رواية الهالكون الفصل العاشر 10 بقلم ياسر عوده
الهالكون ( الجزء العاشر )
توقفنا فى الجزء السابق لما شاف نوح ازاى احمد ابن الصحفى مروان قتل ابوه وامه واخته وبعديها انتحر .
اذكر الله وصلى على الحبيب .
نوح شاف كل حاجه حصلت فى جريمه قتل الصحفى مروان وعيلته ، يمكن يبان لينا احنا ان اللى حصل ده اتكرر فى كل الجرائم التانيه وان مفيش حاجه تقدر تفيد التحقيق بس الحقيقه كانت عكس كده ، واحد زى نوح يقدر يستنتج حاجات كتير من اللى شافه اهمها انه فكر لما شاف الحاله النفسيه اللى صابت احمد بعد ما مر كام دقيقه على قتله لاهله ان هو كان تحت تأثير مخدر لانه لما فاق منه اتصدم لما شاف اهله مقتولين ، الموضوع فى الجرائم التانيه كانت مجرد شك بس نوح اتأكد من كده ، مش بس ده وصله نوح هو كمان لما ربط كل الجرائم ببعض خصوصا جريمه المطعم اللى قتل فيها عمر اخوه امجد نوح استنتج ان ديما قبل ما تحصل الجرائم كان ديما فى طعام قدمهم يعنى اول جريمه كانت احتفال بعيد ميلاد وفى اكل وشرب وتانى جريمه بتاعت العرايس كان قدمهم فيشار وفاكهه والجريمه الرابعه فى المطعم ونوح قال لنفسه اكيد احمد قبل ما يدخل الشقه كان بياكل او بيشرب حاجه .
رجع نوح مكتبه وكان طارق مستنيه .
نوح : خير يا طارق وصلت لحاجه فى قضيه عمر واخوه امجد .
طارق : جمعنا كل المعلومات ان عمر واخوه احمد .
نوح : طبعا مفيش دافع للجريمه .
طارق : لا يا نوح باشا ، الجريمه مستحيل تتعمل اصلا .
نوح : مش فاهم تقصد ايه ؟
طارق : رغم ان انا شفت الفديوهات اللى عمر قتل فيها امجد بس مش مقتنع انه ينفع يقتله اصلا .
نوح : طيب اقعد كده وفهمنى وصلت لايه فى التحريات .
طارق : حكايتهم ماتنفعش غير فى المسلسلات الهندى ، بص يا باشا عمر يبقى الاخ الوحيد ل امجد ، ابوهم وامهم ماتوا وكان امجد عنده 15 سنه بس ومكنش حلتهم حاجه خالص ، امجد طلع اشتغل علشان يصرف على نفسه وعلى اخوه ، هو كان شاطر اوى وذكى واتعلم صانعه صناعه شغل الالمونتات مطابخ وشبابيك وحاجات من ديه ، وبمجهوده فتح ورشه وبعد كده الورشه بقت مصنع وتقدر تقول انه بقى غنى .
الدنيا ضحكتلهم وامجد مكنش مخلى عمر محتاج لحاجه نهائى ومكنش حتى بيحاول يشغله معاه كان عوزه ينبسط بحياته .
امجد دخل عمر جامعه خاصه بفلوس كتير اوى وكل سنه يغيرله العربيه بتعته ، من تحريتنا عرفنا ان امجد كان عنده عمر اهم من مراته وابنه حتى واللى خسرهم بسبب عمر اصلا .
نوح : ازاى ده ؟
طارق : فى يوم عمر اغمى عليه وهو فى الجامعه ولما راح المستشفى اكتشفوا ان عمر عنده مرض نادر جدا ورم ومحتاج عمليه ضروريه ولازم تتعمل فى المانيا بس بمبلغ ماهول جدا ، امجد مهتمش بالفلوس وسفر اخوه بره وعمل العمليه وفضل عمر يتعالج بعديها حوالى اربع سنين امجد باع بسببه مصنعه والفيلا بتعته وعربياته ، ولما مراته رفضت كل ده وخيرته بنها هى وابنها وبين اخوه امجد متردتش واختار اخوه .
