رواية زواج لدقائق معدودة الجزء الثاني 2 الفصل الثاني عشر 12 بقلم زهرة الربيع

رواية زواج لدقائق معدودة الجزء الثاني 2 الفصل الثاني عشر 12

انا هحكيلك كل حاجه من قبل ما احبل بمصطفى في يوم مطلعتلوش شمس كنت عند غنوه في محل الجزاره وكنا بنتحدت سوا ذي العاده ولقيتها زعلانه قوي و قالت انها مضطره تعدي على الزفت حسنين علشان تديله ايجار المحل لانهم كانوا ماجرين محل الجزاره منه

انا سألتها هي زعلانه ليه يعني قالتلي انها مبتحبش تروح هناك لان اللي اسمه حسن ولده الله يجحمه مطرح ما راح بيفضل يعاكسها ويقل ادبه عليها ويقول لها هتجوزك وكلام من ده وهيه مطيقاش تروح بس مضطره لان حميد كان مسافر يجيب بهايم من سوهاج

الكل كان بيسمعوها بانتباه وهيه نزلت دموعها بحسره وقالت ....صعبت عليا وقلتلها انا اللي هودي له الفلوس واخدتها منها ورحتلهم البيت و يا ريتني ما روحت

غنوه بقت تطبطب عليها وهي بقت بتبكي بحرقه وهنا نوح غمض عنيه بغضب وشبه فهم الحوار كله اتنهد وقال.... اهدي يا جنه وكملي... اللي راح راح واحنا معاكي دلوك كملي ومتخافيش من حاجه واصل

جنه كملت ببكى وقالت ....اول ما خبطت فتح لي هو...قصدي الزفت حسن واتفاجئ بيا وقالي ايه جابك انا كنت مستني غنوه ...ماجاتش هيه ليه

قولتلو غنوه مفضياش و بعتالك الفلوس ديت

بصلي بصه عمري ما هنساها بس فهمت معناها متاخر و قال لي فلوس ايه اللي اخدها منك انا ما ليش صالح المحل بتاع ابوي هو بيحاسبني على كل قرش ادخلي اديهاله بنفسك هو في الصاله جوه

وانا كيف الهبله دخلت وبقيت انادي على ابوه بس ما كانش في حد في البيت واتصدمت بيه قفل الباب ودخل

جنه مقدرتش تكمل اكتر وبقت تبكي جامد و الكل كان متأثر جدا بكلامها وشكلها اللي باين عليه الصدق جدا

نوح اتنهد بحزن وقال .....ام جمال ...اعملي كوبايه عصير وهاتيها بسرعه

وبص لجنه وقال.... على مهلك بالراحه كل حاجه ليها حل

جنه حاولت تكمل وقالت وسط شهقاتها.... قولتلو كتير يسيبني اترجيتو وبكيت كتير بس قالي بقى الست غنوه خايفه ما تاجي وبعتاكي انتي مش مهم تادي الغرض بردك

خوفت قوي وقولتلو هصرخ والم عليه البلد بس ضربني و محسيتش بحاجه بعدها

جنه كانت منهاره وبتتكلم بالعافيه وحميد قال بذهول وصدمه وغضب...اكيف..كيف ده ..ليه محدش قالي ليه سكتو...انا..انا اولى بدمو ليه محدش اتكلم منكم

بقلم ...زهرة الربيع

غنوه انتفضت من غضبو وقالت..اهدى يا حميد امانه عليك البت مش ناقصه

نوح قال بهدوء....حميد صلي على النبي كده واقعد..ده كلام عدى عليه سنين خلينا نحل الموضوع علشان نردلهم اعتبارهم اقعد ولا لو مش قادر تسمع خليك بره

حميد قعد وهو هيتجنن ودمه فار من اللي سمعه

ونوح بص لجنه وقال..اطمني وكملي ومتخافيش من حاجه

جنه كملت بدموع وقالت.....صحيت لقيته عمل كل اللي عايزه كل حاجه راحت وقاعد بيشرب وقال لي غوري من هنا ولو جبتي سيره لاي مخلوق وبذات بت عمك..انا هفضحك في كل البلد وهاقول انك جيتي لي داري وانتي عارفه ان مفيش حد فيه غيري

