اسكريبت هايدي فتاة الخمسه جنيه بقلم شهيره عبد الحميد
هايدي فتاة الخمسه جنيه
ياريتك جبتي كيس شيبسي وخلصتينا من وجع الدماغ ده بجد مش فاهمة ايه كمية الافورة والهطل ده كله هي اخترعت الذرة يعني ولا مفيش حد غيرها بيعمل خير ويساعد المحتاجين؟
منشورات السف على هايدي من النوعية دي بقت اكتر مليون مرة من المدح فيها!
والله ثم والله لو البنت دي كانت بنتكوا كنتوا هتتمنوا الكل يفضل يمدح ويتباهى بيها طول العمر.
ثم انتوا عارفين أن كل تريند بياخدله كام يوم ويبدأ غيره كالعادة، خفوا انتوا هزار ماسخ عليها وسيبوها تفرح برزقها وكرم ربنا ليها ولأهلها.
عارفين أن في اطفال كتير زيها بيعملوا الافضل من كده، لكن خلوا عندكوا سياسة أن زي ما في ناس ربنا بيرفع عنهم الستر، في غيرهم ربنا بيصطفيهم ويميزهم.
محدش عارف البنت دي أبوها كان بيمر بأيه، وربنا كرمه في بنته ليه في الوقت ده بالتحديد!
تريندات المصايب بتاخد بالاسابيع كل يوم ننام ونقوم عليها، اشمعنا لما حصلت حاجة حلوة زعلانين من ظهورها والكلام عنها!
الفكرة لا في خمسة جنيه، ولا في تشجيع الشحاتين زي ما بتقولوا، الفكرة كلها في طفلة تربيتها جميلة ظهرت من العدم يمكن تدي دروس لأطفال كتير في عمرها أن الشهرة مبتجيش بالرقص على تيك توك ولا بالصوت العالي، وأن ربنا كرمها لنقاء سريرتها.
سيبوا البنت تفرح، والـ يتكلم عنها يتكلم ويمدح، والـ يكافئها يكافئها.
سيبوا حاجة حلوة تحصل بدون مصمصة شفايف وأف أفة بلا سبب.
زعلانين من ظهور المنشورات بتاعتها اعملوا ظهور أقل.
يكفي أن الطفلة دي هتفضل طول عمرها بتحكي وتتحاكى عن كرم ربنا ليها في وقت غير محسوب، مش هتقولهم مثلًا دانا مرة عمرو دياب لطشني قلم فأتشهرت ولا كشري التحرير طردني فأغتنيت، ولا طلعت لايف عملت نفسي ملبوسة فجالي أسد.
هايدي دلوقتي في مرحلة متتنسيش من عمرها، متعكروهاش بسخافتكوا 🖤.
ومتصدقوش الحسابات المُفبركة الـ بتطلع بأسمها تحت عنوان "هايدي شيبسيكوا" "فتاة الشيبسي" "هايدي خمسة جنيه".
كل دي سخافة من شوية متخلفين عايزين يربحوا من ورا التريند.
أما بالنسبة للـ بيناشدوا بتكريم الشحات، فمعلش إيه الإنجاز ؟
يتكرم علشان بيتسول!
المحتاج نفسه عفيفة، مش هيلف يقول "أي حاجة لله"، وافتكروا قول الله تعالى من سورة البقرة (الآية 273):
"لِلْفُقَرَاءِ الَّذِينَ أُحْصِرُوا فِي سَبِيلِ اللَّهِ لَا يَسْتَطِيعُونَ ضَرْبًا فِي الْأَرْضِ يَحْسَبُهُمُ الْجَاهِلُ أَغْنِيَاءَ مِنَ التَّعَفُّفِ تَعْرِفُهُمْ بِسِيمَاهُمْ لَا يَسْأَلُونَ النَّاسَ إِلْحَافًا ۗ وَمَا تُنفِقُوا مِنْ خَيْرٍ فَإِنَّ اللَّهَ بِهِ عَلِيمٌ"
صدق الله العظيم.
#شهيرة_عبدالحميد