مراته طلبت الطلاق وفعلا طلقها واحتفظت هى بابنه ، وامجد كمل طريقه مع اخوه لغايه لما ربنا شفاه بس امجد سعتها كان خلاص خسر كل حاجه .
تعرف يا نوح باشا كل الشهود بتقول ان امجد عمره ما ندم انه اختار اخوه وكان بيقول فى اى مناسبه عمر ده ثروتى الحقيقيه ولو طلب حياتى هقدمهاله عن طيب خاطر .
اليوم اللى عمر قتل فيه امجد كانوا بيحتفلوا بان عمر خف نهائى من مرضه ، تفتكر يا نوح باشا بعد كل اللى عمله امجد مع اخوه عمر تصدق انه يقتله ؟
نوح سكت دقيقه يفكر وبعدين قال : مستحيل طبعا يقتله ، هيستفاد ايه من قتله ، بس احنا شفنا الفديوهات يا طارق .
طارق : عقلى مش قادر يستوعب يا باشا الكلام ده .
نوح : بقولك ايه عوزك تروح الطب الشرعى وتدورلى على دكتور بس بمواصفات خاصه .
طارق : ازاى ؟
نوح : عاوز دكتور ميكونش عادى اقولك عاوز دكتور عبقرى ومثقف لابعد حدود ومطلع على كل جديد فى عالم الطب الشرعى .
طارق : فهمنى يا باشا ، انت بتفكر فى ايه ؟
نوح : هاتلى اللى طلبته منك الاول وهتفهم سعتها .
طارق : اللى تامر بيه يا باشا .
وراح طارق ينفذ اوامر نوح .
بعد ساعه رجع طارق لمكتب نوح ومعاه دكتوره .
طارق : اقدملك الدكتوره ليلى يا نوح باشا فيها كل الطلبات اللى عوزها .
نوح : اهلا يا دكتوره اتفضلى .
ليلى قعدت وقالت : شكرا لحضرتك ، طارق باشا قالى ان حضرتك عاوزنى .
نوح : بصى يا دكتوره احنا شغالين فى مجموعه جرائم غريبه شويه ملهاش مبرر ليها والحل اللى وصلناله ان مرتكب الجريمه كان تحت تأثر مخدر مثلا ومش فى وعيه بس كل تقارير الطب الشرعى اثبتت ان مفيش مخدر .
ليلى : تقارير الطب الشرعه مش بتثبت كده حضرتك من الطبيعى انها بتقول ملقتش اثر للمخدر مش معنى كده ان مفيش كل الحكايه نتيجه التشريح مطلعتش النتيجه ايجابيه مش اكتر .
ابتسم نوح من كلام ليلى ، من ردها عرف ان هى الشخص المناسب اللى كان محتاجها ، ردها كان ذكى وسريع ودقيق جدا .
نوح : يعنى ممكن يكون فى مخدر والتشريح والتحاليل متظهرهوش ؟
ليلى : بص حضرتك فى مواد لو استخدمت مش بتظهر فى اى تحليل نهائى .
طارق : يعنى ايه تقارير الطب الشرعى متبقاش اكيده 100% ؟
ليلى : بص يا طارق باشا مفيش حاجه فى العلم اسمها 100% ، ده كلام مش حقيقى اى نتيجه بتبقى مطابقه ولو بنسبه 99.9% بس ديما فى احتمال كسر عشرى ان يكون فى خطأ ، ولكل قاعده شواذ .
نوح : طيب انتى قولتى ان فى مواد مش بتبان فى التشريح والتحليل صح ؟
ليلى : طبعا بس مش اى حد يقدر يتحصل على المواد اللازمه والخامات هى ديما بتبقى غاليه جدا ومكلفه ومحتاجه معامل مجهزه لاعلى مستوى حاجه مايقدرش عليها اى حد .
نوح : طيب سؤال يا دكتوره ، هو فى حاجه ممكن تخلى الواحد يتصرف غصب عن ارادته وكمان تديله نوع من القوه الزياده عن قوته .
