رواية مهد القدر الفصل الخامس 5 بقلم ملك سعيد
رواية مهد القدر الفصل الخامس 5
قراءة ممتعة ❤
__________________
رجع ياسين فيلته
بعد مقابلته لحمدي وبينادي الخدامة
: ست كريمة
جت كريمة بسرعة وقالتله باحترام : اؤمرني يا بيه
ياسين : قدر رجعت من برا؟!
كريمة : ايوا يا بيه الآنسة قدر رجعت من بدري وطلعت تنام من غير ما تتعشي
ياسين وهو بيطلع سلالم الفيلا : خلاص يا ست كريمة تقدري تشوفي شغلك
وصل ياسين أوضة قدر و فتح الباب و لاقاها نايمة وحاضنة المخدة بطفولية فبيدخل وبيقعد جنبها وبيمرر ايده علي شعرها وبيقول بحب : طول ما انا عايش مستحيل اتخلى عنك ودايما هحميكي من اي حد يفكر انه يأذيكي حتي لو كان ابوكي الحقيقي انتي الي نورتي دنيتي لما كنت عايش في الضلمة بعد موت سهر مراتي وأول حب في حياتي كنا عايشين اسعد ايام حياتنا كانت دايما تقولي انها نفسها تخلف بنت حلوة بس القدر كان كاتبلها أنها تموت قبل ما تحقق حلمها وتخلف بنت مني ماتت في حادثة عربية ومن وقتها وانا عايش لوحدي لا عندي اخوات ولا اولاد كنت وحيد لحد اليوم الي قررت اتبني بنت وروحت لدار الايتام وشوفتك وقتها حبيتك وحسيت ان فيه حاجة بتشدني ليكي وقتها مترددتش لحظة اني اتبناكي واعوضك عن حنان اهلك وفجأة وبعد سنين الاقي واحد جاي يقولي انه ابوكي وجاي علشان ياخدك مني وقتها كنت اتعلقت بيكي ومكنتش اقدر اسيبك تروحي و تسيبيني بس ابوكي كان همه ان يكسب فلوس من وراكي وقالي انه ممكن يسيبك معايا بشرط اني اديه مبلغ كل شهر وقتها اضطريت أوافق ولحد انهاردة بدفعله بس علشان مخسركيش لو في يوم سبتيني انا ممكن اموت
ياسين كان بيتكلم وعيونه فيها دموع وحزن وخوف انه يخسر بنته بس كان عنده اصرار انه يحميها من اي حد هيأذيها حتي لو كان أبوها الحقيقي
وبعد مدة قام ياسين وباس راس قدر وغطاها كويس وطفى النور
و خرج من الأوضة ودخل اوضته علشان ينام بعد تعب يوم طويل
♥ ❥ ♥ ❥ ♥
سيف بزعيق : عايزة ايه ياروح امك
أمينة بصدمة : ولد عيب
سيف وهو بيحاول يهدي علشان ميعكش الدنيا: اسف يا ماما بس إنتِ موافقة علي الكلام التافه بتاع بنتك ده
رضوي وهي بتحاول تهدي اخوها : اهدي يا سيف انا بس كنت بقترح اني اشتغل مش اكتر
سيف باعتراض : بس انا مش موافق ليه شايفاني قصرت معاكم في حاجة كل الي بتحتاجوه بجيبهولكم ف ليه عايزة تشتغلي
أمينة وهي بتحط ايديها علي كتفه : واحنا مقولناش إنك مقصر معانا بالعكس كل الي بنطلبه بتجيبهولنا بس اختك عايزة تشيل الحمل عنك شوية
رضوي : اه والله
سيف بتريقة : اه والله مفيش زفت شغل وخلصنا
رضوي بغيظ وهي بترمي المخدة علي سيف : بقي كده يا بارد تعرف انا غلطانة والله ما انا مشتغله واديني قاعدالكم اهو ومربعة وهتابع مسلسلاتي بلا شغل بلا هم قوم بقي زي الشاطر هاتلي كيس اندومي ابو ١٠ جنيه وهاتلي شوية سناكس معاك شيبسيهات بس مش من المقاطعة انا بقولك اهو وهاتلي لب و مقرمشات ومتبخلش في الفلوس هات بزيادة ( رضوي بتفكير ) امممم وايه تاني يا بت يا رضوي
سيف بتريقة : وايه تاني يا بت يا رضوي منفسكيش في المحل بالمره ياربي صبرني بربي جاموسة في البيت اه والله
رضوي بتبصله بغيظ و بتشتكي لأمها : شايفة يا ماما ابنك بيتريق عليا ازاي بس لإني قولتله الي نفسي فيه
بتضحك أمينة علي جنان عيالها : ههههه بربي في أطفال بطلوا جنان صدعتوني انا قايمة انام وانتوا امسكوا في خناق بعض
قامت أمينة وسابت عيالها يتخانقوا خناقة كل يوم
رضوي قامت وقعدت جنب سيف وبصتله بنظرات بريئة : اخويا حبيبي اخويا الغالي مش هتقوم بقي تجبلي السناكسات بتاعتي علشان معاد مسلسلي
بصلها سيف بنظرات تهديد : لو مقومتيش من جنبي يا رضوي قولي علي نفسك يا رحمن يا رحيم ده إنتِ ابتلاء من عند ربنا اه والله انا قايم انام شوفي بقي هتجيبي السناكسات بتاعتك منين
قالها سيف بتريقة وغيظ ودخل اوضته
