رواية اختفاءكلب بقلم آمنه محمد
رواية اختفاء كلب بقلم آمنه محمد
بمناسبة حوت الأوركا اللي أكل المدربة فواحد صاحبي كان مربي كلب جا له هدية من صديق عزيز.
الكلب فضل معاه اكثر من خمس سنين وثلاث شهور.. وفجأة الكلب أختفى
صاحبي فضل يدور عليه أكثر من شهر كامل وهو مش لاقيه ولا لاقي ليه أثر
كل اللي ظهر في كاميرات الفيديو أنه الكلب خرج بره سور الڤيلا مش أكثر
حاول يدور عليه كثير معرفش.
صاحبي نزل اعلانات في كل مكان موصلش لشيء.. الكلب من كثرة ما هو غالي عند صاحبي ده حط مكافأة للي يعثر عليه وبردو موصلش لشيء.
هتقول لي كل ده علشان كلب؟!
هقول لك أنه صاحبي عايش لوحده لأن أهله كلهم عايشين في الخليج وهو نزل علشان يتابع دراسة في مصر ويحضر دراسات عليا في علم الحفريات المصرية... ما علينا
لذلك الوحيد اللي كان مونسه في وحدته هو الكلب ده.
صاحبي لما قعد يفكر مع نفسه شوي.. أفتكر الخناقة اللي دارت أخر كام مرة بينه وبين جاره الأستاذ منتصر.
أغلب الخناقات كانت من ثلاث شهور تقريبًا قبل أختفاء ليو الكلب.
وكل الخناقات كانت بسبب إن ليو بينبح كثير وبيحاول يخطي السور لسور بيت أستاذ منتصر.
صاحبي شك إن جاري ده هو اللي خطف الكلب.. وفيه احتمال يكون ق. تله كمان.
ومن غير تفكير أخذ نفسه وراح قدم بلاغ للقسم بأختطاف الجار للكلب.. علشان الكلب ده نوعه غالي جدًا وسلالة نادرة فكان مع صحبي أوراق تبني ووثائق كثير تثبت تبنيه للكلب
وكمان توصيات من جمعية في أمريكا بندرة سلالة الكلب ده ومدى ارتفاع سعره.
تحركت قوة من قسم الشرطة بتجاه بيت الأستاذ منتصر وفتشوا البيت.. وملقيوش أي أثر للكلب
الراجل بالأساس كان مخضوض من الاتهام ومن تواجد الشرطة في بيته في الوقت ده من الليل..
حصلت مشادة بين صاحبي وبين جاره ونظرات الراجل كانت كلها تهديد ووعيد خصوصًا إن منتصر ده كان ضابط قوات قبل ما يترفد بسبب محدش يعرفه.
ولكن لعدم وجود شيء رفع قضية تعويض على صاحبي وربحها
وبعدها بشهر صاحبي جاب كلب بدال ليو.. الكلب المرة دي كان مدرب تدريب بوليسي
والسبب الأساسي لشراء صاحبي للكلب ده كان بسبب إنه خايف لمنتصر ده يتعرض له ولا يأذيه.. والإحساس ده تولد عند صاحبي من نظرات منتصر الحارقة ليه وتهديده في كل لقاء.
وبالفعل صاحبي جاب الكلب وقعد عنده يمكن شهرين.
وفي مرة صاحبي رجع مستعجل من الشغل بيدور على أوراق مهمة ونسي باب البيت مفتوح.. فالكلب خرج وللصدفة الباحتة كان باب بيت الجار مفتوح.
دخل الكلب بدون ما حد يشعر به من أهل البيت نهائي.
صاحبي جاب الورق وخلص وجا له تليفون طلع يرد عليه من بلكونة الغرفة بتاعته لقى الكلب بتاعه هناك عمال ينبش في الجنينة
نزل بسرعة جري ودخل لبست الجار سحب الكلب
والكلب مش راضي يتحرك نهائي تقولش حد مسبته في الأرض وعمال ينبش.. لحد ما قدر صاحبي يسحبه لبره البيت قبل فوات الأوان.
صاحبي كان مستغرب من سلوك الكلب اللي كل شوي ينبح ويبقى عايز يجري يخرج بره البيت...
وكمان يطل ناحية بيت منتصر ويفضل ينبح.. سلوك غريب جدًا أول مرة صاحبي يشاهده.