ليلى : معلش ممكن توضح علشان اقدر اجوبك اجابه صريحه .
نوح : يعنى واحد لسه طالع من مرض صعب وصحته كانت تعبانه يقدر يخليه يقتل اكتر حد بيحبه وكمان عمال كتير يحولو يسيطرو عليه يعجزو بسبب قوتهم .
ليلى سكتت ثوانى وبعدين قالت : فى حالات نادره زى دى حصلت من كام سنه فى بعض الدول الاوروبيه بس الناس والعلماء فسروها انها خارقه للطبيعه ، بس انا هقولك على حاجه جايه من كتب التاريخ مش كل العلماء صدقوها ، وفى اللى اعتبارها خرافه بس هقولهالك لانى مؤمنه بيها .
اذكر الله وصلى على الحبيب .
فى عصر اجتياح المغول للعالم الاسلامى والشرق الوسط واوربا كانت حاله المغول غريبه حيرت العلماء على مر العصور ، كميه الدم والعنف اللى سببوه وذبح الاطفال والنساء دى مكنتش حاجه عاديه البشر يقدروا يعملوها بسهوله ، لغايه فى مؤرخ صينى كتب فى كتابه عن عظمه جنكيز خان قال ان سبب تهور واقدام جيوش المغول ان عالم صينى اكتش نوع من النباتات وتحديدا من الزهور اسمها ( ميراچ ) يعنى السراب ودي كانت سبب المدابح اللى عملوها المغول بدون الاحساس بتأنيب الضمير ده غير القوه اللى حسو بيها ، يمكن الموضوع واخد شكل اسطورى بس نفس الحكايه حصلت فى الحرب العالميه الثانيه وانتصار جيش المانيا على معظم جيوش العالم ومحارق اليهود اللى حصلت فى بعض العلماء استنتجوا ان هتلر قدر يوصل لتركيبه مماثله لزهره السراب وسبب استخدمها بكثره ولتكلفتها الغاليه جدا المانيا اتدينت بفلوس كتير جدا وخصوصا من سويسرا .
بعض العلماء قالوا ان التركيبه اللى اخترعها الالمان كانت بتجبر الجنود تعمل حاجه مش عوزنها من قتل وحرق وانهم كانو بيحسو بقوه كبيره جدا ، بس بعد مفعول الماده لما تنتهى كان بعضهم بيحصله حاله صدمه عصبيه لما يفتكر اللى عمله .
ورغم انها محرمه دوليا دلوقتى بس لسه فى بعض الجهات بتقدر تجمع خاماتها وبيصنعوها .
نوح : تكلفتها دلوقتى توصل لكام يا دكتوره ؟
ليلى : لا دا الجرعه الصغيره تعمل مبلغ كبير ممكن توصل لحوالى 100 الف دولار ويمكن اكتر .
نوح : للدرجادى غاليه ؟
ليلى : لان موادها نادره جدا ومش اى حد يقدر يوصلها غير ان على الاغلب مفعلها مش هيدوم كتير بسبب ان نسبه الفاعليه فيها بتساوى ثروه علشان كده بيتحط فى الجرعه الواحده كميه قليله جدا منها .
نوح : طيب هى ممكن تظهر فى التشريح او التحليل ؟
ليلى : مستحيل تظهر طبعا ، السبب الاساسى اللى مخلى معظم العلماء معتبرين زهره السراب مجرد اسطوره ان مفيش اثبات مدى عليها ، مابتسبش اى اثر نهائى فى الشخص اللى تناولها .
نوح : شكرا ليكى يا دكتوره ، انتى فسرتلنا حاجات كتير .
ليلى : لا شكر على واجب ، بعد اذن حضرتك .
خرجت ليلى من المكتب .
نوح بص ل طارق وقاله : احنا اما قدام تنظيم ضخم سبب كل الجرائم اللى حصلت او قدام دوله كامله بتصفى حسابات .
اذكر الله وصلى على الحبيب
يتبع