رضوي بغيظ : أخوات آخر زمن كتك القرف
وبتقوم تتابع مسلسلاتها المفضلة ولما نجيب سيرة المسلسلات فلازم نعرف أنها هندي او تركي
♥ ❥ ♥ ❥ ♥
وفي الطيارة عند عز
كان فارس زهقان ومش لاقي حاجة يعملها واصلا بالمنطق كده ايه الي يتعمل في الطيارة
فارس بزهق : عز
عز وهو ماسك اللابتوب بيتفرج علي فيلم بتركيز : اممم
فارس بتأفف : انا زهقان
زفر عز بزهق وقاله ببرود : اجبلك الرضعة ما تتلم ياض او اتخمد خليني اركز في الفيلم
فارس بغرور : انت مستحيل تتغير عيل بارد و خنيق اه والله صحوبيتي خسارة فيك ده الواد فهد يتصاحب عنك
عز بشلل من صاحبه الرغاي : اهو متلقح في الكرسي الي وراك صاحبه وابعد عني واخرس بقي خليني اركز في الزفت الفيلم
فارس بحشرية وهو بيبص في اللابتوب : انت بتتفرج علي ايه ها من ده وايه الدبابات دي
عز وهو بيزقه بعيد عن اللابتوب: يابني بطل حشرية
وبيبص وراه علي فهد و بيقولوا : فهد بدل ما إنت قاعد كده لهي فارس بعيد عني احكيله قصة اي زفت بس ابعده عني
ضحك فهد : ههههه امرك يا باشا
فارس بيمرر نظراته عليهم بفيظ وبيقول بتريقة : ههههه امرك يا باشا كتكوا القرف يعني انا غلطان اني بخرجكم من الصمت الي انتوا فيه
عز بنفاذ صبر : متنازلين عن خدماتك
فارس : خلاص يا عم انا غلطان اني بتكلم معاك
وبيدور وشه للناحية التانية وبيشوف مضيفة الطيران وبيقول باعجاب: اوبا ايه القشطة الي هناك دي
فهد و عز بيبصوا ناحية المكان الي بيبص عليه فارس لاقوه بيبص علي المضيفة
فهد بضحك : هههههه مستحيل تتغير يا باشا
عز بتريقة : ديل الكلب عمره ما يتعدل
فارس بيبصلهم بغيظ وبيقولهم : يعني عايزني اعمل ايه الأشكال الحلوة دي مش هنلاقيها في مصر صدقوني
عز بتريقة : وبنت خالتك الي امك وخالتك عايزين فرصة واحدة ويجوزوهالك هتعمل معاها ايه؟!
فارس بزهق : ايه الي جاب السيرة دي دلوقتي اصلا انا مكنتش عايز ارجع مصر علشان كده مش عايز اتجوزها ايه هيجبروني اصلا دي عيلة تافهه
فهد بتدخل : معلش يا باشا مع اني مش لازم اتدخل بس حضرتك مشوفتهاش من ٧ سنين ممكن عقلت واحلوت وتعجبك وانت الي تجري وراها وهي الي ترفضك هتعمل ايه وقتها
عز بابتسامة خبيثة : فعلا نفسي يحصل معاك كده علشان اشمت فيك
فارس بتريقة : اه علشان تقولي اللهم لا شماتة بس انا شمتان بس انا مش هناولك الي في بالك قال انا احبها و اجري وراها ده في أحلامك تعرفوا حاجة انا غلطان اني فتحت كلام معاكوا خلوني في حالي وإنت كمل فيلمك وإنت يا فهد بطل خيال المسلسلات بتاعتك ده ونام
بيرجع عز يتابع فيلمه وفهد بيحاول ينام وفارس بيفكر في كلامهم وقال بينه وبين نفسه: يا تري يا نور بقيتي عاملة ازاي ويا تري عقلتي ولا لسه عيلة تافهه
♥ ❥ ♥ ❥ ♥
تاني يوم في بيت نور
نور بغضب : نفسي اعرف مصحياني بدري و موقفاني في المطبخ ليه محسساني ان رئيس الجمهورية جاي عندنا ده ابن اختك ليه بقي كل التجهيزات دي
حنان باشتياق : فارس ده مش ابن اختي ده ابني ولو أطول افرشله الارض ورود علشانه ياه وحشني اوي بقالي ٧ سنين مشفتهوش حبيت خالتو
نور بغيرة : وليه الحب ده كله ده انا الي هي بنتك مشوفتش منك الحب ده كله والحنان ده يا حنان
حنان وهي بتضربها علي كتفها : بطلي هبل بقي وقومي من وشي مش قولتي إنك هتشتغلي مع قدر مروحتيش ليه
نور : اينعم قولت اني هشتغل بس محددتش امتي هشتغل وقوليلي بقي ابن اختك ده طيارته هتوصل امتي علشان اروح واستقبله
حنان : طيارته هتوصل الساعة ٥ ومش لازم تستقبليه لإن هو قال انه مش هييجي علي هنا علي طول هيروح الأول مع شريكه للفيلا بتاعته ويشوف لو هيحتاج حاجة وبعدين ييجي وقومي بقي اطلعي نادى علي خالتك تنزل تقعد معايا
♥ ❥ ♥ ❥ ♥
رأيكم في البارت يا حبايبي
وقررت انزلكم فصلين هدية أي خدمة
عايزة الاقي تفاعل حلو بقي
#مهد القدر
#بقلمي ملك سعيد
دمتم سالمين ❤
يتبع