مرديتش عليه مقدرتش اتكلم كنت مرعوبه لبست خلقاتي وجريت وصلت بيتنا بالعافيه و امي لما شافتني قالتلي مين عمل فيكي كده وبقت تبكي وتلطم ...قلت لها كل حاجه بس كانت هتعمل ايه انا ابويا ميت ومليش اخوات صبيان احنا اربع بنات خافت على سمعتي و على سمعت اخواتي قالت الناس هتقول بعد ما ابوهم مات عيارهم فلت كتمت على الموضوع و قالت لي اوعي تجيبي سيره لحد متتكلميش واصل اوعى حد يعرف وانا كنت مكملتش ١٨ سنه ومرعوبه قوي سمعت كلامها وسكت

هنا نبيل وقف وقال بذهول .....انتي بتقولي ايه ...مين اللي قالت لك كده ...مامتك ....ازاي...ازاي ما راحتش بيكي على القسم وعملت له محضر الحيوان السافل ده

الكل بصولو بدهشه ونوح قال بخنقه ....انت يا حبيبي عايز توديها القسم وخلاص ....حاضر من عنيا هخليك تزورها قبل ما تمشي اقعد مكانك وبقك ميجيبش هوا ...بدل ما تطلع من المندره كلها وتروح تونس حبايبك في الاسطبل

نبيل لسه هيتكلم شروق قالت بسرعه ....نبيل مش وقته خالص..... اقعد دلوك خلينا نفهم

نبيل اتنهد بخنقه وقعد ..ونوح قال .... كملي يا جنه

جنه قالت بخوف....انا بعدها فضلت محبوسه في اوضتي ومرضيتش اجيب سيره لاي حد ولا حتى غنوه.... لحد حد ماحصل اللي انا وامي معملناش حسابه وظهرت عليا اعراض الحبل وامي عرفت على طول وبقيت تبكي وهي مش عارفه تعمل ايه اخدتني عند حكيمه في نجع تاني عشان متعرفناش واكدتلنا اني حبله ورجعنا من هناك على الورشه اللي كان شغال فيها حسن

وبقت تبكي اكتر وقالت..... امي راحت له وباست على يده ورجله انه يستر عرضنا ويتجوزني لان محدش هيصدقني ويقول انه كان غصب عني... بس هو رمالها شويه فلوس وقالها ده اخر بتك معايا و كثير قوي عليها كمان

ولما بقيت تتحايل عليه اكتر زقها بره المكتب ورمانا انا وهيه وقفل الباب

امي ساعيتها بصتلي بقلة حيله وطبت من طولها هناك وانا مبقيتش عارفه اعمل ايه بس ربنا كبير وموجود كان صادق هناك بيتفق على شغل مع حسن وشافه وهو بيزعقلنا وبيطلعنا بره مكتبه..وقتها الراجل كتر خيره ساعدني و نادي على رجالتو شالو امي واخدنا على المستشفى كان راجل كبير قد ابوي قعد يحاول يهديني ويسكتني وقالي فيه ايه مع حسن لو ليكم عندو حق اساعدكم ... انا وقتها ما كنتش عارفه بقول ايه ولا لاقيه اي مخرج حكيتلو اللي حصل كلو

الله يرحمك يا صادق ويجعله في ميزان حسناتك قالي انتي كيف بتي وهستر عرضك ما تخافيش انتي وامك مسؤولين مني

نوح قال...يعني كيف ما فكرت ..صادق كان عارف

جنه قالت بسرعه...عارف كل حاجه هما فاكرين اني ضحكت عليه بس انا استحاله اورطه معايا كده ...هو كان راجل امير مشيلنيش اي هم بس شرط عليا شرط ان محدش يعرف بالموضوع ده وان ولدي هيبقى ولده

مكانش قدامي حل تاني كان نجده لينا من السماء رغم سنه واتجوزتو وغنوه بعدها بقيت تحاول كتير تعرف انا ليه وافقت على جوازه زي دي وانا كنت صغيره قوي... بس انا ما اتكلمتش ولا كنت ناويه اتكلم ولا اجيب لها سيره ولا تعرف ابدا وقضيت احلى ايام عمري مع صادق وخلفت مصطفى ويشهد ربنا عمره ما فرقه عن عياله و كتبوا على اسمه واتقى ربنا فيه وفيا بس بردك ما كانش مقسوم ليه افرح واصل

اتفاجأت ان الوسخ االي اسمو حسن فضل ورى غنوه لحد ما وافقت على جوازها منيه

لما عرفت انه خطبها كنت هتجن مكنتش عايزاها توقع وقعه زي دي مع الشيطان ده....واتحايلت على صادق اني احكيلها بس قال لي انا راجل معايا ولاد كبار ومش عايز حد يطولهم بالكلام ويقول ان ابوهم اتجوز واحده وهيه حبله من راجل غيره وقال لي انت وعدتيني ولانه كان تعبان وقتها بردك سكت... سكت زي ما دايما بسكت

