اسكريبت كامل بقلم سلسبيل أحمد
- اتفضل العصير
= شكرا مش عاوز.. انا عندي شوية اسئلة في الحقيقة
- هو مش انا الى مفروض اسأل؟ السيدات اولا!
= طب اتفضلي
- لا انا معنديش اسئلة بس بثبت حضوري
= ده انتي مخك تعبان بقا
- انجز هتسأل في ايه ع اساس اني وافقت على الجوازه اوي يعني
= انتي ناويه تلبسي طرحه و تتحجبي وكده ولا
- لا حول ولا قوة الا بالله ما تشوفلك يبني حد محجب تتقدمله جايلي انا ليه؟
= ده مجرد سؤال
- ماشي مش مش عارفه ربنا يهدي
= طب لو انا جاي من الشغل و لاقيتك تعبانه شوية و قولت لك قومي حضري لي الغدا هتعملي ايه
- وانا مالي يا استاذ احمد؟ انا ايه هيوديني بيتك؟
= بأعتبار اننا اتجوزنا يعني
- اه.. بتشوفني زوجه صالحه ولا لاء؟ مانا ممكن اضحك عليك و اقولك اه و لما تيجي تطلب مني حاجه اقولك لا
= معاكي حق
- بطلوا هبـ ـل بقا ونبي
= طب هنكتب قايمه ولا لاء؟
- اكيد هنكتب
= ودهب وهكذا؟
- ايوه كل الحاجات الى الرجالة بتحب تهرب منها دي
= ولو انا عملت كل ده انتي هتعملي ايه؟
- افندم؟
= بقولك هتعملي ايه؟ انا هستفاد ايه يا آنسه مريم
- اولا حد صْربك على ايدك تيجي تتقدم؟
= لاء محدش
- ثانيا.. انت هتخلف؟ تولد وتربي وترضع؟ هتذاكر و تطبخ و تغسل وتكنس هتنضف كاسروله اللبن؟
= كاسروله اللبن؟؟
- و البيبي الساعه خمسه الفجر بتاع الطفل هتقوم تنضفه ؟ رد عليا هتنضفه
= لاء يع !
- شوفت ؟ مانت متعرفش الموضوع فيه معاناة ازاي!
= اممممم طب وانتي هتشاركي في ايه تاني بعيدا عن البيبي بتاع الطفل و كاسروله اللبن
- مهمتي خلصت لحد كده وانت مسؤول تخليني مرتاحه واعيش في مستوي كويس
= وانتي دلوقتي عايشه في مستوي عامل ازاي؟
- زي ما انت شايف انا ميه ميه في بيت ابويا وقبل ما افكر في الحاجه بتبقي عندي فا لو برضو بتدور على حد يقولك هنعيش سوا على الحصيرة فا مش انا
= معلش سؤال هو كلامك بيدل على انك لو مستواكي أقل هتوافقي على الحصيرة.؟
ضحكت: أكيد لا الإنسان من حقه يرتقي يطلع لفوق مش ينزل لتحت بقا ويتعب ويشقي! معلش لو انت ظروفك مش قد كده تتجوز ليه من اساسه؟ تجيب واحده تعاني معاك؟ وبعدين اولاد يعانو؟ زي بالظبط عمال النضافه الى بشوفهم مخلفين خمسين عيل و بيشغلوهم معاهم! مش بيوديهم مدارس حتي.. شايف ده صح؟
- في الحقيقة لا.. لكن برضو تفكيرك مادي انتي عاوزاني اوفرلك كل حاجه.. وطلباتك كلها تيجي لحد عندك وكل ده يعني عاوزاني احقق لك احلامك ولا ايه مش فاهم! بعدين لو حصلي ظروف هتقوليلي مع السلامه!؟
= اطلاقا.. يعني هديك مثال.. لو اتجوزنا و عايشين في مستوي مُريح.. و حصلت لك ازمة وجيت قولت لي اللحقيني بالخاتم الالماظ الى جبتهولك هقولك لا؟؟
بصتلها بدهشه: الماظ؟
- اصلي بكره الدهب ايه فيه ايه؟
= آه كملي كملي
- هديلك الخاتم تفك بيه زنقه و نستحمل سوا الايام الي عندك فيهم ازمه وصح انا مش بتجوز عشان تحقق أحلامي هو الاسكين كير ابو كام ألف الى هطلبة هو ده الأحلام؟
= امال ايه الاحلام؟
- نعمل انا وانت مشروع و نشتغل عليه سوا وينجح نسافر سوا ونعمل ذكريات الحاجات دي
= احنا صحيح متكلمناش في الفرح طبعا هتقوليلي ميكب ارتست و سيشن و فوتوغرافر وقاعه في قصر الكبابجي صح
- اللغي كل ده ياحبيبي انا OSD الموضوع هيبقي مرهق اوي بالنسبالي مش مستاهل يعني
= الـosd ده مُعدي!!
ضحكت: اقصد عندي وسـ ـواس ان لازم كل حاجه تبقي مظبوطه و حدث زي الفرح ده هياخد طاقة كتير وانا مش قادره وفرهم وهاتلي بيهم الخاتم عشان شكلك لسه بتلم تمنه اسلفك؟ انا زوجه متعاونه
= انتي مريبه للشك انا مش مرتاح لك
- انا بشوف اخرك ايه
= يعني مستعده تبقي شريكة حياتي؟ واصحيكي الفجر اشتكيلك من مشاكلي؟
- اه وهقوم اطبطب عليك ونعمل كيكه شوكلاتة
= بس انا بحب الفانيليا
- نص ونص عشان التوفير
= انتي زوجه مدبره كمان؟
- شوفت.. ولسه الى جي احلي
= انا مش مرتاح لك
- انا كمان هعملك اكل حلو صدقني هتدلع هعملك المتشخلعه
= بتعرفي تعملي اكل يعني
- لا لسه هتعلم.. عشان خاطرك والله يا استاذ احمد
= كملي في الحاجات المعنويه حاسسها لطيفه
- هبقي بير اسرارك مش هنكد عليك في الوقت الى تبقي مش قادر فيه تصالحني هراعي انكم كا رجالة خلقكم ضيق.. هسيبك تنزل لصحابك براحتك و تشغل ماتشات الكورة
= وتتفرجي معايا وتعملي فشار و قهوه
- انا اهلاوية مدريديه خلي بالك
= ايه؟ قولتي ايه؟؟
- بشجع الاهلي و الريال
= يا عمي حد يجي يلحقنا بمأذون
- مأذون ايه ياعم انت
= خلاص بقولك هنكتب قايمه و هجيب خاتم الماظ
- يبوي على الرجالة ده انا قاعده معاك عشان اتحكم عليا وانا بلعب الشايب مع عيال خالتي
= بحبك بقولك حد يشوف مأذون
- حد يلحقني
= حد يشوف مأذون
- اللحقونا بجد
= المأذون قبل ما اعمل كاتـ ـنج في خدودي
ضحكت: هتجيب الخاتم يعني؟
- وهكتب قايمه و هنضف معاكي البيبي و كاسروله اللبن
= لا حد يشوفلنا المأذون بقا يجماعه..♡
>>>>>>>>>>>>>>>>>>>>>>>>>>>>>>>>>>>>
تمت.. هستني رأيكم يا صحابي😉💗😂
