رواية العز (عز وليلى) عبر روايات الخلاصة بقلم نانسي أشرف
رواية العز (عز وليلى) الفصل الخامس 5
_ ايه مالك ؟
بصتلي من تحت لفوق
_ ناوي تبات هنا ولا ايه
_ وهبات هنا ليه .. انا عندي اوضة مراتي ابات فيها
ابتسمت وقربت مني
_ صح .. انت عندك اوضة مراتك تبات فيها تنام هنا ليه !
قالتها وبعدت
قعدت على السرير وشاورت على الباب
_ اتفضل اطلع عشان اغير
كنت لسه هتكلم فشاورتلي بايديها
_ وعارفة انك جامد جدا ومش بيتم اغرائك واني لو من غير هدوم مش هحركك بردو .. فأتفضل اطلع للي بتحركك.
مكنتش مصدق الثقة الي هي بتتكلم فيها وفعلا
لقيت نفسي برا الأوضة.
************************
" ليلى "
ابتسمت وانا بقفل الباب وراه
سمعت الفون بيرن بمسدج
" وصلتوا لايه ؟ "
" جابني البيت "
" كويس .. اسمعي يا ليلى .. زي ما قولتلك عز عنيد محتاج حد يعامله ببرود "
" هحاول "
" وافتكري ان الي برا دي مش مراته .. دي واحدة مأجرها عشان تلعب عليكي الدور مش اكتر "
" بس دا دخل ينام معاها "
" اراهنك انه نايم على الأرض اصلاً "
سمعت صوت خبط في الصالة فطلعت وانا لسه ماسكة الفون
ابتسمت وانا بكتبله
" تؤ .. على الكنبة "
" شوفتي! .. صاحبي وانا عارفه "
قفلت مع عمر صاحبه الي عرفني كل حاجة عن عز
من وقت ما كان سكران و بيخطرف بأسمي
والورد الي كان جايلي
والعربية بتاعته الي باتت ليلتين تحت العمارة
طلعت وانا عاملة نفسي داخلة الحمام
_ ايه دا ايه دا !!!!!
قربت منه وهو قاعد باصصلي ومكشر
_ نايم هنا ليه!!! ... السرير ضيق مش واخدكوا
_ نوم الكنب مفيد للصحة
_ امممم .. قولتلي
دخلت الحمام غسلت وشي وخرجت لقيته قاعد
_ ايه الصحة تمام ؟
عملي بصباعه علامة أوك 👍فابتسمت ودخلت الاوضة
مهانش عليا نومه برا
فقعدت على السرير افكر اعمل ايه قبل ما اسمعه بيخبط على الباب وبيدخل
_ أصلاً !!!!!
قولتها وهو بيدخل وبيمدد على السرير جمبي وبيديني ضهره
خبط على كتفه
_ طب والصحة !
_ ننام انهردا وبكرا نهتم بصحتنا اوي
كان بينام فقربت منه وهمست
_ مين الي برا دي؟
_ نرمين
كان بيقولها وهو بينام ومش في وعيه
_ مين نرمين
_ مش عارف
_ اممممم
ابتسمت وسيبته ينام ونمت انا كمان
تاني يوم صحيت لقيته راكن راسه على كتفي وببتنفس بانتظام
حسست على شعره وانا ببتسم
شكله بريئ وهو نايم .. ملامح وشه الي شدتني من اول ما شوفته اول مرة
هناك في المول مع أخته سارة صاحبتي.
_ انتي عبيطة يا بنتي! ما تفتحي!
_ انا اسفة جداً والله بس...
_ بس ايه وزفت ايه؟!!!
فاكرة سارة وقتها اما قربت منه وضربته في كتفه
_ في ايه!!!؟ متتكلم معاها عِدل .. دي ليلى صاحبتي
بصلي لثواني ونفخ اما لقاني بدأت ادمع
قرب مني بعد ما سارة بعدت تشتريلنا حاجة.