لحد ما جيه اليوم المشؤم يوم فرحهم

نوح قال بانتباه...حصل ايه بالظبط يومها

جنه قالت بدموع....انا..انا قعدت ويا حالي ومقدرتش قولت لو هيطلقني مش هخلي غنوه يحصل لها كده وطلبت منه تاني اني اروحلها بس حبسني جوه الاوضه ومرضيش يطلعني وقتها نطيت من الشباك

وروحت الفرح وجريت على اوضة غنوه وقبل ما اقول لها اي حاجه سالتها كتبتو الكتاب ولا لسه.... كنت عايزه اعرف هتكلم ولا لا..... بس هيه طول عمرها ذكيه استغربت جيتي لاني قولتلها جوزي مبيطلعنيش وكمان استغربت سؤالي ولهفتي حبت تعرف انا عايزه اقول ايه فقالتلي لسه... لسه مكتبناش الكتاب..... انا فرحت وقتها اني لحقتها وحكيت لها كل حاجه

وبقت تحاول تسيطر على دموعها وقالت...بس..بس هما اصلا كانوا كتبو الكتاب و شويه وهيروحوا على بيتهم...ولان غنوه بطبيعتها عصبيه قوي اول ما عرفت كانت عايزه تروح تخربها في نص الفرح بس انا اتحايلت عليها عشان ولدي قلت لها انا ميهمنيش اني هتطلق بس همني مصطفى مش عايزه الناس تفضل تعايره بيا طول عمره ويتقال عليه ود حرام..... بس انا مليمهاش على اللي حصل محدش مكانها خيتي ما حدش عاش اللي عاشتو وانا كملتها عليها يوم فرحها قولتلها حاجات تخليها متبصش في وشه مهما حصل ....وفعلا معدتش الليله على خير وعرفت انها قتلتو....وحتى صادق بعديها بايام مات لانو كان عيان سابني لوحدي ..بس الحمد لله كان راضي عني ومزعلش من اللي عملتو

من يومها غنوه وعدتني تسكت ومتقولش قتلتو ليه لاجل ولدي يعيش مكرم والناس متجيبش سيرته وهيه عملت اللي عليها وسكتت رغم انها كانت هتموت بس خلاص مفيش فايده كل حاجه راحت

نوح اتصدم بكلامها ووقف بغضب شديد وقال بزعيق..... كل ده حصل ومفكرتيش تاجي لي ولا مره ...مجيتيش ليه حكتيلي من الاول كنت خليته يتجوزك ورجله فوق رقبة اللي خلفوه

جنه قالت ببكى وانهيار ..محدش فيكم يقولي مقولتيش ليه ومعملتيش ليه....انا كنت معرفاش اتصرف ..كنت صغيره ومرعوبه ومقهوره ولوحدي ...امي قالتلي اسكتي لان الناس مبتسكتش والكلام هيتنطور وانتي عندك اخوات بنات ...انا اتقتلت قبل منو محدش يلومني على اللي حصل

نوح اتنهد بحزن عليها وهز راسو بيأس وقال...عاذرك يا جنه...محدش له حق يلومك ..انا بس محروق علشانك ياريت اقدر ارجع الوقت واخدلك حقك واقف معاكي

حليمه قالت بسخريه....انتو صدقتو الفيلم ده..وايه ضمنلكم كلامها صح..مش يمكن كانت وياه ب..

بس سند قال بسرعه ...اما....ولا كلمه في الموضوع ده ولا كلمه

حليمه قالت بسرعه..انا قصدي ان...

بس قاطعها تاني وقال بحزم...ياما قولتلك ولا كلمه

حليمه اتنرفزت منو وسابت المندره وخرجت بغضب

وجنه اتنهدت بحزن وقالت .... حقك عليا يا غنوه ..انا السبب في كل اللي حصل لك

غنوه حضنتها وبقت تبكي جامد وقالت .....انت اللي حقك علي ....حقك عليا يا قلبي انا اللي بعتك هناك للكلب ده انا اللي ضيعت عمرك حقك على راسي

سند اتاثر جدا بدموعهم وقال..... خلاص اهدوا وصلوا على النبي كل حاجه ليها حل

نوح اتنهد وقال ....معاه حق كل حاجه لها حل احنا معاكم متقلقوش ...جيه دورك يا غنوه ايه اللي حصل بعد ما هي قالتلك او بمعنى اصح بعد ما روحتوا بيتكم

