رواية المشرحة الفصل الثاني 2 بقلم إسماعيل موسى
رواية المشرحة الفصل الثاني 2
المشرحه
2
لما النور قطع وسمعت صوت الباب بيتقفل قعدت اصرخ لكن صوتى مطلعش
كأنى كنت بصرخ جوايا، قعدت على الأرض وانا سامع دكتور على بيقاوم، سامع صوت خبط فى جسم التلاجه بس مش قادر اتحرك ،الخوف شلنى، سمعت صوت دكتور على بيصرخ الحقنى يا ماهر، متحركتش من مكانى ، مقدرتش اصلا، مش عارف اعمل ايه، حسيت انى خلاص هموت، الشيء دا سواء كان كيان او عفريت هيقضى عليه وبسرعه عقلى تذكر كلام عم حارس ربنا يسترها عليك يا ابنى ولمسه لايده المعاقه ساعتها فهمت
ان عم حارس كان عارف هيحصل ايه، وسبب إصابة ايده
ليه يا عم حارس محذرتنيش ليه سبتنى للرعب إلى انا فيه ده؟ المصباح بداء يرعش تانى فوق دماغى ومع كل لقطه حاسس ان روحى هتخرج منى، منتظر الكيان ده يخنقنى او يعمل فيا ذى دكتور على ،وهو النور بيرعش التلاجات كلها اتفتحت ،
ايوه التلاجات المقفوله بالقفول اتفتحت وكل الموتى إلى فيها بدأت تخرج، قاعد فى مكانى وشايف اجساد مقطعه ومحروقه والى بطنه مفتوحه كل دا بيخرج من التلاجات ،
اجساد عريانه ماشيه على الأرض ومع كل خطوه ليها حجات منها بتقع على الأرض ،ايد، رجل، عين، دماغ بشوف كل ده فى اللحظات إلى المصباح كان فيها بينور حطيت دماغى وسط ركبى، جسمى كله بيرتعش، سنانى بتخبط فى بعضيها لدرجة انى كنت خايف النور يرجع، لكن إلى خوفنى اكتر ،
الراجل إلى لابس احمر إلى كان بيبص عليه بنفس التركيز إلى كان بيبص بيه على المشرحه ،اجساد الموتى إلى خرجت من التلاجات كانت بتتحرك بصوره عشوائيه مرعبه ،ذى مشى الموتى الأحياء إلى بشوفهم فى الأفلام، كنت برفع دماغى وارجعها بسرعه وسط ركبي.
، حفلة اموات وانا بس إلى وسطيهم حى ،جسمى دخل فى حالة هيستريا مش قادر اتلم على اى حته منى ووسط دا كله ودا إلى قضى على اخر حاجه فاضله فيه شفت دكتور على ماشى وسطيهم واحد منهم....
شايف الراجل إلى لابس احمر بيتحرك ناحيتى بالبطيء عنيه مش موجودة وشه محروق وايد من جسمه مقطوعه ،لما النور رجع الراجل دا كان وصل عنى، غمضت عنيه بحاول اتشاهد او اقراء قرأن بس لسانى مقيد، الكيان وقف قدامى برجله المسلوخه ورفعنى بأيده السليمه ،
رفعنى بسهوله كأنى ريشه لحد لما وقفت قدامه ووشى بقى فى وشه (،انا عايز ده) همس الكيان ولما اتكلم ظهر لسان طويل محروق بيرعى فوقه دود اسود ،الدود إلى راح يقع على الأرض لما تكلم ،مقدرتش افتح عنيه ولا ابص فيه،
''. عايز دى عشان اشوف '' ايده لمست عينى اليمين وفى لمح البصر عينى بقت فى عينه ،عينى اختفت وخدت مكانها فى وشه ،الدم نزل من وشى غرق كل جسمى ،الراجل إلى لابس احمر ابتسم ،بس دى مكنتش ابتسامه، كان بق محروق، أسنان وانياب سوده متقيحه ،ابتسم فى وشى وهمس '' ' اخيرا شفتك !!
