رواية على لسان الشخصية الفرعية الفصل الثاني 2 بقلم ٱية سيد

رواية على لسان الشخصية الفرعية الفصل الثاني 2 بقلم ٱية سيد

رواية على لسان الشخصية الفرعية الفصل الثاني 2

انت ازاي تحط نفسك في مقارنه ؟

رديت عليها بغضب كنت كابته من خناقتي مع اخويا: 

انتي اللي اضطرتيني اعمل كدا...المره الكام دي واحنا بنأجل جوازنا عشان حضرتك عندك كاريير عاوزه تعمليه 

ردت بصدمه : ودي حاجه وحشه ؟؟

تبقي وحشه لما تخليها في المركز الاول من اولوياتك وتخليني انا التاني ..خلصت خمس سنين وقولتلك نتجوز قولتي لا اخلص امتياز الاول ..

قولت يا ابني اعمل اللي هي عوزاه ..

خلصتي امتياز قولتي تبدأي ماسجتير وبعد اول سنيتن في الماجستير جايه تقوليلي معادله ومش عارفه ايه .

ضربت الارض برجلي وبعدت عنها بغضب وبعدها رجعت تاني وانا بسأل : سارة ...انتي عاوزه تسيبيني ؟؟

ضربتني في صدري بغضب لما كانت عيونها مليانه دموع :

 انت ازاي تقول كدا ..؟بعد كل دا ؟؟

قاطعتها بهدوء مزيف ؛ يمكن كلام اهلنا أثر فيكي ..ازاي تتجوزي واحد في اسنان ..اقل منك ..مش هيفهم طبيعه شغلك ..

اتجوزي واحد من كليتك ..مش دا الكلام اللي بيتقال ؟

كنت بفكرها بكل العيوب والكلام اللي بيتقال عليا عشان اشوف هل هتقبلني بجد زي ما انا ولا هتشوفني زي ما هم شايفيني ..

شخصيه فرعيه 

بصيت بعيد وانا بحاول امنع دموعي تنزل لما هو رجع كرر سؤاله : 

سارة ..اختاري ..يا انا يا المعادله ..

بدأت تعيط وتخبي عيونها بكفوفها مش عوزاني اشوفها وهي بتعيط : حسن متتعاملش كدا معايا ..انا بكره الطريقه دي...

رديت عليها : اهو سبب تاني يخليكي تنفصلي وانتي راضيه 

كانت ساكته ..مش بترد..كانت بتفكر...وهي دي محتاجة تفكير ..حب حياتها ولا معادله غبيه هتاخد من سنين عمرها...محتاجه تفكير ..قلعت الدبله وحطتها في ايدها وكملت بفقدان امل : 

لو القرار صعب عليكي ..انا ممكن اخده بالنيابه عنك ..

كنت واقفه مصدومه من اللي عمله ..بعد حب السنين دي كلها 

مجرد حوار يخليه ينهي علاقتنا بالسهولة دي ..هو حتي مأخدش رأيي ..كان بيسأل ويرد ع نفسه ..كان بيهاجم ويدافع 

كان المذنب والضحيه ..اخد كل الادوار وسابلي الدور الصامت

حاول يروحني البيت بس رفضت ووقفت تاكسي ومشيت 

_____________

رجعت البيت بعد رفضها اني اوصلها واخدت تاكسي 

 وكنت بتعشي معاهم ..بس كنت بقلب في طبقي بالملعقه مكنتش باكل لحد ما ماما نطقت :

 عمر انت هترجع لشغلك امتي ...

كنت مخنوق من الكلام عن عمر ..مش عاوز اسمع عنه حاجه ..عاوز الاهتمام يكون ليا انا فقاطعتها وانا ببصلها بتحدي : انا وجودي انفصلنا..