_ مهو اصل بردو يا ليلى المانجا مبتتطلعش من الهدوم
_ بتطلع
_ بـ تايد الغسيل مفيش مستحيل ؟
ضحكت ورفعت عيني ليه اما هو ابتسم
كانت صدفة يوميها انه يكون في المول مع صحابه في نفس اليوم الي انا وسارة كنا فيه
وقتها رنت جملة من
فيلمي المفضل - دعاء الكروان -
" اهييييه!!!! تكونيش حبيتي الباشمهنديس!!! "
نزلت عيني ليه لقيته فاتح عنيه وبيبصلي
اتخضيت وشيلت صوابعي من شعره وبعدت
اتنهد وهو بيعدل نفسه بأريحية على السرير
_ مش فاكر اخر مرة حد لعبلي في شعري كان امتا
فرد جسمه وهو بيقول بإستفزاز
_ بس تقريبا كانت واحدة
كنت هقوم من جمبه وانا متنرفزة قبل ما اسمعه وهو بيضحك وبيمسكني من معصمي
_ بهزر بهزر
قمت وانا دمي بيغلي وهو كان لسه بيضحك
دخلت المطبخ لقيتها واقفة بتحضر الفطار.
ابتسمت
_ بيض .. وجبنة .. و بطاطس .. دا ولا كأنك في بيتك فعلا
ضحكت بسخرية
_ كل دا عشان منامش جمبك امبارح مش كدا
والمرادي انا الي ضحكت
_ معلش بقا بينام على الجنب الي بيريحه
قربت خطوتين منها
_ وياترى بقا هو فين دلوقتي
اتوترت _ هو .. هو نزل .. نزل الشغل
_ شغل .. قولتيلي
_ ليلى!!!!!!
دخل المطبخ وهو لابس البيچاما وشعره منعكش وجاي على وشه
_ ماما بترن وانا خايف ارد
ضحكت وبصتلها وهي واقفة مش مصدقة قبل ما تدخل الاوضة وتقفل على نفسها
_ الفطار يا ... يا بيبي
بصيتله وهو بيبصلها بعد ما دخلت الاوضة
_ مالها دي ؟
قربت وخدت منه الفون عشان ارد على مامته وانا بقوله
_ معرفش .. روح شوف مالها
********************
" عِز "
_ خير يا نرمين !
_ انت بتحطني انا في الموقف دا ! ماشي يا عِز
كانت بتلم شنطتها وبترمي الهدوم فيها وهي متعصبة
_ ليلى عارفة انك مش مراتي وانها تمثيلية
_ اكيد عمر الي قلها
_ وايه الي هيعرف ليلى بـ عمر !
_ شوف انت بقا
سكت لحظة وكملت
_ انا مش هكمل
_ ايوه طبعاً و تخلي شكلي زي الزفت أنا
_ مبقتش عاوز العب اللعبة دي
_ واما انت مش قدها من البداية بدأتها ليه
_ مكنتش عارف ان دا هيحصل
_ هو الي هيحصل!!!!!
بصتلها وسكت
_ قولها .. انك حبيتها.
رفعت عيني وانا بقولها وراه
_ اه .. حبيتها.
************************
" ليلى "
كلمتها وطمنتها علينا وقفلت معاها في نفس اللحظة الي رن فيها الفون بتاعي
_ عمر ؟
_ ليلى .. انزلي ضروري عايز اقولك على حاجة
_ انزل فين! عِز هنا و بعدين في ايه !
_ الموضوع بخصوصك انتي وعِز
_ طيب ...
_ بصي .. عِز هينزل الشغل كمان شوية وانتي ابقي انزلي وراه
_ تمام
قفلت معاه
ولقيت عِز واقف على الباب
_ كنتي بتكلمي مين
حطيت الفون ورايا
_ ابداً دي فريدة صاحبتي
قرب مني
_ اربطيلي الكارڤات
_ انت اول مرة تلبس بدلة
_ ايوه بس انهردة اجتماع مهم ولازم اجي فورمال
قربت منه وانا بسحب الكارڤات من رقبته
فتحتله اول زرارين من القميص
_ كدا أحلى
ابتسم وبص لنفسه في المراية برضا
ونزل.
ونزلت انا وراه
**************************
_ في ايه يا عمر !