غنوه مسحت دموعها وقالت بحزن..... لما روحنا مكنتش طايقاه مكنتش قادره اسمع صوته انا اصلا مخنوقه منيه من قبل ما اعرف الموضوع ده.. اتجوزتو علشان اخوي يسكت لانه طلبني بدل المره 1000 واخوي كان بيقول لي ايه سبب رفضك ومكنتش الاقي سبب ..كانت عندي احلام بعيده بعد السما من الارض ومكانش ينفع اتكلم ... فقلت افوق من اوهامي واتجوزو مش يمكن لما اتجوز واعيش معاه اغير فكرتي عنه...بس بعد ما عرفت اللي حصل مقدرتش اتكلم معاه ولا كلمه وهو...احم...هو يعني حاول يقرب مني زي اي عريس بس مقدرتش جنه كانت اختي مش بس بت عمي و انا ..انا اللي وديتها هناك بنفسي وهو كان مستنيني انا ...هيه فدتني وضاعت بسببي واتجوزت واحد قد ابوها كل كلامها جيه في راسي... قلتله خليك بعيد عني يا حسن بس ما سمعش الكلام

سند قال بسرعه...وعشان كده قتلتيه

غنوه هزت راسها بالرفض بحزن وقالت...لاه....هو ميأسش ولا سكت فضل يحاول لحد ما خرجت عن شعوري و انفجرت فيه وحكيتله كل اللي اعرفه وقولتلو شهر بالكثير وهتطلق منه مش عشان سمعتي بس عشان جوز جنه ميعرفش انها حكت ويطلقها بس السافل الواطي ولا همه كلامي قالي انا ما صدقت اتجوزتك انا مكنتش عايز غيرك ولو مكانتش بت عمك جات وانتي اللي جيتي كنت هعمل كده علشان الوي دراعك واتجوزك

وطلع موبايله وراني عليه صور وفيديوهات واتصدمت لما لقيته مصور جنه وهي معاه صور مقرفه وما كانش مبين انه غصب عنها لانها كانت مغمى عليها كانت مبينه نايمه في حضنو

قالي هملا بيها البلد هقولهم اني كنت مرافقها ..وابقي قوليلهم بقى انه كان غصب عنها وخليهم يصدقوكي..و مش بس هي هتتفضح انتم كمان واخوكي كلهم هتتفضحو وهتشيلوا عارها عمركم كله ..وانا راجل ومحدش هيقول لي حاجه اعقلي واسمعي الكلام لو في اي يوم فكرتي تطلقي مش هخلي حد الا لما يشوف الفيديو ده

بقلم....زهرة الربيع

انا اتصدمت وبقيت اقول له هاته وحاولت اخد التليفون منيه بس كان بيبعد يده وبقى يقرب مني غصب وانا كنت مخنوقه محسيتش بنفسي غير بسحب سكين كانت في طبق الفاكهه جاري وضربته بيها عشان اخذ التلفون ...كل حاجه حصلت في دقايق وبقى جثه قدامي وانا معارفاش اعمل ايه..بس من وقتها عاهدت نفسي ان اللي عدى جنه ضحت فيه و اللي جاي انا هضحي فيه عشان تعيش هي وولدها ومحدش يتعرضلهم

الكل كان مصدوم من اللي اتقال ونبيل كان متاثر جدا جدا وقال....انا.... انا مش عارف انتوا ازاي بتفكروا بالطريقه دي اتنين بنات يتظلموا بالشكل ده لمجرد انهم خايفين يتكلموا ايه المجتمع الذكوري ده

نوح نفخ بزهق وقال.....وانبي تنقطنا بسكاتك الحكايه محملاش وبص لجنه وغنوه وقال.... انا عايزكم تفهمو ان الموضوع ده لو اترفع للمحكمه كانت غنوه هتتدان لان حتى بعد اللي حكيتوه ده مفيش سبب يخليها تقتله

غنوه قالت بزهول .... كل ده ومفيش سبب بقول لك ا تعدي على بت عمي واتجوزني من غير ما اعرف حاجه ومعاه فيديوهات ليها عايز يفضحها بيها

نوح قال ...افهمي يا غنوه انا دارس قانون وعلشان كده بقولك كل ده في المحكمه ميسواش حاجه....الللي قولتيه ده كنتي تقدري ترفعي بيه قضيه مش تقتليه...وانا مش بلومك ولو كنت مكانك كنت بردك قتلتو بس لازمن افهمك موقفك ..في القانون والمحاكم الوحيده اللي كان من حقها تقتله جنه ومش يوم فرحك كمان لا لحظه الاعتداء ..ده كان هيبقى دفاع عن الشرف وقتها ممكن تاخد حكم مخفف او تطلع براءه لكن بعد اللي حصل ده قدام النيابه انتي هتداني على قضيه قتله