التفتوا ليا بصدمه وقالت : دا حصل امتي ؟..ما انتو كنتو كويسين 

لا مكناش كويسين ...دا اللي انتي كنتي عاوزه تشوفيه 

ردت ماما بتوتر : مالك يا حبيبي في ايه ؟

قاطعتها بغضب : ويهمك في ايه ؟..

كملي اهتمامك بأبنك الوحيد وشوفيه هيرجع الشغل امتي 

قاطعنا احنا الاتنين بابا بعصبيه وهو بينادي عليا بزعيق عشان اسكت : تميم 

رميت الشوكه والسكينه ع السفره وروحت اوضتي 

_________________

اليوم التاني ع البحر ..في عز الضهر كنت بحاول ابعد عنها بقدر الامكان...معرفش ازاي هواجه خالتي وجوزها في التجمع دا بعد ما انفصلت عن بنتهم امبارح بس عموما دي مش اول مره ننفصل فيها انا وجودي ونرجع ..

خرجت من البحر وروحت ناحيتهم  عشان اخد تلفوني و اتصل بالشغل والغي اجازتي وانا ببعد بالتلفون ع ودني سمعت صوت ماما وهي بتضحك وبعدها بتكمل : ما انا مش هسيب جودي لحد غريب 

وزي ما قولتلك من زمان ..جودي متنفعش مع حد غير عمر ..

هم الاتنين نفس الكليه وهيفهموا بعض 

الزمن وقف لما خلصت جملتها...الموج صوته هدي ..الناس بطلت تتحرك... الشمس كانت بتاكل في ضهري اللي بيتحرق 

رجعت لفيت جسمي ببص لماما لقيت خالتي قالت بضيق 

: انتي بتقولي ايه يا خديجه ..انتي اتجننتي ؟

هتعملي عداوة بين الولاد 

فكملت هي : هو انا قولت ايه ....

بقولك مسيبش عرضنا يروح لحد غريب 

مقدرتش اتمالك اعصابي وانا بأقف قدامها وبقول بعصبيه وكأني بتخانق مع واحد في الشارع  ؛ 

انتي ايه ؟؟..مش بتفكري ولو للحظه واحده قبل ما تنطقي 

ايه اللي انتي بتقوليه دا ..

طول عمرك شيفاني شخصيه فرعيه

في البيت وفي الدراسة ..حتي في في علاقتي بحب عمري شيفاني هامش ..مش مهم مشاعري تغور في داهيه ..اهم حاجه سي عمر بتاعك دا 

قامت خالتي من مكانها بصدمه: 

حبيبي عيب اللي انت بتقوله دا 

مامتك بتهزر وبعدين دي ولا اول مره ولا اخر مره تنفصل انت وجودي ..كلنا عارفين حواراتكم ...

قاطعتها : حتي لو بتهزر ...تعمل حساب البني آدم اللي قصادها 

حسيت بقلم ع وشي التفت لقيته بابا ؛ 

اتكلم عن مامتك بطريقه احسن من كدا ..دي اللي تعبت عشانك انت واخوك...

مخلتهوش يكمل جملته ؛ قصدك اللي تعبت عشان اخويا بس ..

لكن انا محدش تعبلي ..

وانا بتكلم عيني وقعت ع عمر وجودي اللي واقفين بعيد  وبيتكلموا ..فنطقت انا بصدمه ؛ دي ما صدقت ...

مشيت ناحيتهم  واول ما شافوني التفتولي :

انتي ما صدقتي ؟؟

مكنتش فاهمه تميم قصده ايه ؛ ما صدقت ايه مش فاهمه ؟

الف مبروك يا عروسه ..بيقروا فاتحتك هناك انتي وعمر  

فزقني عمر بإيده وهو متعصب ..اخيرا اتعصب : 

انت بتقول ايه يلا..ما تظبط كدا انا ساكتلك من امبارح

يتبع😘

رواية على لسان الشخصية الفرعية الفصل الثالث 3 من هنا

رواية على لسان الشخصية الفرعية كاملة من هنا