رواية ذكرياتنا في رمضان كاملة عبر روايات الخلاصة بقلم سلسبيل أحمد
رواية ذكرياتنا في رمضان الفصل الثالث 3
- ايه ده ايه ده فيه ايه ياندي!!
ردت بعياط قوي: الفانوس بتاعي ضيعته
= ضاع ازاي
- نسيته هناك ولما روحت اشوفه ملقتوش
= طب بطلي عياط هدور لك عليه
- ضاع خلاص!!
" طب تعالي معايا "
" احمد خدها على اول الشارع عند بتاع فوانيس وخلاها اختارت واحد جديد "
= الله ده جميل اوي
- متعرفيش مراد اني جبتهولك ماشي؟
= ليه؟
- اسمعي الكلام وخلاص قوليله
لاقيته فالشارع لو شافه وسألك جبتيه منين
= ولو ماما سالت او بابا
- قولي لهم لاقيته برضو انتي ذكيه ليه
ضحكت: اوكيه..اوكيه..
باك #
ليان: بلاش بقا اقولك يا فريده ندي سرحانه في مين
ندي بقمصه: ليان اسكتي!!
" نزلوا كلهم عند فاطمه وسلموا على بعض و ايمان فضلت تحضن فيهم بحب وحنية.. "
" لحد ما دخل مراد "
- تيته.. احمد بره.. عاوز يسلم عليكي
" ندي قلبها دق بقوة وحاولت تخبي.."
فاطمه: دخله يحبيبي دخله
"ليان بصت على ندي"
- السلام عليكم..
" مكنتش مصدقه اني شيفاه قدام عيني.. بعد كل السنين دي احمد رجع؟؟ "
- عليكم السلام ازيك يا حبيبي ماشاءالله!!!
الله اكبر كبرت.. لسه فكراك انت و مراد لما كنتوا بتضربوا بعض!!
"كلنا ضحكنا و احمد ابتسم بهدوء واضح.."
" مكملش دقايق.. مقعدش حتي وخرج هو و مراد.. ومبصش ناحيتي !!! حاولت احافظ على ثبات ملامحي.. مش عاوزة اي حاجه تبان.. "
" لحد ما بصتلي ليان "
- ندي.. مالك!
ابتسمت: مفيش حاجه يا ليلو..
بصيت ناحية فريده: انتي وحشتينا اوي بجد.. تعرفي ان هاجر جاية على الفطار؟
" كملوا كلام سوا والشباب كانوا قاعدين برا مع مراد في الورشة بتاعته.. "
احمد: انت كده استوليت على ورشة عم عبدالرحمن؟
" مراد سكت للحظات و ياسين اتكلم "
- عمي عبدالرحمن الله يرحمه..
أحمد اتصدم من الخبر: امتى ده!
مينا: من حوالي 7 او 8 سنين
احمد: الله يرحمه.. و عمى عز فينه؟
مراد: عمي سافر يمكن بعدكم بسنة بيشتغل بره بينزل كل إجازة مفروض ينزل في نص رمضان يعني..
مينا بص لاحمد: مالك.. حاسس ان فيه حاجات كتير اتغيرت
احمد اتنهد: حاسس ان فيه حاجات كتير فاتتني
ياسين بعتاب: ليه مرجعتوش كل الفترة دي
احمد: كان صعب نسيب الشغل هناك في الإمارات..
مراد: احكي لنا بقا..
- انا كنت دكتور.. وبابا دكتور استشاري.. مسؤول عن فريق طبي في مستشفى هناك.. احنا اتعودنا على الحياة هناك.. منزلناش غير عشان الاحداث الى حصلت..
مراد بصله: يعني لو المواضيع هديت. هتسافروا تاني
احمد: مش عارف..
مينا: المهم انك معانا دلوقتي.. واحنا بنعلق الزينه في مره مراد كان متشعلق فوق وانا ماسك السلم انا و ياسين فضلنا نحركه ونرازي فيه.. وقتها افتكرنا لما انت عملت الحركه دي و وقعته و دراعه اتجبس شهر ونص..
