على العمدة؟"
ـ "فينه؟!"
ـ "في العمليات... بينزف كتير... ومش لاقيين فصيلة دمه!"
ـ "يعني إيه؟!"
ـ "يعني لو ملحقناهوش... ممكن يدخل في غيبوبة أو... لا قدر الله..."
قاطعتها جليله بصوت عالي ومرعوب:
ـ "اخرسي! ماتتكمليش! ابني هيبقى كويس... وزين!"
ـ "بس يا حاجّة... فصيلة دمه AB سالب... ودي نادرة جدًا."
جليله وقفت مكانها، وشها شاحب، وسرحت:
زمرة دمه نفس زمرة دم أبوه...
بصّت للغفير وقالت بأمر واضح:
ـ "تروح حالًا على بيت منصور وتجيبهولي!"
ـ "بس يا حاجة... منصور مات من سنتين، والعمدة قاسم لسه بيبعتلهم الشهرية."
قعدت جليله على أقرب كرسي، وبتحاول تتمالك نفسها وهي بتفتكر:
منصور... الوحيد اللي كان عنده نفس الزمرة، عشان كده جوزي الله يرحمه اشترى له بيت جنبنا، وخلاه يشتغل في المكتب بدل الأرض...
بصت للغفير تاني، وقالت:
ـ "مين من ولاده موجود دلوقتي؟"
ـ "بنته... وابنه، بس الولد لسه صغير."
ـ "هاتلي بنته... حالًا!"
ـ "بس يا حاجة... ممكن ما تكونش نفس فصيلة الدم!"
ـ "ما تقاطعنيش! روح هاتها دلوقتي، واجمعلي كل الفلاحين اللي في الأرض! عايزة أعرف مين فيهم دمه زي دم ابني!"
الغفير خرج يجري، وراح على بيت منصور، وبعد شوية رجع ومعاه فضه، بنت منصور.
دخلت فضه المستشفى وقلبها بيخبط في صدرها زي طبول المولد.
عينها بتلف جوه المستشفى، حاسه بتوهان
مش بس عشان نِدَهوا عليها، لا… ده قلبها هو اللي جابها، مش الغفير.
كانت إيدها بتترعش وهي بتشد طرحتها على راسها أكتر، وبتحاول تبان ثابتة... بس جواها زلزال.
الدمعة نطّت من عنيها قبل ما تلحق تمسحها...
يتبع...
فصول رواية اه يا ولد الهلالي بقلم أماني سيد
اضغط على الفصل الذي تريد قراءته:
- رواية اه يا ولد الهلالي الفصل الأول
- رواية اه يا ولد الهلالي الفصل الثاني
- رواية اه يا ولد الهلالي الفصل الثالث
- رواية اه يا ولد الهلالي الفصل الرابع
- رواية اه يا ولد الهلالي الفصل الخامس
- رواية اه يا ولد الهلالي الفصل السادس
- رواية اه يا ولد الهلالي الفصل السابع
- رواية اه يا ولد الهلالي الفصل الثامن
- رواية اه يا ولد الهلالي الفصل التاسع
- رواية اه يا ولد الهلالي الفصل العاشر
- رواية اه يا ولد الهلالي الفصل الحادي عشر
جاري كتابة باقي فصول الرواية .. عاود زيارتنا ..