_ اقعدي
في كافية مفتوح على النيل
قعدت وانا قلقانة وببصلة بإنتباه
_ ايه الموضوع الي بخصوص عِز ؟
_ انتي وعِز مش عِز بس
بدأ يحكي وانا عيني بتحظ في زهول!
***********************
" عِز "
خِلص الاجتماع وقررت أروح البيت
غريبة ..
كنت دايما بتسرمح على رأي ماما ومرجعش الا بعد الفجر!
بس المرادي خلاص
ليلى عارفة ومتأكدة اني مش مجوز غيرها
ونرمين سابت البيت وبعتتلي مسدج انها مش عايزة تشوف وشي تاني.
دخلت البيت وانا بنادي عليها ملقتهاش
تلاقيها عند ماما
ابتسمت وانا برمي نفسي على الكنبة وبيجي في خيالي مشهد ..
انهردا هنفذه وفعلا نزلت أجيب الحجات الي هعوز استعملها.
***********************
" ليلى "
_ وهو ليه يعمل حاجة زي كدا ؟
_ مراد قالي انه عينه منك .. دا غير ان سيف اصلا طول عمره بيحقد على عز و الحاجة الي في ايد عز دي كنز بنسباله
_ وعِز يعرف الموضوع دا ؟
_ لأ .. انا قولت اقولك عشان تجبيها ليه بهدوء
رجع بضهره لورا
_ اخبارك ايه مع نرمين
_ سابت البيت ومشيت انهردا
ابتسم
_ انا هستأذن بقا عشان ....
وشهقت وانا باخد بالي اني خبطت في الويتر والعصير كله اتكب فوقي
_ انا اسف... اسف جدا
عمر قام من مكانه وقرب ناحيتي وداني منديل
وانا وهو بنقول للويتر حصل خير
واستأذنت ومشيت.
**********************
" عِز "
كنت قاعد ببص في الساعة بانتباه قبل ما اسمع صوت الاسانسير
جريت قفلت كل الأنوار واستنيتها تفتح الباب
فتحته ودخلت وولعت النور
كان في ورد أحمر من الي هي بتحبه في كل مكان
لكن كان في مفترق من الورد الأبيض بيدلها على طريق
في نهايته
كان أنا و المفاجأة الي كنت بحضرها طول اليوم.
قربت وهي بتبتسم بسعادة وانا براقبها من بعيد في الضلمة
كانت بتضحك بصوت زي العيال الصغيرة
لحد ما وصلت وقادت النور
كنت حاطت صورة جوازنا انا وهي وبوكية ورد أحمر كبير على الترابيزة
جيت من وراها وحاوطت خصرها وسندت براسي على كتفها.
_ انتي عارفة ان الورد الأبيض معناه .. تتجوزيني؟!
حطت اديها على دراعي وهي لسه مش بصالي
_ بس احنا مجوزين يا عِز !
_ مش مشكلة .. نجوز المرادي بجد
بصتلي فغمزتلها
ضحكت وهي بتلتفت ليا
_ عِز ... عايزة أقولك على حاجة
_ مش وقته
مسكت اديها
وبعدتلها الكرسي عشان تقعد وقعدت
اتعشينا انا وهي
وشغلت بعدها أغنية ورقصنا سوا
_ كان نفسي أقولك تعالي نتفرج على دعاء الكروان سوا .. لكن انا عندي ليلة طويلة انهردا
بصتلي فبابتسمت بخبث
_ بس الليالي جاية كتير نتفرج عليه بعدين.
شيلتها ودخلنا الاوضة
فتحت عيني تاني يوم لقيتها جمبي
بس المرادي في اوضتنا انا وهي مش في اوضة الأطفال.
ابتسمت وانا ببعد خصلة من شعرها من على عنيها
بوستها في خدها وكنت لسه هقوم من مكاني قبل ما اسمع رنة مسدج
بصيت لقيته رقم غريب...
وصورة...
ليها هي و عمر صاحبي!!!
في كافية على النيل!
ورسالة مكتوبة بعد الصورة
" العشق الممنوع النسخة العربية "
ونقطة.
***********************
يتبع..