" ضحكوا كلهم وفضلوا يحكوا في الذكريات.. "
" وبكده كان فريق الولاد اكتمل.. برجوع احمد وسطهم بعد رجوع ياسين.. "
' اللهم صلِ وسلم وبارك على سيدنا محمد '
'﴿وَبَشِّرِ الصَّابِرِينَ﴾ البقرة'
" وعلى الضهر.. وصلت هاجر اخت ياسين من البلد.. اتحركت براحة لبيت ليان على اساس تفاجئ ليان و ندي.. بقلمي سلسبيل احمد مكانتش تعرف انهم الى مخططين يفاجئوها بـ فريده بعد لما عرفوا بمعاد وصولها من ياسين..! "
>>>>>>>>>>>>>>>>>>>>>>>>>>>>>>>>>>>>>
|| في بيت ليان ||
- انا سامعه خطواتها اهو استخبي بسرعه يا هاجر
" هاجر ضحكت واستخبت بحماس "
ندي بصت لـ ليان: كان نفسي نعمل فيها مقلب بس يلا
" الباب خبط وهما فتحوا واتفاجئوا بيها كده وكده فضلوا يحضنوا في بعض وبعد سلامات دخلت هاجر تقعد وجت فريده من وراها حطت ايديها ع عينيها "
- انا مين ؟
" هاجر سكتت بستغراب "
- مين دي يجماعه مش صوت كنزي ولا مريم
" ضحكوا وعيونهم بتلمع.. "
ندي: متتحركيش وخمني
فريده وهي حابسه دموعها: انا الى كنتي بتحدفيها علطول بالشبشب عشان كنت اكبر منك مش بتعرفي تصْربيني..
" هاجر اتصدمت تماما و قامت مره واحده بعد لما شالت ايدها لفت بصتلها بعدم تصديق "
- لاء لاء مستحيل !! لاء!!
جماعه والله العظيم لاء ده هزار ولا حقيقي
هي فعلا ؟
فريده صْربتها بخفه: مش عارفه شكلي يا جرجوره !!
هاجر بصدمه عيونها دمعت: لاء !! محدش بيقولي كده غيرك
" حضنتها بقوة وهي بتعيط "
- انا مش مصدقه حقيقي ازاي!!!.
ليان بسعاده: اكتملنا تاني يا بنات.. زي ايام زمان!
فلاش باك #
" قبل 12 سنه "
- طب لو مرجعتيش الكيكه بتاعتي يا هاجر انا هضربك
" هاجر رفعت الشبشب "
= متقدريش يا فريده
"ليان وندي ضحكوا"
فريده بشر: متنسيش اني وقعتك قبل كده
ندي: حصل
ليان: طب خلاص رجعي ليها الكيكه ونشتري غيرها
هاجر: دي كانت اخر واحده بالشوكولاته وهي عارفه اني بحبها فا اشترتها قبلي
فريده: ودفعت فلوسها!! هاتيها
هاجر حطت الفكه في ايد ندي: اتفضلي اديها تشتري غيرها
فريده بعصبيه: انا عايزه الكيكه !!!
باك #
ليان فضلت تضحك: انا فاكره يومها بعد لما صْربوا بعض فالشارع وفضلنا نسلك بينهم معرفناش الكيكه راحت فين
هاجر: ماهي وقعت يومها وصاحب نصيبها كلها اكيد
فريده: كانت دايما تيته فاطمه بتتعب معانا سواء احنا او الولاد كل دقيقة تصالح اتنين على بعض
ليان ابتسمت: ومازالت والله..
هاجر: بنات.. عاوزين نبات سوا..
فريده: ودي هنعملها ازاي!
ندي: سهله يابنتي احنا بنعملها كل فترة.. طنط نورا بتنزل هي وطنط كوثر يباتو مع تيته او العكس..
احنا بقا هنستغل سفر عمو عز ونبات عند ليلو..
ليان: ضن كده.. وهنطلع كنزي معانا.. و كمان نقول لمريم
فريده: مريم اخت مينا! وحشتني برضو عاوزة اسلم عليها
هاجر: هنتصل عليها من جروبنا صح دخليها الجروب
يا ليان..
" ومن هنا.. كان اكتمل فريق البنات.. "
" ورجعوا زي ايام زمان.. فريده العقل المدبر لأنها الكبيرة.. وبعدها علطول هاجر.. وعشان كده كانو ناقر ونقير دايما.. البيدج بتاعتي على فيسبوك سلسبيل احمد وبعدهم ليان الى بتحب تدير كل حاجه.. واصغر حد ندي عايشه في ميه المخلل.."
>>>>>>>>>>>>>>>>>>>>>>>>>>>>>>>>>>>
' سبحان الله وبحمده سبحان الله العظيم '
' يَا أَيُّهَا الَّذِينَ آمَنُوا اسْتَعِينُوا بِالصَّبْرِ وَالصَّلَاةِ ۚ إِنَ اللَّهَ مَعَ الصَّابِرِينَ﴾ البقرة '
" بعد ساعه واحده كانت كل البنات والستات في بيت فاطمه .. كوثر و إيمان مامة هاجر و نورا وشهيرة مامة فريده و ماري مامة مينا..