أول حاجة عملها أنه اتصل بصاحب المكان اللي هو بردو يبقى صاحبه وكان اشترى منه الكلب ده وحكى له اللي حصل
صاحب المكان قال له إن النوع ده من الكلاب البوليسي بتكون مدربة على تتبع الأثر أو أكتشاف أماكن المخدرات أو الجثث أو أي شيء زي ما اتعودت
وفكره إن الكلب اللي عنده ده نزل تدريب سنة في مهمات خاصة.. يخليه يتصرف تصرف زي ده في حالات معينة.
صاحب الكلب الأصلي سأل صاحبي علي سؤال
قال له:
"يا علي هو أنت لسه محتفظ بأغراض الكلب ليو القديمة؟!"
صاحبي رد عليه قال له:
" أيوه وبستخدمها مع الكلب الجديد"
رد عليه الراجل صاحبه وقال له:
" يبقى هو كان بيتتبع أثار الكلب اللي قبل منه"
صاحبي علي سمع الجملة دي وقامت في دماغه حريقة وقام متصل عليا وقال لي تعالى لي حالًا... أخذت بعضي وروحت له
حكى لي اللي حصل وأصر أنه يبلغ ويحفر كمان..
حاولت أهديه وأفكره باللي حصل زمان ولكنه راسه وألف سيف لو هيدفع اللي وراه واللي قدامه هيبلغ..
بالفعل بلغ وراحت معانا قوة وفتشوا المكان... وكمان حفروا مكان ما الكلب كان بيشمشم
وبالفعل طلعوا جثة كلب.. صاحبي كان هيتجنن... ولكن الراجل كان واقف ثابت
ومستنينا ننصرف معاه على القسم
وبالفعل كنا على وشك مغادرة المكان
بعد ما البوليس طلع الهيكل تبع الكلب...
بس حصلة حاجة وقفتنا كلنا مش فاهمين حاجة.
كلب صاحبي الجديد كان عمال ينبش في المكان وينبح بشكل غريب جدًا
حاولنا نبعده أكثر من مرة ولكن مفيش فايدة
وكأنه بيقول لهم كملوا حفر...
الضابط اللي كان واقف استغرب من تصرف الكلب ده أوي وقال للعساكر تكمل حفر... خاصة لما بدأ منتصر يزعق ويهدد ويتوعد لما لقى الكلب في الحالة دي و العساكر هتكمل
وكانت الصدمة المفجعة للجميع.. في نفس الحفرة وعلى عمق متر من بعد جثة الكلب ..
وجود ثلاث أجسام غريبة ملفوفة بقماش أبيض وأكياس بلاستكية كثيرة محكمة الغلق.
وأتضحت المصيبة لما فكوا القماش والأكياس... ثلاث جثث مختلفة الأحجام.
الضابط كان واقف هيتجنن من اللي بيحصل.. وصاحبي كمان كان عقله هيشت
بالتحقيق مع الراجل وسؤاله عن وجود الجثث دي في البيت.. أنكر معرفته باللي بيحصل
الضابط المحقق اتصل بالقسم وحكى لهم اللي حصل وطلب قوة تانية وفريق من الطب الشرعي والجنائي.
وخلال كام ساعة من البحث والتحري أكتشفوا تغيب زوجة المتهم وأولاده الإثنين بنت وولد.
بعد ما كان حاكي للأهل أنهم مسافرين الساحل .
تم إلقاء القبض عليه... وبعد ساعات من التحقيق.. اعترف أنه هو اللي قت. لهم.. ودفنهم في الحفرة دي
وإنه الكلب بتاع الجار علي ده حاول يحفر على الريحة اللي شاممها ولذلك قتله ودفنه فوق منهم بحيث لو الشرطة قفشت الموضوع ميلاقوش غير جثة الكلب من فوق وبس...
ومحدش هيفكر يحفر أكثر من كده متخيلين الإجرام؟!
سبب قت. له لزوجته وأولاده مش معروف ولكن أيًا كان السبب، تبقى الجريمة بدون مبررات
ومهما كان المجرم شاطر.. مسيره يقع في شر أعماله.. لأن ربنا مبيضيعش حق العباد.
وبس كده
ك/آمنة محمد