بس الحمد لله حسنين معايزش يحلها في النيابه ودوس المحاضر ودفنه من غير ما يتهمك بحاجه...وعشان كده انا هتكلم وياه سيبوا حل الموضوع ده عليا ..انا شارط عليه من الاول اذا ولده غلطان في حاجه ميجيش جنبك

جنه قالت بدموع ....طب وولدي والقضيه اللي رافعينها علي

نوح وقف وقال بسخريه.... مفيش قضايا اترفعت ولا حاجه هما اتجنوا عشان يرفعوا قضيه يفضحوا ابوهم بيها هم هيحاولوا يهددوا بس علشان ياخدوا الورث...ساعيتها انتي تتنازلي عنيه وخلاص

بصولو بزهول وجنه قالت..بس انت قولت انهم رفعو عليا قضيه

نوح ضحك وشد عبايته وقال...تعيشي وتاخدي غيرها ..انا قولت كده لانكم بالعين سد الحنك ومعايزينش تتكلمو انما ولا فيه محاكم ولا قضايا

غنوه وجنه اتسعت عينيهم وبصوا لبعض بصدمه ونوح ضحك على شكلهم وقال .....ما تتصدموش كده احنا لسه في الاول ..لسه هصدمكم كتيير مش معنى اني ساكت لكم وسايب كل اللي معاه لعبه يلعبها من بعيد لبعيد ابقى مقاديرش احل ولا اربط.... انا سايبكم بمزاجي انما اي مشكله هتلفوا تلفوا وحلها هيبقى عندي

وبص لشروق وقال ....واي حاجه من حقنا وبتاعتنا هنرجعها ....طالت والله قصرت هنرجعها

قال كده ومشي ونبيل وقف بغضب وسحب شروق من ايدها وطلع بيها على اوضة الضيوف وقال بغضب ....يقصد ايه بالكلام ده

شروق قالت بتوتر..مفهماش ..شكلو بيكلم جنه وغنوه

نبيل قال بغضب...لا بقى على فكره يقصدك انتي بالجمله الاخيره دي ..قال اي حاجه بتاعتنا ومن حقنا هنرجعها....ايه هنرجعها دي بقى ان شاء الله

شروق عملت نفسها مش فاهمه قصده ايه وقالت...وانا مالي يا نبيل ما تسألو

نبيل غمض عنيه بغضب وقال بحزم.... شروق انا مش عايز نجرح بعض تمام عايز يبقى فيه بنا تفهم و انا دلوقتي جاهز اقبل منك اي حاجه واي قرار..بس بعد كده مش هقبله على كرامتي ابدا

شروق بلعت ريقها بتوتر وقالت...انا مفهماش قصدك ايه

نبيل قال بسرعه..لا فهماني يا شروق ... ابن عمك ده انا مش مرتاح لحركاته ..انتي قولتيلي اتجوزتو غصب واتطلقتو عادي ومحدش عندو مشاعر للتاني بس انا مش شايف كده ...و زي ما قولتلك اي قرار هتقوليه دلوقت هحترمه...بس بعدين لا

شروق قالت بتوتر...انت مكبر الموضوع و...

بس قاطعها وقال بحزم... من غير لف ودوران هسالك سؤال واحد عايز اجابه صريحه ليه....في نيتك ترجعي للشخص ده ممكن ترجعي له تاني ...عايز اجابه دلوقتي يا شروق ..اجابتك هتحدد مصيرنا..يا اما هيبقى بكره حفل خطوبتنا يا اما هاخد شنطتي وامشي

شروق اتصدمت بكلامه ووووووووو

#زواج_لدقائق_معدوده_الجزء_الثاني

#الثالث_عشر

#روايات_زهرة_الربيع

تفتكرو هترد تقول ايه.....وايه حكمكم على قتل غنوه لحسن هل اتسرعت ولا كان يستاهل وياترى نوح ناوي على ايه اكتبو ارائكم وتوقعاتكم ووروني اروع تفاعل ومشاركات كتير للبارت علشان نكمل 🏃‍♀️🏃‍♀️🏃‍♀️🏃‍♀️

رواية زواج لدقائق معدودة الجزء الثاني 2 الفصل الثالث عشر 13 من هنا

الرواية كاملة من هنا (رواية زواج لدقائق معدودة)