وكنزي و فريده وليان وندي و مريم وهاجر.. "
" وطبعا ده كان عشان اول يوم فاطمه بتعمل العزومه دي وتجمعهم.. وكل واحد كان مسؤل عن حاجه بيعملها.. "
" اما الرجالة فا كانوا على السطح بيجهزوا القاعده "
" مينا و مراد وياسين واحمد و كريم "
" قبل الفطار بدقايق الكل كان بينجز بسرعه! عشان عاوزين يلحقوا و الرجالة بتنزل تطلع الاكل.. "
" و وسط كل ده خرجت ندي بحله
واتفاجئت بأحمد في وشها.. "
" من كتر التوتر كانت هتقع منها ولكن احمد لحقها وقتها فضل باصصلها بتركيز.. وكأنه بيحفظ ملامحها الي كانت واحشاه.. و بيتأكد ان دي ندي فعلا.. وانها كبرت.. قطعت نظراتهم لبعض لما سابته ودخلت وأحمد طلع بهدوء على فوق.. "
" ليان بصتلها وكانت متابعه المواقف.. لكنها سكتت "
" مراد نزل قبل الاذان بحاجه بسيطه "
- ليان.. فين علبة عم جابر حد خدها
ليان: لا لحظه هجبها
" دخلت اجيب العلبة بسرعه تيته وصتني ميت مره مننساش نخرجها له ونسيت "
- اتفضل اهي.. طبعا هتديهاله انت
عشان تسلم من صْربه عكازه
مراد ابتسم بثقة: عمره ما صْربني اصلا بيحبني..
= اممم فعلا اصلك تتحب اوي ماشاءالله
" خرج وانا ضحكت..
وللأسف هو بيحبه اوي فعلا ومراد يتحب..! "
" الاذان اذن والرجالة كانت بتفطر فوق كلهم
احمد كلم ابراهيم.. و يوسف طلع مع مينا و عادل طلع مع ياسين اما الستات والبنات فطروا تحت عند فاطمه.. "
فريده: هو ازاي الأكل حلو كده تسلم ايدكم!
كوثر: ياروحي بالهنا والشفا
فاطمه: الأكل حلو بيكم وبلمتنا سوا
نورا: دي حقيقة حمدلله على سلامتكم وبأذن الله ربنا يديم علينا اللمه دي
ماري: ربنا يديم المحبة ويعود عليكم الايام بخير
مريم بصت ناحية فريده: آمين.. ونفضل سوا علطول!
" اما عند الرجالة القاعده كانت مختلفة شوية.. محدش فيهم كان مبطل نكش فى التاني بقلمي Slsbell Ahmed"
ياسين: كل كويس يا مينا يا حبيبي انت هفتان
مراد: الصيام مبهدله انا عارف
مينا: ريح ياخفيف انت وهو انا لسه بقول بسم الله
كريم بص ليوسف: هي مش كانت بسم الصليب باين؟
مينا رد وهو بياكل: هيموت ويعمل فتنه طائفية
" كلهم ضحكوا و بعدين ياسين اتكلم "
- مش كنا نشيل عمك جابر نطلعه معانا
مينا: عشان يديك بالعكاز ع عينك
مراد: ميقدرش يطلع بعدين بيحب يفطر مع جاره
ياسين: فاتك الى حصل يوم تعليق الزينه يا احمد..
كريم: مينا كان هيخليه شوية ويطلب لنا البوليس
ياسين: هموت مش قادر
احمد: مش متخيل اني لاقيته ربنا يديه الصحه.. ولسه عصبي زي ماهو فاكر ياض لما قطع لنا الكوره؟
ياسين ضحك جامد: أقسم بالله يومها كنت هعملها على نفسي
"ضحكوا كلهم جامد بما فيهم الرجالة"
عادل: انتوا طول عمركم جايبين لينا المصايب
يوسف: انت بتقول فيها انا مش ناسي العربية الى كسروا فوانيسها وهما بيلعبوا وقعدنا نلم من بعض عشان نراضي صاحبها
مينا: والله انا لسه عند كلمتي كان مكسور من الاول
عادل: مش هتفرق انتوا جبتوا اجله خالص!
مراد: بس كانت ايام حلوة..
>>>>>>>>>>>>>>>>>>>>>>>>>>>>>>>>>>>
' لا إله إلا انت سبحانك اني كنت من الظالمين '
' وَاصْبِرْ فَإِنَّ اللَّهَ لَا يُضِيعُ أَجْرَ الْمُحْسِنِينَ﴾ [هود: ] '
|| بعد الفطار بتلت ساعات ||
" كانوا البنات كلهم مستخبين في اوضة بعد لما فاطمه سربت لهم حلويات.. "
ليان: نحبس بشاي بقا؟
هاجر: لا انا زهقت عاوزين نخرج!
فريده: اه.. انا مصر وحشتني اوي!
كنزي: خدوني معاكم
ليان: خلصتي واجابتك؟
ندي: دي وراها حاجات قد كده
ليان: خلاص نقسم البلد نصين!
هاجر: ايه؟
ليان: انهارده نكمل سهرتنا ع السطح و بكره نخطط ونفضي نفسنا نخرج بعد الفطار..
فريده: موافقة
ندي: طب اطلعي شوفي نزلوا كلهم ولا لسه
ليان: اوكيه
" طلعت السطح.. لقيت الشباب لسه فوق فا شاورت لـ مراد "
- خير عايزه ايه
= كفاية عليكم كده زهقنا وعاوزين نطلع شوية
- لاء
ابتسمت بخبث: خلاص نخرج بقا بره نتفسح مع بعض
مراد رفع حاجبه: بأذن مين ان شاء الله ؟
- تيته.. ماما.. مرات عمي كده يعني
= طب ريحي يا ليان يلا
- خلاص انزلوا بقالكم تلت ساعات هو ايه الدخان ده بتشربوا سجاير يا مراد؟ دي اخرتها؟
مراد: دي نار عشان الجو برد يا خفيفه
= كويس خليها والعه عشان ندفي لما نطلع..
- خدي هنا
= نعم
- خليهم يتقلوا و تخلوا بالكم عشان
قاطعته: عشان السطح سوره صغيره وعشان اسلاك الدش و عشان الخشب الى حضرتك راكنه ممكن يعور حد ها حاجه تاني يا استاذ مراد..
" مراد سكت وهي نزلت و ضحكت لما استفزته.."
- ماشي يا ليان.. واحد واحد.
>>>>>>>>>>>>>>>>>>>>>>>>>>>>>>>>>>>
' الله اكبر الحمدلله لا إله إلا الله '
' {إِنَّمَا يُوَفَّى الصَّابِرُونَ أَجْرَهُمْ بِغَيْرِ حِسَابٍ} [الزمر]'
" قضينا الليل كله سوا واتسحرنا كمان عند تيته انا و البنات.. بس اتفقنا نبات مع بعض تاني يوم بعد الخروجه.. "
" كنت حاسه ان الدنيا هاديه و لونها وردي.. وصاحية تاني يوم كلي نشاط.. "
" لكني اتفاجئت بـ موبايلي عمال بيرن ولما بصيت لقيتها كنزي.. "
" رنيت عليها تاني بسرعه وانا قلقانه.. "
- الو.. انتي كويسة
= ليان ممكن تجيلي
- انتي صوتك معيط ؟؟؟ فيه ايه ؟؟
= مفيش حاجه عشان خاطري ري تعالي ومتعرفيش حد انا عند المدرسة
- طب خليكي هناك متتحركيش خليكي جوه
" قومت بسرعه لبست ولما ماما سألتني قولت لها اني محتاجه اروح لفريده! "
" مكنتش عارفه اتلم على أعصابي من قلقي عليها المدرسة مكانتش بعيده ركبت و روحت لها واول لما وصلت لقتها بعد لما دخلت من البوابة "
" جريت عليها وانا بطمن انها بخير "
- مالك حصل ايه!!
ردت بخوف: أنا.. ا أ.
= اهدي متخافيش انا معاكي اهو
" فضلت حاولي خمس دقايق اطمن فيها عشان ترضي تتكلم لحد ما فتحت موبايلها و بدأت توريني شات ليها مع شخص.. وفي اخره صوره ليها "
" مكنتش فاهمه حاجه وبصتلها بعدم استيعاب "
- ده ايه !! انطقي
= واحد.. بس والله انا مش ده دي مش صورتي والله
" مسحت على وشي وانا حاسه ضغطي عالي ومش فاهمه "
- انا مش فاهمه حاجه بطلي عياط وفهميني سامعه؟؟ براحه كده ده مين؟؟ وايه كل الشات والكلام الى بينكم ده
مسحت دموعها وهي بتتنفس بسرعه: واحد كان مساعد مستر العربي الى باخد معاه.. و.. و هو الى كلمني.. وقالي ممكن نبقي صحاب.. وانا..
عيطت بقوة: انا كنت بحبه..
" كنت ساكته تماما ومش مستوعبه الكلام الى بسمعه من كنزي.. ام 15 سنه... الى كنت بروح اجبها من الحضانه واغير لها وهي طفله!! مش مستوعبه الى هي بتقوله "
- بعدين هو قالي نتقابل لوحدنا وانا خوفت قولت له لا راح بعت لي الصورة دي وقالي هيعمل بيها اي حاجه او يبعتها لأهلي لو مسمعتش كلامه وانا والله مبعتش اي صور انا معرفش
قاطعتها: طب اهدي.. اهدي وانا هتصرف
اتكلمت بخوف فظيع: ليان عشان خاطري اوعي تعرفي مراد ونبي
- طب اهدي يا كنزي
" فضلت تعيط جامد برعب اني اعرفه.. او حتي اعرف ندي !! مكنتش قادره اتصرف وحاسه اني مشلولة خصوصا بعد لما قالت لي ان الحيـ ـوان ده قالها تقابله بعد الدرس الى عندها كمان شوية!!! "
" اخدتها ورجعنا البيت وانا بدعي مراد ميشوفناش.. طلعتها وبعدين فضلت ادور على ياسين.. و ارن على هاجر عشان اسألها عليه ولكن هي مردتش واول حد لاقيته في وشي كان مينا.. "
" مكنتش عارفه انيل ايه و روحت عنده "
- مينا.. انا محتاجه مساعدتك في حاجه.. ضروري!
بصلها بستغراب: خير فيه ايه؟ هو مراد فين؟
= مراد أكيد في الورشة.. انا بس مش عاوزاة يعرف.. الموضوع ممكن نتحرك دلوقتي؟
مينا بعدم فهم: نتحرك؟ انا وانتي
- اه عند سنتر **** ممكن بس نروح ضروري ؟ فيه مشكلة هناك.. مش هعرف اقول لحد غيرك
= تمام.. متقلقيش انا همشي وخليكي ورايا
" اتحرك وانا كنت وراه فعلا وأول لما وصلت شوفت الواد البجح واقف !!! "
" واقف لها على باب السنتر ! "
" حكيت لمينا وفهمته كل حاجه "
- مينا انا اسفه بجد بس مراد لو عرف كان هيعمل مصيبه.. انت اكيد فاهم! وكنزي كمان مرعوبة.. انا والله معرفش بعمل ايه بس انت الى لاقيته قدامي حاولت اكلم ياسين بس
مينا بهدوء: محصلش حاجه يا ليان انا فاهم.. انتوا اخواتي خليني اتصرف معاه وانتي روحي دلوقتي
= طب هتعمل ايه؟؟
- متشغليش بالك هحل الموضوع
= طب.. بس مينفعش مراد يعرف
مينا بتردد: خلينا نتكلم بعدين طيب وانا رايح له
" رجعت وانا حاسه اني مش قادره امشي حرفيا رجلي مش شيلاني وحاسه اني اتصرفت غلط.. مبقتش عارفه اقول لمين لكني فكرت اقول لماما وهي تحل الموضوع لو الامور باظت.. "
" معرفتش اطلع البيت من كتر القلق وفضلت مستنيا حوالي ساعه لحد ما شوفته راجع "
" كنت واقفة عند البيت "
- حصل ايه ؟
= متقلقيش مش هيقرب ناحيتها تاني.. بس الافضل تعرفوا مراد.. انا مش هعرف اخبي عليه
" قال جملته ومشي وانا اتفاجئت
بـ مراد جاي عليا "
- انتي ايه الى كان موقفك مع مينا ؟؟
= ءءء ايه؟ أنا ؟؟
- اه انتي ! واقفة معاه ليه ؟؟
= موقفتش معاه
بنرفزه: هو انتي بتكلمي واحد اعمي يعني ؟؟؟
ما تنجزي كان هنا ليه ؟؟
بصتله بدهشه: فيه ايه يا مراد ما توطي صوتك!!!
يتبع..
" البارت انتهي لحد هنا يا صحابي.. واتمني تكونوا لاحظتم الآيات الى بين كل فقرة والتانيه.. الى بتتكلم عن الصبر.. أجر الصبر عظيم.. و جزاء الصبر اعظم.. سواء الصبر على المرض.. او تأخر الرزق.. او اي حاجه... ربنا بيجازي الشخص الصبور .. الى وسط البلاء بيحمد ربنا و يشكره.. خليكم عارفين ده.. وبشر الصابرين ♡"
>>>>>>>>>>>>>>>>>>>>>>>>>>>>>>>>>>>>
" واستنوا الجي دمار..🙈🙈🙈🙈🙈"
#ذكرياتنا_في_رمضان 3🌙✨️💗
